རྒྱ་ནག་གཞུང་གིས་མཚོ་ལྷོ་ཁུལ་གྱི་བོད་རིགས་ལས་བྱེད་ཚོར་ཆོས་བྱེད་མི་ཆོག་པའི་བཀའ་བཏང་བ།

ཟླ་འདིའི་ཚེས་༢༤ ཉིན་བོད་མིའི་སྒྲིག་འཛུགས་ཀྱི་དྲ་གནས་ཐོག་གནས་ཚུལ་སྤེལ་བ་ལྟར་ན། རྒྱ་ནག་གཞུང་གིས་ཉེ་ཆར་བོད་མདོ་སྨད་མཚོ་སྔོན་ཞིང་ཆེན་གྱི་མཚོ་ལྷོ་ཁུལ་གྱི་བོད་རིགས་ལས་བྱེད་ཚོར་སོ་སོའི་ཁྱིམ་དུ་ཡང་ཆོས་བྱེད་མི་ཆོག་པ་དང་། ཁྱིམ་གྱི་ནང་དུ་ཡོད་པའི་མཆོད་ཁང་རྣམས་བཤིག་དགོས་པའི་བཙན་བཀའ་བཏང་ཡོད་འདུག

ལས་བྱེད་སུ་ཞིག་གིས་ཁྱིམ་ནང་གི་མཆོད་ཁང་མ་བཤིག་པ་ཡིན་ན་ལས་བྱེད་ཁོངས་ནས་ཕྱིར་འབུད་གཏོང་རྒྱུ་ཡིན་པ་མ་ཟད། གཞི་རིམ་གྱི་ཐོབ་ཐང་ཡང་འཕྲོག་རྒྱུ་ཡིན་པའི་བཙན་ཁྲིམས་བསྡམས་པ་ལ་བརྟེན་ནས་ཁུལ་དེའི་བོད་རིགས་ལས་བྱེད་ཚོས་མི་འདོད་བཞིན་དུ་ཁྱིམ་ཚང་སོ་སོའི་ནང་གི་མཆོད་ཁང་བཤིག་དགོས་པའི་གནས་སྟངས་ལ་ཐུག་ཡོད་འདུག དེ་བཞིན་ཕ་མ་དང་གཉེན་ཉེ་སོགས་འདས་གྲོངས་ཕྱིན་རུང་འདས་མཆོད་ཀྱི་ཆོ་ག་བྱེད་མི་ཆོག་པའི་དཀའ་ངལ་ཡང་འཕྲད་བཞིན་ཡོད་འདུག ད་ལྟའི་ཆར་ཁྲིམས་གཞི་འདི་བཞིན་ས་གནས་ཡོངས་རྫོགས་སུ་ལག་བསྟར་བྱེད་ཀྱི་མེད་རུང་། རིམ་བཞིན་བོད་རྒྱ་ཁྱབ་ཏུ་ལག་བསྟར་བྱེད་སྲིད་པའི་ཚོད་དཔག་བྱེད་ཀྱི་འདུག

