ལྷ་སའི་བོད་མི་སྣེ་ཤན་པ་གཉིས་ལ་ཁྲིམས་ཆད།
བོད་ཀྱི་རྒྱལ་ས་ལྷ་སར་བོད་མི་ཡུལ་སྐོར་སྣེ་ཤན་པ་གཉིས་ལ་རྒྱ་གཞུང་གིས་བོད་དོན་ཆབ་སྲིད་དང་འབྲེལ་བའི་ཉེས་མིང་འོག ཚེ་བཙོན་གྱི་ཁྲིམས་ཆད་བཏང་ཡོད་པ་དང་། དེང་སྐབས་བོད་ཀྱི་ཕྱོགས་ནས་ཇོ་མོ་གླང་མའི་རིར་རྒྱ་ནག་གི་ཡུལ་སྐོར་བ་མ་གཏོགས་ཕྱི་རྒྱལ་ཡུལ་སྐོར་བ་གཏོང་གི་མེད་པའི་གནས་ཚུལ་འདུག
ཕྱི་ཟླ་༩ ཚེས་༩ ཉིན་འབྲེལ་ཡོད་ཀྱིས་གནས་ཚུལ་མཁོ་སྤྲོད་གནང་བ་ལྟར་ན། བོད་ཀྱི་རྒྱལ་ས་ལྷ་སར་ཡུལ་སྐོར་སྤྲོ་འཆམ་པའི་སྣེ་ཤན་ལས་ཀ་ལོ་མང་རིང་གནང་མྱོང་བའི་བོད་རིགས་བུད་མེད་ཅིག་ཉེ་ཆར་བལ་ཡུལ་བརྒྱུད་དྷ་སར་འབྱོར་ཡོད་པ་དང། ཁོང་གིས་དེང་སྐབས་བོད་ནང་ཡུལ་སྐོར་སྤྲོ་འཆམ་པའི་བོད་རིགས་སྣེ་ཤན་པ་རྣམས་ལ་རྒྱ་ནག་གཞུང་གིས་དོ་དམ་ནན་པོ་བྱེད་བཞིན་ཡོད་སྐོར་འགྲེལ་བརྗོད་བྱས་འདུག
ཐོག་མར་ཁོང་གིས་གནས་ཚུལ་ངོ་སྤྲོད་གནང་བའི་སྐབས་བོད་ནང་ཡོད་བཞིན་པའི་ནང་མི་སྤུན་ཉེ་རྣམས་ལ་ཉེན་ཁ་མི་ཡོང་བའི་ཆེད་དུ་རང་གི་མིང་བརྗོད་འདོད་མེད་པ་ཞིག་གིས་ངོ་སྤྲོད་གནང་བར་གཞིགས་ན། དེང་སྐབས་བོད་ནང་དུ་སྣེ་ཤན་པའི་ལས་ཀ་འདི་བོད་མིར་རག་རྒྱུར་སྔོན་མ་ལས་ཁག་ཏུ་ཕྱིན་ཡོད་རེད། ལས་ཀ་འདི་རག་པར་རྒྱ་གཞུང་གི་སྡེ་ཚན་རིམ་པ་མང་པོའི་ངོ་སྤྲོད་ཡིག་ཆ་དགོས་ཀྱི་ཡོད་དང། ད་དུང་དེའི་ཐོག་མགོ་འདྲེན་བྱེད་མཁན་དགོས་ཀྱི་ཡོད་པ་རེད་ལ། ལྷག་པར་དུ་མཐའ་མཚམས་ས་ཁུལ་ཁག་ལ་འགྲོ་ཆོག་པའི་ལག་ཁྱེར་ཡང་དམིགས་བསལ་ཞིག་བཟོ་དགོས་ཀྱི་ཡོད་པ་རེད་འདུག ཉེ་ཆར་ཡང་ལྷ་ས་གྲོང་ཁྱེར་ནང་གི་ཡུལ་སྐོར་སྤྲོ་འཆམ་པའི་སྣེ་ཤན་པ་ཡོངས་ལ་（升格证）ཅེས་གནས་སྤར་ལག་ཁྱེར་ཟེར་བ་ཞིག་བཟོས་ནས་ལག་ཁྱེར་འདི་མ་ཐོབ་པ་རྣམས་ཀྱིས་སྣེ་ཤན་པའི་ལས་ཀ་བྱེད་ཆོག་གི་མེད་པ་དང་ལག་ཁྱེར་འདི་བོད་མིར་རག་རྒྱུ་ཧ་ཅང་ཁག་པོ་ཡོད་པའི་ངོ་སྤྲོད་གནང་གི་འདུག།
