རྒྱལ་བསྟན་དར་སྤེལ་བགྲོ་གླེང་ཐེངས་བཅུ་པ་ཐའེ་ཝན་དུ་འཚོགས།

ཟླ་འདིའི་ཚེས་༨ཉིན་ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་ནང་བསྟན་དར་སྤེལ་བགྲོ་གླེང་སྐབས་བཅུ་པ་དེ་ཐའེ་ཝན་གྱི་རྒྱལ་ས་ཐའེ་པེ་རུ་འཚོགས་ཡོད་པ་རེད།

ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་འབྲེལ་ཡོད་ཀྱིས་གནས་ཚུལ་འགྲེལ་བརྗོད་གནང་བ་ལྟར་ན། དེ་སྐབས་ནད་ཡམས་སོགས་སྤྱི་ཡོངས་ཀྱི་གནས་སྟངས་དཀའ་ཚེགས་ཅན་དུ་ཡོད་མིན་ལ་མ་ལྟོས་པར།ད་ཐེངས་ཀྱི་ཚོགས་འདུར།ཐའེ་ཝན་གནས་བཞུགས་བོད་བརྒྱུད་ནང་བསྟན་ཆོས་བརྒྱུད་རིས་མེད་ཀྱི་མཁན་སྤྲུལ་དགེ་བཤེས་དགེ་འདུན་པ་བརྒྱ་ལ་ཉེ་བ་ཞིག་མཉམ་ཞུགས་གནང་ཞིང་།གཙོ་བོ་དུས་དང་མཐུན་པའི་སྒོ་ནས་བོད་བརྒྱུད་ནང་བསྟན་འཛིན་སྐྱོང་སྤེལ་གསུམ་གནང་སྟངས་དང་།ཐའེ་ཝན་གནས་བཞུགས་བོད་མི་དག་གི་ཆོས་དང་རིག་གཞུང་གོང་འཕེལ་གཏོང་ཐབས།ས་གནས་ཀྱི་གནས་སྟངས་ལ་གཞིགས་པའི་བོད་བརྒྱུད་དགེ་འདུན་པའི་མཛད་སྤྱོད་དང་ཐུགས་འགན།ཁྲོམ་ར་རིག་པ་དང་འབྲེལ་བའི་ནང་ཆོས་འཆད་སྤེལ་གྱི་ཐབས་ལམ་སོགས་དང་འབྲེལ་བགྲོ་གླེང་ཟབ་གནང་ཡོད་འདུག

