ལཱི་ཐུ་ནི་ཡཱ་ཡིས་རྒྱ་ནག་གི་ཁ་པར་བེད་སྤྱོད་གཏོང་མི་ཉན་པའི་སྐུལ་མ་བྱས་འདུག

ཡུ་རོབ་ཀྱི་རྒྱལ་ཁབ་ལཱི་ཐུ་ནི་ཡཱ་གཞུང་གིས་རྒྱ་ནག་གི་ཁ་པར་ཚོང་ལས་ཁང་ཞིག་གི་ཁ་པར་ནང། བོད་དང་ཐའེ་ཝན། མང་གཙོ་སོགས་དང་འབྲེལ་བའི་ཚིག་རྣམས་རང་ངོས་ནས་ཞིབ་བཤེར་བྱེད་ཀྱི་ཡོད་ཁར། ཁ་པར་ནང་དུ་གནས་ཚུལ་མང་པོ་ཞིག་ཕྱི་ལ་གཏོང་གི་ཡོད་པ་ར་འཕྲོད་བྱུང་སྐོར་བརྗོད་འདུག 

ཟླ་༩ པའི་ཚེས་༢༢ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། ལཱི་ཐུ་ནི་ཡཱ་གཞུང་གི་དྲ་རྒྱ་བདེ་འཇགས་ལས་ཁང་གིས་བརྗོད་དོན་ལ། ཡུ་རོབ་ཁུལ་དུ་རྒྱ་ནག་གི་ཁ་པར་ཚོང་ལས་ཁང་ཆེན་མོ་(Xiaomi) ཡི་ཁ་པར་ཁག་གི་ནང་དུ། བོད་ལ་རང་དབང་དགོས། ཐའེ་ཝན་རང་བཙན་རྒྱལ་ལོ། མང་གཙོའི་ལས་འགུལ་ལྟ་བུའི་ཐ་སྙད་རྩད་གཅོད་བྱས་ཏེ་ཞིབ་བཤེར་བྱེད་པའི་རང་བཞིན་གྱི་ནུས་པ་ཡོད་པ། ཚོང་ལས་ཁང་དེའི་ཁ་པར་(Mi 10T 5G) ཡི་ནང་དུ་ཡུ་རོབ་ཀྱི་མངའ་ཁུལ་དུ་ནུས་པ་དེ་བཀག་ཡོད་འདུག་ཀྱང་། རྒྱང་རིང་ནས་ནུས་པ་དེ་བེད་སྤྱོད་གཏོང་ཐུབ་པ་བཟོ་རྒྱུ་ཡོད་འདུག 

རྒྱལ་ཁབ་དེའི་བདེ་སྲུང་བློན་ཆེན་གྱིས་ལམ་སྟོན་བྱེད་རྒྱུར། རྒྱ་ནག་གི་ཁ་པར་གསར་པ་གཅིག་ཀྱང་མི་ཉོ་བ་དང་། ཉོས་ཟིན་པ་རྣམས་གང་མགྱོགས་གཡུག་དགོས་སྐོར་བརྗོད་འདུག 

དེ་བཞིན་རྒྱལ་ཁབ་དེའི་དྲ་རྒྱ་བདེ་འཇགས་ལས་ཁུངས་ཀྱིས་བརྗོད་དོན་ལ། ཚོང་ལས་ཁང་དེའི་ཁ་པར་དེས་ཁ་པར་ནང་དུ་གནས་ཚུལ་མང་པོ་ཞིག་གསང་ཚིག་ཐོག་ནས་སིང་གྷ་པུར་ཡོད་པའི་གནས་ཚུལ་གསོག་ཉར་བྱེད་ཡུལ་ཞིག་ལ་གཏོང་གི་ཡོད་པ་ར་འཕྲོད་བྱུང་བས། གནས་ཚུལ་དེ་ནི་ལཱི་ཐུ་ནི་ཡ་གཅིག་པུར་གལ་ཆེན་མིན་ཁར། (Xiaomi) ཚོང་ལས་ཁང་གི་ཁ་པར་དང་འཕྲུལ་ཆས་སོགས་བེད་སྤྱོད་གཏོང་མཁན་རྒྱལ་ཁབ་ཚང་མར་གལ་ཆེན་ཆགས་ཡོད་སྐོར་བརྗོད་འདུག 

ཧུ་ཝེ་ཚོང་ལས་ཁང་གི་ཁ་པར་(P40 5G ) ནང་དུ་ཡང་བདེ་འཇགས་ཀྱི་ཞན་ཆ་རྙེད་སོན་བྱུང་ཡང་། རྒྱ་ནག་གི་ཁ་པར་ཚོང་ལས་ཁང་(One Plus) ནང་དུ་ཞན་ཆ་གང་ཡང་རྙེད་སོན་བྱུང་མེད་འདུག 

