ལྷོ་ཀོ་རིའི་སྲིད་འཛིན་གསར་པ་འདེམས་ཐོན་བྱུང་འདུག

ཟླ་འདིའི་ཚེས་༢ ཉིན་(INDIA TV) ཞེས་པའི་གསར་ཁང་གིས་གནས་ཚུལ་སྤེལ་གསལ་ལྟར་ན། ལོ་འདིའི་ཕྱི་ཟླ་གསུམ་པའི་ནང་དུ་ལྷོ་ཀོ་རིའི་སྲིད་འཛིན་གྱི་འོས་བསྡུའི་ཁྲོད་དུ་སྐུ་ཞབས་(Yoon Suk-yeol) ལ་སྲིད་འཛིན་གྱི་རྒྱལ་ཁ་ཐོབ་ཡོད་པ་དང་། ཟླ་འདིའི་ཚེས་བཅུའི་ཉིན་ཁོང་གིས་སྲིད་འཛིན་གྱིས་ལས་འཁུར་བཞེས་རྒྱུ་རེད་འདུག

ཁོང་གིས་ཉེ་ཆར་ལྷོ་ཀོ་རི་ཡ་ནི་སྟོབས་ཆེན་རྒྱལ་ཁབ་བཞིའི་མཐུན་ཚོགས་(The QUAD) ཞེས་པའི་མཐུན་ཚོགས་ནང་འཛུལ་ཞུགས་བྱེད་རྒྱུའི་འདོད་པ་ཡོད་ཅེས་བརྗོད་ཡོད་ན་ཡང་། རྒྱལ་སྤྱིའི་གསར་ཁང་གཞན་གྱིས་གནས་ཚུལ་སྤེལ་གསལ་ལྟར་ན་ད་ལྟའི་ཆར་སྟོབས་ཆེན་རྒྱལ་ཁབ་བཞི་ཡིས་ལྷན་ཚོགས་དེ་རྒྱ་སྐྱེད་གཏོང་རྒྱུ་ལ་གྲ་སྒྲིག་གང་ཡང་མེད་པའི་གནས་ཚུལ་ཐོན་འདུག

ལོ་འདིའི་སྟོབས་ཆེན་རྒྱལ་ཁབ་བཞིའི་ལྷན་ཚོགས་དེ་ཟླ་བ་འདིའི་ནང་ཉི་ཧོང་དུ་འཚོགས་རྒྱུ་དང་། ལྷན་ཚོགས་དེའི་སྐབས་སུ་ཨ་རི་སྲིད་འཛིན་དང་རྒྱ་གར་གྱི་སྲིད་བློན་གཉིས་ཐུག་འཕྲད་བྱེད་རྒྱུ་རེད་འདུག ཨ་རི་སྲིད་འཛིན་གྱིས་ལྷོ་ཀོ་རི་ཡའི་སྲིད་འཛིན་དང་ཉི་ཧོང་གི་སྲིད་བློན་བཅས་དང་ཡང་ཐུག་འཕྲད་བྱེད་རྒྱུ་ཡིན་པ་དང་། དེ་བཞིན་ལྷན་ཚོགས་དེ་འགོ་འཛུགས་མ་བྱས་པའི་སྔོན་ལ་ཨ་རིའི་སྲིད་འཛིན་ལྷོ་ཀོ་རི་ཡའི་ནང་དུ་ཕེབས་རྒྱུ་ཡིན་པའི་གནས་ཚུལ་སྤེལ་འདུག

འདས་པའི་ལོ་ཁ་ཤས་སྔོན་དུ་ལྷོ་ཀོ་རི་ཡས་ཨ་རི་ནས་མཚོན་ཆ་ཉོ་དུས་རྒྱ་ནག་གིས་ངོ་རྒོལ་བྱས་ཡོད་པ་དང་། རྒྱ་ནག་གིས་ཁྲིམས་འགལ་ཐོག་ལྷོ་ཀོ་རི་ཡའི་མཚོ་ཐོག་ཏུ་ཉ་བཟུང་བ་དང་། དེ་བཞིན་ལྷོ་ཀོ་རིའི་ཟ་མ་ཀེམ་ཇེ་(KIMCHI) ཐོག་ལ་ཡང་རྒྱལ་ཁབ་དེ་གཉིས་བར་དུ་རྩོད་རྙོག་བྱུང་མྱོང་ཡོད་པར་བརྟེན། ལྷོ་ཀོ་རི་ཡ་སྟོབས་ཆེན་རྒྱལ་ཁབ་བཞིའི་མཐུན་ཚོགས་ཀྱི་ནང་དུ་མཉམ་ཞུགས་བྱེད་ཐུབ་ན། ས་ཁུལ་བདེ་འཇགས་ལ་ཕན་ཐོགས་པ་དང་བྱང་ཀོ་རི་ཡ་ལ་ཁ་གཏད་གཅོག་པ་ལ་རྒྱབ་སྐྱོར་རག་པ་མ་ཟད། རྒྱལ་ཁབ་ཕན་ཚུལ་འབྲེལ་ཡོད་ཀྱི་གནད་དོན་ཐོག་ཏུ་རྒྱལ་ཁབ་དེ་དག་དང་མཉམ་ལས་བྱེད་རྒྱུ་བཅས་ཀྱི་ཕན་ཐོགས་ཡོད་པར་རྒྱལ་སྤྱི་གསར་ཁང་(WION) གྱིས་འགྲེལ་བརྗོད་བྱས་འདུག །

གསར་འགོད་པ་བློ་བཟང་རྒྱ་མཚོ།