རྒྱ་ནག་ཕྱི་སྲིད་བློན་ཆེན་དང་བལ་ཡུལ་གྱི་མཐོ་རིམ་འགོ་ཁྲིད་ཐུག་འཕྲད་བྱས་འདུག

རྒྱ་གར་གྱི་བང་ཆེན་གསར་ཁང་གིས་དེ་རིང་༢༩ ཉིན་གནས་ཚུལ་སྤེལ་བ་ལྟར་ན། རྒྱ་ནག་གི་ཕྱི་སྲིད་བློན་ཆེན་ཝང་ཡེ་ཁ་སང་གཟའ་མཇུག་ཏུ་བལ་ཡུལ་ལ་བསྐྱོད་ནས་བལ་ཡུལ་གྱི་སྲིད་འཛིན་དང་སྲིད་བློན། དེ་བཞིན་བལ་ཡུལ་གྱི་ཕྱི་སྲིད་བློན་ཆེན་བཅས་དང་མཇལ་ཕྲད་བྱས་ཡོད་འདུག
ཐེངས་འདིའི་འཇལ་ཕྲད་དེ་ནི་བལ་ཡུལ་གྱི་ཀོང་རེ་སི་ཚོགས་པའི་ཚོགས་གཙོ་ལོ་སྔོན་མའི་ཟླ་བ་བདུན་པའི་ནང་བལ་ཡུལ་གྱི་སྲིད་བློན་ཐེངས་ལྔ་པར་བསྐོས་བཞག་བྱས་ནས་བཟུང་རྒྱ་ནག་གི་མཐོ་རིམ་མི་སྣ་ཞིག་བལ་ཡུལ་དུ་བསྐྱོད་པ་ཐེངས་དང་པོ་དེ་ཆགས་འདུག་པ་མ་ཟད། ཨ་རི་གཞུང་གིས་བལ་ཡུལ་ལ་རྨང་གཞི་འཛུགས་བསྐྲུན་བྱེད་རྒྱུའི་ཐོག་ལ་རོགས་དངུལ་ཨ་སྒོར་ས་ཡ་༥༠༠ གནང་བ་དེ་ལ་བལ་ཡུལ་གྲོས་ཚོགས་ཀྱིས་ཁས་ལེན་བྱས་ནས་ཟླ་བ་གཅིག་ཕྱིན་པའི་རྗེས་སུ་རྒྱ་ནག་གི་ཕྱི་སྲིད་བློན་ཆེན་བལ་ཡུལ་དུ་བསྐྱོད་པ་ཞིག་ཀྱང་རེད་འདུག
དེ་དང་མཉམ་དུ་རྒྱ་ནག་གིས་ཨ་རིའི་རོགས་སྐྱོར་དེ་ནི་རྙོག་དྲའི་སྒམ་ཆུང་ཞིག་ཡིན་སྲིད་པའི་ཉེན་བརྡ་བཏང་ཡོད་པ་མ་ཟད། ཨ་རིས་བལ་ཡུལ་ནང་དུ་བཙན་ཤེད་ཀྱི་ཕྱི་འབྲེལ་འཛུགས་བཞིན་འདུག་ཅེས་ཨ་རི་ལ་བསྙོན་འཛུགས་བྱེད་པའི་གནས་ཚུལ་ཡང་ཐོན་འདུག
བལ་ཡུལ་ཕྱི་སྲིད་བློན་ཆེན་གྱིས་སྟོབས་ཤུགས་ཅན་སུ་ལ་ཡང་བལ་ཡུལ་གྱི་ས་ཁོངས་བེད་སྤྱོད་བྱས་ནས་རྒྱ་ནག་ལ་མཐོང་ཆུང་དང་རྒྱ་ནག་གི་ཁེ་ཕན་ལ་དོ་ཕོག་གཏོང་འཇུག་རྒྱུ་མིན་ཞེས་བརྗོད་འདུག་ལ།བལ་ཡུལ་གྱི་སྲིད་བློན་དང་ཕྱི་སྲིད་བློན་ཆེན་གཉིས་ཀྱིས་རྒྱ་ནག་གི་ཕྱི་སྲིད་བློན་ཆེན་དང་ཐུག་ཕྲད་བྱེད་པའི་སྐབས་སུ་བལ་ཡུལ་གྱིས་རྒྱ་ནག་གཅིག་གི་སྲིད་ཇུས་ལ་རྒྱབ་སྐྱོར་ཡོད་པ་ཡང་ཡང་ནན་བརྗོད་བྱེད་པའི་གནས་ཚུལ་ཡང་ཐོན་འདུག
ཐེངས་འདིའི་མཇལ་ཕྲད་སྐབས་སུ་དཔལ་འབྱོར་དང་ཆེད་ལས་མཉམ་ལས་དང་འབྲེལ་རྒྱ་ནག་གིས་བལ་ཡུལ་ལ་ཧིིན་སྒོར་ས་ཡ་༡༣ ནས་༡༥ བར་སྤྲད་རྒྱུ་དང་། རྒྱ་ནག་གིས་བལ་ཡུལ་ལ་ཏོག་དབྱིབས་གཉན་རིིམས་ཀྱི་སྔོན་འགོག་སྨན་ཁབ་ས་ཡ་བཞི་སྤྲད་རྒྱུ་སོགས་རྒྱ་ནག་དང་བལ་ཡུལ་གཉིས་བར་ཆིངས་ཡིག་དོན་ཚན་དགུ་ཅན་ཞིག་བཞག་ཡོད་པའི་གནས་ཚུལ་སྤེལ་འདུག
སྤྱི་ཆ་ནས་བཤད་ན་རྒྱ་ནག་གིས་བལ་ཡུལ་གྱི་ས་ཁུལ་ཁག་ཅིག་བདག་བཟུང་བྱས་པའི་གནས་ཚུལ་མང་པོ་ལོ་སྔོན་མའི་རྒྱལ་སྤྱིའི་གསར་ལམ་ཁག་ཏུ་ཐོན་ཡོད།།
གསར་འགོད་པ་བློ་བཟང་རྒྱ་མཚོ།