རྒྱལ་ཡུམ་ཆེན་མོའི་རྗེས་དྲན་རྐང་སྤོལ་རྩེད་འགྲན་ཐེངས་༢༦ པ་དབུ་འཛུགས་གནང་སོང་།

རྒྱ་གར་ནང་ཏོག་དབྱིབས་ནད་དུག་གི་གནས་སྟངས་བཟང་དུ་ཕྱིན་ཡོད་པ་དང་བསྟུན། རྒྱལ་ཡུམ་ཆེན་མོའི་རྗེས་དྲན་གསེར་གྱི་གཟེངས་རྟགས་རྐང་རྩེད་སྤོ་ལོའི་རྩེད་འགྲན་ཐེངས་ ༢༦ པ་དེ། རྒྱ་གར་བྱང་ཕྱོགས་དོན་གྲུབ་གླིང་བོད་མིའི་གཞིས་ཆགས་སུ་ཟླ་༡༠ པའི་ཚེས་༠༡ ནས་དབུ་འཛུགས་ཀྱིས་ཚེས་༡༢ བར་གནང་རྒྱུ་ཡིན་པ་རེད། འདི་ལོའི་རྩེད་འགྲན་ནང་རྒྱ་གར་དང་བལ་ཡུལ་བཅས་ནས་རུ་ཁག་བཅུ་མཉམ་ཞུགས་གནང་ཡོད་པ་དང་། ཉིན་གྲངས་བཅུ་གཉིས་རིང་ཁྱོན་རྩེད་འགྲན་༢༧ ཡོད་པ་དང་རུ་ཁག་རེར་ཉུང་མཐར་རྩེད་འགྲན་ཐེངས་ ༤ རྩེད་རྒྱུའི་གོ་སྐབས་ཡོད་པ་རེད་འདུག

སྐུ་མགྲོན་གཙོ་བོ་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ཀྱིས། བོད་རྒྱལ་ཡོངས་རྩེད་རིགས་ཚོགས་པ་འདི་ཉིད་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་འོག་ལ་ཡོང་སྟངས་དང་། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་མང་ཚོགས་ཀྱི་སྨན་བཅོས་མཐུན་འགྱུར་ལས་ལྷག་སྔོན་འགོག་ཐོག་ལ་ལས་དོན་མང་བ་སྤེལ་བཞིན་པ། ན་ཚ་མང་པོ་ཞིག་དུས་རྒྱུན་གཟུགས་པོར་འགུལ་སྐྱོད་དང་ལུས་རྩལ་མེད་པའི་རྐྱེན་གྱི་ཡོང་གི་ཡོད་སྟབས། འདས་པའི་ལོ་ཤས་ནང་བཙན་བྱོལ་བོད་མིའི་གཞིས་ཆགས་ཁག་གི་ནང་རྐང་རྩེད་སྤོ་ལོ་དང་སིལ་སྤོལ་རྩེད་ཐང་ཡར་རྒྱས་བཏང་བ་དང་། ལུས་སྦྱོང་ཆེད་དུ་(Open Gym) བརྒྱབ་པ་སོགས་ཀྱི་ལས་གཞི་མང་དག་ཅིག་སྤེལ་གནང་ཡོད་པས་ཚང་མས་དེ་ཚོ་བེད་སྤྱོད་གནང་སྟེ་སོ་སོའི་འཕྲོད་བསྟེན་ལ་སྔོན་ཚུད་ནས་དོ་གནང་བྱ་རྒྱུ་གལ་ཆེན་པོ་ཡིན་པ།ད་ལྟ་འདིར་ཡོད་པའི་རྩེད་འགྲན་པ་ཚང་མ་རིམ་པས་ལོ་ན་རྒས་པའི་སྐབས་སུའང་འཕྲོད་བསྟེན་ལ་མུ་མཐུད་དོ་སྣང་གནང་དགོས་པ་དང་། རྩེད་འགྲན་སྐབས་རྒྱལ་ཕམ་ཡོང་རྒྱུ་ནི་ཆོས་ཉིད་ཡིན་པར་བརྟེན་ཚང་མས་འཁོན་འཛིན་གང་མེད་པར་སྤྲོ་སེམས་ལྡན་པའི་ངང་ནས་རྩེད་དགོས་རྒྱུ་ཧ་ཅང་གལ་ཆེན་པོ་ཡིན་སྐོར་སོགས་ཀྱི་གསུང་བཤད་གནང་སོང་།

རྩེད་འགྲན་དབུ་འཛུགས་ཀྱི་ཐོག་མར་དོན་གྲུབ་གླིང་གཞིས་ཆགས་ཀྱི་རུ་ཁག་དང་སིམ་ལ་རུ་ཁག་གཉིས་དབར་རྩེད་འགྲན་གནང་ཡོད་པ་དང་། སིམ་ལ་རུ་ཁག་གི་སྤོ་ལོ་བཞི་དང་དོན་གྲུབ་གླིང་རུ་ཁག་གིས་སྤོ་ལོ་གཉིས་བླུགས་ཏེ་སིམ་ལ་རུ་ཁག་གིས་རྒྱལ་ཁ་བླངས་ཡོད་པ་རེད།

