སུད་སི་སྦེན་རུ་ཁག་ལ་ཡུ་རོབ་བོད་ཀྱི་རྐང་སྤོལ་རྩེད་འགྲན་གྱི་མཐའ་མའི་རྒྱལ་ཁ་ཐོབ་འདུག
ཡུ་རོབ་བོད་ཀྱི་རྐང་རྩེད་སྤོ་ལོ་རྩེད་འགྲན་ཐེངས་བཅུ་གཉིས་པ་དེ་བཞིན་ཟླ་ ༧ ཚེས་༡༨ ནས་༢༣ བར། སྦེལ་ཇེམ་གྱི་གྲོང་ཁྱེར་ཨན་ཊི་ཝར་པེན་(Antwerpen) གྱི་ཉེ་འཁྲིས་སུ་ཆགས་པའི་ཌུར་ནེ་རྫོང་(Deurne) དུ་འཚོགས་ཡོད་པ་དང་། འདི་ལོའི་ཡུ་རོབ་རྐང་རྩེད་སྤོ་ལོ་རྩེད་འགྲན་ནང་སྦེལ་ཇེམ་དང་། ཧྥ་རན་སི། འཇར་མན། ཨོ་སི་ཀྲོ་རི་ཡ། སུད་སི་སོགས་ནས་རྐང་རྩེད་སྤོ་ལོ་རུ་ཁག་གྲངས་༡༥ མཉམ་ཞུགས་གནང་ཡོད་འདུག
དེ་ཡང་ཡུ་རོབ་བོད་ཀྱི་རྐང་རྩེད་སྤོ་ལོ་རྩེད་འགྲན་གྱི་མཐའ་མའི་འགྲན་སྡུར་དེ་ཟླ་ ༧ ཚེས་ ༢༣ ཉིན་པེ་རི་སི་ནས་ཡིན་པའི་གཡག་རུ་ཁག་(Yak Boyz) དང་སུད་སིའི་སྦེན་(Bern) ནས་ཡིན་པའི་བོད་གཅིག་སྒྲིལ་རུ་ཁག་(Tibet United FC Bern ) དབར་འགྲན་བསྡུར་གནང་ནས་སྐབས་དེར་སུད་སིའི་སྦེན་(Bern) ནས་ཡིན་པའི་བོད་གཅིག་སྒྲིལ་རུ་ཁག་གིས་སྤོ་ལོ་གཉིས་དང་པེ་རི་སི་ནས་ཡིན་པའི་གཡག་རུ་ཁག་གིས་སྤོ་ལོ་གཅིག་བླུགས་ཏེ། ཕྱི་ལོ་ ༢༠༢༢ ལོའི་ཡུ་རོབ་བོད་ཀྱི་རྐང་སྤོལ་རྩེད་འགྲན་གྱི་རྒྱལ་ཁའི་གཟེངས་རྟགས་དེ་སུད་སིའི་སྦེན་(Bern) ནས་ཡིན་པའི་བོད་གཅིག་སྒྲིལ་རུ་ཁག་ལ་ཐོབ་ཡོད་འདུག སྤུན་ཟླ་གཅིག་སྒྲིལ་རུ་ཁག་གི་རྩེད་མོ་བ་བསྟན་འཛིན་རབ་རྒྱས་ཀྱིས་རྩེད་འགྲན་ཁྲོད་དུ། སྤོ་ལོ་བརྒྱད་བླུགས་ཏེ་གསེར་ལྷམ་གྱི་རྟགས་མ་ཐོབ་འདུག
སྦེལ་ཇེམ་ས་གནས་གཞོན་ནུ་ཚོགས་པའི་ངོས་ནས་ཕྱི་ལོ་ ༢༠༠༨ ལོ་ནས་བཟུང་བ་ཡུ་རོབ་རྐང་རྩེད་སྤོ་ལོ་འགྲན་བསྡུར་གོ་སྒྲིག་གནང་འགོ་བཙུགས་ཡོད་པ་དང་། ཡུ་རོབ་རྐང་རྩེད་སྤོ་ལོ་འགྲན་བསྡུར་གོ་སྒྲིག་ཚོགས་ཆུང་གི་ཚོགས་གཙོ་ཐུབ་བསྟན་འཕེལ་རྒྱས་གྱིས་འདི་ལོའི་ཡུ་རོབ་རྐང་རྩེད་སྤོ་ལོ་འགྲན་བསྡུར་དེ་བཞིན་ཧ་ཅང་ཚགས་ཚུད་བྱུང་ཡོད་སྐོར་གསུངས་འདུག །
གསར་འགོད་པ་སྐལ་བཟང་དོན་གྲུབ།