ཡང་ཁོང་གིས་ངོ་སྤྲོད་གནང་བར་གཞིགས་ན་སྣེ་ཤན་པ་ཚོས་ཕྱི་རྒྱལ་ཡུལ་སྐོར་བར་བོད་ཀྱི་ལོ་རྒྱུས་སོགས་ཀྱི་སྐོར་ངོ་སྤྲོད་འགྲེལ་བཤད་གང་འདྲ་རྒྱག་དགོས་མིན་ཐད་རྒྱ་ནག་གཞུང་གི་གཏན་འབེབས་ཡིག་ཆ་ཡོད་པ་དང་། དེ་ལས་བརྒལ་ན་ཁྲིམས་ཆད་ལྗིད་པོ་གཏོང་བ་མ་ཟད། ནང་མིར་ཡང་དཀའ་ངལ་མང་པོ་བཟོ་ཡི་ཡོད་པ་རེད།
རང་ཉིད་བོད་ཀྱི་ལོ་རྒྱུས་ལ་ཤེས་རྟོགས་དེ་ཙམ་མེད་ཀྱང་བོད་ཀྱི་ལོ་རྒྱུས་ཤེས་མཁན་ཚོས་བཤད་རྒྱུར་ཡིག་ཆ་དེ་ཚོའི་ནང་དོན་ནི་རྦད་དེ་དོན་དངོས་དང་ཟློག་ཕྱོགས་ཡིན་པ་རེད་འདུག།
༢༠༡༠ ལོའི་ནང་བོད་ཀྱི་གཞི་ཀ་རྩེ་ཨེ་མ་སྒང་ནས་ཡིན་པའི་བོད་རིགས་སྣེ་ཤན་པ་ཞིག་གིས་ཕྱི་རྒྱལ་ཡུལ་སྐོར་བ་ཇོ་མོ་གླང་མའི་རིར་བལྟ་སྐོར་ཁྲིད་པའི་སྐབས། ཡུལ་སྐོར་བའི་ནང་ནས་ཨ་མི་རི་ཁ་ནས་ཡིན་པ་ཞིག་གིས་རིའི་སྒང་བོད་ཀྱི་རྒྱལ་དར་འཕྱར་ནས་པར་བརྒྱབ་པ་རྒྱ་མིས་མཐོང་བར་བརྟེན། སྣེ་ཤན་པ་འདི་འཛིན་བཟུང་དང་ཚེ་བཙོན་གྱི་ཁྲིམས་ཆད་བཏང་སྟེ། ད་ལྟ་ལྷ་སའི་གྲྭ་བཞི་བཙོན་ཁང་ནང་ཡོད་འདུག ཁོང་གི་མིང་ལ་ཚེ་རིང་བསམ་འགྲུབ་ཟེར་གི་ཡོད་པ་དང་སྐབས་འདིར་ལོ་༢༠ ཙམ་ཡིན་ཡིན་འདུག
དེ་སྔོན་ཡང་བོད་རིགས་སྣེ་ཤན་པ་ཞིག་གིས་ཕོ་བྲང་པོ་ཏ་ལའི་ནང་ཕྱི་རྒྱལ་ཡུལ་སྐོར་བར་༸གོང་ས་ཏཱ་ལའི་བླ་མའི་སྐུ་འཕྲེང་རིམ་བྱོན་སྐོར་ངོ་སྤྲོད་བྱས་པའི་སྐབས་སྐུ་འཕྲེང་༡༤ པ་འགྲེལ་བཤད་རྒྱག་སྟངས་རྒྱ་གཞུང་གི་གཏན་འབེབས་དང་མི་མཐུན་པ་བྱུང་བ་ཡིན་ནམ། གང་ལྟར་ཁོང་ཡང་འཛིན་བཟུང་བྱས་ནས་ཚེ་བཙོན་གྱི་ཁྲིམས་ཆད་ཕོག་པ་དང། ད་ལྟ་བོད་ཕྱོགས་ནས་ཇོ་མོ་གླང་མའི་རིར་བལྟ་སྐོར་འགྲོ་མཁན་རྒྱ་ནག་གི་ཡུལ་སྐོར་བ་མ་གཏོགས་ཕྱི་རྒྱལ་བ་རྩ་བ་ནས་གཏོང་གི་མེད་པ་རེད་འདུག།།
