ས་གནས་འགོ་འཛིན་རྣམས་ཀྱི་འཛིན་སྐྱོང་ཚོགས་ཆེན་འགོ་འཛུགས་གནང་སོང་།

ཟླ་༡༡ པའི་ཚེས་༩ ཉིན་རྡ་ས་གངས་སྐྱིད་བོད་མིའི་སྒྲིག་འཛུགས་ཀྱི་སྲིད་སྐྱོང་ཚོགས་ཁང་དུ། རྒྱ་བལ་འབྲུག་གསུམ་དུ་བོད་མིའི་སྒྲིག་འཛུགས་ཀྱི་ཁྱབ་ཁོངས་ས་གནས་འགོ་འཛིན་རྣམས་ཀྱི་འཛིན་སྐྱོང་ཚོགས་ཆེན་ཐེངས་༡༤ པ་འགོ་འཛུགས་བྱས་ཡོད་པ་རེད། 

ཐེངས་འདིར་ནང་སྲིད་ཁྱབ་ཁོངས་ས་གནས་འགོ་འཛིན་ཁག་གྲངས་༤༤ ཡོད་པ་དེ་དག་ཁོངས་ནས་སྒང་ཏོག་ས་གནས་འགོ་འཛིན་ཕེབས་ཐུབ་མེད་པ་དང་། ལ་སྤྱི་དང་བསུ་ན་མདའ་བཀྲ་ཤིས་གླིང་། འབུམ་ལ་བསྟན་འཛིན་སྒང་། སྦིར་སྡེ་དགེ་བཅས་ས་གནས་བཞིའི་སྐུ་ཚབ་ས་གནས་འགོ་འཛིན་དང་འདྲ་མཉམ་གྱི་ཐོག་ནས་མཉམ་ཞུགས་གནང་ཡོད། ཚོགས་ཆེན་ཐོག་བཀའ་ཤག་སྐབས་༡༦ པའི་དགོངས་པ་གཞིར་བཟུང་གྲོས་གཞི་དོན་ཚན་༡༢ བཀའ་བསྡུར་གནང་རྒྱུ་དང་། ཚོགས་ཆུང་ཆ་བགོས་བྱས་པའི་ཐོག་ནས་བཀའ་བསྡུར་གནང་རྒྱུ་ཡིན་འདུག 

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་གིས། ཐེངས་འདིའི་ཚོགས་འདུའི་རིང་ས་གནས་འགོ་འཛིན་ཚོས་གནད་དོན་ཁག་གི་ཐོག་བཀའ་སྡུར་དང་དོགས་འདྲི་ཆད་ལྷག་མེད་པ་གནང་རྒྱུ་གལ་ཆེན་ཡིན་པ་དང། དེ་བཞིན་བོད་མིའི་སྒྲིག་འཛུགས་ཀྱིས་ལས་དོན་གང་འདྲ་ཞིག་སྤེལ་ནའང་། མི་འབོར་གྱི་གྲངས་ཐོ་གལ་ཆེན་ཆགས་ཡོད་པས། མ་འོངས་པར་མི་འབོར་ཞིབ་བཤེར་ལས་དོན་གཞི་རྒྱ་ཆེ་བ་ཞིག་སྤེལ་འཆར་ཡོད་སྐོར་གསུངས་ནས། གྲོས་གཞི་དོན་ཚན་ཁག་དང་འབྲེལ་ནས་ལམ་སྟོན་གནང་སོང་། 

ཐེངས་འདིའི་ཚོོགས་ཆེན་སྐབས་ཀྱི་གྲོས་གཞི་ཁག་ནི། ༡། ཀ     ས་གནས་འགོ་འཛིན་རྣམ་པས་ནང་སྲིད་ལས་ཁུངས་གཙོས་བོད་མིའི་སྒྲིག་འཛུགས་ལ་དུས་རྒྱུན་འགན་འཁུར་ཞུ་ཕྱོགས་དང་། དེ་མཚུངས་སོ་སོའི་ཁྱབ་ཁོངས་མང་ཚོགས་ལའང་འགན་འཁུར་ལན་འདེབས་ཞུ་ཕྱོགས།

༡། ཁ     ས་གནས་འགོ་འཛིན་རྣམས་ནས་འབྲེལ་ཡོད་རྒྱ་གར་མངའ་གཞུང་གནད་ཡོད་མི་སྣ་ཁག་དང་ཡུལ་མི་བཅས་པར་འབྲེལ་ལམ་དམ་ཟབ་གནང་ཕྱོགས་བཅས་སྐོར།

