རྒྱ་ནག་གཞུང་གིས་མི་མང་ས་ཡ་༢༡ ཙམ་ལ་ཁྱིམ་དུ་བསྡད་དགོས་པའི་བཙན་བཀའ་བཏང་འདུག
ཟླ་འདིའི་ཚེས་༡ ཉིན་བྷི་བྷི་སི་གསར་ཁང་གིས་གནས་ཚུལ་སྤེལ་གསལ་ལྟར་ན། རྒྱ་ནག་གི་ཏོག་དབྱིབས་གཉན་རིམས་ཀླད་ཀོར་གྱི་སྲིད་བྱུས་ཞེས་པའི་འོག་ད་ལྟའི་ཆར་རྒྱ་ནག་སི་ཁྲོན་ཞིང་ཁྲིན་ཏུ་གྲོང་ཁྱེར་ཡོངས་རྫོགས་སྒོ་རྒྱ་བསྡམས་ཡོད་པའི་གནས་ཚུལ་ཐོན་འདུག
ཟླ་འདིིའི་ཚེས་༡ ཉིན་ཁྲིན་ཏུ་གྲོང་ཁྱེར་དུ་མི་གྲངས་༡༥༧ ལ་ཏོག་དབྱིབས་གཉན་རིམས་ཕོག་ཡོད་པར་བརྟེན། ད་ལྟའི་ཆར་མི་མང་ས་ཡ་༢༡ ཡོད་པའི་ཁྲིན་ཏུ་གྲོང་ཁྱེར་ཡོངས་རྫོགས་སྒོ་རྒྱ་བསྡམས་ཡོད་འདུག་ལ། ཁྱིམ་ཚང་རེ་རེའི་ནང་གི་ནད་རྟགས་ཐོན་མེད་པའི་མི་གཅིག་ཉིན་གཅིག་གི་ནང་དུ་ཕྱི་ལ་ཉོ་ཆ་ཐེངས་གཅིག་རྒྱག་ཏུ་འགྲོ་ཆོག་པ་ལས་དེ་མིན་མི་ཚང་མ་ཁྱིམ་དུ་བསྡད་དགོས་པའི་བཀའ་བཏང་ཡོད་པའི་གནས་ཚུལ་ཐོན་འདུག
ལོ་འདིའི་ཕྱི་ཟླ་གསུམ་པའི་ནང་དུ་རྒྱ་ནག་ནང་དུ་ཏོག་དབྱིབས་གཉན་རིམས་ཁྱབ་བརྡལ་ཕྱིན་པའི་རྐྱེན་གྱིས་ཧྲང་ཧེ་གྲོང་ཁྱེར་ཡོངས་རྫོགས་ཟླ་བ་གཉིས་རིང་སྒོ་རྒྱ་བསྡམས་ཡོད་པ་དང་། སྐབས་དེ་རྒྱ་ནག་ཁྱོན་ཡོངས་ལ་མི་མང་ས་ཡ་༡༩༣ ཙམ་ལ་ཏོག་དབྱིབས་གཉན་རིམས་ཀླད་ཀོར་གྱི་སྲིད་བྱུས་དང་འབྲེལ་བའི་དཀའ་ངལ་ཆེན་མོ་འཕྲད་ཡོད་པ་དང་། ལྷག་པར་དུ་དུས་དེར་ཟུར་བཀག་ཏུ་སྡོད་མཁན་དག་ལ་ཁ་ལག་མ་རག་པ་དང་འཚོ་བའི་གནས་སྟངས་ཧ་ཅང་ཞན་པོ་ཡོད་པ་སོགས་གནས་ཚུལ་མང་དག་ཅིག་ཕྱི་ལ་ཐོན་ཡོད་འདུག་ལ། གྲོང་ཁྱེར་སྒོ་རྒྱ་བསྡམས་པ་དེ་ཡིས་རྒྱ་ནག་ཁྱོན་ཡོངས་ཀྱི་དཔལ་འབྱོར་ལ་གྱོང་གུན་ཕོག་ཡོད་པ་དང་རྒྱ་ནག་གི་མི་མང་ཁྲོད་དུ་ཏོག་དབྱིབས་གཉན་རིམས་ཀླད་ཀོར་གྱི་སྲིད་ཇུས་ལ་ངོ་རྒོལ་དང་ཁོང་ཁྲོ་བྱེད་མཁན་ཡང་བྱུང་ཡོད་འདུག
ཐེངས་འདི་ཁྲིན་ཏུ་གྲོང་ཁྱེར་ལ་སྒོ་རྒྱ་བསྡམས་པ་དེ་ནི་ད་བར་སྒོ་རྒྱ་བསྡམས་པའི་གྲོང་ཁྱེར་ཆེ་ཤོས་གཉིས་པ་དེ་ཆགས་ཡོད་འདུག་ལ། ད་ལྟའི་ཆར་ཁྲིན་ཏུ་གྲོང་ཁྱེར་དུ་མི་ཡར་མར་འགྲོ་སྐྱོད་མི་ཆོག་པ་དང་། སློབ་གྲྭ་དང་ཚོང་གཉེར་ཁང་མང་དག་ཅིག་སྒོ་བརྒྱབ་ཡོད་པ་སོགས་ཀྱི་གནས་ཚུལ་ཐོན་འདུག
རྒྱ་ནག་དམར་ཕྱོགས་ཚོགས་པའི་ཚོགས་ཆེན་ཉི་ཤུ་པ་དེ་ལོ་འདིའི་ཕྱི་ཟླ་༡༠ པའི་ནང་འཚོག་འཆར་ཡོད་པ་དང་ཏོག་དབྱིབས་གཉན་རིམས་ཀླད་ཀོར་སྲིད་བྱུས་ཀྱིས་རྒྱ་ནག་གི་ཚོང་དང་དཔལ་འབྱོར་ལ་འགོག་རྐྱེན་བཟོ་བཞིན་ཡོད་ན་ཡང་། ད་ལྟའི་ཆར་རྒྱ་ནག་གཞུང་གིས་སྲིད་བྱུས་དེ་མུ་མཐུད་ནས་ལག་བསྟར་བྱས་དང་བྱེད་བཞིན་པ་རེད་འདུག
ཕྱི་ལོ་༢༠༡༩ ལོར་ཏོག་དབྱིབས་གཉན་རིམས་ཐོག་དང་པོ་དེ་རྒྱ་ནག་ནས་བྱུང་ཡོད་ན་ཡང་། རྒྱ་ནག་གཞུང་གིས་ད་བར་ནད་པ་གྲངས་ཉིས་འབུམ་བཞི་ཁྲི་སུམ་སྟོང་ལྷག་མ་གཏོགས་བྱུང་མེད་པ་དང་དེ་དག་གི་ཁྲོད་ནས་མི་གྲངས་ལྔ་སྟོང་ཉིས་བརྒྱ་ལྷག་མ་གཏོགས་གྲོངས་མེད་རབས་བརྗོད་བཞིན་ཡོད་འདུག་ལ། གྲངས་ཀ་དེ་ནི་ཨ་རི་དང་རྒྱ་གར་སོགས་ལས་ལྡབ་བཅུ་ཕྲག་མང་པོས་ཉུང་བ་ཡོད་པའི་གནས་ཚུལ་ཐོན་འདུག།
གསར་འགོད་པ་བློ་བཟང་རྒྱ་མཚོ།
