རྒྱལ་སྤྱིའི་ཁ་ཕྱོགས་དང་འགྱུར་ལྡོག

(བོད་ཀྱི་བང་ཆེན་གསར་ཤོག་སྤྱིའི་འདོན་ཐེངས་༡༠༠༤ ཆེད་བརྗོད།)

འཛམ་གླིང་འཁྲུག་ཆེན་གཉིས་པ་མཇུག་བསྡུས་རྗེས་མཉམ་འབྲེལ་རྒྱལ་ཚོགས་གསར་འཛུགས་དང་། འགྲོ་བ་མིའི་ཐོབ་ཐང་གི་ཡོངས་ཁྱབ་གསལ་བསྒྲགས་སྤེལ་བ་སོགས་འགྲོ་བ་མིའི་ཐོབ་ཐང་གཙོ་བོར་གྱུར་པའི་འདྲ་མཉམ་གྱི་བསམ་བློ་ཁྱབ་སྤེལ་གཏོང་ཐབས་བྱས་ཡོད། ནུབ་ཕྱོགས་གཙོ་བོར་གྱུར་པའི་རྒྱལ་སྤྱིའི་ནང་གི་སྲིད་གཞུང་མང་པོ་ཞིག་གིས་འགྲོ་བ་མིའི་ཐོབ་ཐང་ལ་བརྩི་འཇོག་བྱས་ཏེ། ཕྱི་ནས་ཡོང་བའི་སྐྱབས་བཅོལ་བ་རྣམས་ལ་གཟིགས་རྟོག་དང་རིམ་པས་ཡུལ་མི་སྤྱི་མཚུངས་ཀྱི་ཐོབ་ཐང་སྤྲད། ལྷག་པར་དུ་ལས་ཀ་མ་རག་པ་དང་ལས་ཀ་བྱེད་མི་ཐུབ་པའི་སྐབས་གཞུང་གིས་གསོ་སྐྱོང་བྱེད་པ་སོགས་ནུབ་ཕྱོགས་ཀྱི་རྒྱལ་ཁབ་མང་ཆེ་བའི་ནང་དར་སྲོལ་ཧ་ཅང་ཆེན་པོ་བྱུང་ཞིང་། དེ་དག་ནི་གཙོ་བོ་འཛམ་གླིང་འཁྲུག་ཆེན་དང་པོ་དང་གཉིས་པའི་སྐབས་འགྲོ་བ་མིའི་སྤྱི་ཚོགས་ལ་བརྡབ་གསིག་དང་གནོད་འཚེ་ཆེན་པོ་ཐེབས་པའི་ཉམས་མྱོང་ལ་བརྟེན་ནས་བྱུང་བ་ཞིག་ཡིན་ལ། སྐབས་དེ་ནས་བཟུང་རྒྱལ་ཞེན་རིང་ལུགས་དང་མི་རིགས་རིང་ལུགས་ལ་རྒོལ་མཁན་ཡང་མང་པོ་བྱུང་ཡོད།

ཨ་ཧྥི་རི་ཀ་དང་། ཁ་ཆེའི་ཡུལ་ལུང་མང་པོ་ཞིག་ཏུ་འཁྲུག་རྩོད་དང་མུ་གེའི་འཇིགས་པ་ལ་བརྟེན་ནས་སྐྱབས་བཅོལ་དུ་ཡོང་མཁན་མང་པོ་བྱུང་བས་ནུབ་ཕྱོགས་ཀྱི་རྒྱལ་ཁབ་ཁག་ཏུ་སྐྱབས་བཅོལ་བ་མང་དྲགས་ཏེ་འབ་སུ་མ་འདུས་པའི་དཀའ་ངལ་མང་པོ་འཕྲད། ལྷག་པར་དུ་སྤྱི་ཚོགས་ཀྱི་ཁོར་ཡུག་དང་དཔལ་འབྱོར་གྱི་གནས་སྟངས་ཐོག་ནས་ཀྱང་དཀའ་ངལ་མང་པོ་ཞིག་འཕྲད་བཞིན་ཡོད། ད་ལྟའི་ཆར་འཛམ་གླིང་ཤར་ནུབ་ཀྱི་ཡུལ་ལུང་མང་ཆེ་བའི་ནང་བསམ་བློ་གསར་པ་ཞིག་གཏོང་འགོ་ཚུགས་ཏེ། འགྲོ་བ་མིའི་ཐོབ་ཐང་སྲུང་སྐྱོབ་དགོས་པའི་རིན་ཐང་གི་ལྟ་བ་ཟུར་དུ་བཞག་སྟེ་རྒྱལ་སྤྱི་ལ་ཁ་ཕྱོགས་པའི་བྱ་གཞག་ཉུང་དུ་བཏང་ཡོད་ལ། རྒྱལ་ཁབ་སོ་སོའི་ནང་དུའང་རང་ཉིད་སྒེར་དང་འབྲེལ་བ་ཡོད་པའི་སྲིད་དོན་ཚོགས་པ་ཁག་གི་ཁེ་ཕན་ཁོ་ནའི་ཆེད་བསམ་བློ་གཏོང་བ་ལས། རྒྱལ་ཁབ་ལ་བསམ་བློ་གཏོང་མཁན་ཡང་ཉུང་དུ་འགྲོ་བཞིན་ཡོད། ཆུང་ས་ནས་བཤད་ན་སྲིད་དོན་ཚོགས་པ་ཁག་ཀྱང་སྲིད་དོན་པ་མི་སྒེར་རེ་ཟུང་གི་ཁེ་ཕན་སྒྲུབ་སའི་སྡིངས་ཆ་ལྟ་བུར་བསྒྱུར་ཟིན། 

