ས་གནས་འགོ་འཛིན་གྱི་འཛིན་སྐྱོང་ཚོགས་ཆེན་མཇུག་བསྒྲིལ་སོང་།

ས་གནས་འགོ་འཛིན་རྣམ་པའི་འཛིན་སྐྱོང་ཚོགས་ཆེན་ཐོག་ཏུ་གྲོས་གཞི་༡༢ ཡི་ཐོག་ཏུ་གྲོས་ཆོད་བཞག་འདུག 

ཟླ་༡༡ ཚེས་ ༡༡ ཉིན་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་གོ་སྒྲིག་འོག་གངས་སྐྱིད་སྲིད་སྐྱོང་ཚོགས་ཁང་དུ་རྒྱ་བལ་འབྲུག་གསུམ་དུ་གནས་པའི་བཙན་བྱོལ་བོད་མིའི་ས་གནས་འགོ་འཛིན་རྣམ་པའི་འཛིན་སྐྱོང་ཚོགས་ཆེན་ཐེངས་བཅུ་བཞི་པའི་མཇུག་སྡོམ་མཛད་སྒོ་འཚོགས་ཡོད་པ་རེད།

སྐབས་དེར་ནང་སྲིད་དྲུང་ཆེ་ཚེ་དབང་སྒྲོལ་མས་ས་གནས་འགོ་འཛིན་རྣམ་པའི་འཛིན་སྐྱོང་ཚོགས་ཆེན་ཐེངས་བཅུ་བཞི་པ་དེ་ཚོགས་ཆུང་བཞི་ལ་ཆ་བགོས་བཟོས་ཏེ་ཚགས་ཚུད་དང་ལེགས་པར་མཇུག་སྒྲིལ་གནང་ཡོད་པའི་སྐོར་གསུངས་སོང་། 

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་གིས་གསུང་བཤད་གནང་དོན། ང་ཚོ་མང་གཙོའི་ལམ་དུ་འགྲོ་བཞིན་ཡོད་སྟབས། ས་གནས་འགོ་འཛིན་རྣམ་པས་ཁྲིམས་དང་སྒྲིག་གཞི་གཙོ་བོ་བཟུང་སྟེ་ཕྱག་ལས་གནང་དགོས་པ་མ་ཟད། བོད་སྤྱི་པའི་དོན་དུ་ལྷག་བསམ་ཟོལ་མེད་ཐོག་ནས་དགོངས་ཚུལ་གསུང་དགོས་པ་དང་། མི་མང་ཉམ་ཐག་རིགས་ལ་ངེས་པར་ལྟ་རྟོག་གནང་དགོས་པ། བོད་ཀྱི་ཆོས་བརྒྱུད་ཁག་གི་བླ་ཆེན་རྣམ་པར་འབྲེལ་བ་ཞུ་དགོས་པ། དེ་བཞིན་མཉམ་འབྲེལ་དང་ས་གནས་འཕྲོད་བསྟེན་སྨན་ཁང་སོགས་ལ་གཟིགས་སྐྱོང་གནང་དགོས་པ་མ་ཟད། སེམས་ནད་ཡོད་མཁན་རྣམས་ལ་ལྟ་རྟོག་གནང་དགོས་པ། དེ་བཞིན་ས་གནས་འགོ་འཛིན་རྣམ་པས་བཙན་བྱོལ་བོད་མིའི་བཅའ་ཁྲིམས་སློབ་སྦྱོང་གནང་དགོས་པ་དང་། ཁྲིམས་དང་སྒྲིག་གཞི་གཙོ་བོ་གཞིར་བཞག་ཐོག་ནུས་པ་མཉམ་སྤུངས་གནང་དགོས་པ། ལས་བྱེད་བླངས་དོར་སྒྲིག་གཞི་ཁག་ལ་བརྩི་སྲུང་གནང་དགོས་པ།

བོད་མིའི་སྒྲིག་འཛུགས་ནས་ལོ་རྒྱུས་ཐོག་བོད་རང་བཙན་ཡིན་པ་དེ་བཞག་ནས་གཉིས་སྨན་དབུ་མའི་ལམ་གྱི་སྲིད་བྱུས་འཛིན་བཞིན་པ། དེ་བཞིན་བོད་ནང་གི་གནས་སྟངས་ཇེ་སྡུག་ཏུ་འགྲོ་བཞིན་ཡོད་སྟབས། རྒྱ་ནག་གཞུང་གིས་བོད་ནང་སྲིད་བྱུས་ཁག་ལག་བསྟར་བྱེད་བཞིན་པའི་སྐོར་བདེ་སྲུང་ལས་ཁུངས་བརྒྱུད་རྟོག་ཞིབ་གནང་དགོས་པ། སྤྱི་ཚོགས་དྲ་རྒྱའི་ནང་གང་བྱུང་མང་བྱུང་གནས་ཚུལ་སྤེལ་བཞིན་པར་ལན་འདེབས་གནང་དགོས་གལ་མེད་པར། མི་དངོས་སུ་སླེབས་ནས་དྲི་བ་བཏང་བ་ཡིན་ན་ལན་འདེབས་གནང་དགོས་སྐོར་གསུངས་རྗེས། ས་གནས་འགོ་འཛིན་རྣམ་པ་ཚོས་ཧུར་ཐག་གིས་ཕྱག་ལས་གནང་བཞིན་པར་ཐུགས་རྗེ་ཞུས་གནང་སོང་།

