རྒྱ་ནག་གིས་ཐའེ་ཝན་ལ་བཙན་རྒོལ་མི་བྱེད་པའི་རྒྱུ་མཚན་བརྒྱད།

ཨཀ་ཤེས་ན་རམ་གྱིས་བརྩམས། བློ་བཟང་རྒྱ་མཚོས་བསྒྱུར།

སྲིད་འཛིན་ཞི་ཅིང་ཕིང་འཛིན་སྐྱོང་གིས་འཇིགས་སྐུལ་ཐེངས་ཁ་ཤས་བྱས་ཏེ་རྒྱ་ནག་དང་ཐའེ་ཝན་གཉིས་བསྐྱར་དུ་གཅིག་འགྱུར་བྱེད་དགོས་པ་དང་། དགོས་ངེས་འདྲ་བྱུང་ཚེ་ཐ་ན་དྲགས་པོ་ཡང་བྱེད་འཆར་ཡོད་པ་ང་ཚོས་ཕལ་ཆེར་བརྗེད་ཚར་བ་རེད།
རྒྱ་ནག་མི་དམངས་བཅིངས་འགྲོལ་དམག་ལ་འཐབ་འཛིང་གནམ་གྲུ་ཐའེ་ཝན་གྱི་འགོག་སྲུང་ཁུལ་དུ་འཕུར་སྐྱོད་བྱེད་པའི་གོམས་གཤིས་ཀྱང་ཡོད། ཡིན་ནའང་། གནས་ཚུལ་གཅིག་གསལ་བོར་གྱུར་བ་ནི་རྒྱ་ནག་གིས་ཐེ་ཝན་ལ་བཙན་འཛུལ་མི་བྱེད་པ་དེ་རེད། རྒྱུ་མཚན་གང་ཞིག་ཡིན་པ་ང་ཚོས་འཚོལ་ན།

༡༽  དམག་གི་འགྲོ་སོང་ནི་ཧ་ཅང་ཆེ་བ་ཡིན།
བཙན་འཛུལ་ཉེས་ཆད་འགེལ་པ་ལ་རྒྱ་ནག་གིས་གདོང་ལེན་བྱེད་པའི་དབང་དུ་བཏང་། དེ་ཕུད་པའི་དམག་གི་འགྲོ་སོང་ནི་ཧ་ཅང་ཆེན་མོ་ཡིན། ཁྱེད་ཀྱིས་འཛུགས་སྐྲུན་གྱི་ལས་རིགས་ཕྱིར་བསྡུ་བྱས་ནས་སྲུང་ སྐྱོབ་ཀྱི་རྨང་གཞིའི་འཛུགས་སྐྲུན་ཐོག་ལ་འགྲོ་སོང་ཆེན་མོ་གཏོང་དགོས་པ་ཡིན། ཁུར་བོ་དེ་ནི་ཁྱེད་ཀྱི་དཔལ་འབྱོར་གྱི་ཐོག་ཏུ་ལྷུང་བ་ཡིན།
ད་ལྟའི་ཆར་རྒྱ་ནག་ལ་འགྲོ་སོང་ཆེན་པོ་གཏོང་བའི་གནས་སྟངས་དེ་མེད་པ་མ་ཟད། རྒྱ་ནག་གི་ས་ཁང་ཕ་ གཞིས་ཀྱི་གཉན་འཕྲང་དེ་ནི་ཇེ་སྡུག་ཏུ་འགྲོ་བཞིན་ཡོད། རྒྱ་ནག་གི་ཡུལ་ཐང་འཕར་ཆ་(inflation) ནི་ཇེ་ལྷོད་དུ་འགྲོ་ན་ཡང་། རྡོ་སོལ་གྱི་རིན་གོང་ནི་སླར་ཡང་འཕར་བཞིན་ཡོད། དེའི་དོན་ནི་གློག་ཤུགས་སྡེ་ཁག་(power sector) ལ་བསྐྱར་གསོའི་དཀའ་ངལ་འཕྲད་རྒྱུ་དང་བཟོ་སྐྲུན་ལས་རིགས་ཀྱི་རིན་གོང་སྔར་ལས་མཐོ་བར་འགྱུར་སྲིད་པ་དེ་ཡིན།

