རྒྱ་ནག་གིས་དམག་གྲངས་ཉུང་དུ་གཏོང་རྒྱུ་ཡིན་ཟེར།

རྒྱ་ནག་གིས་དམག་གྲངས་ཉུང་དུ་གཏོང་རྒྱུ་ཡིན་སྐོར་བརྗོད་པ་དེ་དམག་ཆས་དང་དམག་མིའི་སྦྱོང་བརྡར་ལ་འགྲོ་སོང་མང་དུ་གཏོང་ཆེད་ཡིན་པར། དམག་བྱུས་དཔྱད་བརྗོད་པ་མང་པོ་ཞིག་གིས་འགྲེལ་བརྗོད་བྱེད་བཞིན་ཡོད་འདུག

དེ་ཡང་ཟླ་འདིའི་ཚེས་༣ ཉིན་རྒྱ་ནག་གི་འཛམ་གླིང་དམག་ཆེན་གཉིས་པ་མཇུག་བསྒྲིལ་བའི་དུས་དྲན་ཞིག་པེ་ཅིན་གྱི་གནམ་སྡེ་གོ་མོར་སྲུང་བརྩི་བྱས་པ་དང་། མཛད་སྒོའི་སྐབས་སུ་རྒྱ་ནག་གི་སྲིད་འཛིན་ཞིན་ཅི་ཕིང་གིས་ཞི་བདེའི་ཆེད་དུ། རྒྱ་ནག་གི་དམག་མི་གྲངས་༣,༠༠,༠༠༠ འབུམ་གསུམ་ཉུང་དུ་གཏོང་རྒྱུ་ཡིན་པ་གསལ་བསྒྲགས་བྱས་འདུག

རྒྱ་ནག་གི་དམག་ཤུགས་ཆེན་པོ་ཆགས་ཡོང་བར། ཁྱིམ་མཚེས་རྒྱལ་ཁབ་རྒྱ་གར་དང་དེ་བཞིན་ལྷོ་རྒྱ་ནག་རྒྱ་མཚོའི་རྩོད་རྙོག་ནང་དུ་ཚུད་ཡོད་པའི་ཨེ་ཤི་ཡའི་ལུང་པ་མང་པོ་ཞིག་གིས་དོ་སྣང་དང་དོགས་པ། དེ་བཞིན་གྲ་སྒྲིག་ཡང་མང་པོ་བྱེད་བཞིན་པའི་སྐབས་དེར། རྒྱ་ནག་གིས་དམག་ཤུགས་ཆུང་དུ་གཏོང་བའི་གསལ་བསྒྲགས་དེས། ཕྱི་ལ་ཞི་བདེའི་ལམ་ལ་འཇུག་པ་ལྟ་བུར་མངོན་ཀྱང། དོན་དངོས་སུ་རྒྱ་ནག་གིས་དམག་ཤུགས་ཆུང་དུ་བཏང་རྗེས། དམག་ཆས་དང་དམག་མིའི་སྦྱོང་བརྡར་ལ་འགྲོ་སོང་མང་དུ་གཏོང་ཆེད་ཡིན་པར། དམག་བྱུས་དཔྱད་བརྗོད་པ་མང་པོ་ཞིག་གིས་འགྲེལ་བརྗོད་བྱེད་བཞིན་ཡོད་འདུག

དེ་རིང་གི་མཛད་སྒོའི་ཐོག་རྒྱལ་སྤྱིའི་ཐོག་ནས་མགོ་ཁྲིད་མང་པོ་ཞིག རྒྱ་ནག་གི་འཆར་གཞི་ལྟར་སླེབས་མེད་འདུག མཛད་སྒོའི་ཐོག་དམག་གི་རུ་སྒྲིག་རྔམས་སྟོན་གྲ་རྒྱས་པོ་བྱས་ཡོད་པ་དང། དེ་ནི་འཛམ་གླིང་རྒྱལ་ཁབ་གཞན་ལ་རྒྱ་ནག་གི་དམག་ཤུགས་ངོམས་ཆེད་ཡིན་པ་རྒྱལ་སྤྱིའི་གསར་ཤོག་མང་པོའི་ནང་བཀོད་འདུག
རྒྱ་གར་གྱི་དུས་བབ་སྟེང་དུ། རྒྱ་ནག་གི་དམག་ཤུགས་ངོམས་པར་བརྟེན།རྒྱ་ནག་དང་ས་མཚམས་ཀྱི་རྩོད་གཞི་ཡོད་མཁན་ཨེ་ཤི་ཡའི་ལུང་པ་རྒྱ་གར་དང་ཉི་ཧོང་སོགས་ཀྱི་དམག་ཆས་དང། དམག་གི་སྟོབས་ཤུགས་ཆེད་འགྲོ་སོང་མང་དུ་གཏོང་སྲིད་པ་རེད་ཅེས་བཀོད་འདུག
དེ་སྔོན་རྒྱ་ནག་གི་དམག་ཤུགས་༢,༣༠༠,༠༠༠ ས་ཡ་གཉིས་དང་འབུམ་གསུམ་ཡིན་པ་དང།་འཛམ་གླིང་ནང་དམག་གྲངས་ཆེ་ཤོས་ཡིན་པ་ངོས་འཛིན་བྱེད་བཞིན་འདུག །
སྐལ་བཟང་དོན་གྲུབ།