རྒྱལ་བ་ཇོ་ནང་བས་ཆོལ་ཁའི་སྤྱི་འཐུས་རྩོད་ཀྱི་མེད།

དོན་ཚན་དང་བོ། གཞིས་བཞུགས་རྒྱ་ཆེའི་མི་མང་གི་མངོན་འདོད།

ཇོ་ནང་བའི་གྲལ་དུ་གཏོགས་མིན་ལ་མ་ལྟོས་པར་ད་སྐབས་བཙན་བྱོལ་བོད་གཞུང་མང་གཉིས་ཀྱིས་ཐུགས་ཁུར་ཆེས་ཆེར་གནངས་དགོས་པ་ཞིག་ནི། ཇོ་ནང་ཆོས་བརྒྱུད་ནི་ལོ་ངོ་སྟོང་ཕྲག་གི་ཡར་སྔོན་ནས་བོད་ཀྱི་གཞུང་འབྲེལ་མ་ཡིན་པའི་ཐོག་ནས་ད་བར་ཆོས་བརྒྱུད་རང་རྐང་ཚུགས་པར་བྱས་ཏེ་བོད་ཀྱི་སྒྲུབ་རྒྱུད་ཤིང་རྟ་བརྒྱད་ཀྱི་ནང་ཚན་དུ་ཆགས་པ་དང་། ཉེ་ཆར་ཕྱི་ལོ་༢༠༡༡ ཟླ་༩ ནང་བོད་ཀྱི་ཆོས་བརྒྱུད་ཆེན་པོའི་ཚོགས་ཆེན་ཐེངས་༡༡ པའི་གྲོས་ཆོད་དོན་ཚན་བརྒྱད་པར་གསལ་བ་ལྟར་རྒྱལ་བ་ཇོ་ནང་བ་ནི། ལྟ་གྲུབ་དང་ཆོས་བརྒྱུད་ཀྱི་ཆ་ནས་རང་རྐང་ཚུགས་པ་ཞིག་ཡིན་ཞེས་༸སྤྱི་ནོར་གོང་ས་རིན་པོ་ཆེ་མཆོག་དབུ་བཞུགས་ཐོག་ཐག་ཆོད་བྱུང་བ་དང་། ད་ལྟའི་ཆར་ཡང་བོད་གཞིས་བྱེས་གཉིས་ཆ་ན་བཤད་བསྒྲུབ་བསྟན་པ་འཛིན་སྐྱོང་བྱེད་མཁན་དགེ་འདུན་པའི་སྡེ་ཡང་ཁྲི་ཕྲག་ལྷག་དང་། བསྟན་པའི་གནས་གཞི་ཡང་དགོན་མ་ལག་རི་ཁྲོད་དང་བཅས་པ་བརྒྱ་ལྷག་གིས་གྲུབ་ཡོད་པ་དང་། དེའི་རྗེས་འབྲང་མི་སྡེ་ཡང་ཁྲི་ཕྲག་དུ་མ་ཡོད་པ་ཀུན་གྱིས་ཇོ་ནང་བསྟན་སྲིད་ཐོབ་ཐང་ཆེད་དུ་ མི་ལོ་དུ་མའི་རིང་སྙན་ཞུའི་གྲངས་ཀ་བརྒྱ་ཕྲག་ལས་བརྒལ་བ་ཞིག་ཕུལ་བའི་མངོན་འདོད་དང་རེ་བའི་སེམས་ཤུགས་དེ་མི་ཆག་པར་བྱ་རྒྱུ་ནི་གཞིས་བྱེས་གོང་བུ་གཅིག་སྒྲིལ་གྱི་རྩ་བའི་རྨང་གཞི་ཞིག་ཏུ་འཁུམས།

