སེམས་ཀྱི་གསང་བ་ཞེས་པའི་སྙན་དེབ་དབུ་འབྱེད།

ཟླ་འདིའི་ཚེས་༣ ཉིན་དྷ་ས་བོད་ཀྱི་དཔེ་མཛོད་ཁང་དུ་ན་གཞོན་སྙན་ངག་པ་མེར་པ་འཇམ་དབྱངས་སྒྲོལ་མས་བརྩམས་པའི་<<སེམས་ཀྱི་གསང་བ་>> ཞེས་པའི་སྙན་དེབ་དབུ་འབྱེད་ཀྱི་མཛད་སྒོ་ཞིག་འཚོགས་ཡོད་པ་རེད།

དཔེ་དེབ་དབུ་འབྱེད་མཛད་སྒོའི་སྐུ་མགྲོན་གཙོ་བོ་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤིས་ལྷག་རྡོར་ཕེབས་ཡོད་པ་དང་། ཁོང་གིས་ “ང་ཚོ་འདིར་ཡོང་དོན་ལོ་ཆུང་ཞིག་གིས་སོ་སོའི་ཆོས་དང་རིག་གཞུང་ལ་དོ་སྣང་བྱས་ཏེ། སོ་སོའི་སེམས་ཀྱི་གསང་བ་ཞེས་པ་ཡིག་ཐོག་ཏུ་བཀོད་པ་དེ་ཡག་པོ་རེད་ཅེས་ཡོང་བ་རེད། ཕུགས་རྒྱང་རིང་པོའི་ཐོག་ནས་མུ་མཐུད་ཧུར་བརྩོན་གནང་དགོས་པ་ཞེ་དྲགས་གལ་ཆེན་པོ་རེད། བོད་པའི་སྐད་དང་ཡི་གེ་ཟེར་བ་དེ་བོད་ཀྱི་སྲོག་རྩ་ཡིན་པ་ཡོངས་གྲགས་རེད། སྲོག་རྩ་དེར་བདག་པོ་མ་བརྒྱབ་ན་དབུག་ཆད་རྒྱུ་རེད། སྔོན་མ་བཙན་བྱོལ་ནང་བོད་ཡིག་སྐྱོ་བོ་ཡིན་པ་དེ་དངོས་ཡོད་གནས་ཚུལ་རེད། ཕྱིས་སུ་བོད་ནས་སླེབས་པ་མང་པོ་ཞིག་གིས་འབྲི་རྩོམ་བྱས་པ་དང་། ༧གོང་ས་མཆོག་གིས་བཀའ་སློབ་གནང་ནས་ད་ལྟ་ཡག་ཏུ་སོང་ཡོད་རེད་”ཅེས་རྒྱ་གར་ནང་འཚར་ལོང་བྱུང་བའི་ལོ་ཆུང་ཞིག་གིས་བོད་ཡིག་དཔེ་དེབ་འདོན་ཐུབ་པ་དེ་ཡག་པོ་ཡིན་སྐོར་གསུངས་སོང་།

ཁོང་གིས་སྙན་ངག་ལ་མཐའ་དང་མུ་གང་ཡང་མེད་སྐོར་དང་། བསྟན་བཅོས་མང་པོ་བརྩམས་ཡོད་ནའང་། དེའི་སྒྲོམ་གྱི་ནང་དུ་འདུག་དགོས་དོན་གང་ཡང་མེད་སྐོར། ཁྱེད་རང་བུ་མོ་ལོ་ན་ཆུང་ཆུང་ཡིན་པས་མ་འོངས་པར་སློབ་སྦྱོང་ཡར་རྒྱས་གཏོང་དགོས་སྐོར་དང་། བོད་ཀྱི་རྩོམ་ལ་བོད་ཀྱི་རིག་གཞུང་གི་བྲོ་བ་ཅུང་ཡོད་པ་དང་གོ་བདེ་པོ་ཞིག་དགོས་སྐོར་གསུངས་སོང་།

མེར་པ་འཇམས་དབྱངས་སྒྲོལ་མས་བོད་ཡིག་དེ་བོད་མིར་གལ་ཆེན་པོ་ཡིན་སྐོར་གསུངས་པ་དང་། སྙན་ངག་ཁག་ཅིག་གྱེར་འདོན་བྱས་ཡོད་པ་རེད།

མེར་པ་འཇམ་དབྱངས་སྒྲོལ་མ་ཕྱི་ལོ་ ༡༩༩༧ ལོར་རྒྱ་གར་ལྷོ་ཕྱོགས་སྦེལ་ཀོབ་བོད་མིའི་གཞིས་ཆགས་སུ་སྐྱེས་པ་དང་། འཛིན་རིམ་དང་པོ་ནས་བཅུ་བའི་བར་བདེ་སླར་དབུས་ཉིན་སློབ་ཏུ་སློབ་སྦྱོང་བྱས་པ་དང་། འཛིན་རིམ་བཅུ་གཉིས་མཐར་ཕྱིན་རྗེས། ད་ལྟ་སཱ་ར་མཐོ་སློབ་ཏུ་སློབ་གཉེར་བྱེད་བཞིན་ཡོད་པ་རེད།།

གསར་འགོད་པ་ཆོས་ཉིད་འོད་ཟེར།