བོད་ས་ཡོངས་རྫོགས་རྒྱ་དམར་དྲག་པོའི་གཞུང་གིས་བཙན་འཕྲོགས་བྱས་ནས་མི་ལོ་ཧྲིལ་པོ་༦༣ འཁོར་ཡོད་ཅིང་། དེའི་རིང་བོད་ཕྱི་ནང་གཉིས་སུ་བཟང་ཕྱོགས་དང་ངན་ཕྱོགས་ཀྱི་གནས་ཚུལ་མང་དག་ཅིག་བྱུང་ཡོད། རྒྱལ་སྤྱིའི་ཁོར་ཡུག་གི་ཐོག་ནས་ཀྱང་འགྱུར་ལྡོག་མང་པོ་སོང་ཡོད་པ་དང་། གཞིས་བྱེས་གཉིས་ཀྱི་མི་མང་གི་ངོས་ནས་བསམ་བློ་གཏོང་ཕྱོགས་ལའང་འགྱུར་མང་པོ་ཕྱིན་ཡོད། དེར་བརྟེན་འདས་ཟིན་པའི་བོད་དོན་འཐབ་རྩོད་ཀྱི་ལོ་ཟླ་འདིའི་ནང་གནས་ཚུལ་གཙོ་བོ་གང་དང་གང་བྱུང་ཡོད་མེད་སྐོར་ལ་ཕྱོགས་ཡོངས་ནས་བསྐྱར་ཞིབ་ཀྱིས་བསམ་བློ་གཏོང་དགོས་པ་དང་། མ་འོངས་པར་བོད་དོན་འཐབ་རྩོད་གནས་དང་མི་གནས་ཀྱི་འགག་རྩ་གཙོ་བོ་གང་ཡིན་མིན། འཐབ་རྩོད་ནང་མི་མང་དང་འགོ་ཁྲིད་བར་གྱི་འབྲེལ་བ་དང་། འགོ་ཁྲིད་ཀྱི་འཆར་གཞི་དང་མི་མང་གི་སེམས་ཤུགས་བཅས་ཟུང་འབྲེལ་ཇི་ལྟར་བྱེད་དགོས་མིན་བཅས་ལ་དུས་ནས་དུས་སུ་བསྐྱར་ཞིབ་དང་ལེགས་བཅོས་བྱེད་མ་ཐུབ་ན་འཐབ་རྩོད་ཀྱི་འཆི་གསོན་རྟོགས་དཀའ་བ་ཞིག་ཏུ་འགྱུར་ངེས།
བོད་ནང་ལ་མཚོན་ན་རྒྱ་དམར་གཞུང་གིས་ཟིང་འཁྲུག་ལྷིང་འཇགས་དང་། དམངས་གཙོའི་བཅོས་བསྒྱུར། གྲལ་རིམ་འཐབ་རྩོད། མི་དམངས་སྤྱི་ཁང་། རིག་གནས་གསར་བརྗེ། དམག་ཁྲིམས་བསྡམས་པ་ཟེར་བ་སོགས་བརྒྱུད་ནས་བོད་མི་རྣམས་ལ་དཀའ་ངལ་རབ་དང་རིམ་པ་སྤྲད་ཡོད་པ་དང་། དྲག་པོའི་མཚོན་ཆ་དང་བཙོན་ཁང་གི་མནར་གཅོད་འོག་བོད་མི་མང་དག་ཅིག་གི་ཚེ་སྲོག་ཤོར་ཡོད་པ་དང་། མུག་ཤི་ཐེབས་པའི་གནས་ཚུལ་ཡང་བོད་ས་ཡོངས་སུ་གྲངས་ཀྱིས་མི་ལོངས་པ་ཞིག་བྱུང་ཡོད། སྐབས་དེ་དག་དང་བསྡུར་ན་ཏིང་ཞོ་ཕིང་གིས་རྒྱ་ནག་གི་སྲིད་དབང་ལ་བསྒྱུར་བཅོས་ཅུང་ཙམ་བྱས་རྗེས། ཆབ་སྲིད་ཀྱི་རང་དབང་ཐོག་ནས་སྔོན་