དོན་ཚན་གཉིས་པ། ཇོ་ནང་ཆོས་བརྒྱུད་ཐོབ་ཐང་གི་དགོས་དམིགས།

སྤྱིར་རྒྱལ་ཁབ་ཅིག་དང་གཞུང་ཞིག་ཡིན་ཕྱིན་ངོ་བོ་རྒྱ་བསྐྱེད་དང་། སྟངས་འཛིན་འོག་གི་ཁྱབ་ཁོངས་ཀྱང་བརྟན་བརླིང་གཅིག་སྒྲིལ་སྔར་ལས་ལྷག་པར་ཡོང་ཆེད་ཕྱོགས་ཐམས་ཅད་ནས་མི་མང་གི་རེ་འདོད་དང་བསྟུན་ཏེ་གོམ་འགྲོས་སྤོ་དགོས་པ་དང་། ལྷག་པར་དུ་ད་སྐབས་༸སྤྱི་ནོར་གོང་ས་རིན་པོ་ཆེ་དབུ་བཞུགས་ཐོག་བོད་གཞུང་གི་མིང་གི་དབང་བསྒྱུར་འོག་ཏུ་རྒྱལ་བ་ཇོ་ནང་ཆོས་བརྒྱུད་ཀྱང་ཡོད་དགོས་པ་ནི་རྒྱ་བོད་གཉིས་ཀྱི་སྲིད་དོན་གྱི་གནད་འགག་གི་དགོས་ཕན་ཡིན་པ་དང་། རྒྱ་ནག་གཞུང་དམར་གྱིས་ནི་རྒྱལ་བ་ཇོ་ནང་ཆོས་བརྒྱུད་དེ་བོད་ཀྱི་ཆོས་བརྒྱུད་དྲུག་གི་ནང་ཚན་ཞིག་ཏུ་བགྲང་ནས་ཆོས་བརྒྱུད་སྤྱི་མཚུངས་ལྟར་གྱི་ཐོབ་ཐང་ཆ་ཚང་ཞིག་སྤྲད་ཡོད་པ་མ་ཟད་ད་དུང་གཞིས་བྱེས་བར་གྱི་དཀྲིགས་ཤིང་གི་ལག་ཆ་ལྟ་བུ་བཟོ་བ་ལ་ཡང་འབད་པ་བྱེད་བཞིན་པའི་སྒང་ཡིན་པ་དེ་ཀུན་སྨོས་མི་དགོས་པ་བཞིན་ལགས་ལ།

དོན་ཚན་གསུམ་པ། ཆོས་བརྒྱུད་དབུ་ཁྲིད་རྣམས་ཀྱི་དགོངས་དོན།

འཛམ་གླིང་ནང་བའི་དབུ་ཁྲིད་དམ་པ་༸སྤྱི་ནོར་གོང་ས་མཆོག་གཙོ་བྱས་པས་དཔལ་ལྡན་ས་སྐྱ་གོང་མ་རིན་པོ་ཆེ་དང་རྒྱལ་བ་ཀརྨ་པ་མཆོག་དང་། སྟག་ལུང་རྩེ་སྤྲུལ་རིན་པོ་ཆེ། དགའ་ལྡན་གསེར་ཁྲི་རིན་པོ་ཆེ་སོགས་བོད་ཀྱི་ཆོས་བརྒྱུད་དབུ་ཁྲིད་བླ་ཆེན་རྣམས་ཀྱིས་ཀྱང་དུས་ནས་དུས་སུ་རྒྱལ་བ་ཇོ་ནང་ཆོས་བརྒྱུད་ལ་བོད་ཀྱི་ཆོས་བརྒྱུད་ཅིག་གི་ངོས་འཛིན་དང་རྒྱབ་གཉེར་ཕྱག་དམ་བཅས་བསྩལ་ཡོད་པ་དེ་ཡང་སྣང་མེད་དུ་བྱ་མི་འོས་པའི་རིགས་ཡིན་ལ།

དོན་ཚན་བཞི་པ། ས་སྐྱའི་སྤྱི་འཐུས་ལ་ཇོ་ནང་སྐྱ་སེར་སུས་ཀྱང་འོས་ཤོག་འཕངས་མྱོང་མེད།

བོད་གཞུང་གི་ལམ་ལུགས་མང་གཙོ་བྱས་ནས་ལོ་ངོ་ལྔ་བཅུ་ཙམ་འདས་ཀྱང་ད་ལྟའི་བར་ཇོ་ནང་སྐྱ་སེར་ཕོ་མོ་སུ་གཅིག་གིས་ཀྱང་ས་སྐྱའི་སྤྱི་འཐུས་ལ་འོས་ཤོག་འཕངས་མྱོང་མེད་པ་ནི་ས་སྐྱའི་ཆོས་བརྒྱུད་སྤྱི་འཐུས་དེས་ཇོ་ནང་ཆོས་བརྒྱུད་ཀྱི་སྤྱི་འཐུས་ཀྱི་ཚབ་བྱེད་མི་ཐུབ་པའི་དཔང་རྟགས་དང་། དེ་ཙམ་མ་ཟད་ས་སྐྱའི་སྤྱི་འཐུས་དེ་ཇོ་ནང་བའི་ངོ་ཚབ་མཚོན་པའི་འོས་མི་ཙམ་དུ་ཡང་བགྲངས་མེད་པ་ནི་བསུབ་ཏུ་མེད་པའི་བདེན་རྟགས་ཀྱི་ཚད་ཤིང་ཞིག་ཏུ་གྱུར།