ཐེངས་འདིར་ཚོགས་ཆེན་ཐོག་ས་གནས་འགོ་འཛིན་རྣམས་པའི་གྲོས་གཞི་༡༢ ཡི་ཐོག་ལ་གྲོས་ཆོད་བཞག་པ་དང་། བཙན་བྱོལ་བོད་མིའི་གཞིས་ཆགས་ཁག་གི་ས་ཁང་བདག་འཛིན་དང་བེད་སྤྱོད་བྱེད་ཕྱོགས་ཀྱི་སྒྲིག་གཞི་དང་འབྲེལ་བའི་དཀའ་ངལ་ཆེ་འཕྲད་རིགས་གང་དང་གང་ཡོད།  དེ་དག་སེལ་ཕྱིར་ཐབས་ལམ་ཇི་ཡོད།  དཔེར་ན་རྒྱ་གར་གཞུང་གི་བཀའ་འཁྲོལ་ཡོད་པ་ད་ལྟ་ས་ཆའི་བདག་དབང་སུར་ཡོད་པ་དེར་བདག་ཐོབ་བྱུང་ན་གནས་སྟངས་ཇི་ཆགས་ཀྱི་ཐོག་ཏུ་

༡། བཙན་བྱོལ་བོད་མིའི་གཞིས་ཆགས་ཁག་གི་ས་ཁང་བདག་འཛིན་དང་བེད་སྤྱོད་བྱེད་ཕྱོགས་ཀྱི་སྒྲིག་གཞི་ས་གནས་ཚང་མས་གཅིག་མཚུངས་ཕྱག་བསྟར་ཞུ་རྒྱུར་དཀའ་ངལ་རང་བཞིན་ལ་སོང་། ས་གནས་སོ་སོས་སྒྲིག་གཞི་བསྐྱར་བཅོས་ཞུ་འོས་ས་བོན་དབུས་སུ་འཆར་འབུལ་ཞུ་རྒྱུ་གནང་།

༢། ས་ཁང་ཐོབ་སྐལ་ཡོད་པ་གང་ཞིག་ཕྱི་རྒྱལ་དུ་གནས་སྤོ་ཟིན་པ་མང་པོ་ཞིག་ནས་མུ་མཐུད་ས་ཁང་བདག་ཉར་བྱེད་བཞིན་པ་དེས་མི་རབས་གསར་པ་དང་། ས་ཁང་མཐུན་རྐྱེན་མ་ཐོབ་པ་ཚོར་ས་ཁང་མཐུན་འགྱུར་ཐོབ་རྒྱུར་དཀའ་ངལ་འཕྲད་བཞིན་འདུག་པས། མ་འོངས་རེ་འགར་ཁེ་ཕན་དང་ཁག་ཅིག་ལ་གྱོང་གུན་ཅི་རིགས་མི་ཡོང་བར་ཚང་མར་གཅིག་འགྱུར་གྱི་ལག་བསྟར་ཡོང་ཆེད་སྒྲིག་འཛུགས་ནས་ཇི་དགེའི་གནང་ཕྱོགས་དོ་ནན་དགོས་རྒྱུའི་གྲོས་ཆོད་དང་། བཙན་བྱོལ་བོད་མིའི་གཞིས་ཆགས་ཁག་གི་ས་ཁང་བདག་འཛིན་དང་བེད་སྤྱོད་བྱེད་ཕྱོགས་ཀྱི་སྒྲིག་གཞི་གཙོ་བོར་གྱུར་བའི་ཐོག་གཞན་སྒྲིག་གཞི་ཁག་ལ་བསྐྱར་བཅོས་དགོས་རིགས་ཇི་གཟིགས་ཐོག་དགོངས་ཚུལ་ཐོག ༡། ས་གནས་སོ་སོར་སྤྱི་བརྒྱའི་གནས་སྟངས་མི་འདྲ་བའི་དབང་གིས་རྒྱ་བལ་འབྲུག་གསུམ་ཁུལ་གྱི་བཙན་བྱོལ་བོད་མིའི་གཞིས་ཆགས་དང་ཁ་འཐོར་ས་གནས་ཁག་གི་སྤྱི་མིའམ་བརྒྱ་དཔོན་རྣམ་པའི་ལས་དོན་འགན་ཁུར་ཞུ་ཕྱོགས་ཀྱི་རྩ་འཛིན་ལམ་སྟོན་ལ་བསྐྱར་ཞིབ་ཀྱིས་བསྐྱར་བཅོས་ཞུ་འོས་ཞུ་རྒྱུའི་གྲོས་ཆོད་བཞག་འདུག 

