རྒྱ་ནག་གིས་ཨ་རུ་ན་ཅལ་མངའ་སྡེའི་ས་ཆ་༡༥ ཡི་མིང་གཏན་འབེབས་བྱས་འདུག 

ད་ལྟའི་ཆར་རྒྱ་གར་གྱི་མངའ་ཁོངས་སུ་ཡོད་པའི་ཨ་རུ་ན་ཅལ་མངའ་སྡེའི་ས་ཆ་༡༥ ལ་རྒྱ་ནག་གིས་མིང་གཏན་འབེབས་བྱས་ཡོད་འདུག་པས། རྒྱ་གར་གྱིས་དགག་བྱ་བྱས་འདུག 

ཟླ་༡༢ པའི་ཚེས་༣༠ ཉིན་རྒྱ་ནག་གིས་རྒྱ་གར་གྱི་མངའ་ཁོངས་སུ་ཡོད་པའི་ཨ་རུ་ན་ཅལ་མངའ་སྡེའི་ས་ཆ་༡༥ ལ་མིང་གཏན་འབེབས་ཀྱིས་གསལ་བསྒྲགས་བྱས་འདུག དེ་ཡང་རྒྱ་ནག་གིས་མངའ་སྡེ་དེ་ནི་བོད་ཀྱི་ལྷོ་ཕྱོགས་ས་ཁུལ་ཡིན་པས་རྒྱ་ནག་གི་མངའ་ཁོངས་ཡིན་པར་རྩོད་བཞིན་ཡོད་པ་རེད། 

གནད་དོན་དེ་དང་འབྲེལ་ནས་ཟླ་༡༢ པའི་ཚེས་༣༡ ཉིན་རྒྱ་གར་གྱི་ཕྱི་སྲིད་ལས་ཁང་གི་མགྲིན་ཚབ་པས། ཨ་རུ་ན་ཅལ་མངའ་སྡེ་དེ་ནི་སྔར་ནས་ད་བར་རྒྱ་གར་གྱི་མངའ་ཁོངས་ཡིན་པ་དང་། ད་དུང་མུ་མཐུད་ནས་རྒྱ་གར་གྱི་མངའ་ཁོངས་སུ་གནས་རྒྱུ་ཡིན་པས། རྒྱ་ནག་གིས་མངའ་སྡེ་དེའི་ས་ཆ་རྣམས་ལ་མིང་གསར་བཟོ་བྱས་པ་ཙམ་གྱིས་མངའ་སྡེ་དེ་རྒྱ་གར་གྱི་མངའ་ཁོངས་ཡིན་པའི་བདེན་པའི་གནད་དོན་དེར་འགྱུར་བ་གཏོང་ཐུབ་རྒྱུ་མིན་པ། རྒྱ་ནག་གིས་དེ་སྔོན་ཕྱི་ལོ་༢༠༡༧ ལོའི་ཟླ་༤ པའི་ནང་ཡང་ས་ཆ་ཁག་༦ ལ་མིང་གསར་བཟོ་བྱས་པའི་གནད་དོན་ཡང་བྱུང་ཡོད་སྐོར་བརྗོད་འདུག 

ཐེངས་འདིར་རྒྱ་ནག་གིས་མི་གནས་སྡོད་བྱེད་ཡུལ་གྱི་ས་གནས་ཁག་༨ དང་རི་བོ་༤། གཙང་པོ་༢། ལ་༡ བཅས་ལ་མིང་གཏན་འབེབས་བྱས་ཡོད་འདུག 

རྒྱ་གར་དང་རྒྱ་ནག་གཉིས་བར་ཨ་རུ་ན་ཅལ་མངའ་སྡེའི་བདག་དབང་ཐོག་རྩོད་པ་བྱེད་ཀྱི་ཡོད་པས། རྒྱ་གར་གྱིས་ཨ་རུ་ན་ཅལ་ས་ཁོངས་སུ་ཡོད་པའི་བོད་རིགས་དང་འབྲེལ་བ་བྱེད་ཐུབ་པ་ཆགས་ནས། རྒྱ་ནག་གི་དྲིལ་བསྒྲགས་དང་རྒྱ་སྐྱེད་ལས་དོན་ལ་ཁ་གཏད་གཅོག་ཐུབ་ཆེད་དུ། དམག་གི་སྒྲིག་འཛུགས་ནས་ཨ་རུ་ན་ཅལ་མངའ་སྡེ་རུ་ཡོད་པའི་ཧི་མ་ལ་ཡའི་རིག་གཞུང་སློབ་གཉེར་ཁང་དང་། འབྲས་ལྗོངས་སུ་ཡོད་པའི་རྣམ་རྒྱལ་བོད་རིག་པའི་ལྟེ་གནས་ཁང་གཉིས་མཉམ་དུ་གན་རྒྱ་བཞག་ནས། དམག་མི་རྣམས་ལ་བོད་ཡིག་སློབ་ཁྲིད་བྱེད་འགོ་བཙུགས་ཡོད་ཁར། ཟླ་༣ པའི་ནང་དམག་མི་༡༥ ལ་སྔོན་འགྲོའི་སློབ་ཁྲིད་ཀྱི་ལས་རིམ་ཞིག་མཇུག་བསྒྲིལ་ཟིན་ཡོད་པ་དང་། ཟླ་༡༡ པའི་ནང་དང་བླངས་དམག་མི་༢༠ ལ་སློབ་ཁྲིད་བྱེད་རྒྱུ་ཡིན་སྐོར་བརྗོད་འདུག ཟླ་བ་དྲུག་རིང་གི་འཛིན་གྲྭ་དེ་ནི་དམག་གི་སྒྲིག་འཛུགས་ཀྱིས་ཞིབ་འཇུག་དང་ཁས་ལེན་བྱས་པ་ཞིག་ཡིན་པ་དང་། དེའི་ནང་དུ་བོད་ཀྱི་ལོ་རྒྱུས་དང་རིག་གཞུང་། ལྟ་གྲུབ། ཆབ་སྲིད། མི་འབོར་། མངའ་ཁོངས་ཆབ་སྲིད་སོགས་སློབ་ཁྲིད་བྱེད་ཀྱི་ཡོད་པ་དང་། དེའི་དམིགས་ཡུལ་ནི་ཐོག་མར་ས་མཚམས་ཁུལ་གྱི་དམག་དཔུང་རེ་ནས་དམག་མི་མཐོ་བ་(Officer) རེར་སློབ་ཁྲིད་བྱེད་རྒྱུ། ཕྱིས་སུ་རིམ་པས་དམག་མིའི་གོ་གནས་ཆུང་བ་དང་འབྲིང་བ་རྣམས་ལ་ཡང་སློབ་ཁྲིད་བྱེད་འཆར་ཡོད་འདུག །

གསར་འགོད་པ་སྐལ་བཟང་དོན་གྲུབ།