༢།  ས་གནས་འགོ་འཛིན་རྣམས་ནས་སོ་སོའི་ཁྱབ་ཁོངས་ས་ཆ་ཡོངས་རྫོགས་རྒྱུས་ལོན་ཐུབ་པ་གནང་བའི་ཐོག་སོ་སོའི་ཁྱབ་ཁོངས་གཞིས་ཆགས་ཀྱི་སྤྱི་ཡོངས་གནས་སྟངས་དང་མི་འབོར་སྐྱེས་འདས་སོགས་ཀྱི་གྲངས་མཛོད་ཚད་ལྡན་ཉར་ཚགས་དགོས་གལ་ལྟར་ཞུ་ཕྱོགས་སྐོར།

༣།ཀ བཙན་བྱོལ་བོད་མིའི་གཞིས་ཆགས་ཁག་གི་ས་ཁང་བདག་འཛིན་དང་བེད་སྤྱོད་བྱེད་ཕྱོགས་ཀྱི་སྒྲིག་གཞི་དང་འབྲེལ་བའི་དཀའ་ངལ་ཆེ་འཕྲད་རིགས་གང་དང་གང་ཡོད། དེ་དག་སེལ་ཕྱིར་ཐབས་ལམ་ཇི་ཡོད། དཔེར་ན་རྒྱ་གར་གཞུང་གི་བཀའ་འཁྲོལ་ཡོད་ན་ད་ལྟ་ས་ཆའི་བདག་དབང་སུར་ཡོད་པ་དེར་བདག་ཐོབ་བྱུང་ན་གནས་སྟངས་ཇི་ཆགས།

༣།ཁ བཙན་བྱོལ་བོད་མིའི་གཞིས་ཆགས་ཁག་གི་ས་ཁང་བདག་འཛིན་དང་བེད་སྤྱོད་བྱེད་ཕྱོགས་ཀྱི་སྒྲིག་གཞི་གཙོ་བོར་གྱུར་བའི་ཐོག་གཞན་སྒྲིག་གཞི་ཁག་ལ་བསྐྱར་བཅོས་དགོས་རིགས་ཇི་གཟིགས་ཐོག་དགོངས་ཚུལ།

༤ ། རྒྱ་བལ་འབྲུག་གསུམ་ནང་གི་བཙན་བྱོལ་བོད་མིའི་གཞིས་ཆགས་ཁག་སྲ་བརྟན་ཡོང་ཐབས་སུ་རྒྱུན་གནས་ཐུབ་ཅིང་ཡོང་འབབ་ལྡན་པའི་ཕུགས་འཕེར་ལས་གཞི་གང་དང་གང་གཟིགས་ཀྱི་ཡོད་མེད་དང་། ས་གནས་འགོ་འཛིན་ལས་ཁུངས་ཁག་རང་ཁ་རང་གསོ་ཐུབ་ཐབས་དང་ལས་ཁུངས་ཀྱི་རྒྱུན་གྲོན་ལ་ཕན་པའི་ལས་གཞི་གསར་རྩོམ་དགོས་རིགས་ཇི་གཟིགས་སྐོར།

༥།  རྒྱ་གར་གཞུང་གིས་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ ༢༠༡༤ དངོས་སུ་ལག་བསྟར་སྐབས་དཀའ་ངལ་དངོས་འཕྲད་ཇི་མཆིས་དང་། དེ་དག་སེལ་སླད་ཐབས་ཤེས་གང་གཟིགས་ཀྱི་ཡོད་མེད།

༦། མ་འོངས་པར་བོད་མིའི་སྒྲིག་འཛུགས་ལས་ཁུངས་མ་ལག་དང་བཅས་པའི་ནང་འཛིན་སྐྱོང་གནང་ཕྱོགས་མཐའ་དག་ཤོག་བུའི་སྟེང་ནས་མིན་པར་དྲ་ཐོག་ནས་[e-governance/paperless] འཛིན་སྐྱོང་ལམ་སྲོལ་གསར་གཏོད་གནང་ཕྱོགས་དང་འབྲེལ་བའི་ཐོག་ལ་དགོངས་ཚུལ།

༦།ཁ བོད་མིའི་སྒྲིག་འཛུགས་ཀྱི་དབུས་སའི་ལས་ཁུངས་ཁག་གི་ནང་ཡིག་སྣོད་ཉར་ཚགས་ཚད་ལྡན་དང་གཅིག་མཚུངས་ Standardization of Filing System བཟོ་ཕྱོགས། དེ་འབྲེལ་ལས་བྱེད་ལ་དམིགས་བསལ་ཟབ་སྦྱོང་དང་མཐུན་འགྱུར་སྦྱོར་དགོས་རིགས་ཇི་མཆིས།