དོན་ཚན་ལྔ་པ། ཇོ་ནང་བས་ཆོལ་ཁའི་སྤྱི་འཐུས་རྩོད་ཀྱི་མེད།

ཇོ་ནང་བའི་གཟུར་གནས་མཁས་པ་ལ་ལས་མང་གཙོའི་མང་རྒྱལ་ཉུང་ཕམ་གྱི་ལམ་ལུགས་ལ་མ་ལྟོས་པར་གནས་ལུགས་དང་དྲང་བདེན་བརྩད་དགོས་ཚུལ་དང་། ཡང་ཇོ་ནང་བ་ལ་ལས་ཆོས་སྲིད་ཐ་དད་པའི་ཕྱོགས་ནས་བརྩད་དགོས་ཚུལ་གསུངས་པ་སོགས་རྩ་བའི་དམིགས་ཡུལ་གཅིག་ལ་བསམ་པའི་ལྟ་བ་མི་མཐུན་པ་འགའ་ཞིག་བྱུང་མོད། ཇོ་ནང་བ་སྐྱ་སེར་སུ་དང་གང་གིས་ཀྱང་ཆོལ་ཁའི་ཕྱོགས་ཞེན་བྱས་ཏེ་ཆོལ་ཁའི་སྤྱི་འཐུས་ཀྱི་ཁ་གྲངས་མང་ཉུང་རྩོད་ཀྱི་མེད་པ་ནི་བྱེས་བཞུགས་ཀུན་གྱི་ཐུགས་ལ་འཛིན་དགོས་པའི་གནད་དོན་ཞིག་ཏུ་གྱུར།

དོན་ཚན་དྲུག་པ། བོད་གཞུང་མང་ཀུན་གྱི་དགོངས་པ་གཅིག་འགྲུབ་ཀྱི་རྩ་བའི་ལམ་ལུགས།

གལ་ཏེ་ཆོལ་ཁའི་སྤྱི་འཐུས་གྲངས་ཀ་འཕར་མི་དགོས་པའི་ཐོག་ནས་ད་ལྟའི་ཆོལ་ཁའི་སྤྱི་འཐུས་རྣམས་ལས་གང་རུང་ཞིག་ཇོ་ནང་ཆོས་བརྒྱུད་སྤྱི་འཐུས་ལ་འདེམས་དགོས་པའི་ལམ་ལུགས་ཤིག་བཟོ་རྒྱུ་བྱུང་ན་ཇོ་ནང་གཞིས་བྱེས་ལྷ་སྡེ་མི་སྡེ་ཀུན་གྱི་མངོན་འདོད་དང་མཐུན་ཡོད་པ་མ་ཟད་བོད་ཆོལ་ཁའི་རྡོག་རྩ་གཅིག་དྲིལ་དང་བོད་ཀྱི་བསྟན་སྲིད་མཉམ་གནས་ལ་ཡང་སྔར་ལས་ལྷག་པའི་དགེ་མཚན་ཡོད་པ་དང་། བོད་གཞུང་གི་མ་འོངས་པའི་དཀའ་ངལ་ཡང་གང་མང་སེལ་ཐུབ་པའི་ནུས་པ་ཡོད་པ་སོགས་དགེ་མཚན་གླེང་མི་དགོས་པའི་གནས་སུ་མཐོང་།

ཞེས་རྒྱལ་བ་ཇོ་ནང་བའི་ཆོས་གྲལ་དུ་གཏོགས་པ་ཤེས་རབ་ཆོས་འཕེལ་ནས་ཕྱི་ལོ། ༢༠༡༥ ཟླ་བ། ༣ ཚེས། ༡༥ ལའོ།