དེང་སྐབས་སེང་ག་པུར་དུ་བཞུགས་པའི་ཞིབ་འཇུག་ཚོགས་པའི་ཚོགས་གཙོ་མཁན་པོ་འཇིགས་མེད་རྣམ་རྒྱལ་གྱིས་དྲ་ལམ་བརྒྱུད་ཞིབ་འཇུག་ཚོགས་པའི་ཚབ་ཞུས་ནས་འཚམས་འདྲིའི་གསུང་བཤད་གནང་རྗེས།ཞིབ་ཚོགས་འགན་འཛིན་མཁན་པོ་ཚེ་དབང་རིག་འཛིན་གྱིས་ལས་རིམ་ངོ་སྤྲོད་དང་།ཚོགས་གཞོན་སྒྲུབ་དཔོན་བསོད་ནམས་ཉི་མས་དབུས་པའི་འགན་འཛིན་ཐུན་མོང་ནས་《འགན་འཁྲི》། 《རིས་མེད་ཞལ་འདོན》། 《ཚེ་སྲོག་བྱམས་སྐྱོང་》། 《གཤིན་ཆོག》 །《སྟོན་པའི་འཁྲུངས་སྐར་ཞལ་འདོན་》བཅསཞིབ་འཇུག་ཚོགས་པས་བཏོན་པའི་དཔེ་དེབ་ཁག་ཞལ་འབྱེད་དང་འབྲེལ།ཞིབ་ཚོགས་འགན་འཛིན་སྤྲུལ་སྐུ་ཐུབ་བསྟན་ནོར་བུ་རིན་པོ་ཆེས་ཉེར་མཁོའི་ཞལ་འདོན་གྱི་ཕྱག་དེབ་གསུམ་གྱི་རྩོམ་སྒྲིག་བརྒྱུད་རིམ་དང་།ནང་དོན་འདེམས་སྒྲིག་ཞུས་སྟངས།དགོས་དམིགས་བཅས་ཀྱི་ཐད་ལ་གསུང་བཤད་གནང་།
དེ་ནས་ནང་བསྟན་དཔེ་ཚོགས་ཆེན་མོའི་ལས་བྱེད་པ་རྒན་ངག་དབང་འཕྲིན་ལས་ཀྱིས་དཔེ་ཚོགས་ཆེན་མོའི་བྱུང་བ་དང་།དྲ་ལམ་ནས་དཔེ་མཛོད་བེད་སྤྱོད་གཏོང་ཕྱོགས་སོགས་ཀྱི་ཐད་ལ་གསུང་བཤད། ཞིབ་ཚོགས་འགན་འཛིན་མཁན་པོ་ངག་དབང་མཁས་གྲུབ་དང་།ལྕམ་སེན་སྒྲིས་ཡིས་ཁྲོམ་ར་རིག་པ་དང་འབྲེལ་བའི་ནང་ཆོས་འཆད་སྤེལ་གྱི་ཐབས་ལམ་དང་།འདས་པའི་ཟླ་བ་གསུམ་རིང་ཐའེ་ཝན་དུ་བོད་བརྒྱུད་མཁན་པོ་དགེ་བཤེས་ཧྲག་བསྡུས་ཤིག་ལ་དམིགས་བསལ་ཟབ་སྦྱོང་སྤྲད་པའི་བརྒྱུད་རིམ་སོགས་ངོ་སྤྲོད་གནང་།

ཞིབ་ཚོགས་འགན་འཛིན་མཁན་པོ་ཀུན་དགའ་རིན་ཆེན་གྱིས་ཁོང་གིས་ཕྱག་བསྟར་ཇུས་འགོད་གནང་བའི་ཞིབ་འཇུག་ཚོགས་པའི་ བོད་རྒྱ་དབྱིན་གསུམ་གྱི་https://www.theitb.org དྲ་རྒྱ་གསར་པ་དབུ་འབྱེད་དང་འབྲེལ་བའི་དྲ་ཚིགས་ངོ་སྤྲོད་དང་དྲ་རྒྱུའི་དགོས་ནུས་སོགས་དང་འབྲེལ་བའི་གསུང་བཤད།དགེ་བཤེས་ཐུབ་བསྟན་ནོར་བུས་ཞིབ་འཇུག་ཚོགས་པའི་ལས་འཆར་གཙོ་གྲས་རྒྱལ་སྤྱིའི་སྟོན་པའི་འཁྲུངས་སྐར་གཅིག་གྱུར་དང་འབྲེལ་བའི་ལས་དོན་གསལ་བཤད་སྙན་ཞུ།ཚོགས་གཞོན་སྒྲུབ་དཔོན་བསོད་ནམས་ཉི་མས་ཞིབ་འཇུག་ཚོགས་པའི་འདས་པའི་ལས་སྡོམ་དང་།འབྱུང་འགྱུར་ལས་འཆར་སྙིང་བསྡུས་སྐོར་སྙན་སྒྲོན།ཨོ་གླིང་གནས་བཞུགས་འགན་འཛིན་མཁན་པོ་རྫ་ཚེ་རིང་བཀྲ་ཤིས་ཀྱིས་དྲ་ལམ་བརྒྱུད་ཞིབ་འཇུག་ཚོགས་པས་ལོ་མང་རིང་འབད་བརྩོན་གྱིས་ལེགས་འགྲུབ་བྱུང་བའི་《འགན་འཁྲི》འམ།མིང་རྒྱས་པར་《རྒྱ་རིགས་གཙོ་བོར་གྱུར་པའི་འཛམ་གླིང་ཡུལ་གྲུ་ཁག་ཏུ་བོད་བརྒྱུད་ནང་བསྟན་འཛིན་སྐྱོང་སྤེལ་གསུམ་དང་འབྲེལ་བའི་འབོད་སྐུལ་གྲོས་ཆོད་》ཅེས་པའི་ལོ་རྒྱུས་རང་བཞིན་གྱི་གལ་གནད་ལག་དེབ་དང་འབྲེལ་བའི་གསལ་བཤད་སྙན་སྒྲོན་གནང་།

