རྒྱ་ནག་གིས་ནད་ཡམས་ཕྱིར་བསྒྲགས་བྱེད་མཁན་རྣམས་ལ་དམ་དྲག་བྱེད་བཞིན་ཡོད་འདུག

རྒྱ་ནག་གི་གྲོང་ཁྱེར་ཝུའུ་ཧན་ནས་བྱུང་བའི་“ཏོག་དབྱིབས་གློ་ཚད་རིམས་ནད་”ཅེས་པ་དེ་ད་ལྟ་འཛམ་གླིང་གི་ས་ཕྱོགས་གང་སར་ཁྱབ་གདལ་དུ་ཕྱིན་ནས་མི་༡༣༢ གྱི་ཚེ་སྲོག་ཤོར་ཟིན་པ་དང་། མི་ ༦༠༠༠ ལྷག་(རྒྱ་ནག་གིས་གསང་བ་བྱས་པ་མ་གཏོགས་དེ་ལས་ལྡབ་ཀྱིས་མང་བ་ཡོད་ཚུལ་སྨྲ་མཁན་མི་ཉུང་བ་ཞིག་ཡོད།)ལ་འཇིགས་སུ་རུང་བའི་ནད་ཡམས་དེ་འགོས་པ་ར་འཕྲོད་བྱུང་བ་མ་ཟད། ཚན་རིག་པ་ཚོས་སྔོན་འགོག་དང་བཅོས་ཐབས་མ་རྙེད་པར་ཉིན་རེ་བཞིན་འཆི་བ་དང་ནད་པའི་ཁ་གྲངས་ཇེ་མཐོར་འགྲོ་བཞིན་པའི་ཛ་དྲག་གི་དུས་འདིར། རྒྱ་ནག་གཞུང་ནས་ནད་ཡམས་འདི་དང་འབྲེལ་བའི་སྐོར་གྱི་གནས་ཚུལ་དྲ་ལམ་བརྒྱུད་དེ་ཕྱིར་བསྒྲགས་བྱེད་མཁན་རྣམས་ལ་ཉེས་ཆད་ཚབས་ཆེན་གཅོད་ཀྱི་ཡིན་པའི་ཉེན་བརྡ་བཏང་ཡོད་འདུག 

དེ་ཡང་ཝུའུ་ཧན་གྱི་ནད་ཡམས་འདིས་སྐམ་ས་ཆེན་པོའི་རྒྱ་མི་མང་པོ་ཞིག་ལ་རྒྱ་ནག་དམར་ཤོག་ཚོགས་པ་དང་། དེའི་དྲིལ་བསྒྲགས་གསར་འགྱུར་བརྒྱུད་ལམ་ཁག་གིས་བདེན་པའམ་གནས་ཚུལ་ཆ་ཚང་ཞིག་བརྒྱུད་བསྒྲགས་བྱེད་ཀྱི་མེད་པ་རྟོགས་སུ་བཅུག་ཡོད། དེ་བས་ཝུའུ་ཧན་གྲོང་ཁྱེར་གྱི་སྤྱི་ཚོགས་དྲ་ལམ་བཀོལ་སྤྱོད་མཁན་རྣམས་དང་། ལྷག་པར་དུ་སྨན་པ་དང་སྨན་ཞབས་ཚོས་བརྙན་ཐུང་བླངས་ཏེ་སོ་སོའི་མཐོང་ཐོས་ཀྱི་མྱོང་བ་དངོས་རྣམས་བརྒྱུད་ལམ་ཁག་ཏུ་བཀྲམ་ཏེ་མི་ཚང་མར་ཉེན་བརྡ་སྤྲད་འདུག་པ་དེ་གཞུང་འཛིན་མི་སྣ་ཚོས་ངོ་ཚ་ཁ་སྐྱེངས་ཤིག་ཏུ་མཐོང་ཡོད་འདུག 

རྒྱ་ནག་སྲིད་གཞུང་གི་དྲིལ་བསྒྲགས་གསར་ཁང་གཙོ་བོ་སྟེ། ཤིན་ཧ་གསར་འགྱུར་ཁང་ནས་གནས་ཚུལ་སྤེལ་བ་ལྟར་ན། ཕྱི་ཟླ་༡ ཚེས་༢༥ ཉིན་རྒྱ་ནག་ཏུ་དར་ཁྱབ་ཤིན་ཏུ་ཆེ་བའི་སྐད་འཕྲིན་ཁང་(Wechat)ནས་“རིམས་ནད་གསར་པའི་སྐོར་གྱི་དཀྲོག་གཏམ་ཁྱབ་སྤེལ་གཏོང་མཁན་རྣམས་”ཉེས་ཆད་གཅོད་རྒྱུ་ཡིན་པའི་བརྡ་ཁྱབ་གསར་པ་ཞིག་སྤེལ་ཡོད་འདུག་ཅིང་། བརྡ་ཁྱབ་དེའི་ནང་“དྲ་བའི་ཐོག་ཏུ་བདེན་པ་མ་ཡིན་པའི་གནས་ཚུལ་སྣ་ཚོགས་ཤིག་སྤེལ་བཞིན་པ་དེས་ཡང་ཡང་མི་མང་ལ་སེམས་འཚབ་སློང་གི་ཡོད་སྟབས། གནས་ཚུལ་རྫུན་མ་བརྒྱུད་བསྒྲགས་བྱེད་མཁན་ཚང་མ་ལ་ལོ་གསུམ་ཚུན་གྱི་བཙོན་འཇུག་བཀག་ཉར་རམ། སློབ་གསོ་སྤེལ་རྒྱུ་ཡིན་པའི་ཐོག མཇུག་འབྲས་ཚབས་ཆེན་སློང་མཁན་རྣམས་ལ་ལོ་༣ ནས་༧ བར་དུ་བཙོན་འཇུག་བྱེད་རྒྱུ་ཡིན་”ཞེས་འཁོད་ཡོད་འདུག 