ད་དུང་རྡོ་སྣུམ་རྗེན་པ་དང་རང་བྱུང་སོལ་རླངས་ཀྱི་རིན་གོང་ནི་ཇེ་མཐོར་སོང་ཟིན་པ་ཡིན། དེའི་རྐྱེན་གྱིས་ནུས་ཤུགས་དང་འགྲིམ་འགྲུལ་གྱི་རིན་གོང་ཡང་ཇེ་མཐོར་འགྲོ་བ་ཡིན་པས། རྒྱ་ནག་གིས་ཡུལ་ཐང་འཕར་ཆ་ལ་དོ་སྣང་བྱེད་བཞིན་ཡོད་པས་རྒྱ་ནག་གིས་དམག་འཁྲུག་རྒྱག་ཐུབ་པ་ཞིག་མིན།

༢༽  ཐའེ་ཝན་ལ་གོ་མཚོན་མང་པོ་འཁྱེར་རྒྱུ་ཡོད།
ཁྱེད་ཀྱིས་ཐའེ་ཝན་དང་ཡུཀ་རན་གཉིས་བར་བསྡུར་ཐུབ་པ་ཞིག་མ་རེད། ཐའེ་ཝན་ནི་ཧ་ཅང་ཆུང་ཆུང་ ཞིག་རེད། ཡིན་ནའང་། ཡུཀ་རན་དང་མ་འདྲ་བ་ཐའེ་ཝན་ལ་གོ་མཚོན་མང་པོ་འཁྱེར་རྒྱུ་ཡོད། ཐའེ་ཝན་ནི་གླིང་ཕྲན་༡༠༠ ལྷག་ལས་གྲུབ་པ་ཞིག་ཡིན་ཞིང་། དེའི་ནང་གི་ཁ་ཤས་ནི་ཆུང་དྲགས་པས་འཛམ་གླིང་གི་ས་ཁྲའི་སྟེང་དུ་མཐོང་མི་ཐུབ། འོན་ཀྱང་། གནད་འགག་ནི་ཐའེ་ཝན་གྱི་ཕྱིའི་གླིང་ཕྲན་དུ་སྒྱོགས་མདེལ་དང་། མེ་ཤུགས་འཕུར་མདའ། མེ་སྒྱོགས་བཅས་ཀྱིས་བརྒྱན་ཡོད། ཐའེ་ཝན་གྱི་འཛེང་རྡོའི་རི་བོ་དག་(granite hills) ཀྱང་ཕུག་ལམ་དང་བཙན་རྫོང་མ་ལག་གི་ཁྱིམ་གཞིས་ཡིན།
དེར་བརྟེན་གལ་ཏེ་མི་མང་བཅིངས་འགྲོལ་དམག་གི་དམག་དཔུང་གླིང་ཕྲན་རྒྱལ་ཁབ་ཏུ་བབས་པ་ཡིན་ན། སྲུང་སྐྱོབ་དམ་པོ་ཡོད་པའི་བཙན་ཁུང་ནས་མེ་སྒྱོགས་འཕེན་པ་དང་མེ་མདའ་རྒྱག་པ། གཏོར་བརླག་གཏོང་བྱེད་ཀྱི་སྒྱོགས་མདེལ་བཅས་ཀྱིས་བསུ་བ་བྱེེད་རྒྱུ་རེད།  ཐའེ་ཝན་གྱི་འགོག་སྲུང་ལ་ལོ་ཤས་རིང་ཨ་རིས་དམག་དོན་རོགས་སྐྱོར་ལ་ཤུགས་སྣོན་བརྒྱབ་པར་བརྟེན་ཐའེ་ཝན་ལ་བཙན་འཛུལ་བྱས་པ་དེ་ནི་མི་མང་བཅིངས་འགྲོལ་དམག་ལ་ཤི་སྐྱོན་ཚབ་ཆེན་འབྱུང་རྒྱུ་ཡིན་པ་ངེས།

