ལོ་ངོ་༥༠ རྗེས་སུ་ཨ་རིས་ཐའེ་ཝན་ཕྱིར་མཉམ་འབྲེལ་རྒྱལ་ཁབ་ཏུ་ཞུགས་རྒྱུར་མོས་མཐུན་བྱས་འདུག 

ཐའེ་ཝན་མཉམ་འབྲེལ་རྒྱལ་ཁབ་ནས་ཕུད་དེ་ལོ་ངོ་༥༠ ཕྱིན་པའི་རྗེས། ཨ་རིས་ཐའེ་ཝན་ཕྱིར་འཛམ་གླིང་རྒྱལ་ཁབ་དག་གི་ཚོགས་པ་ཆེ་ཤོས་དེའི་ནང་དུ་ཞུགས་རྒྱུར་མོས་མཐུན་དང་རྒྱབ་སྐྱོར་བྱས་ཡོད་འདུག 

ཟླ་འདིའི་ཨ་རིའི་ཚེས་༢༦ རེས་གཟའ་ཕུར་བུའི་ཉིན་ཨ་རིས་ཐའེ་ཝན་ནི་ཡང་དག་པའི་མང་གཙོའི་རྒྱལ་ཁབ་ཅིག་ཡིན་པ་དང་། མཉམ་འབྲེལ་རྒྱལ་ཁབ་ཀྱི་ཚོགས་མི་རྒྱལ་ཁབ་ཚང་མས་ཐའེ་ཝན་ཕྱིར་ཚོགས་པ་དེའི་ནང་དུ་ཞུགས་རྒྱུར་རྒྱབ་སྐྱོར་བྱེད་དགོས་པའི་འབོད་སྐུལ་ཡོད་བྱས་ཡོད་འདུག 

ཕྱི་ལོ་༡༩༧༡ ལོར་མཉམ་འབྲེལ་རྒྱལ་ཁབ་ཀྱི་ཚོགས་མི་རྒྱལ་ཁབ་ཚོས་འོས་ཤོག་འཕངས་ནས་ཐའེ་ཝན་གཞུང་འབྲེལ་ཐོག་ནས་ཚོགས་པ་དེ་ནས་ཕུད་པ་དང་། དེའི་ཚབ་ཏུ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཡར་བཅུག་རྗེས། ཕྱི་ལོ་༡༩༧༩ ལོར་ཨ་རིའི་སྲིད་འཛིན་ཇི་མི-ཁ་ཋར་(Jimmy Carter) གྱིས་འགོ་ཁྲིད་པའི་ཨ་རིའི་གཞུང་གིས་ཐའེ་ཝན་དང་གཞུང་གི་འབྲེལ་ལམ་བཅད་པ་མ་ཟད། འདས་པའི་ངོ་ལོ་༤༠ ཙམ་གྱི་རིང་ལ་ཨ་རིའི་སྲིད་འཛིན་རིམ་བྱོན་གྱིས་“རྒྱ་ནག་གཅིག་གི་སྲིད་བྱུས་”ངོས་ལེན་གྱིས་རྒྱ་ནག་ལ་བསྟུན་ཐབས་འབའ་ཞིག་བྱས་ཡོད། 

ཡིན་ན་ཡང་། ཉེ་བའི་ལོ་ཤས་ནང་རྒྱ་ནག་གིས་ནང་དུ་དམ་དྲག་བྱེད་པ་དང་། ཕྱི་རུ་བཙན་ཤེད་ངོམ་པ་ཤུགས་ཆེ་རུ་བཏང་ནས་འཛམ་གླིང་དབང་དུ་སྒྱུར་བའི་མངོན་འདོད་དེ་ཇེ་གསལ་དུ་འགྱུར་བཞིན་ཡོད་སྟབས། ཨ་རིས་འདས་པའི་ལོ་༤༠ ལྷག་གི་བསྟུན་མཁས་ཀྱི་སྲིད་བྱུས་དེ་ཡོངས་སུ་ནོར་ཡོད་པའི་ངེས་ལེན་བྱས་ཏེ་དངོས་སུ་རྒྱ་ནག་ལ་ཁ་གཏད་གཅོག་རྒྱུའི་སྲིད་བྱུས་འཐེན་བཞིན་ཡོད་ཅིང་། སྲིད་བྱུས་དེའི་ཆ་ཤས་གལ་ཆེན་གཅིག་ནི་ཐའེ་ཝན་སྲུང་སྐྱོབ་བྱེད་རྒྱུ་དེ་ཆགས་ཡོད། 