རྒྱ་བལ་འབྲུག་གསུམ་ནང་གི་གཞིས་ཆགས་ཁག་དང་སློབ་གྲྭ་ཁག་གི་གནས་སྟངས་ཉམས་དམས་སུ་འགྲོ་གཞིའི་རྐྱེན་རྩ་གཙོ་བོ་གང་ལ་ཐུག་ཡོད་མེད་དང་། དེ་དག་ལ་གདོང་ལེན་བྱེད་ཕྱོགས།  དེ་བཞིན་གཞིས་ཆགས་ཁག་དང་སློབ་གྲྭ་ཁག་ཟླ་སྒྲིལ་གཏོང་ཕྱོགས་དང་འབྲེལ་བའི་སྐོར་ལ།

༡། སྤྱི་ཡོངས་གནས་སྟངས་སམ་མཐུན་རྐྱེན་གྱི་ཆ་ནས་གཞིས་ཆགས་ཉམས་དམས་འགྲོ་བར་རྩིས་མི་ཐུབ་ཀྱང་། གཞིས་ཆགས་ནང་དུ་གཏན་སྡོད་བྱེད་མཁན་གཞིས་མི་ཉུང་དུ་འགྲོ་བའི་གནས་སྟངས་དབང་གིས་གཞིས་ཆགས་ཉམས་དམས་འགྲོ་བར་རྩིས་དགོས་པར་སྙམ། དེའི་རྐྱེན་རྩ་ནི་ཕྱི་རྒྱལ་ཁག་ཏུ་གཏན་འཇགས་གཞིས་ཐོན་བྱེེད་མཁན་མང་བ། ཕྲུག་གུ་གསར་སྐྱེས་ཀྱི་ཚད་གཞི་(Birth rate) ཉམ་ཆག་སོང་བ། གཞོན་སྐྱེེས་རྣམས་རྒྱལ་ས་རང་དུ་གནས་བཅའ་བ་སོགས་ཡིན།

༢། ཕྲུ་གུ་གསུམ་ཡན་གྱི་ཕ་མ་རྣམས་ལ་ཟླ་རེའི་བྱིས་དོད་སྤར་ཆ་དགོངས་བཞེས་གནང་ཐབས།

༣། གྲོང་ཁྱེར་ཆེ་ཁག་ཏུ་འཚོ་སྡོད་བྱེད་བཞིན་པའིི་གཞིས་མི་གཞོན་སྐྱེས་རྣམས་གཞིིས་ཆགས་སུ་ཕྱིར་ལོག་ཐུབ་ཕྱིར་སྐྱེད་ཆུང་བུན་གཡར་སོགས་ཀྱི་ལས་རིམ་རྒྱ་བསྐྱེད་གནང་ཐབས་དང་། གཞིས་ཆགས་ནང་དེང་དུས་ཀྱི་དགོས་མཁོར་གྱུར་བའི་མཐུན་རྐྱེན་བསྐྲུན་ཐབས་ཀྱི་གྲོས་ཆོད་བཞག་འདུག 

དེ་བཞིན་ས་གནས་འགོ་འཛིན་སོ་སོའི་ཁྱབ་ཁོངས་སུ་སེམས་ནད་བཅོས་ཁང་རིགས་ཡོད་མེད།  ཡོད་ཚེ་གཟིགས་རྟོག་གནང་ཕྱོགས་སྐོར་ལ་དེང་གི་ཆར་བོད་མིའི་སྤྱི་ཚོགས་ནང་སེམས་ཁམས་དང་འབྲེལ་བའི་དཀའ་ངལ་ཇེ་མང་དུ་འགྲོ་བཞིན་ཡོད་པར་བརྟེན། སེམས་ནད་བཅོས་ཁང་མེད་པའི་གཞིས་ཆགས་ཁག་ནང་འབྲེལ་ཡོད་འཕྲོད་བསྟེན་ལས་ཁུངས་ནས་དེ་ལྟའི་བཅོས་ཁང་གསར་འཛུགས་དང་མཐུན་རྐྱེན་སྦྱོར་སྤྲོད་གནང་གལ་གྱི་གྲོས་ཆོད་བཞག་འདུག 

དེ་འབྲེལ་གྲོས་གཞི་གཞན་མང་པོ་ཞིག་གི་ཐོག་ཏུ་ཡང་གྲོས་ཆོད་བཞག་འདུག །

གསར་འགོད་པ་སྐལ་བཟང་དོན་གྲུབ།