ས་སྐྱ་༸གོང་མའི་སྦེལ་རྗམ་དུ་དུས་དབང་གནང་བ།

དཔལ་ས་སྐྱ་༸གོང་མ་བདག་ཁྲི་རིན་པོ་ཆེས་འདི་ལོ་ཕྱི་ཟླ་བཞི་པ་ནས་མཛད་རིམ་དབུ་འཛུགས་ཀྱི་བྱང་ཨ་རི་དང་ཡོ་རོ་སོགས་སུ་ཆིབས་བསྒྱུར་བསྐྱངས་ཡོད་པ་དང་། ཟླ་འདིའི་ཕྱི་ཚེས་༢༤ ཉིན་ཡུ་རོབ་སྦེལ་རྗམ་དུ་ཞབས་སུ་འཁོད་དེ། ཟླ་འདིའི་ཕྱི་ཚེས་༢༥ ཉིན་ཡུ་རོབ་ཁུལ་དུ་གནས་བསྡོད་བོད་མི་གཙོ་བོ་གྱུར་པའི་བོད་དང་ཐའེ་ཝན་ཨ་རི་སོགས་དད་ལྡན་མང་ཚོགས་སྟོང་ཕྲག་གསུམ་ལྷག་ལ་དཔལ་དུས་ཀྱི་འཁོར་ལོ་དབང་ཆེན་དངོས་སུ་དབུ་འཛུགས་གནང་འདུག

ཚེས་༢༥དང་༢༦ གཉིས་ལ་དབང་ཆེན་གྱི་སྟ་གོན་དང་དངོས་གཞི་ཁེལ་ཡོད་པ་དང་། ཚེས་༢༧ ཉིན་སྐྱབས་མཆོག་འཁོན་གདུང་ཛྙ་ན་བཛྲ་རིན་པོ་ཆེ་དང་། སྐྱབས་མཆོག་ངོར་ཀླུ་ལྡིང་མཁན་པོ་སྐུ་གཞོན་རིན་པོ་ཆེས་གཙོས་པའི་དད་ལྡན་ཡོངས་ཀྱིས་སྒྲོལ་དཀར་འོད་ཟེར་དྲུག་སྦྲགས་མའི་སྒོ་ནས་༸གོང་མ་བདག་ཁྲི་རིན་པོ་ཆེ་ལ་བརྟན་བཞུགས་རྒྱས་པ་ཞིག་ཕུལ་འདུག

ན་ཟླ་འདིའི་ཕྱི་ཚེས་༢༨ ཉིན་ཧྥ་རན་སི་ས་སྐྱ་བརྩེ་ཆེན་གླིང་དུ་ཞབས་སུ་འཁོད་ནས་ཁུལ་དེར་ཆོས་ཕྱོགས་ཀྱི་མཛད་རིམ་ཁག་གཅིག་བསྐྱང་རྒྱུ་དང་། དེ་ནས་ཕྱི་ཟླ་༧ ཚེས་༦ ཉིན་འཇར་མན་དུ་ཡོད་པའི་ས་སྐྱ་བཀའ་ལྡན་གླིང་གི་ཆོས་ཚོགས་སུ་ཞབས་སོར་འཁོད་ནས་ཟླ་བ་གཅིག་ཙམ་རིང་དཔལ་ལྡན་ས་སྐྱ་པའི་ཟབ་ཆོས་གསུང་ངག་ལམ་འབྲས་ཀྱི་གསུང་ཆོས་བཀའ་དྲིན་བསྩལ་རྒྱུ་ཡིན་འདུག །
གསར་འགོད་པ་ཆོས་ཉིད་འོད་ཟེར།