རྒྱ་ནག་གི་ཧམ་ཤེད་དང་ཉེན་ཁའི་ཁྲོད། ཉི་ཧོང་དང་ཝི་ཊི་ནཱམ་གཉིས་ཀྱིས་རྒྱལ་སྲུང་གྲོས་ཆོད་བཞག་འདུག

ལྷོ་རྒྱ་ནག་རྒྱ་མཚོ་དང་ཞི་བདེ་རྒྱ་མཚོའི་ཁུལ་དུ་རྒྱ་ནག་གི་ཧམ་ཤེད་ཇེ་ཆེར་འགྱུར་བཞིན་པའི་དཀའ་ཉེན་ཁྲོད། ཉི་ཧོང་དང་ཝི་ཊི་ནཱམ་(Vietnam) གཉིས་ཀྱི་བར་དུ་རྒྱལ་སྲུང་མཚོན་ཆ་དང་འཕྲུལ་ཆས་ཉོ་ཚོང་གི་གྲོས་ཆོད་གསར་པ་ཞིག་བཞག་ཡོད་འདུག 

བརྒྱུད་ལམ་ཁག་ནས་གནས་ཚུལ་སྤེལ་བ་ལྟར་ན། བདུན་ཕྲག་གོང་མའི་རེས་གཟའ་སྤེན་པའི་ཉིན་ཉི་ཧོང་གི་རྒྱལ་སྲུང་བློན་ཆེན་ནོ་བྷོའུ-ཁེ་ཤི་(Nobuo Kishi) ཝི་ཊི་ནཱམ་གྱི་རྒྱལ་ས་ཧ་ནོ་(Hanoi) ལ་ཕེབས་ནས་རྒྱལ་ཁབ་གཉིས་ཀྱི་རྒྱལ་སྲུང་གྲོས་ཆོད་ལ་མཚན་རྟགས་བཀོད་ཡོད་འདུག 

ཤར་ཨེ་ཤི་ཡའི་རྒྱལ་ཁབ་གཉིས་ཀྱི་རྒྱལ་སྲུང་བློན་ཆེན་གཉིས་ཀྱི་མཇལ་འཕྲད་གྲུབ་རྗེས། ཉི་ཧོང་གི་རྒྱལ་སྲུང་བློན་ཆེན་ཁོང་གིས་དྲ་ཐོག་གི་གསར་འགོད་གསལ་བསྒྲགས་བརྒྱུད་དེ་ཉི་ཧོང་གིས་ཝི་ཊི་ནམ་ལ་ཉི་ཧོང་ནས་ཐོན་པའི་རང་སྲུང་མཚོན་ཆ་དང་འཕྲུལ་ཆས་འཚོང་རྒྱུའི་གྲོས་མོལ་ཤུགས་ཆེ་རུ་གཏོང་རྒྱུ་ཡིན་ཚུལ་བརྗོད་ཡོད་འདུག 

བརྒྱུད་ལམ་ཁག་ནས་སྤེལ་བའི་གནས་ཚུལ་ལ་གཞིགས་ན། ལྷོ་ཤར་ཨེ་ཤི་ཡའི་ས་ཁུལ་དུ་རྒྱ་ནག་གི་དམག་ཤེད་དང་དབང་ཤུགས་རྒྱ་སྐྱེད་འགྲོ་བཞིན་པའི་དུས་སྐབས་འདིར། མང་གཙོའི་རྒྱལ་ཁབ་རྣམས་ཀྱིས་ཉི་ཧོང་དང་ལྷན་དུ་རྒྱལ་སྲུང་གྲོས་ཆོད་འཇོག་གི་ཡོད་འདུག་ཅིང་། ལྷོ་ཤར་ཨེ་ཤི་ཡའི་རྒྱལ་ཚོགས་(the Association of Southeast Asian Nations) ཀྱི་ཚོགས་མི་གལ་ཆེན་དུ་གྱུར་བའི་ཝི་ཊི་ནཱམ་ནི་དེ་ལྟ་བུའི་གྲོས་ཆོད་འཇོག་མཁན་གྱི་རྒྱལ་ཁབ་ ༡༡ པ་དེ་ཆགས་ཡོད་འདུག 

