རྒྱ་ནག་གི་ཨོ་རྩལ་ལ་ངོ་རྒོལ་ལས་འགུལ་སྤེལ་སོང་།

བོད་ཀྱི་གཞུང་འབྲེལ་མ་ཡིན་པའི་ཚོགས་པ་ལྔ་ཐུན་མོང་གི་ཐོག་ནས་འཛམ་གླིང་རྒྱལ་ཁབ་ཁག་གི་སྲིད་གཞུང་ལ་འདི་ལོའི་པེ་ཅིང་དགུན་དུས་ཨོ་རྩལ་རྩེད་འགྲན་ནང་མཉམ་ཞུགས་མི་བྱེད་པའི་འབོད་སྐུལ་ཞུ་བཞིན་ཡོད་ལ། དེ་ལྟར་དོན་དུ་འཁྱོལ་བ་བྱུང་ཚེ་རྒྱ་ནག་གཞུང་གིས་འགྲོ་བ་མིའི་ཐོབ་ཐང་དང་། རྒྱ་ནག་གཞུང་དང་ལྟ་སྤྱོད་མི་མཐུན་པའི་མི་སྣའི་ཐོག་བཙན་གནོན་གཏོང་བའི་བྱ་སྤྱོད་ངན་པ་དེ་དག་བཀག་འགོག་བྱ་རྒྱུར་ཕན་ནུས་ཆེན་པོ་ཐོན་ངེས་ཡིན་སྐོར་གསུངས་སོང་།

ཟླ་༡ པོའི་ཚེས་༤ ཉིན་དྷ་ས་མེག་གྷན་དུ་བོད་ཀྱི་གཞུང་འབྲེལ་མ་ཡིན་པའི་ཚོགས་པ་ལྔ་སྟེ་བོད་ཀྱི་གཞོན་ནུ་ལྷན་ཚོགས། བོད་ཀྱི་བུད་མེད་ལྷན་ཚོགས། བོད་ཀྱི་རྒྱལ་ཡོངས་མང་གཙོ་ཚོགས་པ། བོད་ཀྱི་དགུ་བཅུ་གསུམ་ལས་འགུལ་ཚོགས་པ། བོད་རང་བཙན་སློབ་ཕྲུག་ཚོགས་པ་བཅས་ནས། རྒྱ་ནག་གི་དགུན་དུས་ཨོ་རྩལ་འགྲན་ཚོགས་ལ་ངོ་རྒོལ་གྱི་རྒྱལ་སྤྱིའི་ལས་འགུལ་ཉིན་མོར་མཉམ་ཞུགས་གནང་ནས་ལས་འགུལ་སྤེལ་སོང་།

ཚོགས་པ་ལྔ་ཡིས་ང་ཚོས་རྒྱ་ནག་གི་འགྲོ་བ་མིའི་ཐོབ་ཐང་རྩོད་ལེན་པ་དང་། བོད་མི།  ཡུ་གུར་བ།  ཧོང་ཀོང་།   ལྷོ་སོག ཐེ་ཝན་བཅས་དང་མཉམ་འབྲེལ་ཐོག ཕྱི་ལོ་༢༠༢༢ ལོའི་ཨོ་རྩལ་རྩེད་འགྲན་ཚོགས་རྒྱུར་ངོ་རྒོལ་བྱེད་བཞིན་ཡོད། འགྲོ་བ་མིའི་ཐོབ་ཐང་གི་གནས་སྟངས་ཧ་ཅང་ཉེན་ཚབས་ཆེ་བའི་མཚམས་འདིར་ང་ཚོས་འཛམ་གླིང་རྒྱལ་ཁབ་ཁག་གི་སྲིད་གཞུང་དང་།   ཨོ་རྩལ་རྩེད་རིག་ཚོགས་ཆུང་།  ཨོ་རྩལ་གྱི་སྦྱིན་བདག་དང་བཅས་པ། དེ་བཞིན་དམངས་གཙོ་དང་རང་དབང་ལ་དགའ་ཞེན་ཡོད་པའི་མི་ཚང་མས་ད་ཐེངས་ཀྱི་ཨོ་རྩལ་འགྲན་ཚོགས་ནང་མཉམ་ཞུགས་མི་བྱ་རྒྱུའི་དགོས་འདུན་འདོན་བཞིན་ཡོད་སྐོར་གསུངས་སོང་།