བོད་དོན་འཐབ་རྩོད་ཀྱང་འགྲོ་བ་མིའི་ཐོབ་ཐང་དང་ཆོས་དང་རིག་གནས་སྲུང་སྐྱོབ་ཁོ་ན་གཞི་རྩར་བཞག་ནས་མུ་མཐུད་ལས་འགུལ་སྤེལ་ན། རྒྱལ་སྤྱིའི་སྤྱི་ཚོགས་སུ་དོ་སྣང་དང་རྒྱབ་སྐྱོར་ཆེན་པོ་བྱེད་མཁན་ཡོད་མེད་ཀྱང་བཤད་དཀའ། མ་འོངས་པར་ཁ་ཕྱོགས་གསར་པ་ཞིག་ཏུ་བསྐྱོད་རྒྱུའི་འཆར་གཞི་བརྟན་པོ་ཞིག་མེད་ན། བོད་དོན་འཐབ་རྩོད་ལ་རྒྱལ་སྤྱིའི་སྟེང་དུ་རྒྱབ་སྐྱོར་དང་ནུས་པ་གང་ཡང་མེད་པར་འགྱུར་རྒྱུའི་ཉེན་ཁ་ཡོད། ད་ལྟའི་ཆར་རྒྱལ་ཁབ་སོ་སོའི་མཐུན་ཕྱོགས་མ་ཡིན་པ་རྣམས་ལ་འགྲོ་བ་མིའི་ཐོབ་ཐང་རྡོག་རོལ་གཏོང་མཁན་ཡིན་པའི་ཁ་རྡུང་གཏོང་གི་ཡོད་པ་ལས། རྒྱལ་ཁབ་དེ་དག་ལ་ཚོང་དང་ཆབ་སྲིད་ཀྱི་འབྲེལ་བ་ཡག་ཏུ་གྱུར་ཡོང་བའི་སྐབས་སུ་འགྲོ་བ་མིའི་ཐོབ་ཐང་ཡར་རྒྱས་ཡོད་མེད་ལ་དེ་ཙམ་དོ་སྣང་མི་བྱེད་པ་ལྟ་བུར་གྱུར་ཡོད། དོན་དངོས་སུ་འགྲོ་བ་མིའི་ཐོབ་ཐང་གི་ལྟ་བ་དང་སྲིད་བྱུས། གོ་ལ་གཅིག་གྱུར་གྱི་རིང་ལུགས་གཙོ་བོར་འཛིན་པ་ལས། རྒྱལ་ཞེན་རིང་ལུགས་དང་། མི་རིགས་རིང་ལུགས་ལ་རྒོལ་བའི་ཁ་ཕྱོགས་ལའང་འགྱུར་བ་ཆེན་པོ་སོང་དང་འགྲོ་བཞིན་འདུག

