རྒྱལ་སྤྱིིའི་དབུ་ལམ་མི་མང་ལས་འགུལ་ཁང་གིས་དབུ་མའི་ལམ་གྱི་ཉིན་མོ་ཞེས་པ་སྲུང་བརྩི་ཞུས་སོང་།
རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གིས་དབུ་མའི་ལམ་གྱི་ཉིན་མོ་ཞེས་པ་དེ་རིང་སྲུང་བརྩི་ཞུས་སོང་ལ། མཛད་སྒོའི་ཐོག་ཏུ་འདི་ལོར་རྒྱ་གར་རྒྱལ་ཡོངས་འཛིན་རིམ་༡༢ ཡིག་རྒྱུགས་ཁྲོད་བོད་ཡིག་ཨང་རིམ་རྩེ་ཕུད་ལོན་པ་རྣམས་ལ་ཆེ་བསྟོད་བྱ་དགའ་དང་གཟེངས་རྟགས་གནང་སོང་།
དེ་རིང་ཕྱི་ཚེས་༡༨ ཀྱི་ཉིན་རྒྱབ་ཆུ་ཚོད་གཉིས་དང་ཕྱེད་ཀའི་ཐོག་རྡ་ས་ས་གནས་འགོ་འཛིན་ལས་ཁུངས་སུ་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་ནས་དབུ་མའི་ལམ་གྱི་ཉིན་མོ་སྲུང་བརྩིའི་མཛད་སྒོ་ཞིག་འཚོགས་གནང་སོང་ལ། མཛད་སྒོའི་སྐབས་སུ་སྐུ་མགྲོན་གཙོ་བོ་བཀའ་ཟུར་འབྲོང་ཆུང་དངོས་གྲུབ་དང་། དམིགས་བསལ་སྐུ་མགྲོན་དུ་རྡ་ས་ས་གནས་འགོ་འཛིན་དཀོན་མཆོག་མིག་དམར་གཙོས་པའི་དབུ་མའི་ལམ་གྱི་ཚོགས་མི་དང་བྱ་དགའ་ཐོབ་མཁན་སློབ་ཕྲུག་ཚོའི་ཕ་མ། དེ་བཞིན་རྡ་སའི་ཁུལ་གྱི་མི་མང་དང་གསར་འགོད་པ་སོགས་མཉམ་ཞུགས་གནང་འདུག
སྐུ་མགྲོན་འབྲོང་ཆུང་དངོས་གྲུབ་ནས་ད་ལྟ་བོད་ནང་བོད་ཀྱི་སྐད་ཡིག་སྦྱོང་སྤྱོད་སྤེལ་གསུམ་ཐད་ཧ་ཅང་གིས་དམ་དྲག་ཆེན་པོ་བྱེད་ཀྱི་ཡོད་པ་དང་། མ་འོངས་པར་བོད་མི་རིགས་དེ་མུ་མཐུད་ནས་གནས་དགོས་ན་བོད་ཀྱི་སྐད་ཡིག་དང་རིག་གཞུང་གནས་དགོས་པར་བརྟེན། མ་འོངས་ཕུགས་རྒྱང་རིང་པོ་ལ་བསམ་བློ་བཏང་ནས་༧གོང་ས་མཆོག་ནས་དབུ་མའི་ལམ་གྱི་སྲིད་བྱུས་དེ་ལམ་སྟོན་གནང་ཡོད་པས་ད་ཆར་གསལ་པོ་ཆགས་ཡོང་གི་ཡོད། དེ་བཞིན་ཕྱི་རྒྱལ་དུ་ཡོད་པའི་བོད་པ་ཚོ་དཔལ་འབྱོར་མཁོ་སྒྲུབ་ཁོ་ན་ལ་མགོ་མ་འཁོར་བ། རང་གི་བུ་ཕྲུག་གི་ཆེད་དུ་བོད་པའི་སྐད་ཡིག་སློབ་རྒྱུ་དང་ཕ་མ་རང་ངོས་ནས་བུ་ཕྲུག་གི་ཆེད་དུ་དུས་ཚོད་བཏང་ནས་བོད་སྐད་དང་བོད་ཡིག་སློབ་ཐབས་ལ་དོ་སྣང་བྱེད་རྒྱུ་ནི་ཤིན་ཏུ་གལ་ཆེན་པོ་རེད་འདུག་ཅེས་གསུངས་སོང་།