དེ་ཡང་ཚོགས་པ་ལྔ་ཡི་བསྒྲགས་གཏམ་ནང་འཁོད་གསལ། “བོད་ཀྱི་གཞུང་འབྲེལ་མ་ཡིན་པའི་ཚོགས་པ་ལྔ་ཐུན་མོང་གི་ཐོག་ནས་བོད་དང་། ཤར་ཏུར་ཀི་སི་ཐན།  ཧོང་ཀོང་།  ལྷོ་སོག  རྒྱ་ནག  ཐེ་ཝན་བཅས་ཀྱི་ལས་འགུལ་བ་དང་མཉམ་དུ་ཕྱི་ལོ་༢༠༢༢ ལོའི་ཟླ་༡ ཚེས་༤ ཉིན་རྒྱལ་སྤྱིའི་ལས་འགུལ་ཉིན་མོར་མཉམ་ཞུགས་བྱ་རྒྱུ་ཡིན།  དེ་ནི་པེ་ཅིང་དུ་དགུན་དུས་ཨོ་རྩལ་རྩེད་འགྲན་ཚོགས་པའི་ཟླ་བ་གཅིག་གོང་གི་ཉིན་མོ་འདིར་ཆགས་ཡོད།  དེ་རིང་གི་ཉིན་མོ་འདི་ནི་རྒྱ་ནག་དམར་ཤོག་ཚོགས་པའི་བཙན་གནོན་དང་དབང་བསྒྱུར་འོག་འགྲོ་བ་མིའི་ཐོབ་ཐང་དང་གཞི་རྩའི་རང་དབང་ཙམ་མ་ཟད།  རྒྱལ་སྤྱིའི་ཁྱོན་ཡོངས་ལ་ཉེན་ཁ་བཟོ་བཞིན་ཡོད་པ་སོགས་ལ་བརྟེན་ནས་ང་ཚོས་རྒྱ་ནག་གི་འགྲོ་བ་མིའི་ཐོབ་ཐང་རྩོད་ལེན་པ་དང་། བོད་མི།  ཡུ་གུར་བ།  ཧོང་ཀོང་།   ལྷོ་སོག ཐེ་ཝན་བཅས་དང་མཉམ་འབྲེལ་ཐོག ཕྱི་ལོ་༢༠༢༢ ལོའི་ཨོ་རྩལ་རྩེད་འགྲན་ཚོགས་རྒྱུར་ངོ་རྒོལ་བྱེད་བཞིན་ཡོད། འགྲོ་བ་མིའི་ཐོབ་ཐང་གི་གནས་སྟངས་ཧ་ཅང་ཉེན་ཚབས་ཆེ་བའི་མཚམས་འདིར་ང་ཚོས་འཛམ་གླིང་རྒྱལ་ཁབ་ཁག་གི་སྲིད་གཞུང་དང་།   ཨོ་རྩལ་རྩེད་རིག་ཚོགས་ཆུང་།  ཨོ་རྩལ་གྱི་སྦྱིན་བདག་དང་བཅས་པ། དེ་བཞིན་དམངས་གཙོ་དང་རང་དབང་ལ་དགའ་ཞེན་ཡོད་པའི་མི་ཚང་མས་ད་ཐེངས་ཀྱི་ཨོ་རྩལ་འགྲན་ཚོགས་ནང་མཉམ་ཞུགས་མི་བྱ་རྒྱུའི་དགོས་འདུན་འདོན་བཞིན་ཡོད་”ཅེས་འཁོད་འདུག 

