རྒྱལ་སྤྱིའི་མནར་གཅོད་འགོག་པའི་སྤྱི་ཆིངས་གཏན་འབེབས་བྱས་ནས་ལོ་ངོ་༣༧ འཁོར་བའི་ཉིན་མོ་སྲུང་བརྩི་ཞུས།

ཟླ་འདིའི་ཚེས་༢༦ ་ཉིན་གྱི་ཞོགས་པ་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་དང་བོད་ཀྱི་གཞོན་ནུ་ལྷན་ཚོགས། དེ་བཞིན་བོད་ཀྱི་བུད་མེད་ལྷན་ཚོགས་དང་བོད་རང་བཙན་སློབ་ཕྲུག་ཚོགས་པ་བཅས་ཀྱི་གོ་སྒྲིག་འོག དྷ་ས་ས་གནས་འགོ་འཛིན་ཚོགས་ཁང་དུ་བཙོན་འོག་ཏུ་མནར་གཅོད་མྱོང་མཁན་རྣམས་ལ་རྒྱབ་སྐྱོར་བྱེད་པའི་རྒྱལ་སྤྱིའི་མནར་གཅོད་འགོག་པའི་སྤྱི་ཆིངས་གཏན་འབེབས་བྱས་ནས་ལོ་ངོ་༣༧ འཁོར་བའི་ཉིན་མོ་སྲུང་བརྩི་དང་སྟབས་བསྟུན། བོད་ཀྱི་ཆབ་སྲིད་བཙོན་ཟུར་དང་བཙོན་འོག་ཏུ་ཡོད་མཁན་རྣམས་ཀྱི་གནས་སྟངས་ཐོག་གཏམ་བཤད་གནང་སོང་།

མཛད་སྒོའི་ཐོག་གོ་སྒྲིག་བྱེད་མཁན་རྣམས་ཀྱི་འགན་འཛིན་དང་ལས་བྱེད་གཙོས་ཆབ་སྲིད་བཙོན་ཟུར་ཁག་ཅིག་དང་གསར་འགོད་པ་དང་མི་མང་གཞན་བཅས་མཉམ་ཞུགས་གནང་འདུག སྐབས་དེར་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་བསྟན་འཛིན་ཟླ་བས་དུས་དྲན་གྱི་གལ་གནད་དང་། བོད་ནང་གི་ཛ་དྲག་གི་འགྲོ་བ་མིའི་ཐོབ་ཐང་གི་གནས་སྟངས་དང་འབྲེལ་བའི་གསུང་བཤད་དང་། ལྟེ་གནས་ཁང་གི་ཉམས་ཞིབ་པ་ཕུར་བུ་སྒྲོལ་མས་བོད་ཀྱི་ཆབ་སྲིད་བཙོན་པ་ཉི་ཤུའི་དངོས་ཡོད་ལོ་རྒྱུས་ངོ་སྤྲོད་གནང་རྗེས། ཆབ་སྲིད་བཙོན་ཟུར་དགེ་བཤེས་ཚེ་རིང་རྡོ་རྗེ་དང་བློ་བཟང་ཡོན་ཏན། དགེ་འདུན་རིན་ཆེན་དང་ཤེས་རབ་རྒྱ་མཚོ། དགེ་བཤེས་ངག་དབང་བདེ་ལེགས་བཅས་ཀྱིས་རྒྱ་གཞུང་ལ་ངོ་རྒོལ་བྱེད་དགོས་པའི་རྒྱུ་མཚན་དང་རྒྱ་གཞུང་གིས་འཛིན་བཟུང་བྱས་རྗེས་བཙོན་ཁང་དུ་མནར་གཅོད་ཇི་ལྟར་མྱོང་གི་ཡོད་མེད་སོ་སོའི་མྱོང་ཚོར་སོགས་གསུངས་སོང་།

སྐབས་དེར་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གསར་འགོད་བསྒྲགས་གཏམ་ཞིག་འགྲེམས་སྤེལ་བྱས་པའི་ནང་། རྒྱ་གཞུང་གིས་བཀག་ཉར་ཁང་དང་བཙོན་ཁང་དུ་ཁྲིམས་ཀྱི་བརྒྱུད་རིམ་གང་ལ་ཡང་མི་བསྟུན་པར་བོད་མི་རྣམས་ལ་རྡུང་རྡེག་གཏོང་བ། གནམ་བཏགས་རྒྱག་པ། རྐང་བཀྱིགས་ལག་སྒྲོག་བྱེད་པ་སོགས་མི་ཆོས་ལས་འདས་པའི་མནར་གཅོད་དྲག་པོ་བཏང་བའི་རྐྱེན་གྱིས་འདས་པའི་ལོ་ངོ་ལྔ་ཙམ་གྱི་ནང་དུ་ནོར་བཟུང་དང་བླ་བྲང་འཇིགས་མེད། ཆོས་སྐྱིད་དང་ལྷ་མོ། བསྟན་འཛིན་ཉི་མ་དང་དགེ་བཤེས་ཕན་བདེ་རྒྱལ་མཚན། ཕྱུག་དར་སོགས་བོད་མི་མི་ཉུང་བ་ཞིག་རྐྱེན་ལམ་དུ་ཕྱིན་ཡོད་པ་དང་། ཆབ་སྲིད་བཙོན་ཟུར་མང་པོ་ཞིག་ནི་དབང་པོ་སྐྱོན་ཅན་དང་གཅོང་ནད་ཅན་དུ་གྱུར་ཡོད་ཅེས་དང་།གཞན་ཡང་ལྟེ་གནས་ཁང་གིས་རྒྱ་གཞུང་གི་བཙོན་འོག་ཏུ་མི་ལོ་༡༣ རིང་སྡུག་སྦྱོང་མནར་གཅོད་མྱངས་ནས་འདས་གྲོངས་སུ་ཕྱིན་པའི་བོད་ཀྱི་ཆབ་སྲིད་བཙོན་ཟུར་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེས་མྱངས་པའི་ཡ་ང་བའི་མནར་གཅོད་ཀྱི་བརྒྱུད་རིམ་ལ་བསྐྱར་དུ་དྲན་གསོ་དང་ཁོང་གི་གནད་དོན་གྱིས་རྒྱ་གཞུང་གི་བཀག་ཉར་ཁང་དང་བཙོན་ཁང་དུ་མནར་གཅོད་མྱངས་དང་མྱོང་བཞིན་པའི་ཆབ་སྲིད་བཙོན་པ་ཚོའི་ཐུན་མོང་གི་གནང་བབ་མཚོན་ཐུབ་པར་བརྗོད་འདུག་ལ།

