རྒྱ་ནག་ལ་ཆབ་སྲིད་ཀྱི་རྒྱལ་ཁ་སྤྲད་ཡོད་པར་བློ་ཕམ་ཡོད་སྐོར་གསུངས་འདུག 

ཉེ་ཆར་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལས་ཁང་གི་འགན་འཛིན་གྱིས་རྒྱ་ནག་ཏུ་མཚམས་གཟིགས་སུ་ཕེབས་པའི་རྗེས་སུ། དྲ་ཐོག་གསར་འགོད་ལྷན་ཚོགས་ཤིག་བསྐོངས་ནས་བསྒྲགས་གཏམ་ཞིག་སྤེལ་ཡོད་པ་དང་། དེ་དང་འབྲེལ་ནས་རྒྱལ་སྤྱིའི་བོད་དོན་ལས་འགུལ་ཁང་གིས་ལྕམ་ཁོང་གིས་རྒྱ་ནག་ལ་ཆབ་སྲིད་ཀྱི་རྒྱལ་ཁ་སྤྲད་ཡོད་པར་བློ་འཕམ་ཡོད་སྐོར་གསུངས་འདུག 

དེ་ཡང་ཟླ་༥ པའི་ཚེས་༢༣ ནས་༢༨ བར་ཉིན་གྲངས་དྲུག་གི་རིང་། མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལས་ཁང་གི་འགན་འཛིན་ལྕམ་མཱི་ཆེལ་བྷ་ཆེ་ལིཀྲ་རྒྱ་ནག་གཞུང་གིས་གདན་འདྲེན་ཞུས་པ་ལྟར་མཚམས་གཟིགས་སུ་ཕེབས་ཡོད་པ་དང་། མཚམས་གཟིགས་མཇུག་བསྒྲིལ་བའི་རྗེས་སུ་ཁོང་གིས་མཚམས་གཟིགས་དང་འབྲེལ་ནས་གསར་འགོད་གསལ་བསྒྲགས་ཤིག་སྤེལ་འདུག 

དེའི་རྗེས་སུ་རྒྱལ་སྤྱིའི་བོད་དོན་ལས་འགུལ་ཁང་གིས་བསྒྲགས་གཏམ་ཞིག་སྤེལ་ནས། ལྕམ་ཁོང་གིས་རྒྱ་ནག་གཞུང་ལ་ཆབ་སྲིད་ཀྱི་རྒྱལ་ཁ་སྤྲད་པར་བློ་ཕམ་ཡོད་པ་དང་། ཁོང་གི་ཉིན་དྲུག་རིང་གི་མཚམས་གཟིགས་རྗེས་སུ་སྤེལ་བའི་གསར་འགོད་གསལ་བསྒྲགས་དེའི་ནང་། རྒྱ་ནག་གཞུང་གིས་བཟོས་པའི་རྒྱལ་ནང་དང་རྒྱལ་སྤྱིའི་སྲིད་བྱུས་ལ་ངོས་ལེན་བྱས་ཡོད་སྐོར་བརྗོད་འདུག 

རྒྱ་ནག་གཞུང་འབྲེལ་བརྒྱུད་ལམ་ཁག་གིས་གསར་འགོད་གསལ་བསྒྲགས་དེ་དང་འབྲེལ་ནས་གནས་ཚུལ་སྤེལ་དོན་ལ། ལྕམ་ཁོང་གི་བསྒྲགས་གཏམ་ལས་ཡུ་གུར་ཁུལ་གྱི་གནས་ཚུལ་རྫུན་མ་ཁྱབ་བཞིན་པ་དེ་བདེན་པ་མིན་པ་གསལ་པོ་ཆགས་ཡོད་པས། དེ་ནི་ཨ་རི་དང་ནུབ་ཕྱོགས་རྒྱལ་ཁབ་ཁག་ཅིག ཁོ་ཚོའི་གསར་འགྱུར་བརྒྱུད་ལམ་ཁག་དང་རྒྱ་ནག་ལ་ཁ་གཏད་བྱེད་མཁན་གྱི་སྡེ་ཚན་ཚོའི་རེ་བ་ལྟར་བྱུང་མེད་སྐོར་འཁོད་ཡོད་འདུག

རྒྱལ་སྤྱིའི་བོད་དོན་ལས་འགུལ་ཁང་གིས་གསུང་དོན་ལ། བོད་ནི་འཛམ་གླིང་ནང་དུ་བསྟུད་མར་རང་དབང་ཆུང་ཤོས་སུ་ངོས་འཛིན་བྱེད་བཞིན་ཡོད་ཀྱང་། ལྕམ་ཁོང་བོད་ནང་དུ་མཚམས་གཟིགས་སུ་ཕེབས་མེད་ཁར། བསྒྲགས་གཏམ་དེའི་ནང་དུ་བོད་དང་འབྲེལ་ནས་བཀའ་མོལ་ཉུང་ཉུང་ཞིག་ལས་གསུངས་མེད་པས། དེ་ནི་ངོས་ལེན་བྱེད་ཐབས་བྲལ་བ་ཡིན་པ་དང་། དེ་ལ་བརྟེན་ནས་འགྲོ་བ་མིའི་ཐོབ་ཐང་གི་ཚད་གཞི་དང་ལྟེ་གནས་ཁང་ཁག་ཉམས་དམས་སུ་བཏང་ཡོད་སྐོར་བརྗོད་འདུག 