ཐའེ་ཝན་མཉམ་འབྲེལ་རྒྱལ་ཁབ་ནས་ཕུད་དེ་ལོ་ངོ་༥༠ འཁོར་བའི་དུས་དྲན་དང་འབྲེལ་བའི་གཏམ་བཤད་དེའི་ནང་། ཨ་རིའི་ཕྱི་སྲིད་དྲུང་ཆེན་བྷི་ལིན་ཁི་(Antony Blinken) ཡིས་“རྒྱལ་སྤྱིའི་སྤྱི་ཚོགས་ལ་སྔར་གཏན་ནས་བྱུང་མྱོང་མེད་པའི་རྙོག་འཛིང་ཆེ་བའི་དཀའ་རྙོག་མང་པོ་ཞིག་འཕྲད་བཞིན་པའི་དུས་སྐབས་འདིར། ཚང་མས་དཀའ་རྙོག་འདི་དག་སེལ་རོགས་བྱེད་རྒྱུ་གལ་གནད་ཆགས་ཡོད། འདིའི་ནང་དུ་ཐའེ་ཝན་དུ་འཚོ་གནས་བྱེད་མཁན་གྱི་མི་མང་ས་ཡ་༢༤ ཡང་འདུས་ཡོད་”ཅེས་བརྗོད་ཡོད་འདུག 

ཨ་རིའི་ཕྱི་སྲིད་དྲུང་ཆེ་ཁོང་གིས་ཐའེ་ཝན་མཉམ་འབྲེལ་རྒྱལ་ཁབ་ཏུ་ཞུགས་སུ་འཇུག་རྒྱུ་དེ་“ཆབ་སྲིད་ཀྱི་གནད་དོན་ཞིག་མ་ཡིན་པར་ཁ་རྩ་དགོས་ཐུག་ཅིག་ཡིན་”ཞེས་བརྗོད་པའི་ཐོག ཐའེ་ཝན་ནི་ཡང་དག་པའི་མང་གཙོ་ཚད་ལྡན་ཞིག་དང་། ཐའེ་ཝན་གྱི་ས་ནས་འཛམ་གླིང་གིས་ལེགས་ཆ་ལེན་རྒྱུ་མང་པོ་ཡོད་ན་ཡང་། ཐའེ་ཝན་གྱི་ཚན་རིག་པ་དང་། ཆེད་ལས་པ། ཚོང་པ། སྒྱུ་རྩལ་བ། སློབ་གསོ་བ། འགྲོ་བ་མིའི་ཐོབ་ཐང་ལས་འགུལ་བ་རྣམས་མཉམ་འབྲེལ་རྒྱལ་ཁབ་ཀྱི་བྱ་འགུལ་དུ་མཉམ་ཞུགས་བྱེད་མི་ཆོག་པ་དེ་འགྲིག་གི་མེད་པའི་འགྲེལ་བརྗོད་ཀྱང་བྱས་ཡོད་འདུག 

ད་ལྟ་རྒྱ་ནག་གིས་ཐའེ་ཝན་ལ་དྲག་པོའི་བཙན་འཛུལ་བྱེད་རྒྱུ་ཡིན་པའི་འཇིགས་སྐུལ་རྒྱུན་མི་ཆད་པར་བྱེད་ཀྱི་ཡོད་ན་ཡང་། ཨ་རིས་ཐའེ་ཝན་ལ་མཐའ་གཅིག་ཏུ་སྲུང་སྐྱོབ་བྱེད་རྒྱུ་ཡིན་པའི་རྣམ་འགྱུར་སྟོན་གྱི་ཡོད་དེ། བདུན་ཕྲག་གོང་མར་སྲིད་འཛིན་བྷ་ཌན་གྱིས་དངོས་སུ་གལ་སྲིད་རྒྱ་ནག་གིས་ཐའེ་ཝན་ལ་དྲག་རྒོལ་བྱས་པ་ཡིན་ན། ཨ་རི་ཐའེ་ཝན་གྱི་རྒྱབ་ཏུ་ལངས་ནས་ཐའེ་ཝན་སྲུང་སྐྱོབ་བྱེད་རྒྱུ་ཡིན་ཞེས་བརྗོད་ཡོད། ། 

གསར་འགོད་པ་དཀོན་མཆོག་རབ་བརྟན།