རྒྱ་གར་ལྷོ་ཕྱོགས་སུ་དུས་དྲན་སྲུང་བརྩི།

ཟླ་འདིའི་ཚེས་༡༠ ཉིན་འཛམ་གླིང་ས་ཕྱོགས་གང་སར་༧གོང་ས་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་དེ་མི་ལོ་ཧྲིལ་བོ་༢༤  འཁོར་བའི་གལ་ཆེའི་དུས་ཆེན་གྱི་མཛད་སྒོ་ཞིག་བོད་མི་གནས་སྡོད་བྱེད་ཡུལ་འཛམ་གླིང་ས་ཕྱོགས་གང་སར་ཡོང་ཁྱབ་ཀྱིས་སྲུང་རྩི་བྱེད་ཀྱི་ཡོད་པ་བཞིན།

ཉིན་དེར་རྒྱ་གར་ལྷོ་ཕྱོགས་མོན་གྷོ་ས་གནས་བོད་མི་གཞིས་སྒར་དུ་ཡང་༧གོང་ས་མཆོག་གི་ནོ་སྦེལ་ཞི་བདེའི་གཟེངས་རྟགས་འབུལ་བཞེས་ཀྱི་དུས་ཆེན་ལ་དགའ་བསུ་རྟེན་འབྲེལ་ཞུ་བའི་མཛད་སྒོ་དང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་གཉིས་སྲུང་བརྩིའི་མཛད་སྒོ་ཞིག་འཚོགས་ཡོད་པ་རེད།

དེ་ཡང་ཉིན་དེའི་ཞོགས་པ་ཆུ་ཚོད་༧། ༣༠ ཕྱེད་ཐོག་ནོར་བུ་རི་རྩེར་མོན་གྷོ་ས་གནས་སེར་སྐྱ་མི་མང་ཚང་འཛོམ་ཐོག་བསངས་གསོལ་དང་རླུང་རྟ་བསྒྲེང་བཙུགས་སོགས་ཀྱི་ལས་རིམ་གྲུབ་རྗེས། མོན་གྷོ་ས་གནས་མི་མང་ཚོགས་ཁང་དུ་ཉིན་འདིའི་མཛད་སྒོ་དངོས་སུ་དབུ་འཛུགས་གནང་ཡོད་པ་དང་།  མཛད་སྒོའི་ཐོག་སྐུ་མགྲོན་གཙོ་བོ་སྐྱབས་རྗེ་ཟུང་མཆོག་སྤྲུལ་རིན་པོ་ཆེ་མཆོག་གིས་གཙོས་མོན་གྷོ་ས་གནས་ཀྱི་གྲྭ་ཚང་ཁག་གི་མཁན་ལས་ཟུར་རྣམ་པ་དང་དགེ་བསྐོས་རྣམ་པ།  དེ་བཞིན་ས་འཐུས་ཚོགས་གཙོ་གུ་རུ་རྒྱལ་མཚན་དང་ས་གནས་འགོ་འཛིན་ཕུན་ཚོགས་ཚེ་རིང་གཉིས་ཀྱི་གཙོས་གཞུང་དང་གཞུང་འབྲེལ་མ་ཡིན་པའི་ལས་ཀྱི་སྣེ་མོ་བ་ཡོངས་བཅས་སེར་སྐྱ་མི་མང་ཕོན་ཆེན་མཉམ་འཛོམས་གནང་ཡོད་པ་དང་།

ཐོག་མར་དུས་འཁོར་ཕོ་བྲང་ནས་༧གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེ་དུང་རྒྱ་སྤོས་སྣེའི་སྔོན་བསུས་ཏེ་མཛད་སྒའི་བཞུགས་ཁྲིར་གདན་འདྲེན་ཞུས་པ་དང་འབྲེལ་སྐུ་མགྲོན་རྣམས་ཀྱིས་སྐུ་པར་རིན་པོ་ཆེར་མཎྚ་རྟེན་གསུམ་འདེགས་འབུལ་གྲུབ་རྗེས། ས་འཐུས་ཚོགས་གཙོ་གུ་རུ་རྒྱལ་མཚན་དང་ས་གནས་འགོ་འཛིན་ཕུན་ཚོགས་ཚེ་རིང་རྣམས་གཉིས་ཀྱིས་རང་གཞུང་བཀའ་སྤྱི་གཉིས་ཀྱི་གསུང་འཕྲིན་རིམ་པས་སྒྲོགས་སྦྱང་དང་དེ་འབྲེལ་གསུང་བཤད་གྲུབ་མཚམས་སུ་སྐུ་མགྲོན་གཙོ་བོ་སྐྱབས་རྗེ་ཟུང་མཆོག་སྤྲུལ་རིན་པོ་ཆེ་མཆོག་གིས་༧གོང་ས་མཆོག་གི་སྐུའི་འཁྲུང་སྐར་དང་འབྲེལ་བའི་གསུང་བཤད་གནང་དོན།   ༧གོང་ས་སྐྱབས་མགོན་ཆེན་པོ་མཆོག་གིས་སྟོན་པ་ཐུགས་རྗེ་ཅན་གྱིས་ལེགས་པར་གསུང་པའི་ལྟ་བ་རྟེན་འབྱུང་དང་སྤྱོད་པ་འཚེ་བ་མེད་པ་གཉིས་ཐུགས་ཉམས་སུ་བཞེས་ནས་འཇིགས་རྟེན་ཁྱོན་ཡོངས་སུ་འཚེ་མེད་ཞི་བའི་ལམ་སྟོན་མཛད་པ་བླ་ན་མ་མཆིས་པ་ཡིན་པ་མ་ཟད།  ཁྱད་པར་དུ་བོད་ཀྱི་འཐབ་རྩོད་དེ་འཚེ་མེད་ཞི་བའི་ལམ་གྱི་ཐོག་ནས་བསྒྲུབ་དགོས་པའི་ལམ་སྲོལ་བཏོད་གནང་བ་དེ་མི་རིགས་ཤིག་གི་འཐབ་རྩོད་གཞན་ལས་ཁྱད་ཆོས་ཆེ་བའི་ལམ་སྲོལ་བཏོད་པ་པོ་ཞིག་ཡིན་པ་དང་།

