རྒྱ་ནག་གིས་ཁ་ན་ཌའི་མི་སེར་གཉིས་ལ་གསང་བ་རྐུ་ཁྱེར་གྱི་ཉེས་འཛུགས།

ཁ་ན་ཌའི་མི་སེར་གཉིས་ལ་རྒྱ་ནག་གཞུང་གིས་རྒྱལ་ཁབ་ཀྱི་གསང་བ་རྐུ་ཁྱེར་བྱས་པའི་དོགས་གཞིའི་འོག་ཞིབ་བཤེར་བྱེད་བཞིན་པ་རེད།

ཁ་ན་ཌའི་མི་སེར་ཡིན་པ་ཁེ་ཝན་གྷ་རེ་ཁྲི་ (Kevin Garratt）དང་རྗུ་ལི་ཡ་ཌོན་གྷེ་རེ་ཁྲི་（Juliadawn Garratt）གཉིས་ལ་རྒྱ་ནག་རྒྱལ་ཁབ་ཀྱི་དམག་དོན་དང་རྒྱལ་སྲུང་གི་གསང་བ་རྐུ་འཁྱེར་བྱས་པའི་དོགས་གཞིའ་འོག ཕྱི་ཟླ་༨ པའི་ཚེས་༤ ཉིན་རྒྱ་ནག་ལེའོ་ནི་ཞིང་ཆེན་ཏེ་ཏོང་གྲོང་ཁྱེར་གྱི་རྒྱལ་ཁབ་བདེ་འཇགས་ལས་ཁུངས་ཀྱིས་ཁྲིམས་ཐོག་ནས་ཞིབ་བཤེར་བྱས་འདུག

ཁ་ན་ཌའི་བརྒྱུད་ལམ་ཁག་ཏུ་གནས་ཚུལ་སྤེལ་བ་ལྟར་ན། ཁ་ན་ཌའི་མི་སེར་དེ་གཉིས་ཀྱིས་བྱང་ཀོ་རི་ཡའི་མཐའ་མཚམས་དང་ཐག་ཉེ་བའི་རྒྱ་ནག་གི་ས་ཁོངས་སུ་ཚིག་ཇ་ཁང་ཞིག་སྒོ་ཕྱེས་ཡོད་པ་མ་ཟད། མཐའ་མཚམས་ས་ཁུལ་དུ་ཆེས་ཞིམ་ཤོས་ཀྱི་ཚིག་ཇ་མཁོ་སྤྲོད་བྱས་ཏེ། ཁོང་གཉིས་ཀྱི་ཇ་ཁང་ལ་ཡུལ་སྐོར་བ་རྣམས་ཀྱིས་ཧ་ཅང་དགའ་མོས་བྱས་པ་ཞིག་ཡིན་འདུག

རྒྱ་ནག་གཞུང་གིས་རྒྱལ་ཁབ་ཀྱི་གསང་བ་རྐུ་ཁྱེར་ཀྱི་ཉེས་འཛུགས་བྱས་པའི་ཁ་ན་ཌའི་མི་སེར་བཟའ་མི་དེ་གཉིས་ནི་༡༩༨༤ ལོ་ནས་རྒྱ་ནག་འཚོ་བ་སྐྱེལ་བཞིན་ཡོད་པ་དང་། ཁོང་གཉིས་ཀྱིས་ཚིག་ཇ་ཁང་དེ་༢༠༠༨ ལོར་སྒོ་ཕྱེས་པ་ཞིག་ཡིན་འདུག་ལ། དེའི་སྔོན་དུ་ཁོང་གཉིས་ཀྱིས་རྒྱ་ནག་གི་ལྷོ་ཕྱོགས་སུ་ཡི་གེ་བསླབས་ཏེ་བསྡད་ཡོད་པ་རེད།

རྒྱལ་ཁབ་ཀྱི་གསང་བ་རྐུ་ཁྱེར་བྱས་པ་ནི་རྒྱ་ནག་ཏུ་ཧ་ཅང་ཚབས་ཆེའི་ནག་ཉེས་ཤིག་ཡིན་པ་དང་། ཁྲིམས་ཐོག་ལ་རྒྱལ་ཁབ་ཀྱི་གསང་བའི་གོ་དོན་ནི་རྒྱལ་ཁབ་གསང་རྒྱ་ལས་ཁུངས་ཀྱིས་གཏན་འབེབས་བྱས་པ་མ་ཟད། གཞུང་ཕྱོགས་ཀྱི་འགྲེལ་བརྗོད་ལའང་རག་ལས་པ་ཞིག་ཡིན་འདུག

བདུན་ཕྲག་གཅིག་གི་སྔོན་དུ་ཁ་ན་ཎའི་སྲིད་བློན་སི་ཏི་ཧྥན་ཧར་ཕར་（Stephen Harper）གྱིས་ཐེངས་དང་པོར་ཡོངས་གྲགས་ཐོག་རྒྱ་ནག་གི་དྲ་ལམ་གསང་ཉུལ་ལས་འགུལ་ལ་སྐྱོན་བརྗོད་བྱས་ཡོད་པ་དང་། ཁོང་གིས་ཁ་ན་ཌའི་སྲིད་གཞུང་གིས་རྒྱ་ནག་གི་དྲ་ལམ་གསང་ཉུལ་བ་ངོས་འཛིན་གསལ་པོ་ཐུབ་ཡོད་ཅེས་བརྗོད་འདུག་ལ། བྱེད་སྟངས་དེ་ལྟ་བུ་ནི་ནམ་རྒྱུན་ཧ་ཅང་མཐོང་དཀོན་པ་དང་། རྒྱ་ནག་སྲིད་གཞུང་ལ་མངོན་གསལ་གྱིས་དོ་ཕོག་བཟོས་ཡོད་པ་རེད།།