གསལ་བསྒྲགས་དེའི་ནང་རྒྱ་ནག་གི་བཙན་འོག་ཏུ་ཡོད་པའི་བོད་དང་མི་རིགས་གཞན་ཁག་གི་གནས་སྟངས་སྐོར་འཁོད་དོན། “བོད་ནང་གི་གནས་སྟངས་ཧ་ཅང་ཇེ་ཞན་ཇེ་སྡུག་ཏུ་འགྲོ་བཞིན་ཡོད་པ་དང་།  རྒྱལ་སྤྱིའི་རང་དབང་ལྷན་ཁང་ནས་བརྟག་དཔྱད་བྱས་པའི་སྙན་ཐོའི་ནང་འཁོད་པར་གཞིགས་ན། བོད་ནང་གི་གནས་སྟངས་དེ་སི་རི་ཡ་དང་ཤར་ཏུར་ཀི་སི་ཐན་ནང་བཞིན་རང་དབང་ཆུང་ཤོས་ཀྱི་གནས་སྟངས་འོག་ལུས་ཡོད་པ་གསལ་སྟོན་བྱས་ཡོད། ཤར་ཏུར་ཀི་སི་ཐན་ནང་ས་གནས་དེ་གའི་ཡུལ་མི་ས་ཡ་༡.༨ ནས་ས་ཡ་༣ བར་ཉེས་མེད་བཙན་བཟུང་བྱས་ཏེ་ངལ་རྩོལ་སློབ་གསོ་རྭ་བའི་ནང་བཅུག་ནས་ཆབ་སྲིད་སློབ་གསོ་དང་མི་སྤྱོད་ལས་འདས་པའི་མནར་གཅོད་གཏོང་བཞིན་ཡོད།  ཧོང་ཀོང་ལ་ཆ་མཚོན་ན་འགྲོ་བ་མིའི་ཐོབ་ཐང་ལས་འགུལ་བ་དང་གཞོན་སྐྱེས་རང་དབང་རྩོད་ལེན་པ་ཚོས་དམངས་གཙོའི་འབོད་སྒྲ་བསྒྲགས་པ་ཙམ་གྱིས་མི་སྣ་སྟོང་ཕྲག་མང་པོ་འཇུ་བཟུང་བྱས་ཡོད་པ་དང་།  རྒྱ་ནག་གཞུང་གིས་རྒྱ་ནག་རང་ཉིད་ཀྱི་རིག་གཞུང་དང་ཐ་དད་ཡིན་པའི་རིག་གཞུང་རྣམས་རྩ་མེད་གཏོང་གི་ཡོད་ཅིང་། ལྷོ་སོག་ལ་ཆ་མཚོན་ན་སོ་སོའི་མི་རིགས་ཀྱི་སྐད་ཡིག་བེད་སྤྱོད་བྱེད་པའི་ཐོབ་ཐང་དང་རང་དབང་བཙན་འཕྲོག་བྱེད་བཞིན་ཡོད་ལ། རྒྱ་ནག་གི་ཆབ་སྲིད་ཀྱི་འཇིགས་སྐུལ་དེ་རྒྱ་ནག་རང་ཉིད་ཀྱི་རྒྱལ་ཁོངས་ལས་རྒལ་ཏེ་རྒྱལ་སྤྱི་ཁྱོན་ཡོངས་ལ་འཇིགས་སྐུལ་བྱེད་བཞིན་ཡོད་པ་དཔེར་ན། ཐེ་ཝན་དང་། ལྷོ་རྒྱ་ནག་རྒྱ་མཚོ། རྒྱ་གར་དང་བོད་ཀྱི་ས་མཚམས་སོགས་སུའང་འཇིགས་སྐུལ་བྱེད་བཞིན་ཡོད་”ཅེས་འཁོད་འདུག