༣༽  ཉི་ཧོང་གི་ལྟ་སྟངས།
ཨ་མེ་རི་ཀ་ནི་སྲིད་འཛིན་བྷ་ཌན་གྱི་འོག་ཏུ་ཕལ་ཆེར་དལ་ལྷོད་ངང་འགྲོ་རྒྱུ་རེད། ཡིན་ནའང་། ཉི་ཧོང་གིས་རྒྱ་ནག་གྱི་བཙན་འཛུལ་ལ་ཁ་གཏད་བཅག་ནས་ཐའེ་ཝན་ལ་སྲུང་སྐྱོབ་བྱེད་རྒྱུ་ཁས་ལེན་བྱས་ཟིན་པ་ཡིན། ཐའེ་ཝན་ལ་སྲུང་སྐྱོབ་བྱེད་རྒྱུ་ནི་ཉི་ཧོང་གི་སྲིད་ཇུས་ཀྱི་གནད་དོན་ཞིག་རེད།
འདི་ནི་ཐད་ཀར་ཉི་ཧོང་གི་ཆེས་མཐོའི་ཆབ་སྲིད་མི་སྣ་སྐུ་ཞབས་ཤིང་ཙོ་ཨ་པེན་(Shinzo Abe) བརྒྱུད་ཡོང་བ་ཡིན། Japan Talks of Defending Taiwan Against China Aggression མི་སུ་ཞིག་གིས་ཉི་ཧོང་གི་སྲིད་གཞུང་འགོ་ཁྲིད་པ་ཡིན་ན། ཐའེ་ཝན་གྱི་མྱུར་སྐྱོབ་ཏུ་ཉི་ཧོང་ཡོང་རྒྱུ་ཡིན་པ་ཞིག་རེད། དེར་བརྟེན། རྒྱ་ནག་གིས་འཐབ་འཛིང་ནི་གླིང་ཕྲན་ཆུང་ཆུང་ཁོ་ན་དང་ལྷན་དུ་མ་ཡིན་པར་འཛམ་གླིང་ཐོག་གི་སྟོབས་ཤུགས་ཆེ་ཤོས་ཤིག་དང་འཐབ་རྩོད་བྱེད་དགོས་པ་དེ་ཡིན། གལ་ཏེ་ཉི་ཧོང་དམག་འཐབ་ནང་དུ་ཚུད་པ་ཡིན་ན། ཨ་མེ་རི་ཀས་མ་མཐར་ཡང་དམག་དོན་རོགས་སྐྱོར་གྱི་བྱ་བ་ཁ་ཤས་བསྒྲུབ་དགོས་པ་ཆགས་པ་ཡིན།
༤༽  ཐའེ་ཝན་ནི་QUAD(ཉི་ཧོང་དང་རྒྱ་གར། ཨ་རི། ཨོ་སི་ཁྲི་ལི་ཡ་བཅས་ལ་གོ་)ཡི་དཀྱིལ་ལ་ཡོད། ད་དུང་ཐའེ་ཝན་ལ་རོགས་སྐྱོབ་བྱེད་པར་ཡོང་མཁན་ནི་ཉི་ཧོང་ཁོ་ན་ཙམ་མ་ཡིན་པར་ཨ་མེ་རི་ཀ་ཡང་ཕྱོགས་གཅིག་ནས་ཡོང་གི་རེད། ཁོ་ཊི་(Quad) ཡིས་ཞི་བདེ་རྒྱ་མཚོའི་མངའ་ཁུལ་གྱི་ད་ལྟའི་གནས་སྟངས་རྒྱུན་འཁྱོངས་བྱ་རྒྱུར་ནན་བསྐུལ་བྱེད་པ་དང་དྲག་པོའི་ཐབས་ལམ་ནི་ཁས་ལེན་བྱེད་མི་ཐུབ་ཅེས་བརྗོད་ཡོད།

