ཤྲི་ལངྒ་ལ་དཔལ་འབྱོར་དཀའ་ངལ་འཕྲད་པས་རྒྱ་གར་སྲིད་བློན་ལ་རོགས་སྐྱོར་ཞུས་འདུག

ཟླ་འདིའི་ཚེས་༤ ཉིན་རྒྱ་གར་གྱི་དུས་བབ་གསར་ཁང་གིས་གནས་ཚུལ་སྤེལ་བ་ལྟར་ན། ཤྲི་ལངྒའི་ཡུལ་དུ་ཕྱི་དངུལ་བརྗེ་ལེན་གྱི་དཀའ་ངལ་ཆེན་པོ་ཞིག་འཕྲད་བཞིན་ཡོད་པ་དང་། དཀའ་ངལ་དེའི་དབང་གིས་རྒྱ་ཁབ་གཞན་ནས་ཟས་རིགས་དང་སྣུམ་སོགས་ཉོ་མ་ཐུབ་པའི་དཀའ་ངལ་བྱུང་བ་མ་ཟད། ཡུལ་མི་ཚོ་ལ་གཞི་རྩའི་དགོས་མཁོ་དག་ཀྱང་མ་འདང་བའི་སྟབས་ཀྱིས་ཤྲིི་ལངྒ་གཞུང་གིས་འབྲེལ་ཡོད་རྒྱལ་ཁབ་དག་ལས་རོགས་རམ་མ་འཚོལ་ཁག་མེད་དུ་གྱུར་འདུག

དེ་ཡང་ཕྱི་ཚེས་༤ ཉིན་ཤྲི་ལངྒའི་ཕྱོགས་འགལ་ཚོགས་པའི་དབུ་ཁྲིད་དང་གྲོས་ཚོགས་འཐུས་མི་སྐུ་ཞབས་Sajith Premadasa ཡིས་རྒྱ་གར་སྲིད་བློན་མོ་དྷི་ལ་རོགས་རམ་གང་ནུས་ཅི་ལྕོགས་བྱེད་པའི་ནན་སྐུལ་བྱས་འདུག

དེ་ཡང་ཁོང་གིས་ANIཞེས་པའི་གསར་ཁང་དུ། ཐུགས་རྗེ་གཟིགས། ཤྲི་ལངྒ་ལ་ལ་རོགས་རམ་གང་ནུས་ཅི་ལྕོགས་བྱེད་རོགས། འདི་ནི་ང་ཚོའི་ཕ་ཡུལ་རེད། ང་ཚོས་ཕ་ཡུལ་སྐྱོབ་དགོས་ཞེས་བརྗོད་འདུག

ཤྲི་ལངྒ་ལ་དཔལ་འབྱོར་ཉམས་ཉེས་ཀྱི་དཀའ་ངལ་ཆེན་པོ་འཕྲད་བཞིན་པར་བརྟེན། མང་ཚོགས་ནང་ནས་ཀྱང་སྲིད་གཞུང་ལ་ཁོང་ཁྲོ་དང་ཟིང་འཁྲུག་ཆེན་མོ་ལངས་བཞིན་ཡོད་པ་དང་། གཞན་ཡང་། ཁ་ཉིན་རེས་གཟའ་ཉི་མའི་ཉིན་ཤྲི་ལངྒའི་ལྷན་ཁང་ཁག་གི་འགོ་ཁྲིད་༢༦ གིས་ལས་ཀ་ནས་རྩ་དགོངས་ཞུ་རྒྱུའི་སྙན་ཞུ་ཕུལ་ཡོད་པའི་གནས་ཚུལ་ཐོན་འདུག

ད་ལྟའི་ཆར་ཤྲི་ལངྒའི་སྲིད་གཞུང་ནི་ཛ་དྲག་གི་གནས་སྟངས་འོག་ཏུ་ཡོད་ཅིང་མི་མང་སྟོང་ཕྲག་མང་པོས་རྒྱལ་ཁབ་ཀྱི་སྲིད་འཛིན་དགོངས་པ་ཞུ་དགོས་ཞེེས་ངོ་རྒོལ་བྱས་པའི་གནས་ཚུལ་ཐོན་འདུག་ལ། ད་ལྟ་འཕྲད་བཞིན་པའི་དཀའ་རྙོག་དེ་ནི་ཤྲི་ལངྒ་ལ་རང་བཙན་ཐོབ་ནས་ད་ལྟའི་བར་འཕྲད་པའི་དཔལ་འབྱོར་ཉམས་ཉེས་ཀྱི་དཀའ་ངལ་ཆེ་ཤོས་ཤིག་ཏུ་གྱུར་ཡོད་པའི་གནས་ཚུལ་ཐོན་འདུག །

གསར་འགོད་པ་རྒྱ་མཚོ།