ས་རཱ་མཐོ་སློབ་དབུ་བརྙེས་ཏེ་ལོ་ངོ་༢༦འཁོར་བ་དང་སྐབས་བཞི་པ་དང་ལྔ་པའི་གཙུག་ལག་རབ་འབྱམས་པའི་སློབ་ཐོན་མཛད་སྒོ་ཞིག་ཚོགས་སོང་།
ཟླ་འདིའི་ཚེས་༡༣ ཉིན་གྱི་ཞོགས་པ་རིགས་ལམ་སློབ་གཉེར་ཁང་གི་ཡན་ལག་ས་རཱ་བོད་ཀྱི་མཐོ་རིམ་སློབ་གཉེར་ཁང་དབུ་བརྙེས་ཏེ་ལོ་ངོ་༢༦ འཁོར་བའི་རྟེན་འབྲེལ་སྲུང་བརྩི་དང་། སྐབས་ལྔ་པའི་ལོ་རྒྱུས་གཙུག་ལག་རབ་འབྱམས་པ་དང༌། སྐབས་བཞི་པའི་རྩོམ་རིག་གཙུག་ལག་རབ་འབྱམས་པའི་སློབ་མ་རྣམས་ཀྱི་སློབ་ཐོན་མཛད་སྒོ་ཞིག་ཚོགས་སོང་།
སྐབས་དེར་ས་རྰ་མཐོ་སློབ་ཀྱི་སློབ་སྤྱི་པ་སངས་ཚེ་རིང་གིས་མཐོ་སློབ་ངོ་སྤྲོད་ཀྱི་གསུང་བཤད་ཀྱི་ནང་དུ། ཁོང་གིས་ཕྱི་ལོ་༢༠༢༤ དང་༢༠༢༥ སློབ་དུས་ནང་སྐབས་གཉིས་པའི་སྐད་བརྡ་རིག་པའི་གཙུག་ལག་རབ་འབྱམས་པའི་སློབ་མ་ལྔ་དང་སྐབས་ལྔ་པའི་ལོ་རྒྱུས་གཙུག་ལག་རབ་འབྱམས་པའི་སློབ་མ་༨ སྐབས་བཞི་པའི་རྩོམ་རིག་གཙུག་ལག་རབ་འབྱམས་པའི་སློབ་མ་༥། དེ་བཞིན་མཐོ་རིམ་རིག་གནས་རབ་འབྱམས་པ་སྐབས་ཉེར་བཞི་དང་ཉེར་ལྔ། ཉེར་དྲུག་དང་ཉེར་བདུན་བཅས་ཀྱི་ནང་སློབ་མ་༡༠༠ དང་། གཞན་ཡང་ནང་དོན་རིག་པ་དང་བོད་དགེ་འོས་སྦྱོང་སོགས་ད་ཡོད་མཐོ་རིམ་སློབ་གཉེར་ཁང་གི་ནང་སློབ་མ་༢༣༣ དང་དགེ་ལས་གྲངས་༥༨ ཡོད་པ་སོགས་ངོ་སྤྲོད་གནང་སོང་།
གཞན་ཡང་སློབ་ཐོན་མཛད་སྒོའི་སྐུ་མགྲོན་གཙོ་བོ་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ནས་ཕྱིི་ལོ་༢༠༢༣ ནས་༢༠༢༤ སློབ་དུས་ཀྱི་ཨང་རིམ་སོན་པའི་སློབ་མ་རྣམས་ལ་གསོལ་རས་དང་། སྐབས་༥ པའི་ལོ་རྒྱུས་གཙུག་ལག་རབ་འབྱམས་པའི་སློབ་མ་༨ ་དང་། སྐབས་བཞི་པའི་རྩོམ་རིག་གཙུག་ལག་རབ་འབྱམས་པའི་སློབ་མ་༥ བཅས་ཁྱོན་བསླབ་པ་མཐར་སོན་གྱི་སློབ་མ་༡༣ ལ་ཕྱག་འཁྱེར་གནང་སོང་།