དེ་ཡང་གསར་འགོད་བསྒྲགས་གཏམ་དེའི་ནང་དུ། ལྕམ་ཁོང་གིས་བོད་རང་སྐྱོངས་ཁུལ་དུ་བོད་མིའི་སྐད་ཡིག་དང་ཆོས། རིག་གཞུང་བཅས་ངོ་བོ་སྲུང་སྐྱོབ་བྱེད་རྒྱུ་དང་། ཆོས་ལུགས་དང་འབྲེལ་བའི་ཐག་གཅོད་ཁག་གི་ནང་དུ་བོད་མི་རྣམས་རང་དབང་ལྡན་པའི་ཐོག་ནས་མཉམ་ཞུགས་ཆ་ཚང་བ་ཞིག་བྱེད་འཇུག་རྒྱུ་གལ་ཆེན་རེད། ངས་བོད་རང་སྐྱོང་ལྗོངས་ནང་དུ་ཤེས་ཡོན་སྲིད་བྱུས་སྐོར་གྲོས་སྡུར་བྱས་ནས་བྱིས་པ་རྣམས་སོ་སོའི་སྐད་ཡིག་དང་རིག་གཞུང་སྦྱོང་རྒྱུ་གལ་ཆེན་ཡིན་པ་ནན་བརྗོད་བྱས་ཡོད་ཅེས་གསུངས་འདུག་པས། རྒྱལ་སྤྱིིའི་བོད་དོན་ལས་འགུལ་ཁང་གིས་གསུང་དོན་ལ། བོད་རང་སྐྱོང་ལྗོངས་ཞེས་པ་དེ་ནི་བོད་ཀྱི་ས་ཁོངས་ཕྱེད་ཀ་ཙམ་ལས་ཚུད་ཀྱི་མེད་པ་གསལ་འདོན་བྱེད་རྒྱུ་གལ་ཆེན་ཆགས་ཡོད་པ་དང་། བོད་ཀྱི་ཤར་ཕྱོགས་དང་བྱང་ཤར་ཁུལ་རྣམས་ཟི་ཁྲོན། མཚོ་སྔོན། ཀན་སུ། ཡུ་ནན་བཅས་ཀྱི་ཞིང་ཆེན་ནང་དུ་བཅུག་ཡོད་སྐོར་གསུངས་འདུག 

དེ་བཞིན་རྒྱལ་སྤྱིའི་བོད་དོན་ལས་འགུལ་ཁང་ནས་གསུང་དོན་ལ། ལྕམ་ཁོང་གིས་རྒྱ་ནག་ནང་གི་འགྲོ་བ་མིའི་ཐོབ་ཐང་གནས་སྟངས་ཐོག་དྲང་བདེན་དང་འཇིགས་སྣང་མེད་པའི་ཐོག་ནས་བཀའ་མོལ་གནང་མ་ཐུབ་པ་དེ་ནི། ཁོང་གི་ལས་འགན་མ་སྒྲུབ་པ་ཆགས་ཡོད། ཁོང་གིས་རྒྱ་ནག་ལ་ཆབ་སྲིད་ཀྱི་རྒྱལ་ཁ་སྤྲད་ཡོད་པ་དང་། ཁོང་གིས་རྒྱ་ནག་གཞུང་གིས་བོད་མི་དང་ཡུ་གུར། སོག་པོ་དང་མི་རིགས་གཞན་གྱི་རིག་གཞུང་གི་ངོ་བོ་དང་ཚེ་སྲོག་ལ་གཏོར་སྐྱོན་བྱེད་ཆེད་དམིགས་ནས་འཆར་གཞི་ལྡན་པའི་ཐོག་ནས་འགྲོ་བ་མིའི་ཐོབ་ཐང་རྡོག་རོལ་གཏོང་གི་ཡོད་པའི་དཔང་རྟགས་རྣམས་ངོས་ལེན་བྱས་མ་ཐུབ་པ་དེས། རྒྱ་ནག་ལ་བློ་སྤོབས་སྐྱེས་ཡོད་པ་དང་གཞུང་འབྲེལ་མིན་པའི་ཚོགས་པ་ཁག་གི་ནུས་པ་ཉམས་དམས་སུ་བཏང་ཡོད་སྐོར་བརྗོད་འདུག །

གསར་འགོད་པ་སྐལ་བཟང་དོན་གྲུབ།