ལྷོ་སུ་ཌན་གྱི་བྱིས་པ་ཁྲི་ལྔ་ལྷག་བཀྲེས་ལྟོགས་ཀྱིས་མནར་བཞིན་པ།

ལྷོ་སུ་ཌན་གྱི་ནང་དུ་བྱུང་བཞིན་པའི་རྒྱལ་ཡོངས་རང་བཞིན་གྱི་དམག་འཁྲུག་ལ་བརྟེན་ནས་བྱིས་པ་ཁྲི་༥ གཙོས་པའི་མི་ས་ཡ་བཞི་ལྷག་མུ་གེའི་དཀའ་ངལ་འོག་ཚུད་ཡོད་འདུག

ཟླ་འདིའི་ཕྱི་ཚེས་༦ ཉིན། མཉམ་འབྲེལ་རྒྱལ་ཚོགས་ཀྱི་དྲུང་ཆེ་ལས་རོགས་ཨེ་མོན་མལ་ (Edmond Mulet）ཡིས་བརྗོད་པ་ལྟར་ན། ལྷོ་སུ་ཌན་(South sudden) དུ་མི་ས་ཡ་བཞི་ཙམ་གྱི་ཁྲོད་དུ་བྱིས་པ་ཁྲི་ལྔ་ལྷག་བཀྲེས་ལྟོགས་ཀྱིས་མནར་བཞིན་པ་དང་། ལྷོ་སུ་ཌན་ལ་རང་བཙན་ཐོབ་ཏེ་ལོ་གསུམ་ཙམ་ཕྱིན་པའི་རིང་། ནང་འཁྲུག་རྒྱུན་ཆད་མེད་པར་བྱུང་སྟེ་མི་ཆོས་རིང་ལུགས་ཀྱི་རྐྱེན་ངན་འོག་ཏུ་ཚུད་ཡོད་པ་རེད།
ཨེ་མོན་ལམ་གྱིས་བརྗོད་དོན། འདི་ནི་མིས་བཟོས་པའི་དཀའ་ཉེན་ཞིག་ཡིན་པ་དང་། འགན་འཁྲི་ཡོད་མཁན་ཡོད་མཁན་དག་གིས་འགན་ཁུར་ཏེ་ཐག་གཅོད་མ་བྱས་པར། དྲག་པོའི་ཟིང་འཁྲུག་ལ་བརྟེན་ནས་མུ་གེ་དང་བཟའ་བཅའ་ཡི་དཀའ་ངལ་འཕྲད་བཞིན་པ་མ་ཟད། མི་ཁྲི་མང་པོ་རང་ཁྱིམ་ནས་ཁ་བྲལ་དགོས་བྱུང་པ་དང་། མི་ཁྲི་༥༠ ལྷག་རྒྱལ་ཁབ་གཞན་ཏུ་བྲོས་བྱོལ་དུ་མི་འགྲོ་ཀ་མེད་བྱུང་ཡོད་པ་རེད།

ད་ལྟའི་ཆར་ས་གནས་ཀྱི་མི་ཁྲི་༡༥༠ ཙམ་ལ་སྡོད་གནས་མེད་པར་གྱུར་ཡོད་པ་དང་། མཉམ་འབྲེལ་རྒྱལ་ཚོགས་བྱིས་པའི་ཐེབས་རྩ་ཁང་གིས་བརྗོད་པ་ལྟར་ན། ལྷོ་སུ་ཌན་གྱི་ནང་དུ་མི་ས་ཡ་༤ སྤྱིའི་མི་འབོར་གྱི་གསུམ་ཆ་གཅིག་ལྷག་དཀའ་ངལ་གྱི་འོག་ཏུ་ལྷུང་ཡོད་པ་དང་། གལ་ཏེ་རྒྱལ་སྤྱིའི་སྤྱི་ཚོགས་ཀྱིས་ད་དུང་རོགས་སྐྱོར་མ་བྱས་ན། བྱིས་པ་ཁྲི་༥ ཙམ་བཀྲེས་ལྟོགས་ཀྱི་དཀའ་ངལ་འོག་འདས་གྲོངས་སུ་འགྲོ་རྒྱུའི་ཚོད་དཔག་བྱས་འདུག