འདི་ལོའི་ཕྱི་ཟླ་༤ ཚེས་༢༢ ཉིན་བོད་རང་སྐྱོང་ལྗོངས་རྩ་འཛུགས་ཁང་ཞེས་པ་ནས་གུང་ཁྲན་ཏང་ཡོན་གྱིས་ཆོས་དད་མི་བྱེད་པའི་བྱ་སྤྱོད་ཚད་གཞི་ཞེས་པའི་སྒྲིག་གཞི་ཞིག་ཚོད་ལྟའི་ལག་བསྟར་ཆེད་འགྲེམས་སྤེལ་བྱས་ཡོད་ཅིང་། དེ་རྗེས་རིམ་པས་ཉིང་ཁྲི་གྲོང་ཁྱེར་དང་། ལྷ་ས་གྲོང་ཁྱེར། མངའ་རིས་ས་ཁུལ་སོགས་སུ་ཁྱབ་བརྡལ་ལག་བསྟར་བྱེད་སྒོ་བཙུགས་འདུག་རུང་། ཕྱི་ཟླ་༦ ཙམ་ནས་ཕྱི་ནང་གི་གསར་འགྱུར་བརྒྱུད་ལམ་ཁག་ཏུ་འདིའི་སྐོར་གནས་ཚུལ་གང་ཡང་བཀོད་ཐོན་བྱུང་མེད་པ་ལ་གཞིགས་ན། བོད་རང་སྐྱོང་ལྗོངས་ནང་སྲིད་བྱུས་འདི་ལག་བསྟར་བྱེད་རྒྱུར་ལས་བྱེད་དང་མང་ཚོགས་ཀྱི་འདོད་མོས་མེད་པས་རེ་ཞིག་མཚམས་འཇོག་བྱས་ཡོད་སྲིད་པ་དང་། ཡང་ན་བརྒྱུད་ལམ་སོགས་སུ་དྲིལ་བསྒྲགས་གང་ཡང་མེད་པར་ལག་བསྟར་བྱེད་མུས་ཡིན་ཡིན་པར་དོགས་གནས་འདུག ད་ཆ་མཚོ་སྔོན་ཁུལ་དུ་སྲིད་བྱུས་འདི་ལག་བསྟར་བྱེད་སྒོ་བཙུགས་པ་འདིས་རྒྱ་ནག་དབུས་གཞུང་གི་བཀོད་བྱུས་གཏན་འབེབས་བྱས་པར་ངོས་འཛིན་བྱེད་ཀྱི་འདུག

བོད་རང་སྐྱོང་ལྗོངས་ཀྱི་དམར་ཤོག་ཚོགས་མིས་ཆོས་ལ་དད་པ་མི་བྱེད་པའི་བྱ་སྤྱོད་ཚད་གཞི་(ཚོད་ལྟའི་ལག་བསྟར) ཞེས་པའི་སྒྲིག་གཞིའི་གཙོ་དོན་དམར་ཤོག་ཚོགས་མི་རྣམས་མར་ཁེ་སིའི་རིང་ལུགས་ཀྱི་ལྷ་མེད་སྨྲ་མཁན་བརྟན་པོར་འགྱུར་བར་ཁྲིད་སྟོན་བྱས་ཏེ། ཏང་གི་བཀའ་ལ་ཉན་པ་དང་། ཏང་གི་རྗེས་སུ་འབྲང་པ། ཆོས་ལ་དད་པ་མི་བྱེད་པ། ཆོས་ལ་མི་ཞུགས་པ། ཆོས་ལུགས་བརྒྱུད་སྤེལ་དང་ཁྱབ་གདལ། སྐུལ་དེད་བཅས་མི་བྱེད་པ། ཆོས་ལུགས་ཀྱི་བྱེད་སྒོ་སྤེལ་བའམ་ཡང་ན་ཆོས་ལུགས་ཀྱི་སྒྲིག་བཀོད་བསྐྲུན་རྒྱུར་རྒྱབ་སྐྱོར་མི་བྱེད་པ། རང་ཁྱིམ་ནང་དུ་ཡིད་ཆེས་མི་བྱེད་པ་དང་ཕྱི་རུ་ཡང་ཡིད་ཆེས་མི་བྱེད་པ་བྱས་ཏེ་མཐའ་གཅིག་ཏུ་གཏན་འགོག་བྱེད་དགོས་པ་དང་། དེ་བཞིན་གུང་ཁྲན་ཏང་ཡོན་གྱིས་ཆོས་དད་མི་བྱེད་པའི་ཁས་ལེན་ཡི་གེ་འཇོག་དགོས་པ་དང་སངས་རྒྱས་དང་སྐུ་འདྲ་སོགས་ཆོས་ལུགས་ཀྱི་རྒྱན་ཆ་མི་འདོགས་པར། ཆོས་ལུགས་ཀྱི་ཆོས་དཔེའམ་ཆོས་ལུགས་ཀྱི་མཚོན་རྟགས་དངོས་པོ་རྐོ་མི་ཆོག་པ་བཅས་སོགས་མངོན་གསལ་དང་མངོན་གསལ་མིན་པའི་ཆོས་ལུགས་ཀྱི་བྱེད་སྒོ་མཐའ་དག་ལ་བཀག་འགོག་ནན་པོ་བྱེད་པའི་སྲིད་བྱུས་ཤིག་ཡིན་འདུག །

གསར་འགོད་པ་ཆོས་ཉིད་འོད་ཟེར།