རྒྱ་ནག་གི་ཨོ་རྩལ་སྐབས་སུ་འབྲེལ་ཡོད་ཚོས་ཉེན་ཁ་ཆེ་བའི་ཁ་པར་མཉེན་ཆས་ཤིག་ཕབ་ལེན་བྱེད་དགོས་ཀྱི་ཡོད་འདུག

ཕྱི་ལོ་༢༠༢༢ ལོའི་ཟླ་༢ པའི་ཚེས་༤ ཉིན་རྒྱ་ནག་གི་རྒྱལ་ས་པེ་ཅིང་དུ་དགུན་དུས་ཀྱི་ཨོ་རྩལ་འགྲན་ཚོགས་འགོ་འཛུགས་བྱེད་ཀྱི་ཡོད་པ་དང་བསྟུན། རྒྱ་ནག་གཞུང་གིས་ཨོ་རྩལ་འགྲན་ཚོགས་སྐབས་སུ་རྩེད་འགྲན་པ་དང་འབྲེལ་ཡོད་ལྟད་མོ་བ། དེ་བཞིན་གསར་འགོད་པ་སོགས་ཀྱིས་པེ་ཅིང་དུ་མ་འབྱོར་བའི་ཉིན་གྲངས་༡༤ ཡི་སྔོན་ནས་(My2022)ཞེས་པའི་ཁ་པར་མཉེན་ཆས་ཕབ་ལེན་བྱེད་དགོས་ཀྱི་ཡོད་པ་དང་། དེའི་དགོས་པ་ནི་ཏོག་དབྱིབས་ནད་དུག་གི་གནས་སྟངས་རྟོག་ཞིབ་བྱེད་ཆེད་ཡིན་སྐོར་བརྗོད་འདུག

རྒྱལ་སྤྱིའི་དྲ་ཐོག་བདེ་འཇགས་ཚོགས་པ་ཞིག་གིས་རྒྱ་ནག་གི་མཉེན་ཆས་དེས་ཁ་པར་ནང་གི་ཡིག་ཆ་སོགས་ལ་བདེ་སྲུང་གི་ཆ་རྐྱེན་སྤྲོད་ཀྱི་མེད་ཁར། མཉེན་ཆས་དེའི་ནང་དུ་རྒྱ་ནག་གཞུང་ལ་ཚོར་བ་རྣོན་པའི་ཚིག་མང་པོ་ཞིག་ཞིབ་བཤེར་བྱེད་པའི་ཆ་རྐྱེན་བཟོ་སྐྲུན་བྱས་ཡོད་པ། དེ་བཞིན་གལ་ཏེ་དྲ་ཐོག་འཇབ་རྒོལ་བ་ཚོས་མཉེན་ཆས་དེ་བརྒྱུད་ནས་ཁ་པར་ནང་གི་གནས་ཚུལ་རྣམས་བརྐུ་ཐབས་བྱས་ཚེ་ལས་སླ་པོ་ཆགས་རྒྱུ་ཡིན་པས་ཉེན་ཁ་ཆེན་པོ་ཡིན་སྐོར་བརྗོད་འདུག

ཨ་རི་སོགས་རྒྱལ་ཁབ་མང་པོ་ཞིག་གིས་རྩེད་འགྲན་པ་ཚོས་རྒྱུན་དུ་ནས་བེད་སྤྱོད་གཏོང་གི་ཡོད་པའི་ཁ་པར་དེ་རང་ཁྱིམ་དུ་བཞག་ནས། རྒྱ་ནག་ཏུ་འགྲོ་སྐབས་རིན་གོང་ཆུང་ལ་ཞིབ་བཤེར་བྱེད་དཀའ་བའི་ཁ་པར་(Burner Phone)བེད་སྤྱོད་གཏོང་དགོས་པའི་ལམ་སྟོན་བྱས་ཡོད་འདུག དེ་བཞིན་དྲ་ཐོག་བདེ་འཇགས་ཚོགས་པ་དེས་ཁ་པར་དེ་རིགས་རྒྱ་ནག་ནས་ཐོན་སྐབས་ཕྱིར་རང་ཡུལ་དུ་འཁྱེར་མི་ཉན་པའི་ལམ་སྟོན་བྱས་འདུག

རྒྱ་ནག་གི་གཞུང་འབྲེལ་བརྒྱུད་ལམ་གོ་ལའི་དུས་བབ་ཀྱིས། རྒྱ་ནག་གི་མཉེན་ཆས་ཐོག་ལ་ཡོད་པའི་སེམས་འཚབ་རྣམས་ནི་དགོས་མེད་ཡིན་པ་དང་། མཉེན་ཆས་དེས་ཁ་པར་ནང་གི་སྒེར་གྱི་གནས་ཚུལ་ཚང་མར་བདེ་སྲུང་གི་ཆ་རྐྱེན་སྤྲོད་རྒྱུ་ཡིན་པ་དང་། མཉེན་ཆས་དེ་ནི་ཉི་ཧོང་དུ་དབྱར་ཁའི་ཨོ་རྩལ་འགྲན་ཚོགས་སྐབས་སུ་བེད་སྤྱོད་བཏང་བའི་མཉེན་ཆས་དང་གཤིབ་བསྡུར་བྱས་ཡོད་འདུག །

གསར་འགོད་པ་སྐལ་བཟང་དོན་གྲུབ།