ད་ལྟའི་ཆར་(Xiaomi) ཚོང་ལས་ཁང་གི་ཁ་པར་ནང་དུ་ཞིབ་བཤེར་བྱེད་པའི་རྒྱ་ཡིག་གི་ཐ་སྙད་༤༤༩ ཡོད་འདུག་པ་དང་། དེ་དག་ཁོངས་སུ་ཐ་སྙད་གསར་སྣོན་བསྟུད་མར་བྱེད་བཞིན་ཡོད་འདུག 

ཉེ་ཆར་ཐའེ་ཝན་གྱིས་ལཱི་ཐུ་ནི་ཡཱར་ཡོད་པའི་གཞུང་ཚབ་ཁང་གི་མིང་ལ་ཐའེ་ཝན་གྱི་གཞུང་ཚབ་ལས་ཁང་ཞེས་འདོགས་རྒྱུ་ཡིན་པའི་གསལ་བསྒྲགས་བྱས་པས། རྒྱ་ནག་གིས་པེ་ཅིང་དུ་ཡོད་པའི་ལཱི་ཐུ་ནི་ཡཱའི་གཞུང་ཚབ་ཕྱིར་འཐེན་བྱེད་དགོས་པ་དང་། དེ་གར་ཡོད་པའི་རྒྱ་ནག་གི་གཞུང་ཚབ་ཕྱིར་འབོད་འགུག་བྱེད་རྒྱུ་ཡིན་སྐོར་བརྗོད་འདུག 

སྤྱིར་བཏང་ཡུ་རོབ་དང་ཨ་རིར་ཡོད་པའི་ཐའེ་ཝན་གྱི་གཞུང་ཚབ་བམ་དོན་གཅོད་ཁང་ཁག་གི་མིང་ལ་ཐའེ་པཱེ་ཞེས་རྒྱལ་ཁབ་དེའི་རྒྱལ་སའི་མིང་བེད་སྤྱོད་གཏོང་གི་ཡོད་འདུག 

བདུན་ཕྲག་སྔོན་མར་ཨ་རིའི་གཞུང་གི་བདེ་འཇགས་སློབ་སྟོན་པ་ཇཱེག་སུ་ལཱི་ཝན་གྱིས་ལཱི་ཐུ་ནི་ཡཱའི་སྲིད་བློན་སཱི་མོན་ཀྲེར་ཁ་པར་བཏང་ནས། རྒྱ་ནག་གི་གནོན་ཤུགས་དང་འབྲེལ་ནས་ཁོང་ལ་རྒྱབ་སྐྱོར་བྱེད་རྒྱུ་ཡིན་སྐོར་བརྗོད་ཡོད་འདུག 

སྤྱིར་ཨ་རི་དང་ཡུ་རོབ་ཀྱི་རྒྱལ་ཁབ་མང་པོ་ཞིག་གིས་རྒྱ་ནག་གི་ཁ་པར་ཚོང་ལས་ཁང་ཧུ་ཝེ་གཙོས་པའི་ཁ་པར་ཚོང་ལས་ཁང་མང་པོ་ཞིག་ནི། རྒྱ་ནག་དམར་ཤོག་གཞུང་དང་འབྲེལ་བ་ཡོད་རྐྱེན་སོ་ཉུལ་སོགས་ཀྱི་ལས་དོན་ལ་མཐུན་རྐྱེན་བྱེད་ཀྱི་ཡོད་པའི་དོགས་པ་བྱེད་ཀྱི་ཡོད་པ་དང་། བརྡ་ཐག་རིམ་པ་༥ ཅན་གྱི་འཕྲུལ་རིགས་ཐད་རྒྱལ་སྤྱིའི་ནང་རྒྱ་ནག་གི་ཚོང་ལས་ཁང་ཧུ་ཝེ་ཡི་ལས་དོན་ལ་ཐོག་མར་རྒྱབ་སྐྱོར་བྱས་ཡོད་ཀྱང་། ཕྱིས་སུ་ཨ་རི་གཙོས་པའི་ཡུ་རོབ་རྒྱལ་ཁབ་མང་པོར་ཕྱིར་བཤིག་བྱས་ཏེ་བཀག་སྡོམ་ཆེན་པོ་བྱས་ཡོད་པ་རེད།།

གསར་འགོད་པ་སྐལ་བཟང་དོན་གྲུབ།