དེ་བཞིན་ཕྱི་ཟླ་༧ པའི་ཚེས་༢༥ ཉིན་མཉམ་འབྲེལ་རྒྱལ་ཚོགས་འགན་འཛིན་ལྷན་ཚོགས་ཀྱིས་བརྗོད་པ་ལྟར་ན། ལྷོ་སུ་ཌན་ལ་སའི་གོ་ལའི་ནང་ཆེས་ཚབས་ཆེ་བའི་བཟའ་ཆས་ཀྱི་དཀའ་ཉེན་འཕྲད་ཡོད་པ་དང་། རྒྱལ་སྤྱིའི་སྤྱི་ཚོགས་ཀྱིས་ཛ་དྲག་ངང་རྒྱལ་ཁབ་དེར་དགོས་ངེས་ཀྱི་རོགས་སྐྱོར་སྐྱེལ་འདྲེན་དགོས་པའི་འབོད་སྐུལ་བྱས་ཡོད་ལ། གལ་ཏེ་ནང་ཁུལ་གྱི་འཐབ་འཁྲུག་མུ་མཐུད་དུ་མཚམས་མ་འཇོག་པ་ཡིན་ན། ལྷོ་སུ་ཌན་ནང་རྒྱལ་ཡོངས་རང་བཞིན་གྱི་མུ་གུའི་འཇིགས་པ་འཕྲད་སྲིད་སྐོར་བརྗོད་འདུག

མཉམ་འབྲེལ་རྒྱལ་ཚོགས་ཀྱི་དཔོན་རིགས་ཀྱིས་བརྗོད་པ་ལྟར་ན། ལྷོ་སུ་ཌན་ནང་དམག་འཁྲུག་ལ་བརྟེན་ནས་དཀའ་ངལ་འོག་ཚུད་པའི་མི་ཁྲི་༣༩༠ ལྷག་ཡོད་པ་དང་། ཆ་སྙོམས་ཀྱི་མི་༣ རེའི་ནང་དུ་མི་༡ རེ་བཀྲེས་ལྟོགས་ཀྱིས་མནར་བཞིན་ཡོད་པ་རེད།

ལྷོ་སུ་ཌན་ལ་ཕྱི་ལོ་༢༠༡༡ ལོར་སུ་ཌན་གྱི་མངའ་འོག་ནས་རང་བཙན་ཐོབ་སྟེ་འཛམ་གླིང་ཐོག་གི་རྒྱལ་ཁབ་གསར་ཤོས་དེ་ཆགས་ཡོད་ནའང་། ལོ་གཉིས་ཙམ་ལས་མ་ཕྱིན་པར་ན་ནིང་ལོའི་ཕྱི་ཟླ་༡༢ པའི་ནང་ནས་ནང་འཁྲུག་བྱུང་འགོ་བརྩམས་ཡོད་པ་དང་། སྲིད་འཛིན་གཞོན་པ་ཟུར་པ་མཱ་ཁ་（Riek Machar）ཡི་འགོ་ཁྲིད་པའི་གྱེན་ལངས་ཤོག་ཁག་གིས། སྲིད་འཛིན་སལ་ཝ་ཁིར་（Salva Kiir）གྱི་སྲིད་དབང་འགོ་རྟིང་སློག་རྒྱུའི་དམིགས་ཡུལ་བཟུང་སྟེ། ཁོང་གཉིས་ཀྱི་ཆབ་སྲིད་ཀྱི་འཐབ་རྩོད་དེ་མི་རིགས་བར་གྱི་དྲག་པོའི་ཟིང་འཁྲུག་ཅིིག་ཏུ་གྱུར་ཡོད་པ་དང་། ལོ་ཕྱེད་ཙམ་ཟིན་ལ་ཉེ་བའི་རིང་། མི་ཁྲི་གཅིག་ལྷག་གི་ཚེ་སྲོག་ཤོར་ཡོད་པ་མ་ཟད། ཁྲི་བཅུ་ལྷག་གི་ཁྱིམ་གཞིས་རྩ་སྟོང་དུ་ཕྱིན་ཡོད་འདུག།