རྩོམ་པ་པོ་ཐུབ་བསྟན་བསམ་འཕེལ་སྐུ་གྲོངས་ཡོད་འདུག

ཟླ་འདིའི་ཚེས་༤ ཉིན་གྱི་སྔ་དྲོ་བོད་མིའི་སྒྲིག་འཛུགས་ཀྱི་དྲུང་ཆེ་ཟུར་པ་དང་རྩོམ་པ་པོ་ཐུབ་བསྟན་བསམ་འཕེལ་རྒྱ་གར་ལྷོ་ཕྱོགས་སྦེལ་ཀོབ་བོད་མིའི་གཞིས་ཆགས་སུ་སྐུ་གྲོངས་ཡོད་འདུག 

ཁོང་ནི་བོད་ཀྱི་རྒྱལ་ས་ལྷ་སར་སྐྱེས་པ་དང་། རྒྱ་གར་དུ་བཙན་བྱོལ་དུ་ཕེབས་ནས་སློབ་གཉེར་རྗེས། བོད་མིའི་སྒྲིག་འཛུགས་ནང་ལོ་ངོ་༣༨ རིང་སྲི་ཞུ་བའི་ཕྱག་ལས་གནང་པའི་ཁྲོད་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་དྲུང་ཆེ་རྒྱུན་རིང་གནང་མྱོང་བ་དང་། དེ་འབྲེལ་ལོ་ངོ་༦ རིང་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་གྱི་ཐུགས་འགན་བཞེས། ༢༠༡༨ ལོར་རྒས་ཡོལ་ལ་ཕེབས་ནས་རྒྱ་གར་ལྷོ་ཕྱོགས་སྦེལ་ཀོབ་བོད་མིའི་གཞིས་ཆགས་ཀྱི་སྲི་ཞུ་བའི་བགྲེས་ཤག་ཏུ་བཞུགས། ཁོང་གི་དབྱིན་ཡིག་ཐོག་བརྩམས་ཆོས་Falling Through the Roof and Tibet: Reports from Exile, Copper Mountain བཅས་ཡོད་པ་དང་། དེ་བཞིན་མཉམ་འབྲེལ་གྱིས་དེབ་བྲིས་པ་དང་བསྒྱུར་བ་ཁག་ཅིག་ཀྱང་ཡོད་པ་རེད།

ཕྱི་ཟླ་༦ པའི་ཚེས་༤ ཞོགས་པ་སྐུ་གྲོངས་པ་དང་། ཕྱི་དྲོ་བོད་མིའི་སྒྲིག་འཛུགས་ཀྱི་ངོས་ནས་གདུང་སེམས་མཉམ་བསྐྱེད་ཀྱི་མྱ་ངན་རྗེས་དྲན་སླད་གཞུང་འབྲེལ་གྱི་མཆོད་འབུལ་སྨོན་ལམ་འཚོགས་ཡོད་པ་རེད།

གསར་འགོད་པ་ཆོས་ཉིད་འོད་ཟེར།

རྩོམ་པ་པོ་ཐུབ་བསྟན་བསམ་འཕེལ་གྱི་རྩོམ་དེབ་སྐོར་ལ་བགྲོ་གླེང་།