དེར་བརྟེན་གལ་ཏེ་རྒྱ་ནག་གིས་ཐའེ་ཝན་ལ་བཙན་འཛུལ་བྱས་པ་ཡིན་ན་དེ་ནི་ཨུ་རུ་སུ་ཡིས་ཡུ་ཁེ་རན་ལ་བཙན་འཛུལ་བྱེད་པ་དང་། བྱང་ཆིངས་རྩ་འཛུགས་(NATO) བདེ་འཇགས་ངང་བར་ཐག་རིང་པོར་གནས་པ་དང་མི་འདྲ་བ་ཡིན། རྒྱ་ནག་གིས་ཐའེ་ཝན་ལ་བཙན་འཛུལ་བྱེད་པ་དེ་ལ་ཕར་རྒོལ་བྱེད་ཆེད་ཁྱེད་ཀྱིས་རྒྱ་གར་དང་ཨོ་སི་ཁྲི་ལི་ཡ་གཉིས་ཀྱིས་ཉི་ཧོང་དང་མཉམ་དུ་ཟླ་སྒྲིལ་ཡོང་བའི་རེ་བ་བྱེད་ཆོག་པ་ཡིན། དེར་བརྟེན། རྒྱ་ནག་གིས་དམག་སྟོབས་ཆེ་བ་གསུམ་དང་ལྷན་དུ་གདོང་ཐུག་བྱེད་པའི་ཉེན་ཁ་དེ་ལེན་རྒྱུ་མ་རེད།

༥༽  འཛམ་གླིང་འདི་ནི་དམག་ལ་ངོ་རྒོལ་དང་ཉེས་ཆད་འགེལ་བར་འཇིགས་ས་ཞིག་ཆགས་ཡོད། ཨུ་རུ་སུ་དང་ཡུཀ་རན་གྱི་དམག་འཁྲུག་ལས་མངོན་པ་ལྟར། འཛམ་གླིང་མི་མང་དམག་འཁྲུག་ལ་ཡི་ག་སྤུ་ཙམ་ཡང་མེད། རྒྱུ་མཚན་དེ་ལ་བརྟེན་ནས་ད་ལྟའི་ཨུ་རུ་སུ་ལ་གཡས་དང་གཡོན། དབུས་བཅས་ཀྱིས་ཉེས་ཆད་འགེལ་བཞིན་ཡོད།
རྒྱ་ནག་གི་ངོས་ནས་བཤད་ན། འདི་གའི་གནས་ཚུལ་དག་ནི་ཧ་ཅང་དཀའ་ཚེགས་ཆེན་མོ་ཆགས་ཡོད། རྒྱ་ནག་ལ་ཡོ་རོབ་མནའ་འབྲེལ་དང་ཨ་རི་ལྷན་དུ་ཁེ་གྱོང་གི་ཨ་སྒོར་དུང་ཕྱུར་ཁྲི་༡་༦ ཡོད། གལ་ཏེ་རྒྱ་ནག་གིས་དངོས་སུ་ཐའེ་ཝན་ལ་ཚུར་རྒོལ་བྱས་ན། ཨ་རི་དང་ཡོ་རོབ་མནའ་འབྲེལ་གྱིས་རྒྱ་ནག་ལ་བཙན་ཤེད་ཀྱིས་ཁྲིམས་གཅོད་བྱེད་ངེས་རེད། ཤར་ལྷོ་ཨེ་ཤི་ཡ་ཤའི་མནའ་འབྲེལ་དང་། ཉི་ཧོང་། ལྷོ་ཀོ་རི་ཡ། ཨོ་གླིང་དང་རྒྱ་གར་བཅས་ཀྱང་དེའི་རྗེས་སུ་འབྲངས་ནས་རྒྱ་ནག་ལ་མཇུག་མཐར་ཨ་སྒོར་ཁྲག་ཁྲིག་གི་ཕམ་ཁ་བྱུང་བ་རེད།
ད་ལྟའི་ཆར། དེ་ནི་རྒྱལ་ཁབ་སུས་ཀྱང་ཁུར་མི་ཐུབ་པའི་གནད་དོན་ཞིག་ཡིན། ལྷག་པར་དུ་རྒྱལ་ཁབ་དེའི་དཔལ་འབྱོར་ཉམས་བཞིན་པའི་སྐབས་སུ་ཡོང་ཐུབ་པ་ཞིག་མིན་པས་དེ་ནི་ད་ལྟའི་རྒྱ་ནག་གི་གནས་ཚུལ་དང་འདྲ་བོ་ཡོད།

