རྒྱ་ནག་གི་ཨོ་རྩལ་འགྲན་ཚོགས་ལ་ངོ་རྒོལ་བྱེད་མཁན་ལས་འགུལ་བ་གཉིས་བཀག་ཉར་བྱས་འདུག

ཕྱི་ལོ་༢༠༢༢ ལོའི་ཟླ་༢ པའི་ནང་རྒྱ་ནག་གི་རྒྱལ་ས་པེ་ཅིང་དུ་དགུན་ཁའི་ཨོ་རྩལ་འགྲན་ཚོགས་འཚོག་རྒྱུ་ཡིན་པ་དང་བསྟུན། ཨོ་རྩལ་འགྲན་ཚོགས་ཀྱི་ཐོག་མའི་འབྱུང་ཁུངས་སུ་ངོས་འཛིན་བྱེད་ཀྱི་ཡོད་པའི་ཡུ་རོབ་གྷེ་རི་སེའི་རྒྱལ་ས་ཨེ་ཐན་སཱེ་ལ། འདི་ལོའི་ཟླ་༡༠ པའི་ཚེས་༡༩ ཉིན་ཨོ་རྩལ་འགྲན་ཚོགས་ཀྱི་དཔལ་འབར་དེ་རྒྱ་ནག་གི་སྐུ་ཚབ་ལ་རྩིས་སྤྲོད་བྱེད་པའི་མཛད་སྒོ་འཚོག་འཆར་ཡོད་པ་དང་བསྟུན། ཟླ་༡༠ པའི་ཚེས་༡༧ ཉིན་མཛད་སྒོ་དེ་འཚོག་ཡུལ་གྱི་ས་གནས་སུ། བོད་རང་བཙན་སློབ་ཕྲུག་ཚོགས་པའི་ལས་འགུལ་བ་རང་ལོ་༡༨ ཡིན་པའི་བོད་མི་ཚེ་ལྷ་(Tsela Zoksang) དང་། ཧོང་ཀོང་ལས་འགུལ་བ་རང་ལོ་༢༢ ཡིན་པའི་ཇཱོ་སཱུ་(Joey Siu) གཉིས་ཀྱིས་བོད་ཀྱི་རྒྱལ་དར་དང་། ཧོང་ཀོང་གི་ལས་འགུལ་ཆེན་མོའི་དར་ཆ་འཁྱེར་ནས། ཕྱི་ལོ་༢༠༢༢ ལོའི་རྒྱ་ནག་གི་ཨོ་རྩལ་འགྲན་ཚོགས་ལ་ངོ་རྒོལ་ཡོད། བོད་ལ་རང་དབང་དགོས་སོགས་ཀྱི་འབོད་ཚིག་བསྒྲགས་ནས་ངོ་རྒོལ་ལས་འགུལ་སྤེལ་འདུག་པས། ཡུན་རིང་མ་སོང་བར་ཉེན་རྟོག་པ་སླེབས་ནས་བཀག་ཉར་བྱས་ཡོད་པ་རེད། 

དེ་ཡང་ཨོ་རྩལ་འགྲན་ཚོགས་ཀྱི་ལོ་རྒྱུས་ནང་དུ་གྷེ་རི་སེའི་རྒྱལ་ས་ཨེ་ཐན་སཱེ་ནི་གལ་ཆེན་པོ་ཆགས་ཀྱི་ཡོད་པས། ངོ་རྒོལ་གྱི་ལས་འགུལ་དེར་དོ་སྣང་ཆེན་པོ་བྱུང་ནས་རྒྱལ་སྤྱིའི་བརྒྱུད་ལམ་ཆེ་ཁག་མང་པོ་ཞིག་ནང་བཀོད་འདུག 

བོད་དང་ཡུ་གུར། ལྷོ་སོག ཧོང་ཀོང་། ཐའེ་ཝན། རྒྱ་ནག་བཅས་ལས་འགུལ་བའི་ཚོགས་པ་༡༦༠ ཡིས། རྒྱལ་སྤྱིའི་ཨོ་རྩལ་ལྷན་ཚོགས་ལ། རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཚབས་ཆེ་རུ་འགྲོ་བཞིན་པ་ལས་ཡར་རྒྱས་ཀྱི་རྣམ་པ་མཐོང་རྒྱུ་མེད་རྐྱེན། ཨོ་རྩལ་འགྲན་ཚོགས་ཀྱི་ལྟ་བ་ལངས་ཕྱོགས་དང་མཐུན་གྱི་མེད་པས། འགྲན་ཚོགས་དེ་རྒྱ་ནག་ལ་གོ་སྒྲིག་བྱེད་དུ་མི་འཇུག་པའི་རེ་འབོད་ཀྱི་ཞུ་ཡིག་སྤྲད་ཡོད་པ་མ་ཟད། ལས་འགུལ་རབ་དང་རིམ་པ་སྤེལ་ཡོད་པ་རེད་དེ། ཨོ་རྩལ་ལྷན་ཚོགས་ནས་བཟང་ཕྱོགས་ཀྱི་ལན་འདེབས་གང་ཡང་སྤྲད་མེད་པ་རེད། འོན་ཀྱང་རྒྱལ་སྤྱིའི་གནད་ཡོད་མི་སྣ་ཁག་ཅིག་གིས། རྒྱ་ནག་གི་དགུན་ཁའི་ཨོ་རྩལ་འགྲན་ཚོགས་སྐབས་སུ་རྒྱལ་ཁབ་ཁག་གི་གནད་ཡོད་མི་སྣ་མཉམ་ཞུགས་མི་བྱེད་པར་གཞུང་འབྲེལ་ཐོག་ནས་ངོ་རྒོལ་བྱེད་དགོས་སྐོར་བརྗོད་ཡོད་པ་རེད། 

ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་ནན་སི་པཱི་ལོ་སི་ཡིས། ཨོ་རྩལ་འགྲན་ཚོགས་དེར་རྩེད་མོ་བ་རྣམས་མཉམ་ཞུགས་བྱེད་རྒྱུ་ཡིན་ཡང་། ཨ་རིའི་གཞུང་གིས་རྒྱ་ནག་ནང་ཏུ་ཨོ་རྩལ་འགྲན་ཚོགས་གོ་སྒྲིག་བྱེད་པར་སྐྱོན་ཆ་གང་ཡང་མེད་པ་ལྟ་བུའི་མཉམ་ཞུགས་བྱེད་ཐུབ་རྒྱུ་མིན་པ་དང་། རྒྱ་ནག་ནང་གི་འགྲོ་བ་མིའི་ཐོབ་ཐང་སྐོར་གསུངས་ནས། རྒྱལ་སྤྱིའི་རྒྱལ་ཁབ་ཁག་གི་འགོ་ཁྲིད་ཚོས་ཀྱང་རྒྱ་ནག་ལ་མཐོང་ཆེན་སྤྲད་མི་རུང་བ་དང་། འགྲན་ཚོགས་དེར་མཉམ་ཞུགས་བྱེད་མི་རུང་བས། གཞུང་འབྲེལ་ཐོག་ནས་ངོ་རྒོལ་བྱེད་དགོས་པའི་སྐུལ་མ་བྱས་འདུག 

དེ་བཞིན་ཨ་རིའི་སྤྱི་མཐུན་ཚོགས་པའི་གྲོས་ཚོགས་འོག་མའི་འཐུས་མི་མཱེ་ཁེལ་ཝོལ་ཛ་(Micheal Waltz) ཡིས་གྲོས་འཆར་ཞིག་བཏོན་འདུག་པ་དང་། དེའི་ནང་ཁོང་གིས་རྒྱ་ནག་གི་འགྲོ་བ་མིའི་ཐོབ་ཐང་རྡོག་རོལ་དང་དེ་བཞིན་ཏོག་དབྱིབས་ནད་དུག་ཁྱབ་གདལ་སྦས་གསང་སོགས་དབང་ཆ་གཅིག་སྡུད་རིང་ལུགས་ཀྱི་བྱ་སྤྱོད་སྤེལ་བཞིན་ཡོད་ཁར། ལྷག་པར་དུ་འདས་པའི་ལོ་གཅིག་ནས་ཚབས་ཆེན་བྱ་སྤྱོད་དེ་དག་ཤུགས་ཆེ་རུ་བཏང་ཡོད་པས། གལ་ཏེ་ཕྱི་ལོ་༢༠༢༢ ལོའི་དགུན་ཁའི་ཨོ་རྩལ་འགྲན་ཚོགས་དེ་རྒྱ་ནག་ཏུ་འཚོག་ཚེ། རྒྱ་ནག་དམར་ཤོག་རྒྱལ་ཁབ་དེ་བློ་ཁོག་ཆེ་རུ་འགྲོ་རྒྱུ་ཡིན་སྐོར་བརྗོད་ནས། ཨ་རིའི་ཨོ་རྩལ་ལྷན་ཚོགས་ཀྱིས་རྒྱལ་སྤྱིའི་ཨོ་རྩལ་ལྷན་ཚོགས་ལ་དགུན་ཁའི་ལྷན་ཚོགས་དེ་རྒྱ་ནག་ནས་རྒྱལ་ཁབ་གཞན་ལ་གནས་སྤོ་བྱེད་པའི་གྲོས་འཆར་འདོན་པའི་རེ་སྐུལ་བྱས་འདུག་པ་དང་། གལ་ཏེ་དེ་ལྟར་མ་བྱས་ཚེ་ཨ་རི་དང་རྒྱལ་ཁབ་གཞན་གྱི་ཨོ་རྩལ་ལྷན་ཚོགས་ནས་རྒྱ་ནག་གི་ཨོ་རྩལ་འགྲན་ཚོགས་དེར་ངོ་རྒོལ་གྱིས་མཉམ་ཞུགས་མི་བྱེད་པའི་རེ་སྐུལ་བྱས་ཡོད་འདུག 

ཡུ་རོབ་མཐུན་ཚོགས་ཀྱི་གྲོས་ཚོགས་སུ་རྒྱ་ནག་གི་ཨོ་རྩལ་འགྲན་ཚོགས་ལ་གཞུང་འབྲེལ་ཐོག་ནས་ངོ་རྒོལ་བྱེད་དགོས་པའི་གྲོས་ཆོད་གཅིག་གཏན་འབེབས་བྱུང་ཡོད་པ་རེད་འདུག །

གསར་འགོད་པ་སྐལ་བཟང་དོན་གྲུབ།