ཤྲི་ལང་ག་ལ་དཔལ་འབྱོར་དཀའ་ངལ་ཆེ་ཤོས་དེ་འཕྲད་དགོས་དོན་ཅི།

རྒྱ་གར་དུས་བབ་གསར་ཁང་གིས་ཁ་སང་ཚེས་༢༩ ཉིན་གནས་ཚུལ་སྤེལ་གསལ་ལྟར་ན། ཤྲི་ལང་གའི་ཡུལ་དུ་གཞུང་གིས་དཔལ་འབྱོར་འཛིན་སྐྱོང་ལེགས་པོ་བྱེད་མ་ཐུབ་པ་དང་དུས་མིན་མི་མང་ནང་ཁྲལ་བསྡུས་པའི་ཐོག ནད་ཡམས་ཀྱི་ཤུགས་རྐྱེན་དག་ལ་བརྟེན་ནས་ད་ལྟའི་ཆར་ཤྲི་ལང་གའི་ཡུལ་ལ་དཔལ་འབྱོར་ཉམས་ཉེས་ཀྱི་དཀའ་ངལ་ཆེ་ཤོས་དེ་འཕྲད་བཞིན་པ་རེད་འདུག

གཞན་ཡང་། ཕྱི་རྒྱལ་གྱི་བུ་ལོན་འབོར་ཆེན་ཡོད་པའི་ཐོག་ནད་ཡམས་ཀྱི་རྐྱེན་པས་ཡང་ནས་བསྐྱར་དུ་སྒོ་རྒྱ་བསྡམས་པ་མ་ཟད། ཡུལ་གྱི་འཛའ་ཐང་ཆག་ཅིང་སྣུམ་མཁོ་སྤྲོད་མ་ཐུབ་པ་དང་། དེ་བཞིན་ཕྱིའི་སྒོར་མོ་ཟུར་འཇོག་བྱེད་མ་ཐུབ་པ། དངུལ་གྱི་འཛའ་ཐང་ཆག་པའི་དབང་གིས་ཡུལ་གྱི་དཔལ་འབྱོར་འཕེལ་རྒྱས་གཏོང་བར་ཤུགས་རྐྱེན་ཆེན་པོ་ཐེབས་ཡོད་པའི་གནས་ཚུལ་ཐོན་འདུག

ད་ལྟའི་ཆར་རྒྱ་དཀར་ནག་གཉིས་དང་བྷང་ལ་ལྡི་ཤི་བཅས་ཀྱིས་ཤྲི་ལང་གའི་དཔལ་འབྱོར་ཉམས་ཉེས་ཀྱི་དཀའ་རྙོག་དེ་སེལ་བར་རོགས་རམ་བྱས་ཡོད་པ་དང་། དེ་བཞིན་ཤྲི་ལང་གའི་གཞུང་གིས་རྒྱལ་སྤྱིའི་མ་དངུལ་ཐེབས་རྩ་་ནས་ཀྱང་རོགས་རམ་རག་ཐབས་བྱས་ཡོད་འདུག

དཔལ་འབྱོར་ཉམས་ཉེས་ཀྱི་དཀའ་ངལ་དེ་ཧ་ཅང་ཆེ་བ་དང་། ཐ་ན་ཤོག་བུ་དང་སྣག་ཚ་ཉུང་དྲགས་པས་ཡུལ་དེར་སློབ་མ་ས་ཡ་མང་པོའི་ཡིག་རྒྱུགས་གཏོང་རྒྱུ་ཕར་འགྱངས་བྱེད་དགོས་བྱུང་འདུག སྔ་ལོ་ཕྱི་ཟླ་བཅུ་པའི་ནང་ཇ་ཕོར་པ་གང་ལ་ཧིན་སྒོར་༢༥ དང་ད་ལྟའི་ཆར་ཇ་ཕོར་གང་ལ་ཧིན་སྒོར་༡༠༠ རུ་འགྱུར་བཞིན་ཡོད་པས། ཤྲི་ལང་གའི་ཡུལ་མི་མང་པོ་ལ་གཞི་རྩའི་དགོས་མཁོ་ཟ་འཐུང་སོགས་ལ་ཡང་དཀའ་ངལ་ཆེན་པོ་འཕྲད་བཞིན་པའི་གནས་ཚུལ་ཐོན་འདུག

