རྒྱ་ནག་ནི་དབྱིན་ཇི་དང་འཛམ་གླིང་གི་བདེ་འཇགས་ལ་ཉེན་ཁ་ཆེ་ཤོས་ཡིན་རབས་བརྗོད་འདུག
ཟླ་འདིའི་ཚེས་༢༦ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ་ལྟར་ན། ཟླ་འདིའི་ཚེས་བདུན་ཉིན་དབྱིན་ཇིའི་སྲིད་བློན་བྷི་རི་ཇོན་སོན་ (Boris Johnson) ལས་གནས་ནས་དགོངས་པ་ཞུས་ཡོད་པ་དང་། ད་ལྟའི་ཆར་ཁོང་གི་ཚབ་ཏུ་དབྱིན་ཡུལ་དུ་སྲིད་བློན་གྱི་འོས་བསྡུ་དེ་འགྲོ་བཞིན་ཡོད་འདུག་ལ། ཐོག་མིའི་ཆར་སྲིད་བློན་གྱི་འོས་མི་བཅུ་བྱུང་ཡོད་པ་དང་། དེ་དག་གི་ཁྲོད་ནས་བགྲོ་གླེང་དང་འགྲན་བསྡུར་སྣ་མང་བྱས་པའི་རྗེས་རྒྱབ་སྐྱོར་མང་ཤོས་ཐོབ་མཁན་གྱི་འོས་མི་གཉིས་ཆེས་མཐའ་མའི་འགྲམ་བསྡུར་གྱི་ནང་དུ་བསླེབས་ཡོད་པ་དང་། ཁོང་གཉིས་ལས་གཅིག་ནི་དབྱིན་ཇིའི་དཔལ་འབྱོར་བློན་ཆེན་ཟུར་པ་རི་ཞི་སོག་ན་ (Rishi Sunak) དང་། གཅིག་ཤོས་ནི་དབྱིན་ཇིའི་ཕྱི་སྲིད་དྲུང་ཆེ་ཟུར་པ་ལི་ཙི་ཊི་རོབ་སི་(Liz Truss) རྣམ་པ་གཉིས་ཆགས་ཡོད་འདུག
སྤྱི་ལོ་༢༠༢༡ ལོར་དབྱིན་ཇིའི་ཐིང་ཊན་ཀེ (British think tank) གྱིས་དབྱིན་ཇི་བ་ཚོས་རྒྱ་ནག་གི་ཐོག་ལ་ལྟ་ཚུལ་ཇི་ལྟར་ཡོད་མེད་ཀྱི་བསམ་ཤོག་བསྡུ་ལེན་ཞིག་བྱས་ཡོད་པ་དང་། སྐབས་དེར་དབྱིན་ཇི་བ་བརྒྱ་ཆ་༧༩% ཡིས་རྒྱ་ནག་ནི་བདེ་འཇགས་ཀྱི་ཉེན་ཁ་ཞིག་ཏུ་ངོས་འཛིན་བྱས་ཡོད་པར་བརྟེན། ཐེངས་འདིའི་དབྱིན་ཇིའི་སྲིད་བློན་གྱི་འོས་མི་གཉིས་ཀས་རྒྱ་ནག་གི་ཐོག་ཏུ་ལམ་ཕྱོགས་མཁྲེགས་པོ་འཛིན་རྒྱུ་གལ་འགངས་ཆེན་མོ་ཆགས་ཡོད་པའི་གནས་ཚུལ་ཐོན་འདུག
སྲིད་བློན་གྱི་འོས་མི་རི་ཞི་སོག་ན(Rishi Sunak) དབྱིན་ཇིའི་དཔལ་འབྱོར་བློན་ཆེན་ཡིན་པའི་སྐབས་སུ། ཁོང་གིས་སྤྱི་ལོ་༢༠༢༡ ལོར་སྒོར་ཐེ་འབུམ་༢༧ གྱི་དངོས་ཟོག་དབྱིན་ཇི་ནས་རྒྱ་ནག་ཏུ་ཕྱི་འདྲེན་བྱས་ཡོད་པ་དང་། སྤྱི་ལོ་༢༠༢༠ དང་བསྡུར་ན་ཨ་སྒོར་ས་ཡ་༧༨༥ གྱི་ཚོང་ཟོག་མང་དུ་ཕྱིན་ཡོད་པ་དང་། དེ་བཞིན་ཨ་སྒོར་ཐེ་འབུམ་༦༦ ལྷག་གི་དངོས་ཟོག་རྒྱ་ནག་ནས་དབྱིན་ཡུལ་དུ་ནང་འདྲེན་བྱས་ཡོད་པས་སྤྱི་ལོ་༢༠༢༠་ དང་བསྡུར་ན། ཨ་སྒོར་ཐེ་འབུམ་༩ ལྷག་གི་ཚོང་ཟོག་མང་དུ་ཕྱིན་ཡོད་པ་དང་། ཁོང་གི་རྒྱ་ནག་ཐོག་ལ་ལྟ་ཚུལ་ནི་ཡག་པོ་ཡོད་རབས་དང་། དེ་བཞིན་སྲིད་བློན་གྱི་འོས་མི་ལི་ཙི་ཊོ་རོབ་སི་ཤེས་རིག་བློན་ཆེན་ཡིན་པའི་སྐབས་སུ། དབྱིན་ཡུལ་དུ་ཁུ་ཙི་སློབ་གཉེར་ཁང་(Confucius) དགུ་ཞིག་སྒོ་ཕྱེ་ཡོད་པ་མ་ཟད། སྤྱི་ལོ་༢༠༡༥ ལོ་ཁོ་མོ་རྒྱ་ནག་ཏུ་ཕྱིན་ཡོད་པས་ཁོ་མོ་ཡང་རྒྱ་ནག་གི་ཐོག་ལ་ལྟ་ཚུལ་ཡག་པོ་ཡོད་རབས་བརྗོད་ཡོད་པ་བཅས། ཐེངས་འདི་སྲིད་བློན་གྱི་འོས་མི་གཉིས་ཀྱི་བར་དུ་བགྲོ་གླེང་བྱེད་པའི་སྐབས་སུ་རྒྱ་ནག་ལ་ལྟ་ཚུལ་ཡག་སྡུག་གི་ཐོག་ལ་ཕན་ཚུན་ཉེས་འཛུགས་བྱས་ཡོད་འདུག
སྤྱི་སྲིད་བློན་འོས་མི་རི་ཞི་སོག་ན་ནི་རྒྱ་ནག་ལ་ལྟ་ཚུལ་ལེགས་པོ་འཛིན་མཁན་ཞིག་ཏུ་ངོས་འཛིན་བྱེད་བཞིན་ཡོད་ན་ཡང་། ཁོང་གིས་འོས་བསྡུ་དྲིལ་བསྒྲགས་བྱེད་པའི་སྐབས་སུ། རྒྱ་ནག་ནི་དབྱིན་ཇི་དང་འཛམ་གླིང་ཁྱོན་ཡོངས་ཀྱི་བདེ་འཇགས་ལ་ཉེན་ཁ་ཆེ་ཤོས་ཆགས་ཡོད་རབས་དང་། རྒྱ་ནག་གིས་ཤེས་ཡོན་དང་རིག་གཞུང་ལྟེ་གནས་ཁང་དག་བེད་སྤྱོད་བྱས་ནས་དབྱིན་ཡུལ་གྱི་གཙུག་ལག་སློབ་གྲྭ་ཁག་ཏུ་འཇམ་པོའི་ནུས་སྟོབས་གོང་འཕེལ་གཏོང་བཞིན་ཡོད་པས་ཁོང་གིས་དབྱིན་ཡུལ་དུ་ཡོད་པའི་ཁུང་ཅི་སློབ་གཉེར་ཁང་༣༠ ་སྒོ་རྒྱག་རྒྱུ་ཡིན་རབས་བརྗོད་ཡོད་འདུག
གནས་ཚུལ་དབྱི་ཞིབ་པ་བརྗོད་གསལ་ལྟར་ན། ད་ལྟའི་ཆར་དབྱིན་ཡུལ་དུ་དཔལ་འབྱོར་གྱི་དཀའ་ངལ་འཕྲད་བཞིན་ཡོད་པ་དང་། གལ་སྲིད་རྒྱ་ནག་དང་ཚོང་འབྲེལ་ཇེ་སྡུག་ཏུ་ཕྱིན་པ་ཡིན་ན། དབྱིན་ཇི་ལ་དཀའ་ངལ་ཆེ་བ་འཕྲད་རྒྱུ་ཡིན་པ་དང་ཆབ་སྲིད་པ་ཚོས་རང་ཉིད་ལ་འོས་ཤོག་རག་རྒྱུའི་དོན་དུ་ཅི་ཡང་བཤད་སྲིད་རབས་ཀྱི་གནས་ཚུལ་སྤེལ་འདུག
ལོ་འདིའི་སྤྱི་ཟླ་བརྒྱད་པའི་ནང་དུ་དབྱིན་ཇིའི་རྙིང་ཞེན་ཚོགས་པའི་ཚོགས་མི་༡༦༠༠༠༠ ཡིས་འོས་བསྡུའི་ལམ་ནས་སྲིད་བློན་གསར་པ་འདེམས་རྒྱུ་ཡིས་གནས་ཚུལ་ཐོན་འདུག།
གསར་འགོད་པ་བློ་བཟང་རྒྱ་མཚོ།
