རྒྱ་ནག་ནས་ཐོན་པའི་མངར་ཟས་ཀྱི་རིགས་ནང་ངན་ལང་ཤོར་བའི་རྫས་ཐོན་འདུག

ཟླ་འདི་ཚེས་༢༧ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ་ལྟར་ན། རྒྱ་ནག་གི་ནང་དུ་འོ་མ་ལས་བཟོས་པའི་ཟས་རིགས་ཤིག་གི་ནང་དུ་ཁྲིམས་མཐུན་མ་ཡིན་པའི་ངན་ལང་ཤོར་བའི་རྫས་ཐོན་ཡོད་པ་དང་། ད་ལྟའི་ཆར་དངོས་ཟོག་དེ་དག་རྒྱ་ནག་ནས་རྒྱལ་ཁབ་གཞན་དུ་ཕྱི་འདྲེན་བྱེད་ཡོད་མེད་ཀྱི་གནས་ཚུལ་གསལ་བོ་ཤེས་ཀྱི་མེད་པའི་སྐོར་དང་། ཐེ་ཝན་གྱིས་རྒྱ་ནག་ནས་འོར་འདྲེན་བྱས་པའི་ཞིང་ལས་ཐོན་རྫས་མང་པོའི་ཁྲོད་ན་དུག་རྫས་(Toxic) ཡོད་པ་ཤེས་རྟོགས་བྱུང་ཡོད་པའི་གནས་ཚུལ་ཐོན་འདུག

རྒྱ་ནག་ལ་བཟོ་སྐྲུན་བྱས་པའི་ཀ་མེ་ལི་ཡ(Camellia) སྣུམ་དང་འོ་མ་ལས་བཟོས་པའི་མངར་ཟས་ཀྱི་རིགས། གོ་རྙེད་(cumin seed) ཀྱི་སོན་སོགས་ཀྱི་ནང་དུ་བྷན་ཛོ་པི་རན་ (Benzopyrene) དང་མེ་ལ་མེན་(melamine) སོགས་ཀྱི་རྫས་རིགས་མང་པོ་ཐོན་གྱི་ཡོད་པ་དང་། རྫས་རིགས་དེ་དག་གིས་འབྲས་ནད་གཙོས་པའི་ན་ཚ་མང་པོ་བྱུང་གི་ཡོད་པའི་གནས་ཚུལ་ཐོན་འདུག

རྒྱ་ནག་ནང་དུ་བཟོ་སྐྲུན་བྱས་པའི་ཟས་རིགས་ཀྱི་ནང་དུ་རྫས་རིགས་དེ་འདྲ་ཐོན་པ་ནི་དེ་རིང་ཐེངས་དང་པོ་མིན་པ། སྤྱི་ལོ་༢༠༠༨ ལོ་རྒྱ་ནག་གི་ནང་དུ་བཟོ་སྐྲུན་བྱས་པའི་ཟས་རིགས་དུ་མའི་ནང་དུ་མེ་ལ་མེན་(Melamine) ཞེས་པའི་རྫས་ཐོན་ཡོད་པ་དང་། ཟས་རིགས་དེ་དག་ནི་ཁྱོན་བསྡོམས་རྒྱལ་ཁབ་༣༠ ནང་དུ་བཙོང་གི་ཡོད་པ་སོགས་ཀྱི་གནས་ཚུལ་ཐོན་ཡོད་པ་མ་ཟད། རྒྱ་ནག་ཏུ་ཕ་མ་མང་པོས་ཕྲུ་གུ་ལ་འོ་ཕྱེ་དང་ཁྲོམ་ནས་འོ་མ་ཉོས་ནས་སྤྲད་ཀྱི་ཡོད་པ་དག་གི་ནང་དུ་མེ་ལ་མེན་(Melamine) ཞེས་པའི་རྫས་དེ་བེད་སྤྱོད་བྱས་ཡོད་པར་བརྟེན། རྒྱ་ནག་གི་ནང་དུ་བྱིས་པ་འབུམ་གསུམ་ལྷག་ནད་པ་ཆགས་ཡོད་པའི་གནས་ཚུལ་ཐོན་ཡོད།

རྒྱ་ནག་གི་ནང་དུ་བཟོས་སྐྲུན་བྱས་པའི་རི་བོང་དཀར་བོའམ(White Rabbit) ཞེས་པའི་མངར་ཟས་དེ་ནི་འཛམ་བུ་གླིང་རྒྱལ་ཁབ་བཞི་ཅུ་ལྷག་གི་ནང་དུ་བཙོང་གི་ཡོད་པ་དང་། སྤྱི་ལོ་༢༠༠༨ ལོ་བརྟག་དཔྱད་བྱེད་པའི་བརྒྱུད་མངར་ཟས་དེའི་ནང་དུ་མེ་ལ་མེན་(Melamine) ཞེས་པའི་རྫས་དེ་རྒྱུན་ལྡན་ལས་ལྡབ་དྲུག་གི་མང་བ་ཐོན་ཡོད་པའི་སྟབས་ཀྱིས། རྒྱ་ནག་ནང་དང་རྒྱལ་སྤྱིའི་ཐོག་ལ་མངར་ཟས་དེ་བཀག་སྡོམ་བྱས་ཡོད་འདུག་ལ། སྐབས་དེར་ལྷོ་ཀོ་རི་ཡ་ཡིས་རྒྱ་ནག་གི་ནང་དུ་བཟོ་སྐྲུན་བྱས་པའི་འོ་མ་དང་འབྲེལ་བའི་མངར་ཟས་རིགས་ཡོངས་རྫོགས་རྒྱ་ནག་ནས་ནང་འདྲེན་བྱེད་རྒྱུ་མཚམས་འཇུག་བྱས་འདུག

རྒྱ་གར་གྱིས་རྒྱ་ནག་ནས་འོ་མ་ལས་བཟོས་པའི་ཟས་རིགས་ནང་འདྲེན་བྱེད་ཀྱི་མེད་ན་ཡང་སྔོན་འགོག་གི་དོན་དུ། སྤྱོ་ལོ་༢༠༡༨-༢༠༡༩ ལོའི་ཟླ་བ་མང་པོའི་རིང་འོ་མ་ལས་བཟོས་པའི་ཟས་རིགས་སྣ་ཚོགས་ཤིག་རྒྱ་ནག་ནས་རྒྱ་གར་དུ་ནང་འདྲེན་བྱེད་མི་ཆོག་པ་བཟོས་ཡོད་པ་སོགས་ཀྱི་གནས་ཚུལ་ཐོན་འདུག མེ་ལ་མེན(Melamine) ཞེས་པའི་རྫས་རིགས་དེ་ནི་ཤོག་བུ་དང་འགྱིག་གི་དངོས་པོ་དག་བཟོ་བ་ལ་ཕན་ཐོགས་ཡོད་པས་བཟོ་གྲྭ་མང་པོའི་ནང་དུ་རྫས་རིགས་དེ་བེད་སྤྱོད་བྱེད་ཀྱི་ཡོད་འདུག།

གསར་འགོད་པ་བློ་བཟང་རྒྱ་མཚོ།