༦༽ རྒྱ་ནག་གི་ཏོག་དབྱིབས་གཉན་རིམས་ཀྱི་གནས་སྟངས།
དམག་འཁྲུག་གང་ཞིག་ཡིན་རུང་ཚང་མར་རྒྱལ་ཁབ་ཀྱི་བསམ་བློའི་སྐུལ་སློང་ཞིག་དགོས་པ་མ་ཟད། ཁྱེད་ལ་རྒྱལ་ཁབ་སླར་གསོའི་བསམ་བློ་ཞིག་དང་རང་ཉིད་ཀྱི་རྒྱལ་ཁབ་ལ་རྒྱབ་སྐྱོར་བྱེད་ཤུགས་ཆེ་རུ་གཏོང་བའི་འདུ་ཤེས་ཤིག་ཀྱང་དགོས། ཞི་ཅི་ཕིང་གིས་དེ་བྱེད་ཐུབ་བམ། ཁོང་གིས་བྱེད་མི་ཐུབ། ཁྱོད་ཀྱིས་རྒྱུ་མཚན་གང་ཡིན་ཤེས་འདོད་དམ། ངས་ཁྱོད་ལ་བཤད་རྒྱུ་ཡིན།
རྒྱ་ནག་གིས་ཁྱེད་ཚོར་ཅི་ཞིག་བཤད་རུང་། དོན་དངོས་ནི་རྒྱ་ནག་ནང་དུ་ཏོག་དབྱིབས་གཉན་རིམས་༡༩ དེ་ཡང་ཡང་ཁྱབ་བརྡལ་སོང་བའི་དབང་གིས་རྒྱ་ནག་ནང་ད་དུང་མི་མང་པོ་ཤི་བཞིན་ཡོད། དཔལ་འབྱོར་ཉམས་སྒུད་དུ་འགྲོ་བ་དང་མི་རྣམས་ནི་འཚོ་བ་ནི་ཕུན་སུམ་ཚོགས་པའི་གནས་སུ་བསླེབས་མེད།  ཁོང་ཚོ་ལ་ཆེས་མཐའ་མ་དགོས་པ་དེ་ཅི་རེད། ཁྲག་དྲི་བྲོ་བའི་དམག་འཁྲུག་དེ་རེད་དམ། དེར་བརྟེན། ཞི་ཅིང་ཕིང་གིས་ཐལ་ཆ་ཆེ་བའི་མི་རིགས་རིང་ལུགས་ལ་སྟངས་འཛིན་བྱེད་མི་ཐུབ་ལ། རྒྱ་ནག་མི་མང་རྣམས་དོན་སྙིང་སྤུུ་ཙམ་ཡང་མེད་པའི་དམག་འཁྲུག་ཅིག་ཏུ་ཡང་གཡུག་མི་ཐུབ།

༧༽ ཉེ་བའི་རྒྱུད་རྫས། (semiconductor)
རྒྱ་ནག་གིས་གོ་ལ་ཧྲིལ་པོའི་ཚན་རྩལ་གྱི་སྣེ་ཁྲིད་པ་ཞིག་བྱེད་འདོད་ཡོད་ཀྱང་། རྒྱ་ནག་ནང་གི་གློག་རྡུལ་བཟོ་གྲྭ་ལ་སྔོན་ཐོན་གྱི་ཉེ་བའི་རྒྱུད་རྫས་(semiconductors) དགོས་པ་ཡིན། རྒྱ་ནག་གིས་དེ་གང་ནས་རག་པ་ཡིན་ནམ། རེད། ཐའེ་ཝན་ནས་རེད། ཐའེ་ཝན་གྱིས་འཛམ་གླིང་གི་ཆེས་སྔོན་ཐོན་གྱི་ཉེ་བའི་རྒྱུད་རྫས་བཟོ་སྐྲུན་བྱེད་ནུས་༩༢% བཟུང་ཡོད། ལྷོ་ཀོ་རི་ཡས་ལྷག་མ་༨% དེ་བཟུང་ཡོད་པས་རྒྱ་ནག་གིས་སོ་སོའི་ལུང་པའི་ནང་ཉེ་བའི་རྒྱུད་རྫས་ཀྱི་འཕྲུལ་ཆས་བཟོ་བསྐྲུན་བྱེད་ཐུབ་མེད། དེར་བརྟེན། གལ་སྲིད་ཞི་ཅིན་ཕིང་གིས་ཐའེ་ཝན་དང་དམག་འཁྲུག་བརྒྱབ་ན། གླིང་ཕྲན་རྒྱལ་ཁབ་ཀྱིས་རྒྱ་ནག་ལ་ཉེ་བའི་རྒྱུད་རྫས་གཏོང་རྒྱུ་བཀག་ནས་རྒྱ་ནག་གི་ཚན་རྩལ་སྡེ་ཁག་གྲགས་འགུལ་མེད་པ་བཟོ་བ་རེད། དེ་ནི་རྒྱ་ནག་གིས་ཐའེ་ཝན་ལ་ཕར་རྒོལ་མི་བྱེད་པའི་རྒྱུ་རྐྱེན་གཞན་ཞིག་ཡིན།