འཇིགས་རྟེན་འདིའི་རྙོགས་འཛིངས་མཐའ་དག་འཚེ་མེད་ཞི་བའི་ལམ་ནས་སེལ་དགོས་པའི་བཀའ་སློབ་དང་དཔེ་མཚོན་འཛིན་ས་ཡིན་སྟབས་༡༩༨༩ ལོར་༧གོང་ས་མཆོག་ལ་ནོར་སྦེལ་ཞི་བདེའི་གཟེངས་རྟགས་འབུལ་བཞེས་མཛད་པ་དེའི་གཟེངས་རྟགས་དེའི་རིན་ཐང་དང་ཆེད་མཐོང་སྔར་ལས་གོང་མཐོར་སོང་ཡོད་པ་དང་ཆབ་གཅིག་བོད་ཀྱི་གནད་དོན་དེ་ཡང་རྒྱལ་སྤྱིའི་ནང་དོ་སྣང་དང་རྒྱབ་སྐྱོར་ཤུགས་ཆེ་རུ་སོང་ཡོད་པ་རེད།   སྐབས་དེའི་ནོར་སྦེལ་ཞི་བདེའི་གཟེངས་རྟགས་འབུལ་སྐབས་ཀྱི་ཆེ་བསྟོད་ཚིག་བརྗོད་ནང་དུ་༧གོང་ས་མཆོག་གིས་འཚེ་བ་དང་དྲགས་པོའི་ཐབས་ལམ་ཡོངས་སུ་སྤངས་ཏེ་བཟོད་སྲན་དང་ཕན་ཚུན་གུས་རྩིའི་ལམ་ནས་ཞི་འགྲིག་ཡོང་ཐབས་ཀྱི་མཛད་རྗེ་དེ་དག་དམིགས་བསལ་གྱི་ཟུར་འདོན་གནང་ཡོད་པ་རེད་ཅེས་སོགས་གསུངས་སོང་།

ཡང་ཁོང་གིས་སློབ་ཕྲུག་ཚོར་ལམ་སྟོན་གནང་དོན།   སློབ་སྦྱོང་གི་བརྒྱུད་རིམ་ནང་དཀའ་ངལ་ཏན་ཏན་འཕྲད་ཀྱི་རེད།   ཡིན་ན་ཡང་ང་ཚོའི་སློབ་སྦྱོང་ཧུར་ཐག་བྱེད་དགོས་པ་དེ་གལ་ཆེན་པོ་ཞིག་ཆགས་ཡོད་པ་རེད།   ང་ཚོ་བོད་ཀྱི་གནད་དོན་ཛ་དྲག་གི་གནས་སྟངས་དང་འཐབ་རྩོད་ཀྱི་གནས་སྟངས་གང་ལ་སླེབས་འདུག   དེ་ཚོའི་ཐོག་བསམ་བློ་ཡང་ནས་ཡང་དུ་བཏང་བའི་ཐོག་ནས་སློབ་སྦྱོང་ཐོག་འབད་བརྩོན་བྱེད་དགོས་པ་རེད་ལ་རྩ་བའི་བོད་མི་རིགས་ཀྱི་ལྷན་སྐྱེས་ཀྱི་གཤིས་སྤྱོད་དམ་བོད་ཀྱི་ཆོས་དང་རིག་གཞུང་བཟང་པོ་བདག་རྐྱེན་དང་དེང་དུས་ཀྱི་ཤེས་ཡོན་གཉིས་ཟུང་འབྲེལ་ཐོག་༧གོང་ས་མཆོག་གིས་བཀའ་དགོངས་བཞིན་ཕེབས་པ་ཡིན་ན་བོད་ཀྱི་བདེན་མཐའ་གསལ་བའི་ཡིད་ཆེས་དང་སྨོན་ལམ་ཡོད་ཅེས་སོགས་གསུངས་སོང་།

དེ་ནས་མོན་གྷོ་ས་གནས་ཤེས་ཡོན་དང་སློབ་གསོ་ཚོགས་ཆུང་གི་གོ་སྒྲིག་འོག་ས་གནས་སློབ་གྲྭ་ཁག་ནས་སློབ་ཕྲུག་དྲུག་གིས་བོད་ཀྱི་སྐད་ཡིག་ཉམས་ཉེས་སུ་སོང་ན། བོད་མི་རིགས་ལ་དགེ་སྐྱོན་གང་ཡོད་དམ་ཟེར་བའི་བརྗོད་གཞིའི་ཐོག་བགྲོ་གླེང་གཏམ་བཤད་གནང་གྲུབ་པ་དང་གཏན་ཉིན་སློབ་ཕྲུག་ཁག་དང་ས་གནས་གཞིས་གྲོང་ཁག་གི་སྡེ་ཚན་ཁག་གཅིག་ནས་གཞས་སྣ་གཟིགས་འབུལ་ཞུས་ཡོད་པ་རེད།

ལྷོ་ཕྱོགས་གསར་འགོད་པས།