རྩོམ་པ་པོ་གྲྭ་འབྲོག་རུ་ཚུལ་ཁྲིམས་གློད་གྲོལ།

མི་ལོ་བཞི་དང་ཕྱེད་ཀའི་རིང་བཙོན་འཇུག་ཁྲིམས་ཐག་བཅད་པའི་རྩོམ་པ་པོ་གྲྭ་འབྲོག་རུ་ཚུལ་ཁྲིམས་རྒྱ་གཞུང་གིས་གློད་གྲོལ་བཏང་འདུག

དེ་ཡང་བསོད་ནམས་ཀྱིས་གནས་ཚུལ་མཁོ་སྤྲོད་གནང་བ་ལྟར་ན། ན་གཞོན་རྩོམ་པ་པོ་འབྲོག་རུ་ཚུལ་ཁྲིམས་རྔ་བ་འབར་ཁམས་མི་དམངས་ཁྲིམས་ཁང་ཟེར་བས་ལོ་བཞི་དང་ཟླ་བ་དྲུག་གི་ཁྲིམས་ཆད་བཅད་ཡོད་པ་དང་།

༢༠༠༩ ལོའི་ཟླ་༤ པའི་ནང་དུ་རྒྱ་གཞུང་གིས་འཛིན་བཟུང་བྱས་ཏེ། ད་བར་སྔ་ཕྱི་མི་ལོ་དྲུག་རིང་ལ་བཙོན་དུ་མནར་གཅོད་ཚད་མེད་མྱོང་དགོས་བྱུང་འདུག་ཀྱང་། ཟླ་༡༢ ཚེས་༥ ཉིན་ཁོང་ཁྲིན་ཏུའུ་བཙོན་ཁང་ཞིག་ནས་གློད་གྲོལ་བཏང་འདུག

ཁོང་འཛིན་བཟུང་བྱེད་དགོས་དོན་ནི། ཁོང་གིས་ཀྲུང་ཧྭ་མེས་རྒྱལ་ལ་ངོ་རྒོལ་དང༌། ཏཱ་ལའི་འོས་ལངས་ལ་སྐུལ་སློང་གི་རྩོམ་ཡིག་སྤེལ་པའི་ཉེས་མིང་འོག རྒྱ་གཞུང་གི་ཉེན་རྟོག་མི་སྣས་རྔ་བ་སྒོ་མང་དགོན་པའི་རང་ཤག་ནས་འཛིན་བཟུང་བཙན་ཁྲིད་བྱས་ཡོད་འདུག་ལ། རྔ་བ་སྒོ་མང་དགོན་དུ་སློབ་གཉེར་གནང་བཞིན་པའི་རིང་ཁོང་སྒེར་གྱིས་གཉེར་བའི། ཁ་བའི་ཚེ་སྲོག་ཅེས་པའི་རྩོམ་རིག་ཚགས་ཤོག་དེ་ཡང་བཀག་འགོག་བྱས་ཡོད་འདུག

རྩོམ་པ་པོ་གྲྭ་འབྲོག་རུ་ཚུལ་ཁྲིམས་ད་ལྟ་རང་ལོ་༣༣ ཡིན་ཞིང་མཚོ་སྔོན་ཞིང་ཆེན་མཚོ་ལྷོ་ཁུལ་མང་ར་རྫོང་། མགོ་མང་འབྲོག་རུ་སྡེ་བར་སྐྱེས་ཞིང་། མང་ར་ཀླུ་ཚང་དགོན་པ་དང་ངྷི་ཚ་དགོན། རྔ་བ་སྒོ་མང་དགོན་བཅས་ནས་ནང་ཆོས་གཙོ་བོར་གྱུར་བའི་ཐ་སྙད་རིག་གནས་ལ་བསླབ་པ་སློབ་གཉེར་གནང་ཡོད་པ་མ་ཟད། རྔ་བ་སྒོ་མང་དགོན་དུ་སློབ་གཉེར་གནང་མཁན་ཞིག་རེད་འདུག།།

གསར་འགོད་པ་ངག་དབང་ཐར་པ།