དེ་བཞིན་རྒྱ་ནག་དྲ་ལམ་རྟོག་ཞིབ་ལས་ཁུངས་ནས་ཕྱི་ལ་ཤོར་བའི་ཡིག་ཆ་ཞིག་གི་ནང་། ཚེས་༢༦ ནས་བཟུང་སྟེ་སྤྱི་ཚོགས་དྲ་ལམ་ཚོགས་པ་གཅིག་གིས་ཀྱང་ནད་ཡམས་སྐོར་གྱི་གནས་ཚུལ་གཞུང་འབྲེལ་མ་ཡིན་པ་གཅིག་ཀྱང་བརྒྱུད་བསྒྲགས་བྱེད་མི་ཆོག་པ་བཟོ་རྒྱུ་དང་། གཞུང་འབྲེལ་གསར་ཁང་ནས་མ་ཡིན་པའི་གནས་ཚུལ་སྤེལ་མཁན་རྣམས་ཉེན་རྟོག་པའི་འཛིན་བཟུང་བྱེད་དགོས་ཚུལ་བཀོད་ཡོད་འདུག 

གཞན་ཡང་ནད་ཡམས་དེ་ཐོག་མར་ཝུའུ་ཧན་གྲོང་ཁྱེར་དུ་བྱུང་བའི་སྐབས། ས་གནས་འགོ་ཁྲིད་ཚོས་གནས་ཚུལ་ཕྱིར་བསྒྲགས་དང་ཉེན་བརྡ་གཏོང་མཁན་རྣམས་“དཀྲོག་གཏམ་བཟོ་མཁན་”གྱི་ཉེས་མིང་འོག་འཛིན་བཟུང་དང་བཀག་ཉར་བྱས་པའི་མཇུག་འབྲས་སུ། གྲོང་ཁྱེར་ཧྲིལ་པོ་སྒོ་མ་བརྒྱབ་བར་དུ་མི་མང་རྣམས་ལ་ནད་ཡམས་དེའི་སྐོར་གྱི་གནས་ཚུལ་ཤེས་རྟོགས་མ་བྱུང་བར་ལུས་ཡོད་འདུག 

སྐད་འཕྲིན་གྱི་སྒྲིག་ཁྲིམས་གསར་པ་དེ་ཁྱབ་བསྒྲགས་བྱས་རྗེས། རྒྱ་ནག་གི་དྲ་ལམ་བཀོལ་སྤྱོད་མཁན་རྣམས་ཁོང་ཁྲོ་ཆེན་པོ་ལངས་པ་དང་། མི་གཅིག་གིས་“ཝུའུ་ཧན་གྱི་ནད་ཡམས་མགྱོགས་མྱུར་ཁྱབ་གདལ་འགྲོ་བའི་རྒྱུ་མཚན་ངོ་མ་དེ་གཞུང་འཛིན་མི་སྣ་ཚོས་གནས་ཚུལ་བཀག་འགོག་བྱས་པས་རེད། ཁྱོད་ཚོས་མུ་མཐུད་གནས་ཚུལ་ཕྱིར་བསྒྲགས་བྱེད་མཁན་རྣམས་ཀྱི་ཁ་འགོག་བཞིན་པ་ཅི་འདྲའི་ངོ་ཚ་བྲལ་བ་ཞིག་རེད་”ཅེས་བྲིས་ཡོད་འདུག 

དེ་བཞིན་སྤྱི་ཚོགས་དྲ་ལམ་དུ་ཤུགས་ཆེར་བརྒྱུད་སྤེལ་བྱས་པའི་བརྙན་ཐུང་དང་སྐད་ཆའི་ནང་། ནད་པས་གང་བའི་སྨན་ཁང་དུ་ནད་ཡམས་ཕོག་ནས་ཤི་བའི་རོ་བདག་མེད་པར་བསྐྱུར་བ་དང་། སྲང་ལམ་དུ་མི་རྣམས་གློ་བུར་དུ་འགྱེལ་བ། སྨན་པ་ཞིག་གིས་ཁ་པར་བརྒྱུད་དེ་སྨན་ཁང་གི་འགན་འཛིན་ལ་དགོས་ངེས་ཀྱི་མཐུན་རྐྱེན་སྐྲུན་དགོས་ཚུལ་རྗོད་བཞིན་པ། ད་དུང་རྒྱ་ནག་སྲིད་གཞུང་ལ་ཡིད་ཆེས་བྱེད་མི་རུང་བའི་སྐོར་གྱི་སྐད་ཆ་སོགས་འདུག །