རྒྱ་གཞུང་གིས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་ལ་མནར་གཅོད་ཚད་མེད་བཏང་ནས་སྐུ་སྲོག་འཕྲོགས་པ་ནི་འགྲོ་བ་མིའི་ཐོབ་ཐང་ཡོངས་ཁྱབ་གསལ་བསྒྲགས་ཀྱི་དོན་ཚན་ལྔ་པར་མི་སུ་ལའང་མནར་གཅོད་དང་སྡུག་རྩུབ་རང་བཞིན་གྱི་མི་སྤྱོད་ལས་འདས་པའི་ཉེས་ཆད་གཏོང་མི་རུང་ཞེས་པ་དང་ཐད་ཀར་འགལ་ཡོད་པ་མ་ཟད། རྒྱ་གཞུང་གིས་ཕྱི་ལོ་༡༩༨༨ ལོར་མིང་བཀོད་དང་ལག་བསྟར་ཁས་ལེན་ཞུས་པའི་མནར་གཅོད་དང་སྡུག་རྩུབ་རང་བཞིན་གྱི་མི་སྤྱོད་ལས་འདས་པའི་ཉེས་ཆད་རིགས་འགོག་པའི་རྒྱལ་སྤྱིའི་སྤྱི་ཆིངས་དང་ཐད་ཀར་རྒྱབ་འགལ་དང་རྡོག་རོལ་བཏང་ཡོད་པ། མཉམ་འབྲེལ་རྒྱལ་ཚོགས་ཀྱི་བཙོན་པ་གཅུན་ཐབས་ཀྱི་མ་མཐའི་སྒྲིག་གཞིའི་དོན་ཚན་༢༢ པར་བཙོན་པ་ཚང་མར་སྨན་བཅོས་ཀྱི་མཐུན་རྐྱེན་འདང་ངེས་བསྐྲུན་དགོས་ཞེས་པ་དེ་ཡང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་གཙོས་བོད་ཀྱི་ཆབ་སྲིད་བཙོན་པ་རྣམས་ལ་ཐོབ་མེད་ཅེས་བཀོད་འདུག།།

གཞན་ཡང་རྒྱལ་སྤྱིའི་འགྲོ་བམིའི་ཐོབ་ཐང་གི་ཁྲིམས་ཐོག་ནས་བཀག་ཉར་ཁང་དུ་བཙོན་པ་འདས་གྲོངས་སུ་ཕྱིན་པའི་གནད་དོན་འབྱུང་སྐབས། དོ་བདག་ལ་དྲང་བདེན་ཐོབ་ཆེད་འབྲེལ་ཡོད་ནང་མིར་གུད་གསབ་ཚུལ་བཞིན་རག་ཐབས་སུ་སྲིད་གཞུང་གི་ངོས་ནས་ངེས་པར་དུ་གནད་དོན་བརྩད་གཅོད་བྱེད་དགོས་པའི་ལས་འགན་བསྐུལ་ཡོད་པ་ལྟར། རྒྱ་གཞུང་གིས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་འདས་རྐྱེན་ལ་ཕྱི་གསལ་ནང་གསལ་དང་དྲང་བདེན་གྱི་ཞིབ་འཇུག་འཐུས་ཚང་བྱ་དགོས་པ་དང་ཁོང་ལ་མནར་གཅོད་གཏོང་མཁན་ལ་ཁྲིམས་ལྟར་ཉེས་ཆད་བཅད་ན། གཞི་ནས་བོད་མི་མང་པོ་བཀག་ཉར་ཁང་དང་བཙོན་ཁང་དུ་མནར་གཅོད་དྲག་པོ་མྱངས་ནས་ཚེ་སྲོག་ཤོར་བ་དང་དབང་པོ་སྐྱོན་ཅན་དུ་གྱུར་པའི་ཡ་ང་བའི་གནས་ཚུལ་འགོག་ཐུབ་པ་རེད་ཅེས་བཀོད་འདུག་ལ། དེ་བཞིན་དེ་རིང་ནས་བཟུང་ཉིན་ཉི་ཤུའི་རིང་དེ་གའི་ལྟེ་གནས་ཁང་ནས་རྒྱ་གཞུང་གི་བཀག་ཉར་དང་མནར་གཅོད་འོག་ཚེ་སྲོག་ཤོར་བའི་བོད་མི་ཉི་ཤུ་ཙམ་གྱི་ལོ་རྒྱུས་ལ་ཉིན་བཞིན་ཕྱིར་དྲན་བྱས་ནས་ཁོང་ཅག་གི་སྙིང་སྟོབས་དང་བློས་གཏོང་ལ་གུས་འདུད་དང་ཤུལ་ལུས་ནང་མི་ཚོར་གདུང་སེམས་མཉམ་སྐྱེད་ཞུ་རྒྱུ་ཡིན་འདུག།

གསར་འགོད་པ། བློ་བཟང་རྒྱ་མཚོ།