དང་མི་འདྲ་བ་ཆེན་པོ་མེད་ཀྱང་། ཟས་གོས་ཐོག་ནས་སྔོན་དང་མི་འདྲ་བར་ཡར་རྒྱས་སུ་སོང་ཡོད་པ་དང་། ཕྱིའི་རྣམ་པའི་ཐོག་ནས་ཆོས་ཀྱི་བསྟི་གནས་ཁག་ཀྱང་སླར་གསོ་བྱེད་ཆོག་པ་ལྟ་བུའི་འགྱུར་བ་སོང་ཡོད། གང་ལྟར་འདས་པའི་མི་ལོ་༦༣ ཙམ་གྱི་རིང་བོད་ཀྱི་གནས་སྟངས་གང་ཐད་ནས་འགྱུར་བ་ཆེན་པོ་སོང་ཡོད་པ་ནི་དངོས་ཡོད་རེད།
བཙན་བྱོལ་བོད་མིའི་སྤྱི་ཚོགས་ལ་མཚོན་ན་ཕྱི་ལོ་༡༩༥༩ ལོར་བོད་མི་ཁྲི་བརྒྱད་ལྷག་སྐྱབས་བཅོལ་དུ་འབྱོར་བའི་སྐབས། ཟས་གོས་གནས་མལ་གྱི་ཐོག་ནས་དཀའ་ངལ་ཆེན་པོ་ཡོད་པ་མ་ཟད། གནམ་གཤིས་ཚ་གྲང་མི་འཕྲོད་པའི་དཀའ་ངལ་དང་། སྐད་ཡིག་གི་ཐོག་ནས་གོ་བརྡ་མི་འཕྲོད་པ་སོགས་ཕྱོགས་ཡོངས་ནས་དཀའ་ངལ་མང་དག་ཅིག་ཡོད་ཀྱང་། ༧གོང་ས་མཆོག་གིས་དབུ་ཁྲིད་པའི་བཙན་བྱོལ་བོད་གཞུང་གི་ངོས་ནས་སྐུ་ངལ་གང་མང་ཞིག་ལ་གདོང་ལེན་གནང་ཡོད་པ་དང་། མི་མང་གི་ངོས་ནས་དཀའ་སྤྱད་སྡུག་རུས་སྣ་ཚོགས་ལ་བརྟེན་ནས་འདས་པའི་མི་ལོ་༦༣ ཙམ་གྱི་གནས་སྟངས་ལ་ཕྱི་མིག་ཅིག་བལྟས་ན་ཡར་རྒྱས་ཆེན་པོ་སོང་ཡོད། ད་ལྟའི་ཆར་བཙན་བྱོལ་བོད་མི་རྣམས་ཀྱི་ཟས་གོས་གནས་མལ་དང་། ཤེས་ཡོན་ཡར་རྒྱས་སོགས་གང་ཐད་ནས་བཤད་ཀྱང་། སྔོན་དང་བསྡུར་ན་སྤྱི་ཡོངས་ནས་དཀའ་ངལ་ཆེར་མེད་པ་ལྟ་བུར་གྱུར་ཡོད་པ་དང་། རྒྱལ་སྤྱིའི་ཐོག་ནས་བཙན་བྱོལ་བོད་མིའི་འཚོ་བ་ལ་རྒྱབ་སྐྱོར་བྱེད་མཁན་སྔོན་ལས་མང་དུ་སོང་ཡོད།
ད་ལྟའི་ཆར་བསམ་བློ་གཏོང་དགོས་པ་གཙོ་བོ་ནི་བཙན་བྱོལ་མི་རྣམས་ཆབ་སྲིད་ཀྱི་སྐྱབས་བཅོལ་བ་ཡིན་པ་དང་། ཆབ་སྲིད་འཐབ་རྩོད་ཀྱི་ཐོག་ནས་བསམ་བློ་གཏོང་སྟངས་ལ་སྔོན་ནས་ད་བར་འགྱུར་བ་ག་རེ་སོང་ཡོད་མེད་དེ། གནས་སྐབས་ཀྱི་འཚོ་བ་ཙམ་དང་མི་འདྲ་བར་གལ་ཆེན་པོར་གྱུར་ཡོད། འདས་པའི་ལོ་རྒྱུས་ནང་བོད་དོན་འཐབ་རྩོད་ཀྱི་ཐོག་ལ་བློས་གཏོང་བྱེད་མཁན་ཧ་ཅང་མང་པོ་ཡོད་པ་དང་། བཙན་བྱོལ་དུ་འབྱོར་རྗེས་ཀློ་སྒྲིག་འཛུགས་དང་། དམག་སྡེ་ཨང་༢༢ པའི་ནང་འཛུལ་ཞུགས་བྱེད་མཁན་ཕལ་ཆེ་བ་ནི་རང་གི་འཚོ་ཐབས་ཙམ་གྱི་ཆེད་དུ་མ་ཡིན་པར། བོད་རྒྱལ་ཁབ་ཀྱི་བདག་དབང་སླར་གསོའི་ཆེད་འཐབ་རྩོད་བྱེད་པའི་འདུན་པ་དང་བསམ་བློ་ཡོད་མཁན་འབའ་ཞིག་ཏུ་གྱུར་ཡོད། ད་ལྟ་དམག་སྒར་ཨང་༢༢ པའི་ནང་འཛུལ་ཞུགས་བྱེད་མཁན་རྣམས་ལ་མཚོན་ན་རྩ་དོན་འཐབ་རྩོད་ལ་སེམས་ཤུགས་མེད་པ་མིན་ཡང་། སྤྱི་ཚོགས་ཁྱོན་ཡོངས་ནས་སྔོན་དང་བསྡུར་ན་བསམ་བློ་གཏོང་སྟངས་ལ་འགྱུར་བ་ཧ་ཅང་ཆེན་པོ་སོང་ཡོད་པ་གསལ་པོ་རེད།
ད་ལྟའི་ཆར་བོད་ནང་གི་བོད་མི་རྣམས་ཀྱིས་དཀའ་ངལ་མང་པོ་ཞིག་ལ་དངོས་སུ་གདོང་གཏད་དགོས་པས་སེམས་ཤུགས་ཆེན་པོ་ཡོད་ཀྱང་། བཙན་བྱོལ་བོད་མི་ཕལ་མོ་ཆེ་ནི་རང་ཉིད་ཀྱི་འཚོ་གོས་ཙམ་ལ་བསམ་བློ་གཏོང་བ་དང་། ནང་ཁུལ་རྩོད་གླེང་དང་ཕྱོགས་ཞེན་ཙམ་ལས་རྩ་དོན་འཐབ་རྩོད་ཀྱི་ཐོག་ལ་སེམས་ཤུགས་ཡོད་མཁན་དཀོན་དུ་འགྲོ་བཞིན་པ་ནི་བོད་དོན་འཐབ་རྩོད་ཀྱི་ཐོག་ནས་གྱོང་གུད་ཅིག་ཏུ་གྱུར་ཡོད། བོད་མིའི་སྒྲིག་འཛུགས་ཀྱི་འགོ་ཁྲིད་རྣམས་ལ་མཚོན་ནའང་མི་མང་གཅིག་སྒྲིལ་བྱས་ནས་འཁྲིད་ཐབས་ལ་བསམ་བློ་མ་བཏང་བར། རང་ཉིད་ཀྱི་འདོད་ཕྱོགས་ཙམ་རྩ་འཛིན་བྱ་རྒྱུ་མང་སོང་ན་འགོ་ཁྲིད་ཚད་ལྡན་ཞིག་ཆགས་མི་སྲིད་པ་དང་། གལ་སྲིད་འགོ་ཁྲིད་ལ་འཆར་གཞི་ཚད་ལྡན་ག་འདྲ་ཞིག་ཡོད་ཀྱང་མི་མང་ལ་སེམས་ཤུགས་མེད་པ་དང་། མཉམ་ཞུགས་བྱེད་མ་ཐུབ་ན་འཐབ་རྩོད་ཀྱི་ནུས་པ་ནི་རིམ་པས་ཉམས་ཆག་ཏུ་འགྲོ་རྒྱུ་ཡིན་པ་སྨྲོས་མི་དགོས་པས། མི་མང་གི་སེམས་ཤུགས་ནི་འཐབ་རྩོད་ཀྱི་འགག་རྩ་ཉག་གཅིག་ཏུ་གྱུར་ཡོད།།
