རྒྱ་ནག་གིས་མང་གཙོ་རྒྱལ་ཁབ་ཁག་གི་འོས་བསྡུའི་ནང་ཐེ་གཏོགས་བྱས་འདུག

ཟླ་འདིའི་ཚེས་༩ ཉིན་བྷི་བྷི་སི་གསར་ཁང་གིས་གནས་ཚུལ་སྤེལ་གསལ་ལྟར་ན། ཁེ་ན་ཌ་ཡི་སྲིད་བློན་གྱིས་རྒྱ་ནག་གིས་ཁེ་ན་ཌའི་འོས་བསྡུའི་ལས་རིམ་ཐོག་ལ་ཐེ་བྱུས་བྱས་ཡོད་པའི་ཐོག་ལ་སྐྱོན་བརྗོད་བྱས་འདུག

ཁེ་ན་ཌའི་གསང་བའི་མི་སྣས་རྒྱ་ནག་གཞུང་གིས་གསང་བའི་ཐོག་ཁེ་ན་ཌའི་འོས་མི་ཚོ་ལ་རྒྱབ་སྐྱོར་བྱས་ཡོད་པ་ཤེས་རྟོག་བྱུང་ཡོད་འདུག་ལ། ཁེ་ན་ཌའི་སྲིད་བློན་(Trudeau) ཡིས་ཕྱི་ལོ་༢༠༡༩ ལོའི་སྤྱི་མཐུན་སྲིད་གཞུང་གི་འོས་བསྡུ་(Federal Election) བྱེད་པའི་སྐབས་སུ་འོས་མི་ཉུང་མཐའ་ལ་༡༡ ལ་རྒྱ་ནག་གཞུང་གིས་གསང་བའི་ཐོག་རྒྱབ་སྐྱོར་བྱས་ཡོད་རབས་བརྗོད་འདུག

རྒྱ་ནག་གཞུང་གིས་ཁེ་ན་ཌའི་རྙིང་ཞེན་ཚོགས་པ་དང་གུ་ཡངས་མང་གཙོ་ཚོགས་པ་བཅས་ཆབ་སྲིད་ཚོགས་པ་གཉིས་ཀའི་འོས་མི་ཚོའི་ཐོག་ལ་ཐེ་གཏོངས་བྱས་ཡོད་པ་ཡིད་ཆེས་བྱེད་བཞིན་འདུག

གནས་ཚུལ་དབྱི་ཞིབ་པ་ཚོས་རྒྱ་ནག་གཞུང་གིས་མང་གཙོའི་རྒྱལ་ཁབ་ཁག་གི་འོས་བསྡུ་ཐོག་ལ་ཐེ་གཏོགས་དང་འོས་མི་ཚོ་ལ་རྒྱབ་སྐྱོར་གྱིས་མཐའ་མ་རྒྱལ་ཁབ་དེའི་སྲིད་བྱུས་ལ་འགྱུར་བ་གཏོང་ཐབས་བྱེད་ཀྱི་ཡོད་རབས་བརྗོད་འདུག

ཟླ་བ་བཅུ་པའི་ནང་དུ་རྒྱ་ནག་གིས་ཁྲིམས་འགལ་ཐོག་རྒྱ་ཁབ་མང་པོའི་ནང་ལ་ཉེན་རྟོག་ལས་ཁུངས་བཙུགས་ཡོད་པའི་གནས་ཚུལ་བྱུང་བའི་རྗེས་སུ། རྒྱ་ནག་གཞུང་གིས་ཁེ་ན་ཌའི་འོས་བསྡུའི་ནང་ལ་ཐེ་གཏོགས་བྱས་ཡོད་པའི་གནས་ཚུལ་དེ་ཤེས་རྟོག་བྱུང་ཡོད་པ་རེད་འདུག

ལོ་འདིའི་ཟླ་བ་བཅུ་པའི་ནང་རྒྱ་ནག་གཞུང་གིས་དབྱིན་ཡུལ་དང་ཧྥ་རན་སི། འཇར་མན་ནི་དང་ཁེ་ན་ཌ་སོགས་རྒྱལ་ཁབ་༢༡ ནང་ལ་ཁྲིམས་འགལ་གྱི་ཉེན་རྟོག་ལས་ཁུངས་ཁྱོན་བསྡོམས་༥༤ ལྷག་བཙུགས་ཡོད་པ་དང་། ཉེན་རྟོག་ལས་ཁུངས་དེ་དག་མང་ཆེ་བ་ནི་ཡུ་རོབ་རྒྱལ་ཁབ་ཁག་དང་ལྷག་པར་དུ་ཡར་ཐོན་རྒྱལ་ཁབ་ཁག་གི་ནང་དུ་བཙུགས་ཡོད་འདུག། ཁྲིམས་འགལ་ཐོག་བཙུགས་པའི་ཉེན་རྟོག་ལས་ཁུངས་དེ་དག་བརྒྱུད་ནས་རྒྱ་ཁབ་དེའི་འོས་བསྡུའི་ལས་རིམ་ཐོག་ལ་ཐེ་གཏོགས་བྱེད་ཀྱི་ཡོད་པའི་གནས་ཚུལ་ཐོན་ཡོད།

གསར་འགོད་པ། བློ་བཟང་རྒྱ་མཚོ།