དེ་བཞིན་སྐུ་མགྲོན་གཙོ་བོས་དགེ་ལས་སློབ་མ་ཡོངས་ལ་བླང་དོར་གྱི་བཀའ་སློབ་གནང་བའི་སྐབས། ཁོང་གིས་ང་ཚོ་བོད་ལ་འཛམ་གླིང་སྤྱི་ལ་ངོམ་ཆོག་པ་དང་ཕན་ཐོགས་ཡོད་པ། སུ་ལ་ཡང་ཞེད་སྣང་བྱེད་མི་དགོས་པའི་རིག་གཞུང་རྩ་ཆེན་ཞིག་ཡོད་པ་དེ་ཧ་གོ་དགོས་པ་དང་། ཕྱི་རྒྱལ་བ་མང་པོ་རྡ་སར་ཡོང་བའི་དགོས་པ་གཙོ་བོ་༧གོང་ས་མཆོག་མཇལ་རྒྱུ་དང་བོད་པའི་རིག་གཞུང་གིས་ཡིད་འཕྲོག་ནས་ཡོང་བ་ལས། བོད་པ་ཚོའི་གདོང་མཛེས་དྲགས་པ་དང་རྡ་སར་ཚོང་ཆེན་པོ་རྒྱག་རྒྱུ་ཡོད་ནས་ཡོང་བ་ཞིག་མ་རེད་ཅེས་དང་།
སྤྱིར་བཏང་སློབ་སྦྱོང་བྱེད་དུས། ཁ་སྐོམ་ན་ཆུ་འཐུང་དགོས་རེད། ཡིན་ཡང་རྒྱ་མཚོ་ཡོངས་རྫོགས་འཐུང་དགོས་མ་རེད་ཅེས་དཔེ་ཆའི་ནང་གསུངས་པ་ལྟར། ཚང་མ་སྦྱོང་དགོས་པ་དང་ཤེས་དགོས་པ་ཤིག་མིན་པ་མ་ཟད། ཚང་མ་ཤེས་ཀྱང་ཐུབ་ཐབས་མེད་པས། བརྗོད་གཞི་གཅིག་གམ་སློབ་ཚན་གཅིག་འདྲ་བོ་ཞིག་གི་ཐོག་ལ་གཏིང་ཟབ་མོ་སྦྱང་རྒྱུ་གལ་ཆེན་ཡིན་པ་དང་། ཚང་མའི་ཐོག་ལ་ཕྲན་ཙམ་ཏོག་ཙམ་ཤེས་པ་དེས་ལས་ཀ་རག་པར་ཕན་ཐོགས་མེད་པ་མ་ཟད་སྤྱི་ཚོགས་ལ་ཡང་ཕན་ཐོགས་ཡོད་མ་རེད་ཅེས་སློབ་སྦྱོང་བྱས་ན་ཡང་ཆེད་སྦྱོང་དང་རིག་གཅིག་རྐང་འཛིན་བྱེད་རྒྱུ་གལ་ཆེན་ཡིན་པའི་སྐོར་དང་། གཞན་ཡང་། རྒྱ་གཞུང་གིས་བོད་ནང་བོད་ཀྱི་རིག་གཞུང་རྩ་མེད་བཟོ་བྱེད་ཀྱི་ལས་གཞི་རབ་དང་རིམ་པ་སྤེལ་བཞིན་པའི་སྐབས་སུ། ང་ཚོ་རང་དབང་ལུང་པའི་ནང་ཡོད་མཁན་ཚོས་ལོ་དང་ཟླ་བ་བསྟུན་ནས་ཤུགས་རྒྱག་དགོས་པ་དང་། རྒྱ་ནག་གཞུང་གིས་བོད་དེ་རྒྱ་ནག་གི་ཁོངས་གཏོགས་རེད་ཅེས་རྗོད་པའི་སྐབས་དེར། ང་ཚོས་རྒྱ་མི་རིགས་དང་ཐ་དད་ཡིན་པའི་ངོ་བོ་གསལ་བོ་བསྒྲུབ་དགོས་པ་སོགས་ཀྱི་བཀའ་སློབ་གནང་སོང་།
གསར་འགོད་པ། བློ་བཟང་རྒྱ་མཚོ།