གསལ་བསྒྲགས་དེའི་ནང་མུ་མཐུད་འཁོད་དོན། “འདས་པའི་དུས་ཡུན་རིང་པོ་དེ་དག་གི་ནང་དུ་ང་ཚོས་རྒྱལ་སྤྱིའི་ཨོ་རྩལ་རྩེད་འགྲན་ཚོགས་པར། གལ་ཏེ་རྒྱ་ནག་ནང་ཨོ་རྩལ་རྩེད་འགྲན་འཚོགས་རྒྱུའི་གོ་སྐབས་སྤྲད་ཚེ་ཉེན་ཚབས་ཆེན་པོ་ཇི་ཙམ་ཡོད་པ་དང་། རྒྱ་ནག་གིས་འགྲོ་བ་མིའི་ཐོབ་ཐང་ཡར་རྒྱས་གཏོང་རྒྱུུའི་རྣམ་འགྱུར་རྫུན་མ་དེ་ཚོར་ཡིད་ཆེས་བྱ་རྒྱུ་མེད་ལུགས་ང་ཚོས་གོང་གི་ཡ་ང་བའི་གནས་ཚུལ་རྣམས་འབོད་སྐུལ་རབ་དང་རིམ་པར་ཞུས་ཡོད། ཕྱི་ལོ་༢༠༢༠ ནས་བཟུང་རྒྱ་ནག་གཞུང་གིས་སྔར་ལས་ལྷག་པའི་སྒོ་ནས་ས་གནས་བོད་མིའི་གྲངས་འབོར་ཉུང་དུ་གཏོང་བཞིན་ཡོད་པ་དང་།  བོད་མིའི་ཆོས་དང་རིག་གཞུང་སོགས་རྩ་མེད་དུ་གཏོང་ཆེད་སྲིད་ཇུས་གསར་པ་མང་པོ་ཞིག་གཏན་འབེབས་བྱས་ཡོད་པ་དང་། ཕྱི་ལོ་༢༠༡༩ ནས་༢༠༢༠ ལོ་བར་ཞིང་འབྲོག་གསོ་སྐྱོང་དང་ངལ་རྩོལ་ནུས་ཤུགས་སྤོ་བསྒྱུར་གྱི་འཆར་གཞི་ཟེར་བའི་སྲིད་ཇུས་དེ་མུ་མཐུད་ནས་ལག་ལེན་བྱས་ཏེ་བོད་ཀྱི་ཞིང་འབྲོག་མི་སེར་སྟོང་ཕྲག་མང་པོའི་རང་བདག་གི་ས་ཞིང་རྣམས་བཙན་འཕྲོག་བྱས་པ་ལྟ་བུ་ཆགས་ཡོད་སྟབས། མཐའ་མ་བཙན་ཤེད་ཀྱིས་གནས་སྤོ་མི་བྱེད་ཐབས་མེད་བྱུང་བའི་ཞིང་འབྲོག་པ་རྣམས་གྲོང་ཁྱེར་ཁག་གི་ནང་དཀའ་སྡུག་གི་འཚོ་བ་སྐྱེལ་དགོས་པ་ཞིག་ཆགས་ཡོད། 

