རྒྱ་ནག་གི་ཉེན་ཁ་འགོག་རྒོལ་བྱེད་ཆེད། ཉི་ཧོང་དང་ཨོ་སི་ཁྲུ་ལི་ཡ་གཉིས་ཀྱིས་མཉམ་འབྲེལ་གྱི་རྒྱལ་སྲུང་ཆིངས་ཡིག་ཅིག་འཇོག་རྒྱུ་རེད་འདུག 

ཞི་བདེ་རྒྱ་མཚོའི་ཁུལ་གྱི་རྒྱལ་ཁབ་ཚོས་རྒྱ་ནག་གི་ཧམ་ཤེད་དང་། དྲག་པོའི་དམག་ཤུགས་རྒྱ་སྐྱེད་ཇི་ལྟར་འགོག་དགོས་མིན་གྱི་སེམས་འཚབ་ཆེན་པོ་བྱེད་བཞིན་པའི་སྐབས་འདིར། ཉི་ཧོང་དང་ཨོ་སི་ཁྲུ་ལི་གཉིས་ཀྱིས་མཉམ་འབྲེལ་ཐོག་ནས་རྒྱལ་ཁབ་གཉིས་ཀྱི་ཁེ་ཕན་སྲུང་སྐྱོབ་བྱེད་པའི་ཆིངས་ཅིག་འཇོག་གཏན་འཁེལ་ཡོད་འདུག 

ཕྱི་ཟླ་༡ ཚེས་༥ ཉིན་རྒྱལ་སྤྱིའི་བརྒྱུད་ལམ་ཁག་ནས་གནས་ཚུལ་སྤེལ་བ་ལྟར་ན། ཨེ་ཤི་ཡའི་མང་གཙོའི་སྟོབས་ཆེན་རྒྱལ་ཁབ་ཉི་ཧོང་དང་། ཨོ་སི་ཁྲུ་ལི་ཡ་གཉིས་ཀྱི་བར་དུ་བདུན་ཕྲག་འདིའི་རེས་གཟའ་པ་སངས་ཉིན་(ཚེས་ ༧)ལོ་རྒྱུས་རང་བཞིན་ལྡན་པའི་རྒྱལ་སྲུང་གྲོས་མཐུན་ཞིག་འཇོག་གཏན་འཁེལ་ཡོད་འདུག་ཅིང་། གྲོས་མཐུན་ཡིག་ཆ་དེའི་འོག་ནས་རྒྱལ་ཁབ་གཉིས་ཀྱི་རྒྱལ་སྲུང་སྟོབས་ཤུགས་མཉམ་འབྲེལ་བྱས་ཏེ་རྒྱལ་ཁབ་གཉིས་ཀའི་ཁེ་ཕན་དང་། ཞི་བདེ་རྒྱ་མཚོའི་ཁུལ་གྱི་བརྟན་ལྷིང་དང་བདེ་འཇགས་སྲུང་སྐྱོབ་བྱེད་འཆར་ཡོད་འདུག 

ལོ་རྒྱུས་རང་བཞིན་ཅན་གྱི་གྲོས་མཐུན་དེ་དང་འབྲེལ་བའི་ཐད་ལ། ཨོ་སི་ཁྲུ་ཡི་ཡའི་སྲིད་བློན་སི་ཁོ་ཊ-མོ་རེ་སོན་(Scott Morrison) གྱིས་“ཆིངས་ཡིག་འདི་ནི། ང་ཚོའི་རྒྱལ་ཁབ་གཉིས་ལ་ཐུན་མོང་དུ་འཕྲད་བཞིན་པའི་བདེ་འཇགས་ཀྱི་དཀའ་ཉེན་ལ་མཉམ་དུ་གདོང་ལེན་བྱེད་པའི་ཆོད་སེམས་དང་། ཞི་བདེ་རྒྱ་མཚོའི་ཁུལ་གྱི་སྲ་བརྟན་དང་བདེ་འཇགས་སྲུང་སྐྱོབ་བྱེད་པའི་ཆིངས་ཡིག་ཅིག་ཆགས་ཀྱི་ཡོད་”ཅེས་འགྲེལ་བརྗོད་བྱས་ཡོད་འདུག 

རྒྱ་ནག་གིས་ཞི་བདེ་རྒྱ་མཚོའི་ཁུལ་དུ་དམག་ཤུགས་རྒྱ་བསྐྱེད་བྱས་ཏེ་གླིང་ཕྲན་དང་མཚོ་འགག་མང་པོ་ཧམ་འཛིན་བྱེད་བཞིན་པར་མང་གཙོའི་མཐུན་ཕྱོགས་རྒྱལ་ཁབ་ཚོས་སེམས་འཚབ་ཆེན་པོ་བྱེད་ཀྱིན་ཡོད་པ་དང་། རྒྱ་ནག་གི་དཀའ་ཉེན་ལ་གདོང་ལེན་དང་། འགོག་རྒོལ་བྱེད་པའི་ཆེད་དུ་ཨ་རི་དང་། ཉི་ཧོང་། རྒྱ་གར། ཨོ་སི་ཁྲུ་ལི་བཅས་ལས་གྲུབ་པའི་སྟོབས་ཆེན་རྒྱལ་ཁབ་བཞིའི་མཐུན་ཚོགས་(the Quad) ཀྱིས་རྒྱལ་ཁབ་བཞིའི་མཉམ་འབྲེལ་ནུས་ཤུགས་ཆེ་རུ་བཏང་ནས་རྒྱ་ནག་གི་སྟོབས་ཤུགས་འགོག་རྒོལ་བྱེད་རྒྱུའི་འབད་བརྩོན་བྱེད་ཀྱིན་ཡོད་ཅིང་། ཐེངས་འདིའི་ཨོ་ཉིའི་ཆིངས་ཡིག་འདི་ཡང་རྒྱལ་བཞིའི་མཐུན་ཚོགས་ཀྱི་མཉམ་ལས་ཀྱི་སྒྲོམ་གཞིའི་འོག་ནས་བྱུང་བ་ཞིག་ཆགས་ཀྱི་ཡོད་འདུག 

གཞན་ཡང་། ཉི་ཧོང་དང་ཨོ་སི་ཁྲུ་ལི་གཉིས་ཀྱིས་ཚོང་ལས་དང་། ཚན་རྩལ་འཕྲུལ་ཆས། ཁོར་ཡུག་སྲུང་སྐྱོབ་སོགས་ཀྱི་ཐོག་ནས་ཀྱང་མཉམ་ལས་བྱས་ཏེ་མང་གཙོའི་རྒྱལ་ཁབ་གཉིས་ཀྱི་ཁེ་ཕན་སྲུང་སྐྱོབ་དང་རྒྱ་བསྐྱེད་བྱེད་འཆར་ཡོད་འདུག ། 

གསར་འགོད་པ་དཀོན་མཆོག་རབ་བརྟན།