ལྷོ་ཞི་བདེ་རྒྱ་མཚོའི་གླིང་ཕྲན་ནང་དུ་རྒྱ་དམག་གི་རྟེན་གཞི་འཛུགས་རྒྱུར་ཨ་རིའི་སེམས་ཚབ།

ཟླ་འདིའི་ཚེས་༡༩ ཉིན་རྒྱ་གར་གྱི་དུས་བབ་གསར་ཁང་གིས་གནས་ཚུལ་སྤེལ་བ་ལྟར་ན། ལྷོ་ཞི་བདེ་རྒྱ་མཚོའི་གླིང་ཕྲན་ཁག་གི་ནང་དུ་རྒྱ་ནག་གིས་དམག་མིའི་གནས་གཞི་འཛུགས་སྐྲུན་བྱེད་སྲིད་པར་སེམས་ཚབ་ཀྱི་རྐྱེན་གྱིས་བདུན་ཕྲག་སྔོན་མའི་ནང་ཨོ་སི་ཁྲི་ལི་ཡའི་གྲོས་ཚོགས་འཐུས་མི་ཞིག་སོ་ལོ་མོན་གླིང་ཚོམས་(Solomon Island) སུ་ཕེབས་ཡོད་དང་། བདུན་འདིའི་གཟའ་ཟླ་བའི་ཉིན་ཨ་རིས་མཐོ་རིམ་དབུ་ཁྲིད་ཀོ་ཊི་(kurt Campbell) དང་། ཌ་ནེ་(Daniel Kritenbriink) གཉིས་ཀྱིས་འགོ་ཁྲིད་ནས་ཨ་རིའི་སྐུ་ཚབ་ཚོགས་པ་ཞིག་སོ་ལོ་མོལ་གླིང་ཚོམས་སུ་འཚམས་གཟིགས་གཏོང་རྒྱུ་ཡིན་པ་གསལ་བསྒྲགས་བཏང་ཡོད་འདུག

ཟླ་བ་སྔོན་མའི་ནང་དུ་རྒྱ་ནག་དང་སོ་ལོ་མོན་གཉིས་ཀྱི་བར་དུ་བདེ་འཇགས་ཀྱི་ཆིངས་ཡིག་ཅིག་ཟིན་བྲིས་སུ་བཀོད་ཡོད་པ་དང་། སོ་ལོ་མོན་གྱིས་བརྗོད་གསལ་ལྟར་ན་ཆིངས་ཡིག་དེ་ལ་མཚན་རྟགས་མཐའ་མ་དེ་གང་མགྱོགས་རྒྱག་རྒྱུ་ཡིན་པར་འགྲེལ་བརྗོད་བྱས་འདུག གསར་ལམ་ཁག་ཏུ་གནས་ཚུལ་ཐོན་གསལ་ལྟར་ན། ཟིན་བྲིས་དེ་དྲ་ལམ་ཐོག་ཕྱིར་གྱར་ཡོད་པ་དང་དེའི་ནང་དུ་རྒྱ་ནག་གིས་ཉེན་རྟོག་པ་དང་དྲག་ཆས་དམག་དཔུང་མངགས་གཏོང་བྱས་ནས་སོ་ལོ་མོན་སྤྱི་ཚོགས་ཀྱི་སྒྲིག་ལམ་སྲུང་བ་དང་རྒྱུན་མཐུད་པ་ལ་གཞོགས་འདེགས་བྱེད་རྒྱུ་ཡིན་པའི་གནས་ཚུལ་ཐོན་འདུག

སོ་ལོ་མོན་གྱིས་རྒྱ་ནག་གིས་དེ་རུ་དམག་དོན་རྟེན་གཞི་འཛུགས་མི་སྲིད་ཅེས་བཤད་ཀྱང་། མཐའ་སྐོར་རྒྱལ་ཁབ་ཁག་དང་ནུབ་ཕྱོགས་རྒྱལ་ཁབ་མང་པོས་དེ་ལ་སྔར་བཞིན་སེམས་ཁྲེལ་བྱེད་བཞིན་ཡོད་འདུག

ཨ་རིའི་རྒྱལ་སྲིད་སྤྱི་ཁྱབ་ཁང་གི་མགྲིན་ཚབ་(Ned Price) པས་སོ་ལོ་མོན་གླིང་ཚོམས་སྲིད་གཞུང་གིས་འགྲེལ་བརྗོད་ཇི་ལྟར་བྱས་མིན་ལ་མ་ལྟོས་པར་བདེ་འཇགས་ཆིངས་ཡིག་དེ་ཡིས་སོ་ལོ་མོན་གླིང་ཕྲན་དུ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་དམག་དོན་སྟོབས་ཤུགས་ཡར་རྒྱས་གཏོང་རྒྱུའི་སྒོ་མོ་ཕྱེ་བ་རེད་ཅེས་དང་། ཆིངས་ཡིག་དེ་ཡིས་སོ་ལོ་མོན་གླིང་ཕྲན་གྱི་སྲ་བརྟན་ལ་ཡང་གཏོར་བརླག་བྱེད་སྲིད་པ་རེད་ཅེས་བརྗོད་ཡོད་འདུག

ཕྱི་ལོ་༡༩༩༣ ལོ་སོ་ལོ་མོན་གྱི་ཡུལ་དུ་ཡོད་པའི་ཨ་རིའི་གཞུང་ཚབ་ཁང་སྒོ་བརྒྱབ་ཡོད་པ་དང་། བདུན་ཕྲག་སྔོན་མར་ཨ་རིའི་ཕྱི་དྲིལ་དྲུང་ཆེ་དྲུང་ཆེ་གཞོན་པ་(Wendy Sherman) དང་སོ་ལོ་མོན་གྱི་ཕྱི་སྲིད་བློན་ཆེན་བར་སོ་ལོ་མོན་གྱི་རྒྱལ་ས་རུ་ཨ་རིའི་གཞུང་ཚབ་ཁང་སླར་ཡང་སྒོ་ཕྱེ་རྒྱུའི་འཆར་གཞི་ཐོག་ལ་གླེང་མོལ་བྱས་ཡོད་པའི་གནས་ཚུལ་ཐོན་འདུག །

གསར་འགོད་པ་བློ་བཟང་རྒྱ་མཚོ།