རྒྱ་ནག་གཞུང་གིས་མི་རིགས་རྩ་མེད་དང་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་གི་ཡོད་པ་དེ་ནི་ཡོངས་གྲགས་ཆགས་ཡོད་ནའང་། ད་དུང་རྒྱལ་སྤྱིའི་ཨོ་རྩལ་རྩེད་འགྲན་ཚོགས་ཆུང་གིས་དེ་ལ་གཞིགས་པའི་ཐག་གཅོད་ཅིག་བྱས་མེད་པ་དང་། ང་ཚོས་འཛམ་གླིང་རྒྱལ་ཁབ་ཁག་གི་སྲིད་གཞུང་ལ་ད་ཐེངས་ཀྱི་ཨོ་གླིང་ཕིག་རྩེད་འགྲན་ནང་མཉམ་ཞུགས་མི་བྱ་རྒྱུའི་འབོད་སྐུལ་དང་དགོས་འདུན་བཏོན་ཡོད་ལ། དེ་ནི་རྒྱ་ནག་གི་ངོས་ནས་འགྲོ་བ་མིའི་ཐོབ་ཐང་ཡར་རྒྱས་གཏོང་བར་རྒྱལ་སྤྱིའི་སྤྱི་ཚོགས་དང་སྲིད་གཞུང་ཁག་གིས་རྒྱ་ནག་གཞུང་ལ་གནོན་ཤུགས་སྤྲོད་པའི་གོ་སྐབས་བཟང་ཤོས་ཤིག་ཆགས་ཡོད། ད་ལྟའི་ཆར་ཨ་རི་དང་། ལི་ཐུའུ་ནི་ཡ། ཉིའུ་ཛི་ལན་ཀྲེ། སེ་ཀོ་ལན་ཀྲེ།  སྦེལ་འཇམ། ཐེ་ཝན། ཨོ་སི་ཁྲུ་ལི་ཡ། དབྱིན་ཡུལ། ཁེ་ན་ཊ ཁོ་སེ་ཝོ་བཅས་ཀྱིས། གཞུང་འབྲེལ་གྱི་མི་སྣ་མཉམ་ཞུགས་མི་བྱེད་པའི་གསལ་བསྒྲགས་བསྐྱངས་ཡོད་པ་དང་། རྒྱ་གར་ནི་དམངས་གཙོའི་རྒྱལ་ཁབ་ཆེ་ཤོས་ཤིག་ཡིན་པའི་ཆ་ནས་གནས་སྐབས་ཀྱི་ཁེ་ཕན་ལ་མ་གཟིགས་པར། གོང་གསལ་རྒྱལ་ཁབ་ཁག་དང་མཉམ་དུ་གཞུང་འབྲེལ་སྐུ་ཚབ་མི་གཏོང་རྒྱུའི་དགོས་འདུན་འདོན་དགོས་པ་ཡིན། དེ་ལྟར་བྱས་ཚེ་རྒྱ་ནག་ལ་གདོང་ལེན་བྱ་རྒྱུའི་ཐད་ནུས་པ་དེ་བས་ཆེ་བ་ཞིག་འདོན་ཐུབ་པ་དང་རྒྱ་གར་གྱི་ངོས་ནས་འགྲོ་བ་མིའི་ཐོབ་ཐོབ་ཐང་གི་གནད་དོན་ཐད། དྲང་བདེན་གྱི་ཕྱོགས་སུ་ལངས་བཞིན་ཡོད་པ་དེ་ཡང་རྒྱ་ནག་ལ་བརྡ་ལན་གསལ་པོ་ཞིག་སྤྲོད་ཐུབ་ངེས་རེད་”ཅེས་འཁོད་འདུག

གསལ་བསྒྲགས་དེའི་ནང་འབོད་སྐུལ་ཞུས་དོན། “ང་ཚོས་འཛམ་གླིང་རྒྱལ་ཁབ་ཁག་གི་སྲིད་གཞུང་ལ་འདི་ལོའི་པེ་ཅིང་དགུན་དུས་ཨོ་རྩལ་རྩེད་འགྲན་ནང་མཉམ་ཞུགས་མི་བྱེད་པའི་འབོད་སྐུལ་ཞུ་བཞིན་ཡོད་ལ། དེ་ལྟར་དོན་དུ་འཁྱོལ་བ་བྱུང་ཚེ་རྒྱ་ནག་གཞུང་གིས་འགྲོ་བ་མིའི་ཐོབ་ཐང་དང་། རྒྱ་ནག་གཞུང་དང་ལྟ་སྤྱོད་མི་མཐུན་པའི་མི་སྣའི་ཐོག་བཙན་གནོན་གཏོང་བའི་བྱ་སྤྱོད་ངན་པ་དེ་དག་བཀག་འགོག་བྱ་རྒྱུར་ཕན་ནུས་ཆེན་པོ་ཐོན་ངེས་ཡིན་”ཞེས་འཁོད་འདུག །

གསར་འགོད་པ་སྐལ་བཟང་དོན་གྲུབ།