རྒྱལ་སྤྱིའི་སྟེང་དུ་“ཐའེ་ཝན་གཅིག་གི་སྲིད་བྱུས་”ཐོག་མར་གླེང་སློང་བྱེད་འགོ་བརྩམས་འདུག

 རྒྱལ་སྤྱིའི་ཆབ་སྲིད་ཀྱི་འགྱུར་འགྲོས་ནང་། རྒྱ་ནག་དང་ཐའེ་ཝན་གཉིས་ཀྱི་འབྲེལ་བའི་སྲིད་བྱུས་ལ་འགྱུར་བ་ཤུགས་ཆེན་འགྲོ་བཞིན་པའི་སྐབས་འདིར། ཅེག་སྤྱི་མཐུན་རྒྱལ་ཁབ་(Czech Republic) ཀྱི་ཆབ་སྲིད་པ་དང་ཉམས་ཞིབ་པ་ཞིག་གིས་ཡུ་རོབ་ནས་“ཐའེ་ཝན་གཅིག་གི་སྲིད་བྱུས་”ཕྱིར་བསྒྲགས་བྱེད་དགོས་པའི་འབོད་སྐུལ་བྱས་འདུག 

ཡུ་རོབ་གྲོས་ཚོགས་ནས་ཐའེ་ཝན་ལ་བཏང་བའི་སྐུ་ཚབ་ཐོག་མ་དེ་ཐའེ་ཝན་ལ་གཟིགས་སྐོར་དུ་ཕེབས་བཞིན་པའི་མཚམས་འདིར། ཅེག་སྤྱི་མཐུན་རྒྱལ་ཁབ་ཀྱི་ཆབ་སྲིད་པ་དང་། བདེ་འཇགས་སྲིད་བྱུས་ཉམས་ཞིབ་ཁང་གི་འགན་འཛིན་ཇཱ་ཁབ-ཇན་ཌ་(Jakub Janda) ཡིས་ཋོའུ་ཋར་དྲ་བའི་ཐོག་ཏུ་རྩོམ་ཐུང་ཞིག་སྤེལ་བའི་ནང་། ཁོང་གིས་ཡུ་རོབ་ནས་“ཐའེ་ཝན་གཅིག་གི་སྲིད་བྱུས་”འཛིན་དགོས་པའི་འབོད་སྐུལ་བྱས་འདུག 

ཕྱི་ཟླ་༡༡ པའི་ཚེས་༤ ཉིན་སྤེལ་བའི་རྩོམ་ཐུང་དེའི་ནང་། ཡུ་རོབ་ཀྱི་ཆབ་སྲིད་པ་ཁོང་གིས་ཐའེ་ཝན་ནི་ཁྲིམས་ལུགས་ལྡན་པའི་མང་གཙོའི་རྒྱལ་ཁབ་ཅིག་ཡིན་པའི་འགྲེལ་བརྗོད་བྱས་པའི་རྗེས། ཡུ་རོབ་ཀྱི་འགོ་ཁྲིད་ཚོས་“ཐའེ་ཝན་གཅིག་གི་སྲིད་བྱུས་”དངོས་སུ་ཕྱིར་བསྒྲགས་བྱེད་དགོས་པའི་བསམ་ཚུལ་བཏོན་འདུག ཁོང་གིས་ད་དུང་ཡུ་རོབ་ཀྱི་ངོས་ནས་ད་ལྟ་རྒྱ་ནག་དམར་ཤོག་ཚོགས་པའི་དབང་སྒྱུར་འོག་ཏུ་ཡོད་པའི་ས་ཁུལ་རྣམས་རྒྱ་ནག་གི་ཡིན་པར་ངོས་འཛིན་བྱས་ནས་“རྒྱ་ནག་གཅིག་གི་སྲིད་བྱུས་”དེ་མུ་མཐུད་རྒྱུན་སྐྱོང་ཡོང་ཆོག་པ་ཞིག་ཡིན་པའི་གསལ་བཤད་ཀྱང་བྱས་འདུག 

ཁོང་གིས་རྩོམ་ཐུང་དེ་དང་ལྷན་དུ་རྒྱ་ནག་གི་ས་ཁྲ་ཞིག་ཀྱང་བཀོད་པའི་ནང་། བོད་དང་ཤར་ཏུར་ཀི་སི་ཐན་ལྟ་བུའི་རྒྱ་ནག་གི་དྲག་ཤུགས་ཀྱིས་བཟུང་བའི་ས་ཁུལ་རྣམས་ད་ལྟའི་ཆབ་སྲིད་ཀྱི་ས་ཁྲའི་སྤྱི་འགྲོས་ལྟར་རྒྱ་ནག་གི་ཁོངས་སུ་བཞག་འདུག་རུང་། མཐའ་ཟུར་གྱི་ཐའེ་ཝན་གྱི་ས་ཁྲ་སྔོན་པོར་བསྒྱུར་བའི་ཐོག “འདི་རྒྱ་ནག་མ་རེད། ཐའེ་ཝན་རེད་”ཅེས་པའི་གསལ་བཤད་ཀྱི་ཡི་གེ་ཡང་བྲིས་ནས་བཞག་འདུག 

ད་ལྟ་རྒྱ་ནག་དང་མང་གཙོའི་འཛམ་གླིང་གཉིས་ཀྱི་འགལ་ཟླ་དེ་ཉིན་བཞིན་ཇེ་གསལ་དང་ཇེ་དྲག་ཏུ་འགྱུར་བཞིན་ཡོད་པས། ཨ་རི་དང་ཡུ་རོབ་མཐུན་ཚོགས་ཀྱིས་གཙོས་པའི་མང་གཙོའི་སྟོབས་ཆེན་རྒྱལ་ཁབ་རྣམས་ཀྱིས་“རྒྱ་ནག་གཅིག་གི་སྲིད་བྱུས་”ལ་བསྐྱར་ཞིབ་ནན་པོ་བྱས་ཏེ་ཐའེ་ཝན་དང་འབྲེལ་ལམ་ཟབ་ཏུ་གཏོང་བའི་འགོ་བརྩམས་ཟིན་ཡོད། ། 

གསར་འགོད་པ་དཀོན་མཆོག་རབ་བརྟན།