ལྕམ་ནེན་སི་པེ་ལོ་སི་ཐེ་ཝན་གྱི་རྒྱལ་ས་ཐའེ་པེ་ནང་འབྱོར་འདུག

ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་ནེན་སི་པེ་ལོ་སི་མཆོག་གིས་སྣེ་འཁྲིད་པའི་གྲོས་ཚོགས་མཐུན་མིའི་སྐུ་ཚབ་ཚོགས་ཆུང་རྣམས་མཱ་ལེ་ཤི་ཡའི་གནམ་ཐང་བརྒྱུད་དེ་ཐེ་ཝན་གྱི་རྒྱལ་ས་ཐའེ་པེ་གནང་ཐང་དུ་དེ་རིང་དགོང་མོ་ ༡༠།༥༤ ཐོག་འབྱོར་ཡོད་འདུག

ཟླ་༧ ཚེས་༣༡ ཉིན་ཨ་རིའི་གྲོས་ཚོགས་འོག་མའི་ཚོགས་གཙོ་ནན་སི་པེ་ལོ་སི་གཙོས་པའི་ཨ་རི་གྲོས་ཚོགས་ཀྱི་སྐུ་ཚབ་ཚོགས་པ་ཞིག་ཉི་ཧོང་དང་ལྷོ་ཀོ་རི་ཡ། སིང་གྷ་པུ་དང་མ་ལི་ཤི་ཡ་བཅས་རྒྱལ་ཁབ་བཞིའི་ནང་དུ་འཚམས་གཟིགས་ཕེབས་འགོ་བཙུགས་ཡོད་པ་དང་། རྒྱལ་ཁབ་དེ་དག་གི་དབུ་ཁྲིད་ཚོ་དང་ལྷན་དུ་མཇལ་འཕྲད་ཀྱིས་ཞི་བདེ་དང་བདེ་འཇགས། དཔལ་འབྱོར་དང་ཚོང་དོན། ཏོག་དབྱིབས་གཉན་རིམས་དང་འགྲོ་བ་མིའི་ཐོབ་ཐང་། གནམ་གཤིས་འགྱུར་ལྡོག་སོགས་ཀྱི་ཐོག་ལ་གྲོས་མོལ་བྱེད་རྒྱུ་ཡིན་པའི་གནས་ཚུལ་ཐོན་ཡོད་པ་དང་། ཕྱི་ཚེས་ ༢ ཉིན་ཨ་རིའི་གྲོས་ཚོགས་འོག་མའི་ཚོགས་གཙོ་ནན་སི་པེ་ལོ་སི་ཐེ་ཝན་དུ་ཕེབས་རྒྱུ་ཡིན་པའི་གནས་ཚུལ་ཐོན་རྗེས། རྒྱ་ནག་གི་ཕྱི་འབྲེལ་བློན་ཆེན་གྱིས་གལ་སྲིད་ཁོང་མོ་ཐེ་ཝན་ནང་ཕེབས་པ་ཡིན་ན། ཨ་རྒྱའི་བར་གྱི་མཛའ་གྲོགས་ཀྱི་འབྲེལ་ལམ་ལ་ཤུགས་རྐྱེན་ངན་པ་བཟོ་བཞིན་ཡོད་པ་མ་ཟད། ཐེ་ཝན་རང་བཙན་གྱི་ཁ་བྲལ་ཕྱོགས་གཏོགས་ལ་བརྡ་ལན་ངན་པ་གཏོང་ཡོད་པས། གལ་ཏེ་ཨ་རིའི་ངོས་ནས་ལམ་ནོར་དུ་འགྲོ་རྒྱུའི་མཐའ་འཁྱོངས་བྱེད་ཚེ། རྒྱ་ནག་གིས་སེམས་ཐག་གཙང་བཅད་ཀྱིས་དྲག་ཤུགས་ལྡན་པའི་བྱེད་ཐབས་སྤྱད་དེ་རྒྱལ་ཁབ་ཀྱི་བདག་དབང་དང་མངའ་ཁོངས་ལ་སྲུང་སྐྱོབ་མཐའ་གཅིག་ཏུ་བྱེད་རྒྱུ་ཡིན་པ་མ་ཟད། གནད་དོན་དེ་དང་འབྲེལ་ནས་མཇུག་འབྲས་ཅི་འདྲ་བྱུང་ཀྱང་དེའི་འགན་འཁྲི་ཡོད་ཚད་ཨ་རིས་འཁུར་དགོས་པའི་ཉེན་བརྡ་བཏང་བ་ལ་མ་ལྟོས་པར་། དེ་རིང་དགོང་མོ་མཱ་ལེ་ཤི་ཡའི་གནམ་ཐང་བརྒྱུད་དེ་ཐེ་ཝན་གྱི་རྒྱལ་ས་ཐའེ་པེ་གནང་ཐང་དུ་དགོང་མོ་ ༡༠།༥༤ ཐོག་འབྱོར་ཡོད་འདུག

ཐེངས་འདིའི་ལྕམ་ནེན་སི་པེ་ལོ་སི་མཆོག་གིས་སྣེ་འཁྲིད་པའི་གྲོས་ཚོགས་མཐུན་མིའི་སྐུ་ཚབ་ཚོགས་ཆུང་གི་ཚོགས་མི་སྐུ་ཞབས་(Gregory Meeks) དང་། ཊ་ཀཱ་ནོ་ (Mark Takano)།  ཌལ་བྷེ་ནི། (Suzan Delbene)། ཨན་ཌི་ཀིམ་(Andy Kim)། ཁེ་ཤི་ན་མོ་ཐའེ་ (Raja Krishinamoorthi) བཅས་གྲོས་ཚོགས་མཐུན་མི་ལྔ་ཕེབས་ཡོད་པ་མ་ཟད། ཕྱི་ལོ་ ༡༩༩༧ ལོར་ཨ་རིའི་སྤྱི་འཐུན་ཚོགས་པའི་གྲོས་ཚོགས་འོག་མའི་ཚོགས་གཙོ་མཆོག་ཐེ་ཝན་ལ་འཚམས་གཟིགས་ཕེབས་པའི་རྗེས། ད་བར་ཨ་རིའི་ཆེས་མཐོའི་དཔོན་རིགས་ཤིག་གིས་ཐེ་ཝན་དུ་གཞུང་འབྲེལ་འཚམས་གཟིགས་གནང་བ་ཐོག་མ་དེ་ཆགས་ཡོད་འདུག

གསར་འགོད་པ། ཆོས་གྲགས།