སུད་སི་དང་ལེག་ཏེན་སིཊ་ཡན་བོད་རིཌ་མི་མང་ནས་༧གོང་ས་མཆོག་ལ་བརྟན་བཞུགས་འབུལ་རྒྱུ་གཏན་འཁེལ་འདུག 

༧གོང་ས་མཆོག་ཨ་རི་ནས་སུད་སིར་ཆིབས་བསྒྱུར་གནང་བ་དང་བསྟུན་སུད་སི་དང་ལེག་ཏེན་སིཊ་ཡན་བོད་རིགས་མི་མང་ནས་མགོན་པོ་གང་ཉིད་ལ་བརྟན་བཞུགས་བསྟར་འབུལ་དང་གསུང་ཆོས་གསོལ་བ་བཏབ་པ་བཞིན་ཞལ་བཞེས་ཐོབ་ཡོད་འདུག 

ཕྱི་ཟླ་༨ ཚེས་༡༤ ཉིན་སུད་སི་དང་ལེག་ཏེན་སིཊ་ཡན་བོད་རིགས་མི་མང་སྒྲིག་འཛུགས་ཀྱི་ཚོགས་གཙོ་གཞོན་གྱི་མཚན་ཐོག་དང་སུད་སི་དོན་གཅོད་ལས་ཁུངས་བཅས་གསལ་བསྒྲགས་ཤིག་སྤེལ་འདུག་པ་དང་། དེའི་ནང་དུ་ཕྱི་ཟླ་༨ ཚེས་༢༣ རེས་གཟའ་པ་སངས་ཉིན་༧གོང་ས་སྐྱབས་མགོན་ཆེན་པོ་མཆོག་ཨ་རི་ནས་སུད་སིར་ཞབས་སོར་འཁོད་རྒྱུ་ཡིན་པ་དང་། སུད་སི་དང་ལེག་ཏེན་སིཊ་ཡན་བོད་རིགས་མི་མང་ནས་ཇི་ལྟར་གསོལ་འདེབས་ཞུས་དོན་བཞིན། ཕྱི་ཚེས་༢༥ ཞོགས་པའི་ཆུ་ཚོད་༩་པ་ནས་༡༠ བར། ཧེ་ལེན་རྩེད་རའི་ཚོགས་ཁང་དུ་མགོན་པོ་གང་གིས་མཛད་པའི་སྤྱན་རས་གཟིགས་བླ་མའི་རྣལ་འབྱོར་བསྡུས་པའི་བཤད་ལུང་དང་སྦྲགས་ནས་མ་ཎིའི་ལུང་གནང་རྒྱུ་དང་། དུས་མཚུངས་སུད་སི་དང་ལེག་ཏེན་སིཊ་ཡན་བོད་རིགས་མི་མང་གིས་༧གོང་ས་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་ཡིན་ཞེས་དང་། དེ་བཞིན་དད་ལྡན་སེར་སྐྱ་མི་མང་རྣམས་ཚོགས་ཁང་དུ་ཞོགས་པའི་ཆུ་ཚོད་༧ པ་ནས་གཏོང་འགོ་འཛུགས་རྒྱུ་དང་། གསུང་ཆོས་ཀྱི་འཛིན་བྱང་www.ticketcorner.ch ཞེས་པའི་སྦྲེལ་ཐག་འདིའི་ཐོག་ནས་གཟིགས་རྒྱུ་ཡོད་པར་འཁོད་འདུག ༧གོང་ས་སྐྱབས་མགོན་ཆེན་པོ་མཆོག་ཕྱི་ཚེས་༢༦ ཉིན་སུད་སིའི་རྒྱལ་ས་ཛུ་རིག་ནས་རྒྱ་གར་དུ་ཆིགས་ཐོན་གནང་རྒྱུ་རེད་འདུག དགའ་ལྡན་ཕོ་བྲང་ཡིག་ཚང་གི་དྲ་བར་བཀོད་པའི་མཛད་འཆར་ལྟར་ན། ཕྱི་ཟླ་ ༩ ཚེས་ ༦ དང་༧ ཉིན་བཞུགས་སྒར་དྷ་རམ་ས་ལར་མོན་གྱི་དད་ལྡན་མི་མང་ལ་སྤྱན་རས་གཟིགས་ཀྱི་བཀའ་དབང་དང་བརྟན་བཞུགས་བསྟར་འབུལ་ཞུ་རྒྱུ་དང་། ཕྱི་ཟླ་ ༩ ཚེས་ ༡༢ དང་ ༡༣ ཉིན་གྲངས་གཉིས་རིང་ལྷོ་ཤར་ཨེ་ཤ་ཡའི་དད་ལྡན་རྣམས་ལ་ཆོས་འབྲེལ་དང་། ཕྱི་ཟླ་ ༩ ཚེས་ ༡༨ ཉིན་བོད་ཀྱི་བུད་མེད་ལྷན་ཚོགས་དང་།  བོད་ཀྱི་རྒྱལ་ས་ལྷ་སའི་མཐུན་གྲོགས་རྫོང་ཁག  ཌལ་ཧོར་སློབ་ཟུར་བཅས་ནས་བརྟན་བཞུགས་བསྟར་འབུལ། དེ་བཞིན་ཕྱི་ཟླ་ ༩ ཚེས་ ༣༠ ནས་ཉིན་གྲངས་གཉིས་རིང་ཐའེ་ཝན་གྱི་དད་ལྡན་ཆོས་ཞུ་བ་རྣམས་ལ་སྤྱོད་འཇུག་ཆེན་མོའི་ལེའུ་བརྒྱད་པའི་ཆོས་འབྲེལ་བསྩལ་རྒྱུ་བཅས་རེད་འདུག

གསར་འགོད་པ།བསྟན་འཛིན་ལམ་བཟང་།