ལག་རྩེད་སྤོ་ལོའི་རུ་ཚོགས་(NBA)ཀྱི་རྩེད་འགྲན་པ་ཞིག་གིས་“བོད་ལ་རང་དབང་སྤྲོད་དགོས་”ཞེས་བཤད་འདུག 

ཨ་རིའི་རྒྱལ་ཡོངས་ལག་རྩེད་སྤོ་ལོའི་རུ་ཚོགས་(NBA) ཀྱི་རྩེད་འགྲན་པ་ཨེ་ནེ་སི-ཁེན་ཋར་(Enes Kanter) གྱིས་རྒྱ་ནག་གིས་བོད་དུ་ལག་བསྟར་བྱེད་བཞིན་པའི་མི་རིགས་རྩ་མེད་ཀྱི་སྲིད་བྱུས་ལ་སྐྱོན་བརྗོད་དྲག་པོ་བྱས་པ་མ་ཟད། “ངས་བོད་ལ་རང་བཙན་འཐོབ་པའི་རེ་བ་དང་ཡིད་ཆེས་བྱེད་ཀྱི་ཡོད་”ཅེས་བཤད་འདུག 

བྷོ་ས་ཋོན-སལ་ཋིག་རུ་ཁག་(Boston Celtics) གི་རྩེད་འགྲན་པ་ཨེ་ནི་སི-ཁེན་ཋར་གྱིས་མདང་དགོང་མཚན་མོར་སོ་སོའི་སྤྱི་ཚོགས་དྲ་བྱང་(social media accounts) དག་གི་སྟེང་དུ་རྒྱ་ནག་གི་དྲག་གནོན་དང་མི་རིགས་རྩ་མེད་ཀྱི་སྲིད་བྱུས་ལ་སྐྱོན་བརྗོད་དང་། བོད་ཀྱི་རྩ་དོན་ལ་རྒྱབ་སྐྱོར་གྱི་སྐད་ཆ་བཤད་འདུག་ཅིང་། དེ་ནི་ཨ་རིའི་རྒྱལ་ཡོངས་ལག་རྩེད་སྤོ་ལོའི་རུ་ཚོགས་ཀྱི་རྩེད་འགྲན་པ་ཞིག་གིས་དངོས་སུ་སྤྱི་ཚོགས་དྲ་ལམ་བརྒྱུད་དེ་ཞི་ཅིན་ཕིང་ལ་“གདུག་རྩུབ་ཆེ་བའི་སྒེར་གཅོད་པ་”ཞེས་བོས་པ་དང་། བོད་ཀྱི་རང་བཙན་ལ་རྒྱབ་སྐྱོར་གྱི་སྐད་ཆ་བཤད་པ་ཆེས་ཐོག་མ་དེ་ཆགས་ཀྱི་ཡོད་པར་བརྟེན། དེ་རིང་ཞོགས་པར་བོད་མི་ཚོས་དགའ་བ་ཆེན་པོས་ཁོང་གི་སྐད་ཆ་དང་བརྙན་ཐུང་རྣམས་སྤྱི་ཚོགས་དྲ་ལམ་ཁག་ཏུ་བརྒྱུད་སྐུར་ཤུགས་ཆེན་བྱེད་བཞིན་འདུག 

ཏིར་ཀི་(Turkey) ནས་ཡིན་པའི་རྩེད་འགྲན་པ་ཁོང་གིས་སོ་སོའི་སྤྱི་ཚོགས་དྲ་བྱང་ཐོག་ཏུ་སྐར་མ་གསུམ་མ་ཟིན་ཙམ་གྱི་བརྙན་ཐུང་ཞིག་བཞག་པའི་ནང་། ཁོང་གིས་༧རྒྱལ་བ་རིན་པོ་ཆེའི་སྐུ་པར་ལྡན་པའི་སྟོད་ཐུང་ནག་པོ་ཞིག་གྱོན་པ་མ་ཟད། “ངས་རྒྱ་ནག་གཞུང་ལ་སྤྲོད་འདོད་པའི་བརྡ་ལན་གཅིག་ནི། བོད་ལ་རང་དབང་སྤྲོད་དགོས་ཟེར་བ་དེ་ཡིན། བོད་ཀྱི་བདག་པོ་བོད་མི་རེད་”ཅེས་བཤད་འདུག 