༨༽  ཞི་ཅིང་ཕིང་གི་ནང་ཁུལ་གྱི་བཙན་ཤེད།
ཞི་ཅིང་ཕིང་གིས་རྒྱ་ནག་གི་སྲིད་འཛིན་གྱི་ཡུན་ཚད་མེད་པ་བཟོས་ཞིང་གཞུང་འབྲེལ་མིན་པའི་ཐོག་ནས་ཁོང་རང་ཉིད་མི་ཚེ་གང་བོ་རྒྱ་ནག་གི་སྲིད་འཛིན་ཏུ་ཐོབ་པ་བྱས་པ་རེད། ཡིན་ནའང་། སྒུག་དང་། རྒྱ་ནག་དམར་ཤོག་ཚོགས་པའི་དབུས་ཆབ་སྲིད་ཁང་གི་རྒྱུན་ལས་ཀྱིས་ཁོང་ཉིད་རྒྱ་ནག་དམར་ཤོག་ཚོགས་པའི་སྤྱི་ཁྱབ་དྲུང་ཆེ་དང་རྒྱ་ནག་གི་སྲིད་འཛིན་དུ་བདམས་ན་མ་གཏོགས་ཁོང་ཉིད་གོ་གནས་མཐོ་ཤོས་སུ་འདུག་མི་ཐུབ། དེར་བརྟེན། གལ་སྲིད་ཞི་ཅིང་ཕིང་གིས་ཐའེ་ཝན་ལ་ཕར་རྒོལ་བྱས་ཏེ་དུས་ཡུན་རིང་པོའི་དམག་འཁྲུག་རྒྱག་མ་ཐུབ་ན། ཞི་ཅིང་ཕིང་གིས་མི་མང་བཅིངས་གྲོལ་དམག་ལ་ཡ་ང་བའི་བྱས་རྗེས་ཟིན་ཐོ་ཞིག་སྤྲད་པ་རེད། དེ་ནས་ཞི་ཅིང་ཕིང་གི་ཡོད་ཚད་ཚར་བ་ཡིན་ལ་ཞི་ཅིང་ཕིང་གི་སྲིད་དོན་གྱི་ལས་ཀ་དེ་ཡང་མཇུག་སྒྲིལ་པ་ཡིན། དེར་བརྟེན་ཞི་ཅིང་ཕིང་གིས་ཐའེ་ཝན་ལ་ཕར་རྒོལ་བྱེད་ཆེད་ཉེན་ཁ་དེ་ཐམས་ཅད་ལེན་གྱི་མ་རེད། དེར་བརྟེན། རྒྱ་ནག་དམར་པོའི་སྲིད་གཞུང་གིས་དྲིལ་བསྒྲགས་གང་བྱེད་ལ་མ་ལྟོས་པར། རྒྱ་ནག་གིས་ཐའེ་ཝན་ལ་བཙན་འཛུལ་བྱེད་རྒྱུ་དེ་ནི་ཧ་ལམ་མ་ངེས་པ་ཡིན།།

རྩོམ་པ་པོ་ ཨཀ་ཤེས་ན་རམ་ནི་རྒྱལ་གཅེས་མི་སྣ། ཆབ་སྲིད་དབྱེ་ཞིབ་པ། རྒྱལ་སྤྱིའི་འབྲེལ་བའི་ཆེད་མཁས་པ། TFIGlobal ཞེས་པའི་གསར་ཁང་གི་རྩོམ་པ་པོ་ཞིག་ཡིན་པ་རེད། སྒྱུར་རྩོམ་འདིའི་ཚད་འཛིན་མ་རྩོམ་དབྱིན་ལ་འཛིན་དགོས། 8 reasons why China won’t attack Taiwan