ལོ་འདིའི་ནང་ཞིང་པ་༦༦༠ ཡིས་རང་སྲོག་བཅད་ཡོད་པ།
རྒྱ་གར་མ་ཧ་ར་ཤེ་ཊེ་ར་(Maharashtra)མངའ་སྡེའི་ས་ཁུལ་མ་ར་ཋ་ཝ་ཌ་(Marathwada)རུ་བདུན་ཕྲག་གཅིག་ནང་ཞིང་པ་༣༢ ལས་མང་བས་རང་སྲོག་བཅད་ཡོད་པའི་གནས་ཚུལ་ཐོན་འདུག
རྒྱ་གར་མ་ཧ་ར་ཤེ་ཊེ་ར་(Maharashtra)མངའ་སྡེའི་ས་ཁུལ་མ་ར་ཋ་ཝ་ཌ་(Marathwada)རུ་བདུན་ཕྲག་གཅིག་ནང་ཞིང་པ་༣༢ ལས་མང་བས་རང་སྲོག་བཅད་ཡོད་པའི་གནས་ཚུལ་ཐོན་འདུག
རྒྱ་གར་དུས་བབ་ཀྱིས་གནས་ཚུལ་སྤེལ་གསལ་ལྟར་ན། རྒྱ་གར་ནང་ལོ་འདིར་ཁྱོན་བསྡོམས་ཞིང་པ་༦༦༠ ཡིས་རང་སྲོག་བཅད་པ་དང། མ་ར་ཋ་ཝ་ཌའི་ས་ཁུལ་ལ་བདུན་ཕྲག་གཅིག་ནང་ཞིང་པ་༣༢ དང་ལོ་འདིའི་ནང་༦༢༨ ཡིས་རང་སྲོག་བཅད་ཡོད་འདུག དེ་ཡང་བུ་ལོན་ཆེན་པོ་ཕྱིར་སློག་བྱེད་མ་ཐུབ་པ་དང་ཞིང་ཁའི་སྟོན་ཐོག་ཡག་པོ་མ་བྱུང་བའི་རྐྱེན་གྱིས་ཡིན་འདུག ད་དུང་ཉིན་ཤས་རིང་ཆར་པ་མ་བབ་ཚེ། མངའ་སྡེའི་གཞུང་གིས་མ་ར་ཋའི་ས་ཁུལ་ལ་ཐན་པ་བྱུང་བར་ངོས་འཛིན་བྱ་རྒྱུ་ཡིན་འདུག
དེ་སྔོན་ཕྱི་ཟླ་༧ པའི་ནང་ཞིང་པ་ཞིག་གི་སྟོན་ཐོག་ལ་གླང་ཆེན་ཁྱུ་ཞིག་གིས་གཏོར་བཤིགས་བཏང་ཡོད་པས། རྒྱ་གར་ཤིང་ནགས་ལས་ཁུངས་ནས་ཁོ་ལ་ཉིན་༡༠ ཡི་ནང་ཚུད་གུན་གསབ་སྤྲད་དགོས་ཀྱང་། ལོ་གཅིག་གི་རྗེས་སུ་ད་དུང་མ་སྤྲད་པས། ཁོ་འུ་ཐུག་ནས་རང་སྲོག་བཅད་ཡོད་འདུག
དེ་བཞིན་བུར་ཤིང་ཞིང་པ་ཞིག་གིས་དངུལ་ཁང་ནས་བུ་ལོན་སྒོར་༣,༥༠,༠༠༠ སུམ་འབུམ་ལྔ་ཁྲི་དང་། སྒོར་༡,༥༠,༠༠༠ གཅིག་འབུམ་ལྔ་ཁྲི་ཞིག་གྲོགས་པོ་དང་དངུལ་གཡར་མཁན་སྒེར་པ་ཁ་ཤས་ས་ནས་གཡར་ཏེ། བུ་ལོན་སྤྲད་ཐབས་བྲལ་བ་ཆགས་ཏེ་རང་སྲོག་བཅད་པ་སོགས་དང་འདྲ་བའི་གནས་ཚུལ་མང་པོ་བྱུང་ཡོད་འདུག
འཛམ་གླིང་འཕྲོད་བསྟེན་ལས་ཁུངས་དང་རྒྱལ་སྤྱིའི་རང་ལྕེབ་སྔོན་འགོག་ཚོགས་པས། ཕྱི་ཟླ་༩ པའི་ཚེས་༡༠ ཉིན་དེ་འཛམ་གླིང་རང་ལྕེབ་སྔོན་འགོག་ཉིན་མོར་སྲུང་བརྩི་ཞུ་རྒྱུར་འབོད་སྐུལ་བྱས་ཡོད་འདུག
སྐལ་བཟང་དོན་གྲུབ།
