རྩ་ཁྲིམས་བསྐྱར་བཅོས་དགོས་པའི་ས་ཡིག་བསྡུ་རུབ་ཀྱི་ལས་འགུལ།

འབར་མའི་ཁ་གཏད་ཆབ་སྲིད་ཚོགས་པས་གྲོས་ཚོགས་ནང་ཐད་བསྐོས་དམག་གི་འཐུས་མིའི་དབང་ཚད་གཅོག་ཆེད་མི་མང་གི་མཚན་རྟགས་ས་ཡ་ལྔ་ཙམ་བསྡུ་རུབ་བྱས་འདུག

ནོ་བྷེལ་ཞི་བདེ་གཟེངས་རྟགས་ཐོབ་མཁན་ཨང་སན་སུ་ཀྱིད་ཀྱིས་དབུ་ཁྲིད་པའི་རྒྱལ་ཡོངས་དམངས་གཙོ་ཚོགས་པས་ས་ཡིག་བསྡུ་རུབ་ཀྱི་ལས་འགུལ་དེ་གཟའ་སྤེན་པའི་ཉིན་མཇུག་སྒྲིལ་ཡོད་པ་དང་། ལས་འགུལ་དེའི་དམིགས་ཡུལ་གཙོ་བོ་ནི། འབར་མའི་རྒྱལ་ཁབ་ཀྱི་རྩ་ཁྲིམས་དོན་ཚན་༤༣༦ པ་བསྐྱར་བཅོས་དང་། དོན་ཚན་དེའི་ནང་རྩ་ཁྲིམས་གང་འདྲ་ཞིག་བཟོ་བཅོས་དགོས་པ་ཡིན་ནའང་གྲོས་ཚོགས་འཐུས་མི་༧༥ཡིས་གྲོས་ཚོགས་ནང་རྒྱབ་སྐྱོར་དགོས་ཀྱི་ཡོད་ཀྱང་། གྲོས་ཚོགས་ཀྱི་ཞབས་སྟེགས་བརྒྱ་ཆ་ཕྱེད་ཀ་ལས་ལྷག་གཞུང་འཛིན་ཆབ་སྲིད་ཚོགས་པ་(USDP) ཡིས་བཟུང་ཡོད་པ་དང་ཞབས་སྟེགས་བརྒྱ་ཆ་༢༥དམག་མིའི་ཆེད་ཡིན་པས། གྲོས་ཚོགས་ནང་གྲོས་ཆོད་གང་འདྲ་ཞིག་ཡིན་ནའང་མང་མོས་ཐོབ་ཁག་པོ་ཡོད་པ་མ་ཟད། རྩ་ཁྲིམས་དོན་ཚན་༥༩ཡི་ནང་བཟའ་ཟླ་དང་བུ་ཕྲུག་ཕྱིའི་རྒྱལ་ཁབ་ཀྱི་མི་སེར་ཡིན་པ་ཨང་སན་སུ་ཀྱིད་འདྲ་བ་དེ་ཚོར། རྒྱལ་ཁབ་འཛིན་སྐྱོང་དང་སྲིད་འཛིན་འོས་འདེམས་ནང་འཛུལ་ཞུགས་ཀྱི་ཐོབ་ཐང་མེད་པ་རེད། ཡིན་ནའང་མི་མང་ཚོར་ལོ་༤༩ རིང་དམག་གིས་དབང་བསྒྱུར་བའི་སྲིད་དབང་ཕྱིར་བསྡུ་དགོས་པའི་བསམ་ཚུལ་ཤུགས་དྲག་ཡོད་པ་དང་། རྒྱལ་ཡོངས་དམངས་གཙོ་ཚོགས་པའི་ཚོགས་གཙོ་ཨང་སན་སུ་ཀྱིད་ལ་གཞུང་འཛིན་ཐོབ་ཐང་དགོས་སྐོར་གསར་འགྱུར་བརྒྱུད་ལམ་ཁག་ཏུ་བསྒྲགས་འདུག

འོན་ཀྱང་རྒྱལ་ཡོངས་དམངས་གཙོ་ཚོགས་པས་མཚན་རྟགས་ས་ཡ་ལྔའི་སྙན་ཞུ་དེར་བརྟེན་ནས། གྲོས་ཚོགས་ནང་རྩ་ཁྲིམས་བསྐྱར་བཅོས་བྱེད་རྒྱུར་ཤུགས་རྐྱེན་ཐེབས་ཁག་པོ་ཡིན་སྐོར་གྲོས་ཚོགས་ཀྱི་ཚོགས་གཙོ་ཞི་ཝི་མན་(Shwe Mann) གྱིས་བརྗོད་འདུག།