བོད་པ་ཚོས་བརྒྱུད་སྐུར་ཤུགས་ཆེན་བྱེད་བཞིན་པའི་བརྙན་ཐུང་དེའི་ནང་། ཁོང་གིས་རྒྱ་ནག་གི་གདུག་རྩུབ་དྲག་པོའི་དབང་སྒྱུར་འོག་ཏུ་བོད་མི་ཚོར་གཞི་རྩའི་ཐོབ་མང་མེད་པ་དང་། རྒྱ་ནག་གི་སྙིང་རྗེ་མེད་པའི་མི་རིགས་རྩ་མེད་ཀྱི་སྲིད་བྱུས་དེར་ངོ་རྒོལ་དང་། རྒྱལ་སྤྱིའི་དོ་སྣང་འགུགས་ཆེད་བོད་མི་༡༥༠ ལྷག་གིས་འུ་ཐུག་ཐབས་ཟད་ངང་རང་ལུས་མེ་སྲེག་བཏང་བའི་གནས་ཚུལ་རྣམས་ཤེས་རྗེས། “ང་རང་ཁུ་སིམ་མེར་སྡོད་ཐུབ་ཀྱི་མི་འདུག ང་རང་བོད་ཀྱི་གྲོགས་པོ་དང་གྲོགས་མོ་རྣམས་དང་ལྷན་དུ་ཡོད་ལ། ངས་ཁོ་ཚོའི་རང་དབང་གི་འཐབ་རྩོད་ལ་རྒྱབ་སྐྱོར་བྱེད་ཀྱི་ཡོད་”ཅེས་བརྗོད་པའི་ཐོག “རྒྱ་ནག་གི་དམར་ཤོག་ལྟ་གྲུབ་དེ་ལོ་ངོ་བརྒྱ་ཙམ་ལས་ཕྱིན་མེད། འོན་ཀྱང་། ནང་པའི་ཤེས་རིག་དང་ལྟ་གྲུབ་རྣམས་ལོ་ངོ་སྟོང་ཕྲག་མང་པོར་གནས་ཡོད། བོད་ཀྱི་མ་འོངས་པ་དེ་བོད་མི་ཁོ་ནས་ཐག་གཅོད་དགོས་ཀྱི་རེད-བརྒྱ་ཆ་བརྒྱ་ཐམ་པ་རེད། བོད་བོད་མི་ཚོར་བདག་གི་རེད། ངས་བོད་ལ་རང་བཙན་འཐོབ་པའི་རེ་བ་དང་ཡིད་ཆེས་བྱེད་ཀྱི་ཡོད། རྒྱ་ནག་གི་གདུག་རྩུབ་ཆེ་བའི་སྒེར་གཅོད་པ་ཞི་ཅིན་ཕིང་། ངས་ཁྱོད་དང་ཁྱོད་ཀྱི་རྗེས་འབྲང་བ་ཚོར་ཡང་ནས་བསྐྱར་དུ་དང་། ཡང་ནས་བསྐྱར་དུ་སྤྲོད་འདོད་པའི་བརྡ་ལན་གསལ་པོ་གཅིག་ནི། བོད་ལ་རང་དབང་སྤྲོད་དགོས། བོད་ལ་རང་དབང་སྤྲོད་དགོས་ཞེས་པ་དེ་ཡིན་”ཞེས་བསྣན་འདུག 

དེང་སྐབས་རྒྱ་ནག་གོ་ལའི་དཔལ་འབྱོར་གྱི་སྟོབས་ཤུགས་ཨང་གཉིས་པ་དང་རྒྱལ་སྤྱིའི་ཁྲོམ་ར་ཆེ་ཤོས་ཤིག་ཏུ་གྱུར་ཡོད་སྟབས། རྒྱ་ནག་གཞུང་དང་མི་མང་གིས་དམིགས་བསལ་གྱི་གོ་ཐོབ་དེ་བཀོལ་ནས་ཕྱིའི་བཟོ་ཚོང་ཁང་དང་མི་སྣ་ཆེ་ཆུང་ཐམས་ཅད་ལ་གནོན་ཤུགས་སྤྲོད་རྐྱང་བྱེད་ཀྱི་ཡོད་པ་དང་། བཟོ་ཚོང་ཁང་དང་གྲགས་ཅན་མི་སྣ་རྣམས་ཀྱིས་ཀྱང་(ཐའེ་ཝན་དང་བོད་གཉིས་འཛམ་གླིང་རྒྱལ་ཁབ་ཀྱི་ས་ཁྲའི་ངོས་སུ་བཀོད་པའམ། ཡང་ན་༧ཏཱ་ལའི་བླ་མའི་གསུང་ཚིག་ཅིག་བཟོ་ཚོང་ཁང་གི་དྲྭ་ངོས་སུ་བཞག་པ་ལྟ་བུ) རེ་བྱས་མ་ཐག སོ་སོའི་ཚོང་གི་ཁེ་ཕན་ཆེད་དུ་རྒྱ་ནག་ལ་དགོངས་སེལ་ཞུས་ཏེ་བསྟུན་ཆེ་ཐུབ་ཆུང་ཐུབ་བྱེད་བཞིན་ཡོད།

