རྒྱ་ནག་གིས་ཨ་རིའི་གློག་བརྙན་ཞིག་བཀག་སྡོམ་བྱེད་དགོས་སྐོར་བཤད་འདུག

ཨ་རི་བོད་ཁང་ནས་ལོ་རེའི་དགོས་དངུལ་མཁོ་བསྡུའི་དགོང་ཚོགས་ཐེངས་༣༥ པའི (35th Annual Benefit Concert) ཐོག་གློག་བརྙན་འཁྲབ་སྟོན་པ་གྲགས་ཅན་ཁི་ནོ་(Keau Reeves) མཉམ་ཞུགས་བྱེད་རྒྱུ་ཡིན་པའི་གསལ་བསྒྲགས་སྤེལ་རྗེས། རྒྱ་ནག་གིས་ཁོང་ལ་ཁ་རྡུང་སྐྱོན་བརྗོད་དང་། ཁོང་གིས་འཁྲབ་པའི་གློག་བརྙན་རྣམས་བཀག་སྡོམ་(boycott) བྱེད་རྒྱུ་ཡིན་ཚུལ་བཤད་ཡོད་འདུག 

བརྒྱུད་ལམ་ཁག་ནས་གནས་ཚུལ་སྤེལ་བ་ལྟར་ན། གློག་བརྙན་འཁྲབ་སྟོན་པ་ཁི་ནོ་བོད་དོན་རྒྱབ་སྐྱོར་ལས་འགུལ་དེར་མཉམ་ཞུགས་བྱེད་རྒྱུའི་གནས་ཚུལ་ཐོན་པར་བརྟེན། རྒྱ་ནག་གི་མི་མང་ཚོས་ཁོང་ལ་སྐྱོན་བརྗོད་དྲག་པོ་བྱས་པ་མ་ཟད། ཁོང་གིས་གཙོ་འཁྲབ་བྱས་པའི་གློག་བརྙན་ Matrix Resurrections རྒྱ་ནག་ཏུ་སྟོན་མི་ཆག་པ་བཟོ་བའི་དགོས་འདུན་བཏོན་ཡོད་འདུག
ཨ་རིའི་བོད་ཁང་གིས་ཟླ་འདིའི་ཚེས་༢༠ ཉིན་ད་ལོའི་དགོས་དངུལ་མཁོ་བསྡུའི་དགོང་ཚོགས་དེ་ཕྱི་ཟླ་༣ ཚེས་༣ ཉིན་དྲ་ཐོག་ནས་འཚོགས་གཏན་འཁེལ་བའི་གསལ་བསྒྲགས་སྤེལ་བའི་ནང་། གློག་བརྙན་འཁྲབ་སྟོན་པ་ཁི་ནོ་དང་། གཞས་པ་གྲགས་ཅན་ཕེ་ཊི-མི་ཐི་(Patti Smith) དང་། ཇེ་སོན-བྷེལ་(Jason Isbell) ལ་སོགས་པའི་གྲགས་ཅན་མི་སྣ་མང་པོ་མཉམ་ཞུགས་བྱེད་གཏན་འཁེལ་ཡོད་འདུག་པའི་ཁར། བོད་ཀྱི་གཞས་པ་གྲགས་ཅན་བསྟན་འཛིན་ཆོས་རྒྱལ་ཡང་དགོས་དངུལ་མཁོ་བསྡུའི་ལས་འགུལ་དེར་མཉམ་ཞུགས་བྱེད་གཏན་འཁེལ་ཡོད་འདུག

རྒྱ་ནག་གིས་བོད་ཀྱི་གནད་དོན་ལ་རྒྱབ་སྐྱོར་བྱེད་མཁན་དང་དང་། ༧གོང་ས་མཆོག་ལ་མཇལ་ཁ་ཞུ་མཁན་གྱི་གློག་བརྙན་འཁྲབ་སྟོན་པ་དང་། གཞས་པ། གློག་བརྙན་འཁྲབ་ཁྲིད་པ་རྣམས་རྒྱ་ནག་ཏུ་ཡོང་མི་ཆོག་པ་དང་། ཁོ་ཚོའི་གློག་བརྙན་དང་གླུ་གཞས་རྣམས་རྒྱ་ནག་ཏུ་ལྟ་ཉན་མི་ཆོག་པ་བཟོ་བཞིན་ཡོད་པས། རྒྱལ་སྤྱིའི་གློག་བརྙན་འཁྲབ་སྟོན་པ་དང་གཞས་པ་མང་པོས་སོ་སོའི་གློག་བརྙན་དང་གླུ་གཞས་གཞི་རྒྱ་ཆེ་བའི་རྒྱ་ནག་གི་ཁྲོམ་ར་ལ་བྲིན་རྒྱུག་ཡོང་བའི་ཆེད་དུ་བོད་ཀྱི་གནད་དོན་ལས་གཡོལ་ནས་རྒྱ་ནག་གི་དགོས་འདུན་ལ་སྟུན་གང་ཐུབ་བྱེད་པའི་ལམ་སྲོལ་ཞིག་ཆགས་ཡོད་པ་རེད། ། 

གསར་འགོད་པ་དཀོན་མཆོག་རབ་བརྟན།