རྒྱ་ནག་དང་བོད་དུ་སངས་རྒྱས་ཀྱི་བསྟན་པ་དར་ཡོད།

ད་སྐབས་དཔལ་ནལེཎྜའི་བསྟི་གནས་དེ་བཞིན་གྱང་རོ་ཆགས་ནས་ཡོད། འོན་ཀྱང་བསྟི་གནས་ཁང་དེ་ནས་བྱུང་བའི་སངས་རྒྱས་བཅོམ་ལྡན་འདས་ཀྱི་གསུང་དང་། ལྷག་པར་ལེགས་སྦྱར་སྐད་ནས་དར་བའི་སྟོན་པའི་བསྟན་པ་སྨད་དུ་བྱུང་བ་དེ་དག་དར་འཕེལ་འགྲོ་བཞིན་ཡོད་ཅེས་༧གོང་ས་མཆོག་གིས་གསུངས་ཡོད་པ་རེད།

དེ་ཡང་བོད་མིའི་སྒྲིག་འཛུགས་ཀྱི་དྲ་རྒྱར་གནས་ཚུལ་སྤེལ་གསལ་ལྟར་ན། ཟླ་འདིའི་ཕྱི་ཚེས་༡༣ ཉིན་༧གོང་ས་མཆོག་གིས་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་ཨིན་དར་གྷན་དི་རྒྱལ་ཡོངས་སྒྱུ་རྩལ་བསྟི་གནས་ཁང་དུ། Indira Gandhi National Centre for the Arts ཞེས་པར་ཨེ་ཤི་ཡའི་ནང་དཔལ་ན་ལེཎྜའི་སྲོལ་རྒྱུན་ནས་དར་བའི་ནང་ཆོས་སྐོར་གྱི་རྒྱལ་ཡོངས་ལྷན་ཚོགས་དབུ་འབྱེད་དང་འབྲེལ་གསུང་བཤད་གནང་དོན།

“ཐོག་མར་ངོས་ཀྱིས་ཨིན་དར་གྷན་དི་རྒྱལ་ཡོངས་སྒྱུ་རྩལ་བསྟི་གནས་ཁང་དང་བོད་ཁང་གཉིས་ཀྱིས་དཔལ་ན་ལེཎྜའི་སྲོལ་རྒྱུན་ཐོག་ཆེད་གཉེར་གྱིས་དོ་སྣང་ཆེན་པོ་གནང་བར་ཐུགས་རྗེ་ཆེ་ཞུ་རྒྱུ་ཡིན། ངོས་རང་ཕྱི་ལོ་༡༩༥༦ ལོར་རྒྱ་གར་དུ་ཐོག་མར་འབྱོར་སྐབས་ན་ལེཎྜས་མཚོན་རྒྱ་གར་གྱི་གནས་མང་པོ་མཇལ་རྒྱུའི་གོ་སྐབས་ཐོབ་བྱུང་། སྤྱིར་ངོས་རང་བོད་དུ་ཡོད་སྐབས་ནས་ན་ལཎྜ་ཞེས་པའི་མཚན་འདི་བསྟན་བཅོས་མང་པོའི་ནང་ཡོད་པར་བརྟེན་ཐོས་མྱོང་ཡོད། བོད་གངས་ཅན་གྱི་ལྗོངས་སུ་དར་བའི་ནང་པ་སངས་པའི་བསྟན་པ་འདི་ཁུངས་གཏུགས་ན་དཔལ་ན་ལེཎྜ་ནས་དར་བའི་བསྟན་བཅོས་དེ་དག་ལ་ཁུངས་གཏུགས་ཐུབ། ང་ཚོས་ཆུང་དུས་ནང་ཆོས་སློབ་གཉེར་བྱེད་སྐབས་ཐོག་མར་དཔེ་ཆ་བློ་འཛིན་བྱེད་སྲོལ་ཡོད། དེ་ནས་ཚིག་འབྲུ་རེ་རེར་སློབ་སྦྱོང་བྱས་ནས་མཐར་རང་གི་འཛིན་གྲོགས་དང་ལྷན་རྟགས་བསལ་བཏང་སྟེ་གཞུང་ལུགས་རྣམས་ཀྱི་ནང་དོན་གཏིང་ཟབ་མོ་ཡོད་པ་དེ་དག་གི་གོ་ དོན་མཐར་ཕྱིན་པ་རྟོགས་ཐབས་བྱེད་སྲོལ་ཡོད། ངོས་རང་ལོ་༦།༧ ཙམ་ནས་དཔེ་ཆ་ལྟ་རྒྱུར་ཕྲན་བུ་ཉོབ་སྣང་དང་བཅས་ལམ་སྲོལ་དེ་རྒྱུན་འཛིན་བྱས་པ་ཡིན། འོན་ཀྱང་རིམ་བཞིན་ལོ་ན་ཡར་སོན་སྐབས་ནང་དོན་རིག་པའི་གཞུང་ལུགས་དེ་དག་ལ་དོ་སྣང་ཤུགས་ཆེར་བསླེབས་ཏེ་རྒྱ་གར་གྱི་པཎ་གྲུབ་དང་ལོ་པཎ་རྣམས་ཀྱི་མཛད་རྗེས་ལ་ཡི་རང་དང་ཤེས་ནས་དད་པ་ཐོབ་པ་ཞིག་བྱུང་།