ལྷག་པར་དུ་ཨུ་རུ་སུ་དང་ཡུག་རེན་གྱི་དམག་འཁྲུག་དེའི་དབང་གིས་སྣུམ་གྱི་གོང་ཚད་འཕར་བཞིན་ཡོད་པས་ཤྲི་ལག་གའི་མི་མང་ཁྲོད་དུ་དངངས་སྐྲག་དང་རེ་ཐག་ཆད་པའི་སྣང་ཚུལ་ནི་ཉིན་རེ་ནས་ཉིན་རེ་ཇེ་གསལ་དུ་འགྲོ་བཞིན་པའི་གནས་ཚུལ་སྤེལ་འདུག

དེ་བཞིན་Scroll.in ཞེས་པའི་གསར་ཤོག་ཐོག་ཟླ་འདིའི་ཚེས་༣༠ ཉིན་གནས་ཚུལ་སྤེལ་གསལ་ལྟར་ན། ལོ་སྔོན་མ་ནས་ད་ལྟའིི་བར་འབྲས་ཀྱི་གོང་ཚད་ནི་༣༠% འཕར་ཡོད་པ་དང་ཀྲོ་མ་ཀྲུ་སོགས་ཟས་རིགས་ཁག་གཅིག་གི་རིན་གོང་ནི་ལྡབ་ལྔ་འཕར་ཡོད་པ་མ་ཟད། སྔ་ལོ་ཕྱི་ཟླ་༣ པ་ནས་ཕྱི་ཟླ་༡༢ བར་སྣུམ་གྱི་གོང་ཚད་ནི་༧༡% འཕར་ཡོད་པས་འདས་པའི་ཟླ་བ་ཁ་ཤས་ཀྱི་རིང་ཡུལ་མི་ཚོས་རྡོ་སྣུམ་གྱི་ས་ཚིགས་སུ་དུས་ཡུན་རིང་པོ་བང་སྒྲིག་དགོས་པ་ནི་རྒྱུན་ལྡན་དུ་འགྱུར་ཡོད་པ་དང་། ད་བར་ཡུལ་མི་གསུམ་ཞིག་ཉི་མ་ཚ་བོའི་དཀྱིལ་ལ་བང་ཡུན་རིང་བསྒྲིགས་ནས་འདས་གྲོངས་སུ་ཕྱིན་ཡོད་པའི་གནས་ཚུལ་ཐོན་འདུག

ད་ལྟའི་ཆར་ཡུལ་དེའི་ཡུལ་མི་ཚོ་སྲིད་གཞུང་ལ་ཁྲོང་ཁྲོ་ཇེ་ཆེ་རུ་འགྲོ་བཞིན་ཡོད་པ་དང་། ཕྱི་ལོ་༢༠༡༩ ལོར་ཤྲི་ལང་གའི་སྲིད་འཛིན་ལ་འོས་གྲངས་༥༢% རག་པས་ཡུལ་གྱི་སྲིད་འཛིན་དུ་གྱུར་ཡང་། ད་ལྟའི་ཆར་ཁོང་ལ་རྒྱབ་སྐྱོར་བྱེད་མཁན་མང་པོ་ཡང་ཁོང་ལ་ངོ་རྒོལ་བྱེད་མཁན་དུ་གྱུར་ཡོད་པའི་གནས་ཚུལ་ཐོན་འདུག དེ་ལས་ལྷག་པ་ཞིག་ལ་ལོ་འདིའི་ཕྱི་ཟླ་༣ པའི་ནང་ཞིབ་འཇུག་གི་སྙན་ཐོ་ཞིག་གི་ནང་དུ་ཤྲི་ལང་གའི་ཡུལ་མི་༡༠% མ་གཏོགས་སྲིད་གཞུང་ལ་ངོས་ལེན་མེད་པའི་གནས་ཚུལ་ཞིག་ཀྱང་ཐོན་འདུག

ཤྲི་ལང་གའི་དཀའ་རྙོག་དེ་ནི་ནད་ཡམས་མ་བྱུང་གོང་ནས་ཡོད་པ་དང་། ལྷག་པར་དུ་ནད་ཡམས་བྱུང་རྗེས་སུ་དཀའ་ངལ་ཇེ་ཆེ་རུ་ཕྱིན་ཡོད་པ་བཅས་ཤྲི་ལང་གའི་རྒྱལ་ཁབ་ནི་ད་ལྟའི་ཆར་དཔལ་འབྱོར་ཉམས་ཉེས་ཀྱི་དཀའ་ངལ་ཆེན་མོ་ཞིག་གི་ནང་དུ་ལྷུང་བཞིན་ཡོད་འདུག །

གསར་འགོད་པ་བློ་བཟང་རྒྱ་མཚོ།