ཕྱི་ལོ་༢༠༡༩ ལོར་འཕུར་མདའ་རུ་ཁག་(Rockets) གི་སྐབས་དེའི་སྤྱི་གཉེར་བ་ཌ་ལི-མོ་རེ་(Daryl Morey) ཡིས་ཧོང་ཀོང་ལ་རྒྱབ་སྐྱོར་གྱི་འབོད་ཚིག་ཅིག་དྲ་ཐོག་ཏུ་བཞག་རྗེས། རྒྱ་ནག་གི་མི་མང་ཚོས་ཁོང་ལ་སྐྱོན་བརྗོད་དང་ཁ་རྡུང་དྲག་པོ་བཏང་བ་མ་ཟད། རྒྱ་ནག་གི་སྦྱིན་བདག་དང་ཚོང་ཤག་རྣམས་ཀྱིས་ཀྱང་འཕུར་མདའ་རུ་ཁག་དང་འབྲེལ་ཐག་གཅོད་རྒྱུ་ཡིན་པ་དང་། རྒྱ་ནག་རྒྱལ་ཡོངས་ཀྱི་བརྙན་འཕྲིན་ཁང་ནས་འཕུར་མདའ་རུ་ཁག་གི་རྩེད་འགྲན་རྣམས་བརྒྱུད་གཏོང་བྱེད་མཚམས་འཇོག་གི་ཡིན་པ་སོགས་ཀྱི་འཇིགས་སྐུལ་དང་གནོན་ཤུགས་སྤྲད་པས། སྤྱི་གཉེར་བ་ཁོ་རང་གིས་འབོད་ཚིག་དེ་ཕྱིར་བསུབས་ནས་རྒྱ་ནག་མི་མང་ལ་ཕོག་ཐུག་བཏང་བར་དགོངས་སེལ་ཞུས་པའི་ཐོག རྒྱལ་ཡོངས་ལག་རྩེད་སྤོ་ལོའི་རུ་ཚོགས་ནས་ཀྱང་འཕུར་མདའ་རུ་ཁག་གི་སྤྱི་གཉེར་བའི་སྐད་ཆ་དེ་ཁོ་རང་སྒེར་གྱི་བསམ་ཚུལ་ཡིན་པ་ལས། དེས་འཕུར་མདའ་རུ་ཁག་གི་ལྟ་བའམ་རྒྱལ་ཡོངས་ལག་རྩེད་སྤོ་ལོའི་རུ་ཚོགས་ཀྱི་ལྟ་བ་མཚོན་མི་ཐུབ་པའི་འགྲེལ་བཤད་དང་དགོངས་སེལ་ཡང་ཞུས། 

དེ་རིང་རྒྱལ་སྤྱིའི་བརྒྱུད་ལམ་ཁག་ནས་སྤེལ་བའི་གནས་ཚུལ་ལྟར་ན། རྩེད་འགྲན་པ་ཁོང་གིས་བོད་ལ་རྒྱབ་སྐྱོར་དང་ཞི་ཅིན་ཕིང་ལ་སྐྱོན་བརྗོད་ཀྱི་སྐད་ཆ་དེ་བཤད་རྗེས། ད་ནངས་ཞོགས་པར་རྒྱ་ནག་གི་ཐད་གཏོང་བརྙན་འཕྲིན་བརྒྱུད་ལམ་ཁག་ནས་བྷོ་ས་ཋོན-སལ་ཋིག་རུ་ཁག་གི་ཐད་གཏོང་ལས་རིམ་ཡོངས་རྫོགས་རྩིས་མེད་ཀྱིས་ལྟ་མི་ཐུབ་པ་བཟོས་ཡོད་འདུག ། 

གསར་འགོད་པ་དཀོན་མཆོག་རབ་བརྟན།