ད་སྐབས་དཔལ་ནལེཎྜའི་བསྟི་གནས་དེ་བཞིན་གྱང་རོ་ཆགས་ནས་ཡོད། འོན་ཀྱང་བསྟི་གནས་ཁང་དེ་ནས་བྱུང་བའི་སངས་རྒྱས་བཅོམ་ལྡན་འདས་ཀྱི་གསུང་དང་། ལྷག་པར་ལེགས་སྦྱར་སྐད་ནས་དར་བའི་སྟོན་པའི་བསྟན་པ་སྨད་དུ་བྱུང་བ་དེ་དག་དར་འཕེལ་འགྲོ་བཞིན་ཡོད། རྒྱ་ནག་དང་བོད་དུ་ལེགས་སྦྱར་སྐད་ལ་རྟེན་པའི་སངས་རྒྱས་ཀྱི་བསྟན་པ་དྲི་མ་མེད་པ་དར་འཕེལ་བྱུང་བ་མ་ཟད། ལྷག་པར་བོད་ནང་སངས་རྒྱས་ཀྱི་བསྟན་པ་དེར་འཛིན་སྐྱོང་སྤེལ་གསུམ་སྒོ་ནས་ཆེ་ཆེར་དར་ཡོད། དེ་ཡང་སྟོན་པ་བཅོམ་ལྡན་འདས་རང་ཉིད་ཀྱིས་འདུལ་བྱ་རྣམས་ལ་སྟོན་པའི་གསུང་ལ་དད་པ་ཙམ་གྱིས་མི་ཆོག་པར་རིག་པའི་ལམ་ནས་རྟགས་ཤིང་དཔྱད་དགོས་པ་བཀའ་གནང་ཡོད། དེར་བརྟེན་ཀླུ་སྒྲུབ་དང་ཨཱརྱ་དེ་བཱ། སངས་རྒྱས་བསྐྱངས། ཟླ་བ་གྲགས་པ། ཞི་བ་ལྷ་སོགས་ཀྱིས་སྟོན་པའི་བཀའ་བཞིན་ཕྱག་བསྟར་མཛད་དེ་དམ་པའི་དོན་ལ་རིག་པའི་ལམ་ནས་བརྟགས་ཤིང་དཔྱད་ཡོད་”ཅེས་གསུངས་ཡོད་པ་རེད།

༧གོང་ས་མཆོག་གིས་མུ་མཐུད་དུ་གསུངས་དོན། “དེང་སྐབས་སུ་ཚན་རིག་པའི་ཁྲོད་ཕྱི་དངོས་པོའི་གནས་ལུགས་མཐར་ཐུག་ཇི་ཡིན་ཐོག་དཔྱད་པ་བྱེད་མཁན་རིགས་ཅིག་ཐོན་བཞིན་ཡོད། ངོས་ཀྱིས་ལོ་ངོ་སུམ་ཅུ་ལྷག་ཙམ་རིང་ཚན་རིག་པ་དང་ཐུག་འཕྲད་ཀྱིས་བགྲོ་གླེང་བྱ་རྒྱུའི་ལས་གཞི་ཞིག་འགོ་བརྩམས་ཡོད། དེང་སྐབས་ཚན་རིག་པ་མང་པོ་ཞིག་གིས་དཔལ་ན་ལེཎྜའི་མཁས་པས་སེམས་ཀྱི་རྣམ་གཞག་སྐོར་གསུང་པའི་བསྟན་བཅོས་རྣམས་ལ་དོ་སྣང་ཧ་ཅང་གནང་གི་འདུག ང་ཚོ་བོད་པར་མཚོན་ན་རྒྱ་གར་ང་ཚོའི་བླ་མ་དང་ང་ཚོ་རྒྱ་གར་གྱི་སློབ་མ་ཆགས་ཡོད། ངོས་རང་རྒྱ་གར་གྱི་བུ་ཞིག་ཡིན་པར་ངོས་འཛིན་བྱེད་བཞིན་ཡོད། ངོས་ཀྱི་ལུས་པོར་མཚོན་ན་རྒྱ་གར་གྱི་འབྲས་དང་བག་ལེབ་ཀྱིས་འཚོ་ཡོད། ངོས་ཀྱི་ཀླད་པའི་ནང་གང་སྦྱངས་པའི་ཡོན་ཏན་དེ་དག་རྒྱ་གར་གྱི་རིག་གཞུང་ཆགས་ཡོད།

རྒྱ་གར་ནང་ལོ་ངོ་སྟོང་ཕྲག་རིང་ཆོས་ལུགས་འདྲ་མིན་འཆམ་མཐུན་ངང་གནས་ཐུབ་ཡོད། རྒྱ་གར་གནའ་བོའི་སྲོལ་རྒྱུན་ནང་ཆོས་ལུགས་ཚང་མར་གུས་བརྩི་བྱེད་སྲོལ་ཡོད། ལྷན་ཚོགས་འདི་ལྟ་བུས་དཔལ་ན་ལེཎྜའི་སྲོལ་རྒྱུན་གྱི་ལེགས་བཤད་དེ་དག་གི་རིན་ཐང་དྲན་གསོ་གཏོང་རྒྱུར་ཧ་ཅང་ཕན་ཐོགས་ཡོང་ངེས་”ཞེས་སོགས་ཀྱི་བཀའ་སློབ་གནང་ཡོད་པ་རེད།