བཙན་བྱོལ་བོད་པའི་སྤྱི་ཚོགས་སུ་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གི་ཁ་མཆུ་ཨང་༢༠ པའི་ཐག་གཅོད་བྱེད་སྟངས་ལ་བརྟེན་ནས། ཁྲིམས་ཞིབ་པ་དེ་དག་མི་སྒེར་སོ་སོ་དང་འབྲེལ་བ་ཡོད་པ་དང་མཐུན་ཕྱོགས་ཡིན་པའི་ལྟ་ཚུལ་ཤུགས་ཆེ་བྱུང་ཡོད་པ་མ་ཟད། དེ་ལ་བརྟེན་ནས་བཙན་བྱོལ་བོད་པའི་སྤྱི་ཚོགས་ལ་ཤུགས་རྐྱེན་ཆེན་པོ་ཐེབས་ཡོད། འོན་ཀྱང་ང་ཚོའི་མིག་གིས་མཐོང་ས་ནས་ཨ་རིའི་ཁྲིམས་ཁང་དུ་སྲིད་འཛིན་ཟུར་པ་ཌོ་ནལ་ཊོམ་དང་འབྲེལ་བའི་ཁ་མཆུ་ཐག་གཅོད་བྱེད་སྟངས་དང་། རྒྱ་གར་གྱི་ཁྲིམས་ཁང་རེ་ཟུང་དུ་ར་ཧུལ་གཱན་དྷིའི་ཁ་མཆུ་ཐག་གཅོད་བྱས་པ་རྣམས། ཁྲིམས་དཔོན་དེ་དག་སྲིད་དོན་ཚོགས་པ་སོ་སོ་དང་འབྲེལ་བ་ཡོད་པ་ལ་བརྟེན་ནས་བྱུང་ཚུལ་ནི་ཡོངས་གྲགས་ཡིན་པ་མ་ཟད། དོ་བདག་ཌོ་ནལ་ཊོམ་དང་། ར་ཧུལ་གཱན་དྷིས་ཀྱང་ཡོངས་གྲགས་ཀྱི་ཐོག་ནས་ཤོད་བཞིན་ཡོད་པས། བཙན་བྱོལ་བོད་པའི་སྤྱི་ཚོགས་ནང་གནད་དོན་དེ་ལྟ་བུ་བྱུང་བ་ནི་ཧ་ལས་རྒྱུ་གང་ཡང་མེད་པ་ལྟ་བུར་གྱུར་མི་འདུག་གམ།

མདོར་ན་རྒྱལ་སྤྱིའི་ཁྱོན་ཡོངས་སུ་འགྱུར་ལྡོག་ཆེན་པོ་འགྲོ་བཞིན་པ་བཞིན། བོད་པས་ཀྱང་དེ་དང་བསྟུན་ནས་གོ་སྐབས་ཤིག་འཚོལ་མ་ཐུབ་ན་བོད་དོན་འཐབ་རྩོད་ལ་རེ་བ་གང་ཡང་མེད་པར་འགྱུར་སྲིད་པ་རེད། བོད་ནང་དུ་རྒྱ་དམར་གཞུང་གིས་གདུག་རྩུབ་དང་མནར་གཅོད་འོག་རང་དབང་གང་ཡང་མེད་པར། བོད་ཀྱི་ཆོས་དང་རིག་གནས་ཀྱང་རྩ་མེད་དུ་གཏོང་རྒྱུའི་ཉེན་ཁ་ཆེན་པོ་ཡོད་པ་དང་། བཙན་བྱོལ་བོད་པའི་སྤྱི་ཚོགས་སུ་མི་སྒེར་སོ་སོའི་ཟས་གོས་ཀྱི་གནད་དོན་ཙམ་ཐག་གཅོད་ཡོང་ཐབས་བྱ་རྒྱུ་ལས། སྤྱི་པའི་ལས་དོན་ལ་བསམ་བློ་གཏོང་མཁན་ཧ་ཅང་དཀོན་དུ་འགྲོ་བཞིན་ཡོད། གོང་དུ་བཤད་པ་བཞིན་རྒྱལ་སྤྱིའི་ཁ་ཕྱོགས་ལ་འགྱུར་བ་ཆེན་པོ་འགྲོ་བཞིན་པའི་སྐབས་འདིར་བོད་དོན་འཐབ་རྩོད་ཀྱི་ནུས་པ་གསར་པ་དང་གོ་སྐབས་གསར་པ་ཞིག་རག་རྒྱུའི་རེ་བ་ཆེན་པོ་ཡོད། དབུ་མའི་ལམ་གྱི་སྲིད་བྱུས་བརྒྱུད་རྒྱ་ནག་གི་འོག་ཏུ་སྡོད་རྒྱུའི་བསམ་བློ་ལ་འགྱུར་བ་གཏན་ནས་མ་བཏང་ན། མ་འོངས་པར་བསྐྱར་དུ་གོ་སྐབས་འདི་ལྟ་བུར་འཐོབ་རྒྱུ་ཧ་ཅང་ཁག་པོར་གྱུར་ཡོད།།