རྒྱ་ནག་གི་གཞུང་ཚབ་པའི་གཏམ་བཤད་སྐབས་ངོ་རྒོལ་རིམ་པ་སྤེལ་འདུག 

ཟླ་༦ པའི་ཚེས་༢༣ ཉིན་ཨོ་སི་ཀྲོ་ལི་ཡའི་སིཌ་ནི་འཕྲུལ་ལས་སློབ་ཆེན་(University of Technology Sydney) དུ་ཡུལ་དེར་གནས་སྡོད་རྒྱ་ནག་གཞུང་ཚབ་པས་ཨོ་སི་ཀྲོ་ལི་ཡ་དང་རྒྱ་ནག་གཉིས་བར་གྱི་འབྲེལ་ལམ་ཐོག་གཏམ་བཤད་བྱེད་སྐབས་སུ། བོད་མི་མང་སྤྱི་ཟུར་གདོང་འདུས་སྐྱིད་འཛོམས་དང་། བོད་དོན་ལས་འགུལ་བ་ཁག་ཅིག་གིས་བོད་དོན་དང་ཧོང་ཀོང་། ཡུ་གུར་ལ་རང་དབང་དགོས་པའི་ངོ་རྒོལ་ལས་འགུལ་སྤེལ་འདུག 

དེ་ཡང་ངོ་རྒོལ་ལས་འགུལ་དེ་ནི་ཐེངས་གཅིག་ལ་ལས་འགུལ་བ་ཚང་མས་མཉམ་དུ་སྐད་འབོད་བྱས་པ་མ་ཡིན་པར། གཏམ་བཤད་ཀྱི་དུས་ཡུན་ཆ་ཚང་རིང་ལས་འགུལ་བ་རིམ་པས་ཡར་ལངས་ནས་སྐད་འབོད་ལས་འགུལ་སྤེལ་ནས། རྒྱ་ནག་གི་གཞུང་ཚབ་པའི་གཏམ་བཤད་མཚམས་འཇོག་ཐེངས་མང་པོ་བྱེད་དགོས་འཁེལ་འདུག 

དེ་ཡང་གཏམ་བཤད་ཀྱི་དུས་ཡུན་རིང་ལས་འགུལ་བ་ཚོས་འཆར་གཞི་ལྡན་པའི་ཐོག་ནས། ངོ་རྒོལ་སྐད་འབོད་ཐེངས་༧ བྱས་འདུག་པ་དང་། ཐེངས་རེ་བྱས་རྗེས་བདེ་སྲུང་ལས་བྱེད་ཚོས་ལས་འགུལ་བ་རྣམས་ཕྱིར་འབུད་བྱས་འདུག ཡང་དུས་ཡུན་ཏོག་ཙམ་སོང་རྗེས་སླར་ཡང་ལས་འགུལ་བ་གཞན་ཡར་ལངས་ནས་ངོ་རྒོལ་སྐད་འབོད་བྱས་པ་བྱུང་འདུག

གཏམ་བཤད་དང་ལས་འགུལ་རིམ་པའི་བརྙན་ཆ་ཚང་དེ་ཨོ་སི་ཀྲོ་ལི་ཡའི་གསར་ཁང་ཆེ་གྲས་ཨེ་བྷི་སེ་གསར་ཁང་གི་ཡུ་ཀྲོབ་དྲ་ཐོག་བཞག་འདུག །

གསར་འགོད་པ་སྐལ་བཟང་དོན་གྲུབ།