དེ་ཡང་ཕྱི་ལོ་༢༠༢༠ ལོར་འཆར་གཞི་ལྟར་བྱས་ན་ཟླ་༥ པའི་ཚེས་༣ ཉིན་ནས་རྒྱ་གར་བྱང་ཕྱོགས་རྡེ་ར་རྡུན་དུ་ཡོད་པའི་བོད་མིའི་གཞིས་སྒར་དོན་གྲུབ་གླིང་དུ། རྒྱལ་ཡུམ་ཆེན་མོའི་དྲན་རྟེན་རྐང་སྤོལ་རྩེད་འགྲན་ཐེངས་༢༦ པ་གོ་སྒྲིག་བྱེད་རྒྱུ་ཡིན་པ་དང་། རྩེད་འགྲན་ལ་དེབ་སྐྱེལ་བྱེད་མཁན་རུ་ཁག་༡༤ བྱུང་ཡོད་ཀྱང་། ཟླ་༣ པ་ནས་བཟུང་འཛམ་གླིང་གང་སར་དང་རྒྱ་གར་ནང་དུ་ཡང་ཏོག་དབྱིབས་ནད་དུག་ཁྱབ་གདལ་ཕྱིན་པའི་རྐྱེན་གྱིས་རྒྱལ་ཡུམ་ཆེན་མོའི་རྐང་སྤོལ་རྩེད་འགྲན་ལོ་གཅིག་རིང་ཕར་འགྱངས་བྱས་ཏེ། ཕྱི་ལོ་༢༠༢༡ ལོའི་ཟླ་༥ པའི་ཚེས་༣ ཉིན་ནས་གོ་སྒྲིག་བྱེད་རྒྱུ་གསལ་བསྒྲགས་བྱས་ཡོད་པ་རེད་དེ། ཕྱི་ལོ་༢༠༢༡ ལོའི་ཟླ་༤ པའི་ནང་རྒྱ་གར་ཡོངས་སུ་ཏོག་དབྱིབས་ནད་དུག་གི་ནད་རླབས་གཉིས་པ་སླེབས་ནས་གནས་སྟངས་ཚབས་ཆེན་ཆགས་ཡོད་པས། སྔོན་བརྡ་མ་བཏང་བར་དུ་རྩེད་འགྲན་འཕར་འགྱངས་བྱེད་རྒྱུ་གསལ་བསྒྲགས་བྱས་ཡོད་པ་རེད། ད་ལྟའི་ཆར་རྒྱ་གར་ནང་གནས་སྟངས་ཡག་ཏུ་ཕྱིན་ཡོད་པས་རྩེད་འགྲན་གོ་སྒྲིག་བྱས་ཡོད་པ་རེད།

ཕྱི་ལོ་༢༠༡༩ ལོའི་ཟླ་༥ པའི་ཚེས་༣༡ ནས་ཟླ་༦ པའི་ཚེས་༡༠ སྟེ་ཉིན་གྲངས་༡༡ རིང་རྡ་སྟེང་བོད་ཁྱིམ་གྱི་རྐང་སྤོལ་རྩེད་ཐང་དུ། བྱང་ཨ་རི་དང་དབྱིན་ཡུལ། རྒྱ་གར་དང་བལ་ཡུལ་བཅས་ནས་རུ་ཁག་༢༣ བར་རྒྱལ་ཡུམ་ཆེན་མོའི་རྐང་སྤོལ་རྩེད་འགྲན་བྱས་ཡོད་པ་དང་། མཐའ་མའི་རྒྱལ་ཁ་དེ་རྒྱ་གར་ལྷོ་ཕྱོགས་བོད་མིའི་གཞིས་ཆགས་མོན་གྷོ་འདོད་རྒུ་གླིང་རུ་ཁག་གིས་བླངས་ཡོད་པ་རེད། ཕྱི་ལོ་༢༠༡༨ ལོའི་རྒྱལ་ཁ་ཡང་མོན་གྷོ་རུ་ཁག་གིས་བླངས་ཡོད་པ་རེད།།

རྒྱལ་ཡུམ་ཆེན་མོའི་དྲན་རྟེན་གྱི་རྐང་སྤོལ་རྩེད་འགྲན་དེ་ནི་༧གོང་ས་མཆོག་གི་མ་ཡུམ་བདེ་སྐྱིད་ཚེ་རིང་གི་དྲན་རྟེན་ཆེད་དུ། ཕྱི་ལོ་༡༩༨༡ ལོ་ནས་འགོ་བཙུགས་ཡོད་པ་དང་། བཙན་བྱོལ་བོད་མིའི་སྤྱི་ཚོགས་ནང་གི་རྩེད་འགྲན་ཀྱི་ཚད་གཞི་མཐོ་ཤོས་དང་ཆེ་ཤོས་དེ་ཡིན་པ་རེད། རྩེད་འགྲན་དེའི་སྐབས་སུ་བོད་རྒྱལ་ཡོངས་རྐང་སྤོལ་རུ་ཁག་གི་རྩེད་མོ་བ་ཡང་འདེམས་སྒྲུག་བྱེད་ཀྱི་ཡོད་པ་རེད།།

གསར་འགོད་པ་སྐལ་བཟང་དོན་གྲུབ།