རྒྱ་ནག་གིས་ཧམ་པ་ཆེན་པོས་ཁྱིམ་མཚེས་རྒྱལ་ཁབ་ཚོའི་ས་ཁོངས་སམ་གླིང་ཕྲན་རྣམས་ཁོ་ཚོའི་ཡིན་ཟེར་ནས་སྐམ་ས་དང་རྒྱ་མཚོ་རྣམས་ཧམ་ཟ་དང་ཧམ་འཕྲོག་བྱེད་ཀྱིན་ཡོད་པས། ཉི་ཧོང་དང་ཝི་ཊི་ནཱམ་གཉིས་ཀ་རྒྱ་ནག་དང་ལྷན་དུ་ས་རྩོད་དང་ཆུ་རྩོད་ཤོར་ནས་ཡོད་འདུག་ཅིང་། གཉིས་ཀས་རྒྱ་ནག་གི་དབང་ཤུགས་རྒྱ་སྐྱེད་ལ་འཇིགས་སྣང་བྱེད་ཀྱི་ཡོད་འདུག 

ཉེ་བའི་ཆར། ཧྥི་ལི་ཕིན་གྱི་མཚོ་དམག་དམག་དཔོན་ཟུར་པ་ཞིག་གིས་ཀྱང་རྒྱ་ནག་གི་དབང་ཤུགས་རྒྱ་སྐྱེད་ལ་གདོང་ལེན་བྱེད་ཆེད་ཤར་ཨེ་ཤི་ཡའི་གླིང་ཕྲན་རྒྱལ་ཁབ་ཉི་ཧོང་དང་། ཧྥི་ལི་ཕིན། ཐའེ་ཝན་གསུམ་པོས་ངེས་པར་དུ་མཉམ་འབྲེལ་དང་རྡོག་རྩ་ཆིག་སྒྲིལ་བྱེད་དགོས་པའི་ལྟ་ཚུལ་བཏོན་པའི་ཐོག གལ་སྲིད་ཤར་ཨེ་ཤི་ཡའི་མང་གཙོའི་རྒྱལ་ཁབ་གསུམ་གྱིས་ལག་གདང་སྦྲེལ་ནས་མཉམ་རུབ་མ་བྱས་པ་ཡིན་ན། ཞི་བདེ་རྒྱ་མཚོའི་ཁུལ་དུ་སླེབ་བཞིན་པའི་རྒྱ་ནག་གི་དབང་ཤུགས་རྒྱ་སྐྱེད་ལ་གདོང་ལེན་བྱེད་ཐབས་བྲལ་ཡོད་ཅེས་བཤད། 

ད་ལྟ་མཛམ་གླིང་གི་མིག་ལམ་དུ་དམར་ཤོག་རྒྱ་ནག་གི་ཧམ་ཤེད་དང་གཡོ་སྒྱུའི་རང་བཞིན་ཇེ་གསལ་དུ་འགྱུར་བཞིན་ཡོད་པས། ཨ་རིས་གཙོས་པའི་མང་གཙོའི་རྒྱལ་ཁབ་རྣམས་ཀྱིས་རྒྱ་ནག་གི་དབང་ཤུགས་རྒྱ་སྐྱེད་ལ་སེམས་འཚབ་ཆེན་པོ་བྱས་ཏེ་དངོས་སུ་དེ་ལ་ཁ་གཏད་གཅོག་རྒྱུའི་སྲིད་བྱུས་འཐེན་འགོ་རྩོམ་བཞིན་ཡོད། ། 

གསར་འགོད་པ་དཀོན་མཆོག་རབ་བརྟན།