༧། རྒྱ་བལ་འབྲུག་གསུམ་ནང་གནས་འཁོད་ནང་སྲིད་ཁྱབ་ཁོངས་ས་གནས་འགོ་འཛིན་ལས་ཁུངས་ཀྱི་རང་ཁོངས་ལས་བྱེད་རྣམས་ཀྱི་བླང་དོར་དང་ཐོབ་ཐང་གི་སྒྲིག་གཞིའི་ཐོག་ལ་དཀའ་ངལ་ཇི་འཕྲད་དང་ཐབས་ལམ་ཇི་གཟིགས།

༨། རྒྱ་བལ་འབྲུག་གསུམ་ནང་གི་གཞིས་ཆགས་ཁག་དང་སློབ་གྲྭ་ཁག་གི་གནས་སྟངས་ཉམས་དམས་སུ་འགྲོ་གཞིའི་རྐྱེན་རྩ་གཙོ་བོ་གང་ལ་ཐུག་ཡོད་མེད་དང་། དེ་དག་ལ་གདོང་ལེན་བྱེད་ཕྱོགས། དེ་བཞིན་གཞིས་ཆགས་ཁག་དང་སློབ་གྲྭ་ཁག་ཟླ་སྒྲིལ་གཏོང་ཕྱོགས་དང་འབྲེལ་བའི་སྐོར།

༩།ཀ བཙན་བྱོལ་བོད་མི་སུད་ཚོང་བ་རྣམས་ལ་མ་འོངས་པར་དགུན་ཚོང་དང་འབྲེལ་བའི་དཀའ་ངལ་སེལ་ཐབས་སུ་ Shopping Complex སོགས་ཀྱི་མཐུན་འགྱུར་སྦྱར་ཐབས་ཇི་གཟིགས།

༩།ཁ གཞིས་ཆགས་སོ་སོའི་ནང་དཔལ་འབྱོར་འདུ་འགོད་ལས་གཞི་གསར་རྩོམ་དགོས་རིགས་ཇི་གཟིགས།

༡༠།ཀ   གཞིས་ཆགས་སོ་སོའི་ནང་གཞུང་ཁོངས་དང་གཞུང་ཁོངས་མིན་པའི་རྒས་གསོ་ཁང་ཁྱོན་བསྡོམས་ཇི་བྱེད་དེ་དག་ལ་ས་གནས་འགོ་འཛིན་བརྒྱུད་ནང་སྲིད་ལས་ཁུངས་ནས་གཅིག་མཚུངས་ཀྱི་གཟིགས་རྟོག་གནང་ཕྱོགས།

༡༠།ཁ   དེ་བཞིན་ས་གནས་འགོ་འཛིན་སོ་སོའི་ཁྱབ་ཁོངས་སུ་སེམས་ནད་བཅོས་ཁང་རིགས་ཡོད་མེད། ཡོད་ཚེ་གཟིགས་རྟོག་གནང་ཕྱོགས་སྐོར།

༡༠།ག   འགོ་འཛིན་ལས་ཁུངས་སོ་སོའི་ཁྱབ་ཁོངས་སུ་གཏོགས་པའི་གཞོན་སྐྱེས་ལས་མེད་བར་ལྡིང་རིགས་ཡོད་མེད། ཡོད་ཚེ་དེ་དག་ལའང་དཀའ་སེལ་གཟིགས་རྟོག་གནང་ཕྱོགས།

༡༡། བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་ས་མིག་གཏོད་ཕྱོགས་དང་ལས་བྱེད་བཀོད་སྒྲིག་གནང་སྟངས་ཐད་ལ་དགོངས་ཚུལ།

༡༢། ད་ལྟའི་ཆར་རང་རིགས་མང་ཚོགས་ཁྲོད་སྡོད་ཁང་མེད་པའི་དཀའ་ངལ་འཕྲད་བཞིན་པ་དང་། སྡོད་ཁང་ཞུ་མཁན་ཡང་གང་མཚམས་བྱུང་དང་འབྱུང་བཞིན་པར་སོང་། སྡོད་ཁང་དཀའ་སེལ་སླད་གཞིས་ཆགས་ཁག་སོ་སོའི་ནང་ས་ཁང་སྟོང་པ་ཡོད་མེད་ཀྱི་གནས་སྟངས་ཇི་ཡིན་དང་བགོ་སྤྲོད་གནང་ཕྱོགས་ཇི་དགེ་བཅས་ཀྱི་སྐོར་ལ་གོས་སྡུར་གནང་རྒྱུ་ཡིན་འདུག །

གསར་འགོད་པ་སྐལ་བཟང་དོན་གྲུབ།