མཇུག་ཏུ།ཀཿ་ཐོག་རིག་འཛིན་ཆེན་པོ་རིན་པོ་ཆེས་ཞིབ་འཇུག་ཚོགས་པའི་ཚབ་གནང་ནས་འབྲེལ་ཡོད་ཡོངས་ལ་ཐུགས་རྗེ་ཆུ་ཞུའི་གསུང་བཤད།ཞིབ་ཚོགས་འགན་འཛིན་བླ་མ་ཡོན་ཏན་རིན་པོ་ཆེས་དབུ་དྲངས་ནས་བསྔོ་སྨོན་གྱི་མཚམས་སྦྱོར་རྒྱས་པ་བཅས་ལས་རིམ་མཇུག་ཡོངས་སུ་གྲོལ་ཡོད་རེད།

ཚོགས་ཐོག་དེར་ཚོགས་ཞུགས་པ་ཡོངས་ལ་གོ་སྐབས་གཅིག་མཚུངས་ཕུལ་བའི་ཐོག་ནས་སྐབས་དོན་བརྗོད་གཞི་ཁག་དང་།དེ་བཞིན་ཞིབ་འཇུག་ཚོགས་པའི་ལས་དོན་བྱེད་ཕྱོགས།ཐའེ་ཝན་གནས་བཞུགས་དགེ་འདུན་པའི་ཐོངས་མཆན་སོགས་དང་འབྲེལ་བའི་སྐོར་བཅས་ཕྱོགས་མང་པོ་ཞིག་ལ་དྲི་བ་དྲིས་ལན་གྱིས་བཀའ་བསྡུར་གནང་ཡོད་པ་དང་།ཚོགས་ཞུགས་པ་མང་པོ་ཞིག་གིས་ཀྱང་ཞིབ་འཇུག་ཚོགས་པའི་ལས་དོན་གྱི་གྲུབ་འབྲས་ལ་བསྔགས་བརྗོད་དང་འབྲེལ་འབྱུང་འགྱུར་ལས་འཆར་ཁག་དང་འབྲེལ་བའི་སྐོར་གསུངས་ཡོད་པ་རེད།

ཚོགས་འདུ་ཧྲིལ་པོར།དགེ་བཤེས་སྣང་སྣང་དང་མཁན་པོ་ངག་དབང་མཁས་གྲུབ་ཟུང་གིས་ཚོགས་འདུའི་ལས་རིམ་གཙོ་སྐྱོང་དང་།མཁན་པོ་ཚེ་དབང་རིག་འཛིན་གྱིས་ཚོགས་འདུའི་མདོ་འཛིན་གནང་བ་དང་།ཐེངས་འདིའི་ཚོགས་ཁང་དང་ཐད་གཏོང་སོགས་དང་འབྲེལ་བའི་ལས་རིམ་ཡོངས་རྫོགས་༧སྐྱབས་རྗེ་མགར་ཆེན་རིན་པོ་ཆེའི་ཆོས་ཚོགས་ནས་མཐུན་སྦྱོར་གནང་ཞིང་།ལས་རིམ་ཧྲིལ་པོ་ཞིབ་འཇུག་ཚོགས་པའི་ངོ་དེབ་སོགས་བརྒྱུད་ནས་ཐད་གཏོང་རྒྱང་སྲིང་བྱས་ཡོད་པ་རེད།།

གསར་འགོད་པ་ཆོས་ཉིད་འོད་ཟེར།