དམིགས་བསལ་སྐུ་མགྲོན་རྡ་ས་ས་གནས་འགོ་འཛིན་དཀོན་མཆོག་མིག་དམར་ནས་ད་ཆར་བོད་པའི་སྤྱི་ཚོགས་ཁྲོད་དབུ་མའི་ལམ་ལ་ཡང་འགྲེལ་བརྗོད་ལོག་པ་དེ་འདྲ་བྱེད་མཁན་མང་པོ་ཡོང་གི་འདུག་པས། དེ་དག་གིས་དབུ་མའི་ལམ་གྱི་སྐོར་གོ་རྟོགས་མེད་ནས་འགྲེལ་ལོག་རྒྱག་པ་རྩ་བ་ནས་མ་རེད། དེ་ལས་ལྡོག་སྟེ་སྤྱི་ཚོགས་ཁྲོད་རྙོག་གླེང་བཟོ་ཐབས་ཆེད་དུ་༧གོང་ས་མཆོག་གི་བཀའ་ལ་ཡང་འགྲེལ་བརྗོད་ལོག་པ་བྱེད་མཁན་དེ་འདྲ་ཡོང་གི་འདུག་པས། མིང་མང་ཚོས་སྤྱི་ཚོགས་མི་འཁྲུག་པའི་ཆེད་དུ་དེ་དག་ལ་གཟབ་གཟབ་གནང་དགོས་པར་བརྗོད་གནང་སོང་།
དེ་བཞིན་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་ནས་དབུ་མའི་ལམ་གྱི་ཉིན་མོ་སྲུང་བརྩི་དང་སྦྲགས། བོད་ཀྱི་སྐད་ཡིག་རིག་གཞུང་མི་ཉམས་གོང་འཕེལ་གཏོང་ཆེད་དུ་རྒྱ་གར་རྒྱལ་ཡོངས་འཛིན་རིམ་བཅུ་གཉིས་ཀྱི་ཡིག་རྒྱུགས་ཁྲོད་བོད་ཡིག་གི་ཡིག་རྒྱུགས་གྲུབ་འབྲས་རྩེ་ཕུད་ལོན་པའི་སློབ་མ་གྲངས་ ༡༠ ལ་ཆེ་བསྟོད་གཟེངས་རྟགས་དང་ཧིན་སྒོར་ཁྲི་གཅིག་རེ་བཅས་ཁྱོན་བསྡོམས་ཧིན་སྒོར་འབུམ་གཅིག་གི་གསོལ་རས་བྱ་དགའ་འབུལ་རྒྱུ་གཏན་འཁེལ་བྱུང་ཡོད་པར་བརྗོད་པ་བཞིན། ད་ལོར་སློབ་མ་གྲངས་ ༡༤ ཡིས་ཡིག་རྒྱུགས་ལེགས་པར་ལོན་མཁན་ཁོང་རྣམ་པས་བྱ་དགའ་བགོ་བཤའ་བརྒྱབས་ནས་སློབ་མ་རེར་ཧིན་སྒོར་ ༧༡༤༣ བཅས་ཕུལ་གནང་སོང་། སྐབས་དེར་སློབ་མ་མང་པོ་ཞིག་གི་ཕ་མ་དང་སྤུན་མཆེད་རྣམས་ཀྱིས་སློབ་མ་ཚོའི་ཚབ་བྱས་ནས་བྱ་དགའ་ལེན་པ་ལས་སློབ་མ་ཚོ་དངོས་སུ་ཡོང་ཐུབ་མི་འདུག
གསར་འགོད་པ། བསོད་ནམས་ཕུན་ཚོགས།
